Dövlət qurumlarına hansı yeni elektron xidmətlər əlavə edilib?
Elektron xidmətlərin keyfiyyətinin artırılması, əhatə dairəsinin
genişləndirilməsi və bununla da vətəndaşların rahatlığının təmin edilməsi məqsədi
ilə dövlət qurumları tərəfindən elektronlaşdırılan xidmətlərin sayı artmaqda
davam edir.
Nəqliyyat, Rabitə və Yüksək Texnologiyalar Nazirliyinin Məlumat
Hesablama Mərkəzinin operatoru olduğu "Elektron hökumət” portalına Ədliyyə
Nazirliyinin daha 7 yeni xidməti inteqrasiya edilib.
Bu xidmətlərə "Borcun, icra ödənişinin, icra hərəkətləri ilə bağlı xərclərin
internet vasitəsilə ödənilməsi”, "Vətəndaşlıq vəziyyəti aktlarının dövlət
qeydiyyatına dair təkrar şəhadətnamələrin və arayışların verilməsi”, "Dövlət
notariat arxivindən notariat hərəkətləri barədə məlumatın və onlarla bağlı sənədlərin
surətlərinin verilməsi”, "Soyadın, adın və ata adının dəyişdirilməsi üçün
elektron müraciət”, "Vərəsəlik işlərinin açılıb-açılmaması barədə məlumatın
verilməsi”, "Qeyri-kommersiya hüquqi şəxsin və təhsil müəssisəsinin ləğv edilməsi
və kreditorların tələblərinin bildirilməsi qaydası və müddəti barədə ilk məlumatın
dərc olunması haqqında” və "Mülki dövriyyə nəticəsində baş verən hüquqi hadisələrdən
yaranan yeni hüquq və vəzifələr barədə fiziki və hüquqi şəxslərin məlumatlandırılması”
daxildir.
Beləliklə, sözügedən qurumun portalda olan elektron xidmətlərinin
sayı 24-ə çatıb.
"Qeyri-kommersiya hüquqi şəxsin və təhsil müəssisəsinin ləğv edilməsi
və kreditorların tələblərinin bildirilməsi qaydası və müddəti barədə ilk məlumatın
dərc olunması haqqında” adlı xidmətdən istifadə etmək üçün müraciət edən şəxsin
şəxsiyyət vəsiqəsinin seriya nömrəsi, qeyri-kommersiya hüquqi şəxsin və ya təhsil
müəssisəsinin dövlət qeydiyyatı haqqında Şəhadətnamə və VÖEN-i tələb olunur.
"Elektron hökumət” portalından Ədliyyə Nazirliyinin təqdim etdiyi elektron xidmətlər
içərisindən adı çəkilən xidməti seçən istifadəçi əvvəlcə təşkilatın hüquqi
formasını seçərək "növbəti” düyməsini sıxır. Açılan səhifədə anket məlumatlarının
tamamlanması tələb olunur. Anket tamamlanaraq "İrəli” düyməsi aktiv edilir və
açılan səhifədə anket məlumatları əsasında tərtib olunmuş ərizə forması
görünür. Ərizənin mətni ilə tanış olan istifadəçi "Təsdiq” düyməsini seçməklə ərizəsini
təsdiq edib aidiyyəti quruma ünvanlayır.
Qeyd edək ki, "Soyadın, adın və ata adının dəyişdirilməsi üçün
elektron müraciət” xidməti qeydiyyatsızdır. Digər xidmətlərdən istifadə etmək
üçün isə "Elektron hökumət” portalında qeydiyyatdan keçmək vacib şərtdir.
