Əfsanəvi “Komandante”
Kuba inqilab lideri Fidel Kastroya yas tutur. Az qala 50 il ərzində
Kubanı idarə edən Fidel Kastronun ölümü barədə xəbəri onun qardaşı, hazırkı
prezident Raul Kastro elan edib. Ölkədə doqquz günlük matəm mərasimləri davam
edir. Bayraqlar yarıya qədər endirilib. Bazar ertəsi insanlar 90 yaşlı liderin
külünu onun hakimiyyət uğrunda mübarizəyə başladığı Santyaqo de Kuba şəhərinə
aparıb. Bəzi dünya liderləri XX əsrin simvolunun ölümünə görə başsağlığı verib.
Prezident Barak Obama Fidel Kastronun ölümü ilə bağlı Kuba xalqına
başsağlığı verərək bildirib ki, o, Kuba ilə əlaqələrin yaxşılaşdırılması
istiqamətində səylərini davam etdirəcək. "Bu gün Fidel Kastronun ailəsinə
başsağlığı veririk və dualarımız Kuba xalqı ilədir. Kuba xalqı bilməlidir ki,
ABŞ-da onların dostları və tərəfdaşları var” - deyə Obamanın bəyanatında
deyilir. ABŞ və Kubada Fidel Kastronun irsinə münasibətin birmənalı olmadığını
anlayan Obama, Kastronu nə tənqid edib, nə də tərifləyib. Prezident Obama
bildirib ki, Kastronun etdiklərini tarix mühakimə edəcək.
ABŞ-ın yeni prezidenti Donald Tramp da Fidel Kastronun ölümünə
münasibət bildirib. O,Twitterhesabında "Fidel Kastro öldü!” yazıb.
Daha sonra isə onun Kastronu "qəddar diktator” adlandıran bəyanatı açıqlanıb. "Fidel
Kastronun irsi poliqon, oğurluq, dəhşətli əzab-əziyyət, aclıq və fundamental
insan haqlarının rədd edilməsi ilə yadda qalıb” - deyə Tramp bildirib. Tramp,
Kastronun ölümü ilə kubalıların uzun sürət dəhşətlərdən xilas olacağına ümid
etdiyini bildirib. "Mənim administrasiyam Kuba xalqının rifah halının
yaxşılaşması və azadlığa qovuşmasını təminat altına almaq üçün çalışacaq” -
deyə Donald Trampın bəyanatında bildirilir.
Kastro 1959-ci ildə kommunist inqilabı nəticəsində hakimiyyətə gəlib
və onilliklər ərzində ABŞ-a meydan oxuyub. Onun tərəfdarları ona Soyuq müharibə
zamanı Amerikaya qarşı dayanan və Kubanı xalqına qaytaran adam kimi baxır. Onun
tənqidçiləri isə onu diktator adlandırır. ABŞ-ın Mayami ştatındakı kubalıların
icmasında Kastronun ölümü xəbəri alqışla qarşılanıb. BBC müxbirinin xəbərində
deyilir ki, Kubadan gələnlər arasında Fidel Kastroya qarşı mənfi münasibət
mövcuddur. Bu fikirdə olan sakinlər sabiq prezidentin ölümündən sonra
dəyişikliklər gözləyirlər. İnternetdəki videolarda sevinən insanların bir araya
gəldiyini, əllərində Kuba bayraqlarını dalğalandırdıqlarını görmək olar.
Uzunömürlü rəhbər
50 il ərzində hakimiyyət başında olan Fidel Kastro 2008-ci ildə
səlahiyyətlərini qardaşı Raul Kastroya ötürdükdən sonra istefaya çıxıb. Bundan
iki il əvvəldən o, ölkənin idarəçiliyində demək olar ki, artıq iştirak etmirdi.
2013-cü ildə Kastro istefa barədə qərarını ölümcül xəstəliklə əlaqələndirib.
Fidel Kastro sonuncu dəfə ictimaiyyət qarşısına avqust ayında 90
illik yubileyi münasibətilə təşkil olunmuş tədbir vaxtı çıxıb. Kuba inqilabının
lideri vəfatından sonra kremasiya olunmaq istədiyini deyib.
