Dövlət hər zaman vətəndaşının yanındadır - Fotolar
Hələ 2003-cü ilin prezident
seçkiləri öncəsi Azərbaycanın regionlarında çoxsaylı görüşlər keçirən, vətəndaşlar
qarşısında çıxış edən İlham Əliyev ona etimad göstəriləcəyi halda hər bir
azərbaycanlının prezidenti olacağını vəd etmişdi. Prezident seçildikdən sonra
ulu öndər Heydər Əliyev siyasi kursunu uğurla davam etdirən dövlət başçısı İlham
Əliyev öz fəaliyyəti ilə xalqa ləyaqətlə xidmət etmək nümunəsini ortaya qoydu.
Hər il Azərbaycanın rayonlarına səfərlər edən, ən müxtəlif obyektlərin, o
cümlədən xidmət mərkəzlərinin, istehsal müəssisələrinin, yeni salınmış
yolların, körpülərin, müasir dövrün tələbləri nəzərə alınmaqla inşa edilən
səhiyyə obyektlərinin, məktəb binalarının açılışını edən Prezident İlham Əliyev
yerli sakinlərin daim əhatəsində olub. Sevincli günlərdə, bayramlarda, rəsmi
tədbirlərdə insanlarımızın sevincinə şərik olan dövlət başçısı ölkə
vətəndaşlarının dar günündə də onların əsl himayəçisinə çevrilib.
Ermənistan
işğalı nəticəsində yurd-yuvasından didərgin düşmüş 1 milyondan artıq qaçqın və
məcburi köçkünün, şəhid ailələrinin, müharibə veteranlarının sosial durumunun
yaxşılaşdırılması, onların mənzil-məişət problemlərinin həlli, müharibə
əlillərinin avtomobillə təmin olunması deyilənlərə əyani misaldır. Kür çayının
daşmasından, Zaqatala-Qax rayonların ərazisində baş verən dağıdıcı zəlzələdən sonra
da hadisə yerinə ilk baş çəkənlərdən biri məhz Prezident İlham Əliyev olub.
Onun qayğısı ilə təbii fəlakət nəticəsində evləri uçulan, dağıdılan vətəndaşlar
yeni, daha müasir mənzillərlə təmin olunublar. Bununla ölkə başçısı hələ
prezident seçilməzdən öncə verdiyi vədinə sadiq olduğunu nümayiş etdirib, sözün
əsl mənasında hər bir azərbaycanlının prezidenti olub.
Ötən ilə yekun vuraraq cari
ilə uğurlarla qədəm qoyan Prezident İlham Əliyev yanvar ayından bu yana
keçirdiyi görüşlərlə, imzaladığı fərman və sərəncamlarla, atdığı hər bir addımla
yenidən öz humanistliyini, qayğıkeşliyini nümayiş etdirib, səmimi davranışları
ilə ənənəvi fəaliyyətini ortaya qoyub.
Yanvarın 11-də isə
Prezident İlham Əliyevin sədrliyi ilə Nazirlər Kabinetinin 2018-ci ilin
sosial-iqtisadi inkişafının yekunlarına və qarşıda duran vəzifələrə həsr olunan
iclasda dövlətimizin başçısı yola salınan ildə görülən işlər, əldə edilən
nailiyyətlərlə bağlı çıxış edib. Qeyd edib ki, müxtəlif tədbirlərdə, görüşlərdə
xalqa müntəzəm olaraq hesabatlar verir və hazırkı iclas da onlardan biridir. O,
bunu xalqa xidmət etmək baxımından düzgün addım kimi qiymətləndirib. Məmurlara
səslənərək deyib ki, Azərbaycanda bütün işlər qanun çərçivəsində aparılmalıdır.
Ölkə rəhbəri hər kəsin bundan nəticə çıxarmasının vacibliyini dilə gətirərək,
cari ildə islahatların dərinləşməsi istiqamətində çox ciddi addımlar atılacağını
bəyan edib.
Yanvarın 29-u "Azərbaycan
Respublikası regionlarının 2014-2018-ci illərdə sosial-iqtisadi inkişafı Dövlət
Proqramı”nın icrasının yekunlarına həsr olunan konfransda ictimaiyyət
qarşısında çıxış edən dövlət başçısı İlham Əliyev bir daha bəyan edib ki, Azərbaycanın
uğurlu inkişaf modelinin əsas qayəsi ölkəmizdə aparılan siyasətin xalq
tərəfindən dəstəklənməsindədir.
