Dövlət satınalmalarının səmərəliliyi artırılacaq
Xəbər verildiyi kimi, Prezident İlham Əliyev icra
hakimiyyəti orqanlarının və dövlət büdcəsindən maliyyələşən təşkilatların fəaliyyətində
satınalmaların səmərəliliyinin artırılması ilə bağlı əlavə tədbirlər haqqında fərman
imzalayıb. Fərmana əsasən, icra hakimiyyəti orqanları və dövlət büdcəsindən
maliyyələşən təşkilatlar tərəfindən 2018-ci il 1 yanvar tarixinədək idxal
mallarının (işlərinin, xidmətlərinin) satın alınması dayandırılacaq.Müəyyən edilib ki, məhdudiyyət dövlət zəmanəti
ilə alınmış xarici kreditlər, xarici qrantlar, ölkənin müdafiəsi və dövlət təhlükəsizliyi
ehtiyacları ilə bağlı idxal olunan malların (işlərin, xidmətlərin), dərman və
tibb vasitələrinin satın alınmasına şamil edilmir.Həmçinin fərman qüvvəyə mindiyi günədək bağlanmış
müqavilələr üzrə idxal mallarının (işlərinin, xidmətlərinin) satın alınması zərurəti
yaranarsa, icra hakimiyyəti orqanları və dövlət büdcəsindən maliyyələşən təşkilatlar
tərəfindən həmin malların (işlərin, xidmətlərin) satın alınmasına razılıq
verilməsi barədə qərarı Azərbaycan Prezidenti ilə razılaşdırmaqla İqtisadiyyat
Nazirliyi qəbul edir.
İqtisadçı ekspert Rəşad
Həsənov deyir ki, fərmanın imzalanmasında bir neçə əsas məqsəd
var: "Fərman dövlət
satınalmalarının təkmilləşdirilməsi, ölkə vəsaitlərinin xaricə axınının məhdudlaşdırılması,
səmərəsiz istifadənin müəyyən qədər aradan qaldırılmasına öz müsbət töhfəsini verəcək. Sözügedən fərmanın imzalanmasında bir
neçə əsas məqsəd var. Bunlardan birincisi ölkədən valyutanın xaricə axınını müəyyən
qədər məhdudlaşdırmaq və manatın sürətli
ucuzlaşmasını və ya manat üzərində olan təzyiq həddini müəyyən qədər nəzarət
altında saxlamaqdır. İkinci bir tərəfdən, əsas məqsədlərdən biri də dövlət gəlirlərinin azaldığı bir vaxtda vəsaitlərin
qənaətlə istifadə edilməsinə nail olmaqdır. Bundan sonra bir sıra dövlət müəssisələri, icra hakimiyyətləri
layihələrin icrası zamanı satınalmaları təşkil edərkən daha çox yerli
istehsalçılara müraciət edəcəklər. Bu müraciət həm özlüyündə yerli istehsalın təşviqi,
inkişaf edirilməsi və təkmilləşdirilməsinə,
eyni zamanda, istehsal həcminin artmasına, ümumdaxili məhsulda azalma sürətinin
aşağı düşməsinə müsbət təsir göstərəcək. Qeyd edim ki, fərman həmçinin ölkədə məşğulluğun artmasına da xeyli faydalı
olacaq”.
R.Həsənovun
sözlərinə görə, fərman ölkədə yeni bir ənənə formalaşdıracaq: "Fərmanın icrası
ilə bağlı ciddi nəzarət tətbiq olunmalıdır. Vacib əhəmiyyət daşıyan idxal məhsullarının
alışının həyata keçirilməsinin İqtisadiyyat Nazirliyi tərəfindən birbaşa olaraq
ölkə prezidenti ilə razılaşdırılması tələbi qoyulmalıdır. Məhz bu tələbin
qoyulması fərmanın daha keyfiyyətli icrası məqsədini daşıyır. Hazırda fərman
imkan verir ki, zəruri əhəmiyyətli məhsulların istehsalı baş versin. Az əhəmiyyətli,
sadəcə olaraq şan-şöhrət, dəbdəbə xətrinə dövlət büdcəsinin xarici markalara, brend
məhsullarının idxalına yönləndirilməsi hazırki şərtlər daxilində məsuliyyətsiz
davranışdır. Fikrimcə, bu günə qədər dövlət qurumları özlüyündə bu qərarı verməli
idi. Belə bir şey olmadığı üçün rəsmi olaraq hər hansı bir sənədin imzalanmasına
ciddi zərurət, ehtiyac yarandı. Bildiyimiz kimi, fərman 2018-ci ilin yanvarın
1-ə qədər qeyd olunan məhsulların idxalını məhdudlaşdırır ki, bu dövr ərzində müəyyən bir
ənənə formalaşa bilər. Eyni zamanda, dövlət büdcəsindən maliyyələşən təşkilatların
satınalmalarında, həmçinin yerli
istehsalçıların dövlət qurumları ilə əməkdaşlığında müsbət ənənə formalaşacaq.