Komandantenin həyatı
Kubanın sabiq lideri müasir dünyada hamıdan çox hakimiyyətdə olub. Birləşmiş
Ştatlarda ondan xilas olmağa çalışsalar da, Fidel Kastronun hakimiyyəti
illərində 10 ABŞ prezidenti dəyişib. Tərəfdarlarının "Komandante” kimi müraciət
etdikləri Fidel öz varlığı ilə Amerikaya xatırladıb ki, kommunizm bütün dünyada
məğlubiyyətə uğrasa da, bəzi guşələrdə, lap elə onun qulağının dibində hələ də
nəfəs alır. Fidel 1926-cı ildə varlı mülkədar ailəsində anadan olmuşdu, lakin
o, öz həyatı ilə əksəriyyəti yoxsul olan kubalıların həyatları arasındakı
fərqdən elə sarsılıb ki, inqilabçıya çevrilib və adı korrupsiya və bərabərsizliyin
simvoluna dönmüş Batistanın rejiminə qarşı mübarizə aparıb.
Varlı pleyboylar üçün sığınacaq rolunu oynayan Kuba mütəşəkkil
cinayətkar sindikatlar tərəfindən idarə olunur, adada fahişəlik, qumar biznesi
və narkotik maddə ticarəti çiçəklənirdi. Fidel Kastro bir qrup inqilabçı ilə
birlikdə Sierra-Maestra dağlarında yerləşən bazadan klassik partizan
kampaniyası aparıb. 1959-cu il yanvarın 2-də üsyançıların ordusu Havananı zəbt
edib, Batista qaçıb. Kubada argentinalı Ernesto Çe Gevaranın da daxil olduğu
yeni hökumət təşkil edilib. Hakimiyyət torpağı xalqa qaytarmağı və yoxsulların
hüquqlarını qorumağı vəd edib.
Karib böhranı
Fidel israr edirdi ki, onun ideologiyası ilk növbədə Kuba
ideologiyasıdır. "Bu nə kommunizm, nə də marksizmdir. Bu, planlı iqtisadiyyat
şəraitində təmsilçi demokratiya və sosial ədalətdir” - deyə Kastro həmin
günlərdə yazırdı. Tezliklə Fideli ABŞ prezidenti Devid Eyzenhauer sıxışdırmağa
başlayır və Kuba lideri sonralar bildirirdi ki, o, Sovet İttifaqının və onun
rəhbəri Nikita Xruşşovun himayəsinə sığınmağa məcbur olub. Kuba Soyuq
müharibənin meydanına çevrilmişdi. 1961-ci ilin aprelində ABŞ Kastro rejimini "Azadlıq
adası”nı daha əvvəllər tərk etmiş Kuba qaçqınları ordusunun əli ilə devirməyə
çalışdı.
Lakin Kuba ordusu Donuzlar körfəzindən edilən müdaxilənin qarşısını
aldı. Bir çox insanlar həlak oldu, minədək kubalı əsir düşdü. Beləliklə, Fidel
superdövlətin qulağının dibinə bir sillə vurmuş oldu. Superdövlət bu silləni
heç vaxt bağışlamadı.
Bir il sonra Amerika kəşfiyyatı Kubada sovet raketlərinin
yerləşdirilməsinə dair gizli planların üstünü açdı. Dünya nüvə müharibəsinin
kandarında idi. Bu hadisə tarixə "Karib böhranı” adı ilə daxil olub.
"Həbsxanaya çevrilmiş bu adada hücum raketlərinin yerləşdirilməsi
üçün meydançalar hazırlanıb, - deyə o vaxt ABŞ prezidenti Con Kennedi yazırdı. O
bildirirdi ki, bu bazaların yeganə məqsədi Qərb yarımkürəsinə nüvə zərbəsi
endirmək ola bilər. ABŞ və SSRİ sərt qarşıdurma vəziyyətində idilər və böhran
onunla başa çatdı ki, Xruşşov raketləri Kubadan çıxartdı. Lakin bunun
müqabilində, məxfi şəkildə amerikalılar da bəzi silahları Türkiyədən çıxarmalı
oldular.
Afrika və yenidənqurma
Buna baxmayaraq, Fidel Kastro Amerikanın bir nömrəli düşməninə
çevrilmişdi. Mərkəzi Kəşfiyyat İdarəsi ona qarşı müxtəlif sui-qəsd planları
hazırlamışdı. Bunların arasında xüsusi siqar da vardı. Bu siqar komandante onu
alışdıran kimi partlamalı idi. Başqa planlar da müzakirə edilirdi. Bunlardan
birinə görə Fidelin saqqalı qopub düşməli, onu gülüş obyektinə çevirməli idi. Öz
növbəsində, Sovet İttifaqı Kubanı pula tutmuşdu. SSRİ adada yetişdirilən şəkər
qamışının böyük hissəsini alırdı. Əvəzində Havana limanına gələn sovet gəmiləri
amerikalıların sərt embarqosu altında yaşayan kubalılar üçün müxtəlif mallar
gətirirdilər. Moskvadan asılı olmasına baxmayaraq, Fidel o vaxtlar yaranmağa
başlamış "bloklara qoşulmayan ölkələr hərəkatı”na liderlik edirdi.