Daim şəhid ailələrinə,
müharibə veteranlarına diqqət və qayğı ilə yanaşan Prezident İlham Əliyev
birinci xanım Mehriban Əliyeva ilə birlikdə yanvarın 28-də Prezident Sarayında
şəhid ailələri ilə görüşəndə də xalqa arxalandığını, onların dəstəyinə
güvəndiyini növbəti dəfə qeyd edib. O, son illər ərzində şəhid ailələri ilə
çoxsaylı görüşlər keçirdiyini, birlikdə bir çox evlərin açılışlarında iştirak
etdiyini, şəhid ailələrinə mənzillərin, avtomobillərin açarlarını şəxsən təqdim
elədiyini xatırladaraq, bunu özü üçün borc bildiyini söyləyib. Prezident deyib
ki, xalqa xidmət etmək onun ən böyük vəzifəsidir, böyük şərəfdir. Deyilən
sözlərin əməldə ifadə olunmasına misal olaraq vurğulayaq ki, 2018-ci ildə
keçirilən prezident seçkilərində inamlı qələbəsindən sonra Prezident İlham
Əliyevin imzaladığı ilk fərman şəhid ailələrinə birdəfəlik ödəmənin (11 min
manat) verilməsi ilə bağlı olub. Bu da həmin ailələrin sosial müdafiəsinin
yaxşılaşdırılmasının dövlət başçısının uğurlu siyasətinin başlıca
məqsədlərindən biri olduğunu bir daha təsdiq edib, ictimaiyyət tərəfindən böyük
rəğbət və məmnunluqla qarşılanıb. İndiyədək artıq 3758 şəhidin 5144 vərəsəsinə
birdəfəlik ödəmənin verilməsinə dair qərar qəbul olunub və onlardan 3100 şəhid
üzrə 4200 vərəsəyə ödəniş edilib.
Dövlət başçısının 28 yanvar
2019-cu il tarixli fərmanı ilə birdəfəlik ödəmə verilən şəhid vərəsələrinin
əhatə dairəsinə 1997-ci ilin avqust ayının 2-dək şəhid olmuş əlavə 2725
nəfərin, o cümlədən vərəsələri 11 000 manatdan az sığorta ödənişi almış 2264
şəhid hərbi qulluqçunun və 461 şəhid polisin vərəsələri də daxil edilib.
Beləliklə, vərəsələrinə birdəfəlik ödəmə verilməsi nəzərdə tutulan şəhidlərin
sayı 12 268-ə çatıb. Bunun üçün ümumilikdə 135 milyon manat vəsait nəzərdə
tutulub. Onu da əlavə edək ki, Prezident Sarayında şəhid ailələri ilə görüş zamanı
Prezident İlham Əliyev ayağa durmaqda çətinlik çəkən ahıl şəhid anasına şəxsən
yaxınlaşıb, onun qarşısında əyilərək birdəfəlik ödəməni almaq üçün istifadə
olunan plastik kartı şəhid anasına təqdim edib.
Bununla yanaşı, tribunada nitq
söyləyərkən qəhərlənən şəhid atasına yaxınlaşan dövlətimizin başçısı stəkana su
tökərək ona içirib, daha sonra qolundan tutaraq kürsünü tərk etməsinə yardımçı
olub. Bu hərəkətləri ilə milli-mənəvi dəyərlərimizə, şəhid valideynlərinə
hörmət və ehtiramını ifadə edən Prezident öz şəxsində əsl vətəndaşlıq,
səmimiyyət, canıyananlıq nümunəsi göstərib.
Prezidentin indiyə qədər həyata
keçirdiyi tədbirlər, eləcə də sadalanan bu iki fakt hər bir Azərbaycan
vətəndaşının, o cümlədən əlində silah Vətən keşiyində dayanan əsgər və zabitlərimizin
ürəyini sözün əsl mənasında dağa döndərib. Hərbçilərimiz bir daha əmin olublar
ki, onların ailələri, valideynləri Azərbaycan dövləti və onun prezidentidir.
