Dünya azərbaycanlıları Vətən naminə birləşir
Diasporla İş üzrə Dövlət Komitəsinə Fuad Muradovsədr təyin olunandan sonra qurumun
fəaliyyətində sanki bir canlanma, yeni bir hərəkat başladı. Dünya
azərbaycanlılarının birləşdirilməsi, soydaşlarımızın fəaliyyətinin koordinasiya
edilməsi, diaspor hərəkatının gücləndirilməsi, milli-mədəni irsin təbliği,
işğal edilmiş ərazilərimizlə bağlı həqiqətlərin dünya ictimaiyyətinə çatdırılması
kimi bir çox işlər həyata keçirildi və keçirilməkdə də davam edir.Həmvətənlərimizin xarici ölkələrin ictimai-siyasi həyatında fəal
mövqe tutması, siyasi-iqtisadi təsir imkanlarına malik olması istiqamətində
ardıcıl tədbirlər həyata keçirilir. Azərbaycanın diaspor təşkilatlarının
dayanıqlı əsaslar üzərində qurulması və daha güclü təməllərlə fəaliyyət
göstərməsi üçün dövrün tələblərinə uyğun yeni strateji istiqamətlər
müəyyənləşdirilib. Diasporla İş üzrə Dövlət Komitəsinə sədr təyinatından sonra
strateji hədəflərə yönələn yenilənmiş fəaliyyət proqramı çərçivəsində artıq
intensiv tədbirlərin həyata keçirilməsinə başlanılıb.Belə ki, uzun müddətdir ki, xaricdə yaşayan soydaşlarımız lobbiçilik
fəaliyyətimizin zəifliyindən şikayət edir, təşkilatlanma məsələlərində
problemlər yarandığını qeyd edirdilər. Aparılan yeni siyasət, yeni canlanmadan
sonra dünyanın müxtəlif ölkələrində yaşayan həmvətənlərimizin halını xəbər
aldıq.
"Siyasətin
birinci pilləsi lobbiçilikdir”
Avropa Azərbaycanlıları
Konqresinin (AAK) baş katibi, Finlandiya Azərbaycalıları Konqresinin həmsədri
Arzu Oqtay deyir ki, xaricdə fəaliyyət göstərən Azərbaycan diaspor təşkilatları
birgə fəaliyyətə üstünlük verir: "Ümumiyyətlə "diaspor” qədim yunan sözü olub,
hərfi mənada "səpələnmə” deməkdir. Fəaliyyət dairəsindən, məşğuliyyətindən və
dini etiqadından asılı olmayaraq, hər hansı bir etnosa aid adamların müəyyən
zaman kəsiyində öz tarixi vətənlərindən kənarda məskunlaşmaları və ictimai
fəaliyyəti bilavasitə diasporun formalaşması ilə nəticələnir. Bu gün "Azərbaycan
diasporu” dedikdə, xarici ölkələrdə məskunlaşmış azərbaycanlılar nəzərdə
tutulur”.
Arzu xanım qeyd edir ki, koordinasiya şuralarının yaradılmasına
baxmayaraq, birgə təşkilatlanma işlərində təcrübə baxımından bəzi problemlər
ortaya çıxır. Lobbiçilik məsələsinə gəlincə isə, müsahibimiz bunu siyasətin
birinci pilləsi adlandırır: "Lobbiçiliyi gücləndirmək üçün Avropa ölkələrinin
siyasətçiləri dövlət orqanları ilə sıx əməkdaşlıq etməlidir. Bu lobbiçilik missiyasını
da Avropada fəaliyyət göstərən, mənim də baş katibi olduğum Avropa
Azərbaycanlıları Konqresi öz üzərinə götürüb. Belə ki, 2017-ci ilin martından
AAK-ın yeni seçilmiş prezidenti Sahil Qasımovun və idarə heyəti üzvləri sayəsində
AAK-ın ictimai-siyasi fəallığı sürətlə artmağa başlayaraq lobbiçilik
fəaliyyətinin gücləndirilməsi istiqamətində işlərə start verildi. Sahil
Qasımovun yeni idarə heyətinin qarşısında qoyduğu əsas məsələlərdən birincisi
lobbiçilik fəaliyyətinin gücləndirilməsi üçün AAK-da təmsil olunan
təşkilatların yaşadıqları ölkələrin siyasətçiləri ilə daima görüşlər keçirərək
Azərbaycan həqiqətlərini onlara çatdırmaq və AAK olaraq müxtəlif Avropa
ölkələrində toplaşaraq rəsmi dövlət qurumları ilə görüşlər keçirmək olub. AAK Avropada
lobbiçiliyimizin daha da təkmilləşməsi, güclənməsi üçün gələcəkdə də bütün
səylərini birləşdirərək, var gücü ilə işləməyi qarşısına məqsəd qoyub”.
