Ədəbiyyatsevərlərin xəyalları gerçəkləşdi
Portuqaliyanın Obidos şəhərində cari ilin ilk günlərində istifadəyə
verilmiş "Ədəbiyyat adamı” ("The Literary Man”) oteli yəqin ki, ilin ən
sensasion ədəbiyyat hadisələrindən biri olacaq. Belə görünür ki, görkəmliliyi,
dəbdəbəsi, nəhəngliyi və orijinallığı ilə görənləri heyran qoyan otel hələ
adından çox bəhs etdirəcək. "Huffington Post”da yer alan xəbərə görə, otellə
bağlı açıqlama verən menecer bu il bu sahədə işini ən yaxşı görən mehmanxana
olacaqlarına iddialıdır. Tarixi binanın rekonstruksiyasından sonra onun üzərində
inşa edilmiş və quruluşuna heç bir xələl gətirilməmiş binanın ümumi restoranı ədəbiyyatsevərlər
üçün əsl cənnət məkandır. Satış üçün nəzərdə tutulmuş ayrıca bölmədən başqa
burada otel qonaqlarının ixtiyarına verilmiş 50000 nüsxə fondu olan kitabxana
var. Bura dünyanın ən möhtəşəm kitabxana-otelidir. Otel nümayəndələrinin verdiyi
açıqlamaya görə, il ərzində burada kitab sərgisinin, təqdimatların, qiraət günlərinin
təşkili planlaşdırılır. Bir sözlə, Portuqaliyada turistlərə ədəbi festival
havası vəd edilir. Yataq otaqlarında da standart kitab rəfi olan oteldə bir gecəlik
kirayə haqqı 90 dollardır.