Fevralın 1-də Bakı Konqres
Mərkəzində Gənclər gününə həsr olunmuş respublika toplantısında iştirak edən
Prezident İlham Əliyev ölkə gənclərinə vətənpərvər olmağı, xalqın, dövlətin
maraqlarını hər zaman uca tutmağı tövsiyə edib. Dövlət başçısı indiyə qədər nəyin
bahasına olsa da Azərbaycanın dövlət maraqlarının keşiyində dayandığını, bu
yolda təzyiqlər, yalanlar, böhtanlar və iftiralarla üzləşdiyini diqqətə
çatdırıb. Bildirib ki, bunların heç biri onu yolundan döndərə bilməyib. Ölkə
rəhbəri Azərbaycan iqtidarının düz yolda olduğunu, onun rəhbərliyi ilə həyata
keçirilən siyasətin xalqın maraqlarına cavab verdiyini xatırladaraq, əldə edilən
nəticələrin, nailiyyətlərin, gözəlləşən şəhərlərin bütün bədxahlara, paxıllıq
edənlərə ən gözəl cavab olduğunu vurğulayıb.
Sözügedən tədbirdə çıxış edən
şəhid polkovnik-leytenant Raquf Orucovun oğlu Aqşin Oruclunun tribunadan
düşərkən Prezident tərəfindən səmimiyyətlə qarşılanması, dövlət başçısının onu
öz övladı kimi qucaqlaması da humanizmin, xalqın yanında olmağın daha bir
nümunəsidir. Ölkə başçısı dövlətin qayğısı ilə əhatə olunan bu şəhid oğlu ilə
qürur duyduğunu öz səmimiyyəti ilə büruzə verib.
Zəlzələnin baş verdiyi
Şamaxı rayonuna fevralın 7-də səfər edən, təbii fəlakətdən evləri ziyan görən
sakinlərin əhatəsində olan, çətinliklərini, qarşılaşdıqları problemi yerindəcə
müşahidə edən, həmçinin Prezidentlə görüşdə dövlət başçısının əlini öpməyə cəhd
edən ahıl Saray nənənin əlini özü öpərək ona ehtiramını bildirən Prezident
İlham Əliyev bir daha sadəliyini, səmimiyyətini, xalqına olan münasibətini
ortaya qoydu. Sakinlərlə görüş zamanı bəyan etdi ki, təbii fəlakətdən zərər
çəkən evlər əsaslı şəkildə təmir olunacaq, tamamilə yararsız olanların yerində
isə müasir tələblərə cavab verən yeni evlər tikiləcək. "Biz bilirdik ki, siz
gələcəksiniz”, - söyləyən kənd sakinlərinə "Mən gəlməyə bilməzdim”, - deyərək
cavab verən Prezident İlham Əliyev Azərbaycan dövlətinin hər zaman öz
vətəndaşlarının yanında olduğunu, bundan sonra da belə olacağını vurğulayıb.
Ən nəhayət, fevralın 13-də
Beyləqan rayonuna səfəri çərçivəsində dövlət başçısı istirahət parkında
dincələn rayon sakinləri ilə səmimi söhbət aparıb, onların yaşayışı, mövcud
problemləri ilə yerindəcə maraqlanıb, sakinlərin fikirlərini dinləyib. Bir sıra
məsələlərin həllini tapması, o cümlədən Dünyamalılar kəndində yeni orta məktəb
binasının tikintisi üçün dərhal göstərişlər verib. Rayon sakinlərinin
əhatəsində olan Prezident İlham Əliyev gənc müğənni ilə birlikdə "Azərbaycan”
mahnısını ifa edib, sakinlərlə xatirə şəkilləri çəkdirib. Elə həmin gün Beyləqan
rayonundakı "N” saylı hərbi hissəyə baş çəkən Prezident Azərbaycan əsgərinin
xidmət şəraiti, qidalanması ilə yaxından maraqlanıb, əsgərlərlə birlikdə nahar
edib.
Bütün bu sadalananlar
Azərbaycan Prezidenti İlham Əliyevin Vətənə, millətə, xalqa, dövlətə ləyaqətlə
xidmət etdiyini göstərən faktlardır. Dövlətimizin başçısı siyasəti, fəaliyyəti
ilə dünən olduğu kimi bu gün də öz xalqına bağlılığını ortaya qoyur. Eyni
zamanda o, bütün dünyaya sübut edir ki, hər bir azərbaycanlının prezidentinə
çevrilmək barədə verdiyi vədlərə sadiqdir.
Rufik
İSMAYILOV