Dünya birliyinin mütləq əksəriyyəti bizi dəstəkləyir
XX əsrin 90-cı illərində
müstəqilliyini yenidən bərpa edən Azərbaycan 1993-cü ildən başlayaraq dünya
birliyinin layiqli üzvünə çevrilməyə başladı. İşğalçı Ermənistan istisna
olmaqla, bütün dünya dövlətləri ilə qarşılıqlı maraqlara xidmət edən
münasibətlərin qurulması illər keçdikcə ölkəmizin beynəlxalq aləmdə nüfuzunu
daha da artırdı. Bu gün müasir Azərbaycan sabitlik məkanı, miltikulturalizm,
tolerantlıq ənənələrini yaşadan diyar, etibarlı tərəfdaş, Cənubi Qafqazın
inkişaf etmiş lider dövləti kimi tanınmaqdadır. Prezident İlham Əliyev də aprelin
18-də Milli Məclisdə keçirilən andiçmə mərasimində ölkəmizin beynəlxalq aləmdəki
rolunu şərh edərək bildirib ki, Azərbaycan dünyada çox müsbət reputasiyaya
malikdir. O, Azərbaycanın son 15 il ərzində beynəlxalq aləmdə böyük uğurlara
imza atdığını vurğulayıb. Qeyd edib ki, dünyadakı mövqelərimiz daha da
möhkəmlənir, Azərbaycana qarşı dünya birliyi tərəfindən böyük rəğbət, dəstək nümayiş
etdirilir: "Biz bunu hiss edirik və əldə edilmiş nəticələr, qəbul edilmiş
qərarlar bunu bir daha təsdiqləyir. Əlbəttə ki, bunun ən bariz nümunəsi bizim
155 ölkənin dəstəyi ilə BMT Təhlükəsizlik Şurasına seçilməyimiz olubdur. Bu,
gənc müstəqil dövlət üçün çox böyük nailiyyətdir. Bu, onu göstərir ki, dünya
birliyinin mütləq əksəriyyəti bizi dəstəkləyir”.
Prezident İlham Əliyev
bildirib ki, son 15 il ərzində qonşu dövlətlərlə daha da sıx münasibətlər qura
bilmişik. Onun sözlərinə görə, hazırda ikitərəfli münasibətlərimiz ən yüksək
səviyyədədir, işğalçı Ermənistan istisna olmaqla digər qonşu dövlətlərlə Azərbaycanın
heç bir problemi yoxdur, bütün məsələlər konstruktiv şəkildə öz həllini tapır
və ikitərəfli əməkdaşlıq çoxtərəfli əməkdaşlığa şərait yaradır: "Çoxtərəfli
əməkdaşlıq da Azərbaycanın təşəbbüsü ilə baş verir. Bizim təşəbbüsümüzlə dörd
qonşu ölkə ilə dörd çoxtərəfli əməkdaşlıq formatı yaradılıbdır və bu, işlək
formatlardır. Biz bu üçtərəfli və dördtərəfli görüşlərdə çox önəmli məsələləri
müzakirə edirik, həll edirik. Məsələlərin həlli bütün qonşu ölkələr, o cümlədən
Azərbaycan üçün böyük fayda verir, eyni zamanda, qonşularla isti
münasibətlərimiz regional sabitliyə, təhlükəsizliyə də öz müsbət təsirini
göstərir”.