Afrikada gedən çoxsaylı münaqişələrdə isə Kuba bir qayda olaraq
tərəflərdən birini dəstəkləyirdi. Məsələn, o, öz əsgərlərini Anqola və
Mozambikin marksist rejimlərini qorumaq üçün göndərirdi. Daha sonra isə Mixail
Qorbaçovun aşkarlıq və yenidənqurma zəmanəsi başlandı. Komandante və onun
inqilabı üçün bunlar fəlakətin carçıları idi. Moskva Kubadan şəkər qamışı
almağı və əslində faktiki olaraq onun iqtisadiyyatına dəstəyi dayandırmışdı. Sovet
İttifaqından gələn köməyin kəsilməsi nəticəsində adada hətta ən adi malların
qıtlığı başlanmışdı. Kuba mağazalarının piştaxtaları boş idi. Növbələr uzanır,
səbir kasası daşırdı. Beləliklə, Fidel Kastronun dünyanın ən inkişaf etmiş
ölkəsi adlandırdığı Kuba əslində qatır arabalarının zəmanəsinə qayıtmışdı. 1990-cı
illərin ortalarına yaxın belə vəziyyət kubalıların əksəriyyətini boğaza
yığmışdı. Minlərlə kubalı Florida sahillərinə çatmaq üçün sınıq-salxaq
qayıqlarda dənizə çıxırdı. Onların çoxları okeanda boğulurdu və bu, özlüyündə
komandantenin hakimiyyətinə etimadsızlığın göstəricisi idi.
"Fidel” deyəndə
Lakin özünün bütün aşkar uğursuzluqlarına baxmayaraq, Fidel Kastro
Karib kommunizminin təkrarsız brendini yarada bilmişdi. İnqilabın ölməsinə
imkan verməmək üçün adada yavaş-yavaş da olsa, bazar iqtisadiyyatı
islahatlarına başlanmışdı.
Və o, ömrünün sonunadək Vaşinqton üçün göz dağı olaraq qala bildi.
Məsələn, Fidel neftlə zəngin Venesuela ilə saziş bağlamışdı. Bu ölkənin
prezidenti Uqo Çaves Kuba liderinin yaxın dostu idi və Amerikanı ən böyük
günahlarda ittiham edir, ən görkəmli antikastro dissidentlərindən birinin
Kubaya ekstradisiya edilməsinə çağırırdı. Bir çox kubalılar Fideli açıq-aşkar xoşlamasa
da, onu səmimi-qəlbdən sevənlər də az deyildi. Ona pərəstiş edənlər "yankilərin
təcavüzünə” sinə gərən Kastronu Ameirka Qoliafına qarşı döyüşən Davidə
bənzədirdilər. Belələri üçün Fidel və Kuba ayrılmaz anlayışlar idi.
Kastronun ölümü nəyi dəyişəcək?
Son məlumatlara görə, "Röyters” agentliyi Kubada minlərlə adamın
İnqilab meydanına, Fidel Kastro ilə vida mərasiminə axışdığını yazıb."The
Teleqraf” qəzeti isə dünyanın digər yerlərində onun ölümünə sevinən kütlənin
videolarını yayımlayıb. Ölkəni, az qala, yarım əsr idarə etmiş Kastronun ölümü
nəyi dəyişəcək? "The Los Angeles Times”qəzeti inkişafa daha çox gənclərin
inandığını yazır. İnqilab liderinin qardaşı Raul Kastro ölkə iqtisadiyyatında
islahatlar gerçəkləşdirib, kiçik biznesin inkişafına, qismən də olsa, şərait
yaradıb. Məsələn, kiçik restoranların, qadın salonlarının, maşınyuma
məntəqələrinin açılmasına icazə verib, xarici ölkələrə səyahət etmək
istəyənlərə məhdudiyyətləri aradan qaldırıb. Son illər Kubanın ABŞ-la
münasibətlərində inkişaf görünür, yarıməsrlik düşmənçilikdən sonra, nəhayət,
2014-cü ildə R.Kastro və ABŞ prezidenti B.Obama münasibətlərin yeni mərhələsinə
qədəm qoyduqlarını elan ediblər. "The Los Angeles Times” yazır ki, matəm
mərasimləri, konsertlərin ertələnməsi, əyləncəyə qadağalar turistləri
əndişələndirsə də, gənclərdə ümid yaradıb. Gənclər F.Kastronun tarixə
qovuşmasıyla yeni eranın başlanacağına, şəxsi azadlıqların və iş yerlərinin
artacağına ümidli görünürlər.