"Azərpoçt” MMC tərəfindən istifadəyə verilmiş "Poçtap” xidməti də
"Elektron hökumət” portalına inteqrasiya edilib. Bu xidmət itirilmiş sənədlərin
tapılaraq sahibinə qaytarılması məqsədi daşıyır. Belə ki, əgər hər hansı bir sənədinizi
itirmisinizsə, onu tapmaq üçün "Elektron hökumət” portalında elektron xidmətlər
siyahısındakı "POÇTAP - itirilmiş sənədlərin axtarışı” xidmətindən istifadə edə
bilərsiniz. Açılan səhifədə ilk olaraq sənədin qrupu seçilir. Sonra vətəndaş tələb
olunan xanada sənədin nömrəsini, soyadını, adını və ata adını qeyd edərək
axtarış düyməsini aktiv edir. Axtarışa uyğun nəticə dərhal ekranda görünür. Əgər
itirilmiş sənəd tapılıbsa və sistemdə görünürsə, dövlət rüsumunu ödədikdən
sonra vətəndaş 169 çağrı mərkəzinə zəng edərək tapılmış sənədi ona yaxın poçt məntəqəsinə
yönləndirə bilər. Sonda vətəndaş yönləndirdiyi poçt məntəqəsindən gedib sənədini
götürə bilər. Xidmətdən istifadə üçün portalda qeydiyyatdan keçmək tələb
olunmur. "Poçtap” xidməti çərçivəsində sənədi tapılan şəxslər 1.80 AZN xidmət
haqqı ödəyərək, sənədi poçt şöbələrindən və "Şəbəkə” xidmət
mərkəzlərindən təhvil ala bilərlər. Sənədin hər hansı ünvana çatdırılması lazım
gəldikdə isə çatdırılma rüsumu "Azərekspresspoçt”un xidmət tariflərinə uyğun
hesablanır.
"Elektron hökumət” portalının mobil tətbiqinin "Android” versiyası da
yenilənib. Bu mobil əlavə vasitəsilə bir çox elektron xidmətlər vətəndaşlara
daha rahat və əlçatandır. Belə ki, geniş istifadəçi auditoriyasına malik
sözügedən mobil tətbiqin "Android” versiyasının "Elektron arayışlar” bölməsinə
5 elektron arayış əlavə olunub. Həmin əlavələr "İl ərzində rabitə xidmətləri
üzrə ödənişlər haqqında arayış”, "Vətəndaşın adına qeydiyyatda olan nəqliyyat
vasitələri haqqında elektron arayış”, "Vətəndaşın hərbi xidmət keçməsi barədə
arayış”, "Vətəndaşın hərbi qeydiyyatda olması barədə arayış” və "Dənizçinin şəxsiyyət
sənədi” aiddir.
Bununla yanaşı, Əmək və Əhalinin Sosial Müdafiəsi Nazirliyinin
"Sosial sığorta haqqında məlumat” və "Sığortaedənin uçot nömrəsinin öyrənilməsi”
elektron xidmətlərindən də "Android”
mobil əməliyyat sisteminin istifadəçiləri yararlana bilərlər.
Hazırda "Elektron hökumət” portalı mobil tətbiqinin "Android”
versiyasında Nəqliyyat, Rabitə və Yüksək Texnologiyalar Nazirliyinin 7, Əmək və
Əhalinin Sosial Müdafiəsi Nazirliyinin 2, Daxili İşlər Nazirliyinin 1, Səhiyyə
Nazirliyinin 3, Ədliyyə Nazirliyinin 1 elektron xidməti, həmçinin 11 adda
elektron arayış vətəndaşların istifadəsindədir.
Həmçinin "Elektron hökumət” portalının mobil tətbiqinin "İOS”
versiyası da istifadəçilərin ixtiyarındadır.
Hər iki mobil əlavəyə giriş "Elektron imza” kartı və istifadəçi
adı/şifr vasitəsilə mümkündür.
Qeyd edək ki, sözügedən tətbiqləri müvafiq olaraq "AppStore” və
"PlayStore” onlayn mağazalarında "Elektron hökumət” portalı yazıb axtarış etməklə
mobil qurğuya yükləmək mümkündür.
Ləman Hüzeynzadə
Bu məqalə "Beynəlxalq Mətbuat
Klubu” İctimai Birliyi tərəfindən Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi Şurasının "Dövlət qurumlarında əhalinin
müraciətlərinə baxılması qaydalarının monitorinqi” layihəsi çərçivəsində
hazırlanıb