Milli
Məclisin Beynəlxalq münasibətlər və parlamentlərarası əlaqələr komitəsinin
üzvü, ATƏT PA-da təmsil olunan millət vəkili Tahir Mirkişili də son 15
ildə Azərbaycan çox böyük inkişaf yolu keçdiyini dilə gətirib. O qeyd edib ki,
bu müddət ərzində həm müstəqilliyimiz möhkəmlənib, həm ordumuz güclənib, həm
iqtisadiyyatımız 3 dəfədən çox artıb, həm də digər sahələrlə bağlı uğurlar əldə
olunub. Millət vəkilinin sözlərinə görə, bütün bunlar Azərbaycanın beynəlxalq
reputasiyasını və dünya bazarında yerini möhkəmləndirib. Azərbaycanın dünyadakı
mövqeyinin möhkəmləndirilməsini sübut edən göstəricilərdən söhbət açan komitə
üzvü söyləyib ki, ölkəmizin BMT-nin Təhlükəsizlik Şurasının qeyri-daimi üzvü
seçilməsi, orada sədrliyə başlaması, Qoşulmama Hərəkatına üzv olan ölkələrin
2019-cu ildən etibarən 3 il müddətində Azərbaycanın bu təşkilatı idarə etməsi
ilə bağlı qərar qəbul etməsi ölkəmizə beynəlxalq aləmdə verilən dəyər, etibar
və inamdır. Azərbaycanın ATƏT kimi çox böyük regional təşkilatda mühüm
reputasiyaya malik olduğunu dilə gətirən millət vəkilinin qənaətincə, dünyada
çox az ölkə var ki, onların özlərinin müstəqil mövqeləri mövcuddur: "Bir çox
ölkələrin mövqeləri qruplaşmalar, böyük dövlətlərin diktəsi altında formalaşır
və onlar buna uyğun şəkildə xarici siyasət aparırlar. Amma Azərbaycan çox az
ölkələrdəndir ki, özünün xarici siyasəti və mövqeyi, bir çox hadisələrə
yanaşması var. Məhz bu yanaşma dünya birliyi tərəfindən rəğbətlə qarşılanır.
Bunun nəticəsidir ki, hər hansı qərar verilən zaman əgər bizim regiona
aiddirsə, o zaman ölkəmizin mövqeyi hökmən nəzərə alınır. Bunun özü
Azərbaycanın beynəlxalq mövqeyinin yüksək olmasını göstərir. Əlbəttə ki,
ölkəmiz bu mövqeyindən istifadə etməklə regionda sülh və əmin-amanlığın təmin
olunması, regional layihələrin həyata keçirilməsində özünü göstərir”.
Millət vəkili qeyd edib ki,
son 15 ildə Azərbaycana 230 milyard dollardan çox xarici investisiya cəlb
edilib. Onun sözlərinə görə, xarici investisiya o ölkələrə yatırılır ki, onların
reputasiyası yüksək olsun, reytinq cədvəllərində üst pillələrdə qərarlaşsın.
Deputat deyib ki, Azərbaycanın iqtisadi cəhətdən də Cənub Qaz Dəhlizi kimi
böyük layihələr həyata keçirməsi, Bakı-Tbilisi-Qars, Bakı-Tbilisi-Ərzurum
layihələrin reallaşması ölkəmizin beynəlxalq imicinin kifayət qədər yüksək
olmasının bariz nümunəsidir. Milli Məclis tərəfindən ölkəmizdə həyata keçirilən
xarici siyasətin dəstəklənməsi istiqamətində xeyli işlər görüldüyünü dilə
gətirən parlamentari əlavə edib ki, bu işlərin davam etməsi, daha da
aktivləşməsi, buna uyğun qanunvericilik bazasının yaradılması yönümdə də
planlar mövcuddur.
Millət
vəkili Aydın Mirzəzadə isə söyləyib ki, son 15 ildə Azərbaycanda
ümummilli lider Heydər Əliyevin bizə qoyduğu miras daha da çoxaldılıb. Azərbaycan
dövlətçiliyi daha da möhkəmləndirilib, iqtisadiyyatımız gücləndirilib, bir
milyona yaxın yeni iş yeri yaradılıb, ölkəmiz beynəlxalq aləmdə siyasi nüfuzunu
bir qədər də artırıb: "Bu gün Azərbaycanın region və dünya məsələləri ilə
mövqeyi diqqətlə gözlənilir və hörmətlə yanaşılır. Prezident İlham Əliyev öz inauqurasiya
çıxışında Azərbaycanın gələcəyə yönələn siyasətinin əsas istiqamətini də
vurğuladı. Bu, müstəqilliyimizin möhkəmlənməsi, iqtisadiyyatımızın daha da
güclənməsi, Dağlıq Qarabağ münaqişəsinin ancaq və ancaq Azərbaycanın ərazi
bütövlüyü çərçivəsində həll edilməsinin vacibliyi, hər bir vətəndaşa qayğı ilə
yanaşılması və sair idi. Azərbaycanda demokratik inkişaf ölkə cəmiyyətinin
bağlılığı istiqamətində baş verir. İnanıram ki, növbəti yeddi ildə Azərbaycanın
inkişafı daha möhtəşəm olacaq”.
Alpər
TURAN