Mərasimi izləməyə gələn gənclərdən bir neçəsi qəzetə müsahibəsində
ölkənin hələ də təcrid olunmasından şikayətləniblər. Amma F.Kastronun ölümünün
qardaşına – hazırda hakimiyyətdə olan R.Kastroya sərbəstlik verəcəyinə
inandıqlarını da bildiriblər. Adının açıqlanmasını istəməyən 18 yaşlı bir gənc
internetə girişin bundan sonra artacağına ümidvar olduğunu söyləyib: "Məncə,
bizdə də internet, başqa ölkələrdəki kimi, hər yerdə olmalıdır. Valideynlərim
internetin nə olduğunu bilmir, bu, burda bir arzudur”. "Obyektiv olmalıyıq.
Fidel bizim üçün çox şey edib, amma iş yerləri yoxdursa, inkişaf imkanımız
yoxdursa, hansı yaxşılıqdan söhbət gedə bilər” - bu sualı Maria adlı tələbə
verib.
Tezliklə köklü
dəyişikliklər gözləməyə dəyməz
"The Los Angeles Times” azadlıqlar barədə bundan uzun müddət sonra da
söhbət getməyəcəyini yazır. Çünki analitiklərin fikrincə, bir neçə xırda
islahatı çıxmaq şərtilə, Kubanın indiki siyasi liderləri iri addımlar atacaq
liderlərə bənzəmirlər. Hökumətdəkilərin işi-gücü şimaldakı qonşuya alternativ
quruluş axtarmaq, öz modelləri hesab etdikləri Çindən, Vyetnamdan misallar
gətirməkdir. Qəzet yazır ki, Kuba liderləri demokratiya tələblərinə də yalnız
Vaşinqtonla dostyana münasibətlər qurmaqdan ötrü baxa bilərlər. Analitiklərin
dediyinə görə, indiki şəraitdə köklü dəyişikliklər Kubada hakim partiyanın
hegemonluğuna təhlükə yarada bilər, ona görə də hazırkı liderlərin belə
dəyişikliklərə gedəcəyi inandırıcı deyil. R.Kastro özü də çoxpartiyalı
quruluşun, sərbəst toplaşma kimi azadlıqların yolverilməz olduğunu dəfələrlə
vurğulayıb.
"Raul, yəqin ki, vaqonlarını arxa-arxaya düzüb, onu qoruyacaq keşikçi
qatarını qurduğuna əmin olmağa çalışacaq”. Kuba üzrə mütəxəssis, Obama
administrasiyasının tez-tez məsləhət aldığı professor Ted Henken "The Los
Angeles”ə müsahibəsində belə deyib.
Kubada dövləti Kommunist Partiyasının şurası idarə edir. Bu şura əsas
qanunverici orqandır. Onu isə Fidel Kastrodan sonra Raul Kastro tam nəzarətdə
saxlayır. Keçən il Kubada ilk dəfə Kommunist Partiyasından olmayan iki nəfər
bələdiyyə seçkilərində kampaniyaya başlayıb. Amma heç biri uğur qazana
bilməyib. Qəzet yazır ki, bununla da hökumət islahatçılara dərs vermiş olub.
Kubanın indiki lideri Raul Kastronun 85 yaşı var. O, 2018-ci ildə
hakimiyyətdən gedəcəyini elan edib. Yerinə vitse-prezident Migel Diaz-Kanelin
keçəcəyi gözlənir. Nisbətən cavan olan M.Diaz-Kanel də ölkənin digər öndə olan
şəxsləri kimi, Kommunist Partiyasına sadiqdir, amma tanıyanlar onun ölkəni
modernləşdirməyə meyilli olduğunu deyirlər. "The Los Angeles Times” yazır ki,
F.Kastronun ölümünə görə elan olunan 9 günlük matəm onun mirasından imtina
edilmədiyini, mirasın möhkəmliyini göstərir.
Hazırladı: Kamran