Bu fərman qüvvədən düşdüyü dövrdən sonra da bu ənənənin qorunub saxlanılmasına səbəb
olacaq və ümumiyyətlə, ölkə iqtisadiyyatına faydalı olacaq”.
Ekspert qeyd
etdi ki, fərmanın həyata keçirilməsi zamanı bəzi problemlər ortaya çıxa bilər: "Məsələn, hansısa dövlət qurumu ciddi zərurət
olmayan idxal məhsulunun satın alınmasını zəruri bir tələb kimi ortaya qoya bilər.
Yəni süni əsaslandırılma təşkil edilə bilər. Bu səbədən də belə hallarda son qərar ölkə prezidenti tərəfindən
veriləcək. Düşünürəm ki, bunun əsas məqsədi bu kimi sui-istifadə, subyektiv
yanaşma hallarının müəyyən qədər neytrallaşdırılmasıdır”.
İqtisadçı ekspert Pərviz Heydərovun da mövzu ilə
bağlı fikirlərini öyrəndik: "Məlumdur ki, dövlətimizin maliyyə imkanları əvvəlki
kimi deyil. Neftin qiymətinin 2 dəfədən çox enməsiylə əlaqədar olaraq maliyyə vəsaitlərinə
qənaət etmək məcburiyyəti yaranıb. Həmçinin qeyd edim ki, dövlət investisiya xərcləri
də azaldılıb. Bir sözlə, bütün istiqamətlərdə maliyyə vəsaitlərinin xərclənməsində
səmərəliliyi artırmaq bir nömrəli vəzifə olaraq qarşıya məqsəd qoyulub. İcra
hakimiyyəti orqanlarının və dövlət büdcəsindən maliyyələşən təşkilatların fəaliyyətində
satınalmaların səmərəliliyinin artırılması ilə bağlı əlavə tədbirlər haqqında fərman
da məhz bu zərurətdən irəli gəlib. Sənəddə də qeyd olunub ki, icra hakimiyyəti
orqanlarının və dövlət büdcəsindən maliyyələşən təşkilatların fəaliyyətində səmərəliliyi
artırmaq, ölkədə sahibkarlıq fəaliyyətini genişləndirmək, habelə biznes və
investisiya mühitinin əlverişliliyini və rəqabət qabiliyyətini daha da artırmaq
məqsədi fərmanın əsas qayəsini təşkil edir. İcra hakimiyyəti orqanları və dövlət
büdcəsindən maliyyələşən təşkilatlar tərəfindən idxal mallarının (işlərinin,
xidmətlərinin) satın alınması 2018-ci il 1 yanvar tarixinədək dayandırılır. Yəni
bu, müvəqqəti tədbir də ola bilər, uzadıla da bilər”.
P.Heydərov
xatırlatdı ki, nəzərdə tutulmuş müddətdə icra hakimiyyəti orqanları və dövlət
büdcəsindən maliyyələşən təşkilatlar tərəfindən idxal mallarının (işlərinin,
xidmətlərinin) satın alınması zərurəti yaranarsa, icra hakimiyyəti orqanları və
dövlət büdcəsindən maliyyələşən təşkilatlar tərəfindən həmin malların (işlərin,
xidmətlərin) satın alınması mümkün olacaq, sadəcə olaraq, bu barədə qərarı dövlət
başçısı ilə razılaşdırmaqla İqtisadiyyat Nazirliyi qəbul edəcək.
Ekspertin
fikrincə, əsas məqsəd dövlət vəsaitlərindən
istifadəni səmərəli təşkil etməkdir: "Fərman qüvvəyə mindiyi günədək bağlanmış
müqavilələr üzrə idxal mallarının (işlərinin, xidmətlərinin) satın alınması üzrə
də zərurət yaranarsa, icra hakimiyyəti orqanları və dövlət büdcəsindən maliyyələşən
təşkilatlar tərəfindən həmin malların (işlərin, xidmətlərin) satın alınmasına məhz
eyni qaydada razılıq veriləcək. Burada
heç bir mənfi cəhətdən söhbət gedə bilməz. Əslində bunu neftin satış qiymətlərinin
yüksək olduğu dövrdə də tədbiq etmək olardı. İqtisadiyyat və maliyyə Nazirliklərinin birlikdə icra hakimiyyəti
orqanları və dövlət büdcəsindən maliyyələşən təşkilatlar tərəfindən idxal
mallarının (işlərinin, xidmətlərinin) satın alınmasına xərclənən vəsaitlər barədə
hər 3 ayda bir dəfə ölkə prezidentinə məlumat vermələri hətta qeyri-postneft
dövründə də həyata keçirilməli idi”.
Şəbnəm Mehdizadə