"Hələ
də ümumdünya bir diaspor şəbəkəsi yarada bilməmişik”
Azərbaycan Amerika Qadın
Cəmiyyətinin rəhbəri Minəvvər Vahabova bizimlə söhbətində Diasporla
İş Üzrə Dövlət Komitəsində 2018-ci ildə kadr dəyişikliyindən sonra xeyli
canlanma hiss olunduğunu vurğuladı. Bildirdi ki, bundan sonra yeni layihələrə
imzalar atılıb və bu işlərin təsiri Amerikada da özünü göstərməkdədir: "Son bir
il ərzində Diaspor Televiziyası yaradıldı. Jurnalistika sahəsində öz sözünü
demiş Vəsilə Vahidqızı bu TV-yə gətirildi. Bütün bu dəyişikliklər əlbəttə ki,
bir çox ölkələrdə artıq fəaliyyət göstərən diaspor təşkilatlarına bir daha
stimul verdi. Komitənin sədri Fuad Muradov öz komandası ilə birlikdə bir çox
ölkələrə səfərlər etdi. Hər birimiz bilirik ki, diaspor fəaliyyəti könüllülük
əsasında qurulan bir fəaliyyətdir. İnsanlar Vətənini sevməsələr, yaşadıqları
qürbət ölkələrdə Vətənləri üçün faydalı olmağa çalışmasalar, bu işin öhdəsindən
gələ bilməzlər. Biz yaşadığımız ölkələrdə Vətənimizi tanıtmaq, onun naminə
əlimizdən gələni etmək üçün bir sıra çətinliklərə sinə gərməli oluruq. Çünki
Azərbaycan gənc müstəqil ölkədir və bizim borcumuz onu yaşadığımız ölkələrin
ictimaiyyətinə tanıtmaq, ən gözəl keyfiyyətlərini ətrafımızdakı insanlara
çatdırmaqdır”.
M.Vahabova söhbət əsnasında hələ də təşkilatlanma işlərində bəzi
problemlərin olduğunu dedi: "Hələ də bir ümumdünya diaspor şəbəkəsi yarada
bilməmişik. Hələ də digər ölkələrdə yaşayıb, fəaliyyət göstərən diaspor
yoldaşlarımızın fəaliyyəti ilə yalnız "Facebook”, "İnstagram” və digər sosial
media səhifələrindən xəbər tuturuq. Azərbaycan Diasporunun bir ümumdünya şəbəkəsinə
ehtiyacı var. Əlbəttə, Diaspor Komitəsinin saytı fəaliyyət göstərir və biz bəzi
məlumatları oradan ala bilirik, lakin sırf diaspor təşkilatlarının bir ümumi
saytı yaradılsaydı, daha yaxşı olardı”.
"Çətinliklərin
qarşısında aciz deyilik”
"Vətənpərvər” -
Azərbaycanın Misirdə Diaspor Təşkilatları Birliyinin sədri, tədqiqatçı-alim Seymur
Nəsirov isə deyir ki, 24 ildir Misirdə yaşayan azərbaycanlılara dəstək olur,
həmvətənlərinə əlindən gələn köməyi əsirgəmir: "Misirə qədəm qoyduğum gündən
bəri - 24 ildir Misirdə yaşayan azərbaycanlılarla güclü əlaqələr qurmuşuq. Bura
gələndə, ilk hədəfim Azərbaycanı layiqincə təbliğ və təmsil etmək idi. O ildən
bu ilə çox şey dəyişib, ancaq mən öz əqidəmi, həyat prinsipimi dəyişməmişəm.
İlk olaraq düşündüm ki, ən gözəl təbliğat vasitəsi Azərbaycanla bağlı ərəb
mənbələrindən tədqiqatlar aparmaqdır. 24 ildir ki,
ərəb mənbələrində Azərbaycanla bağlı tədqiqat aparır, 250-dən çox əslən
azərbaycanlı alim haqqında iki kitabın müəllifiyəm”.
Misirdə yaşayan alimimiz deyir ki, problemsiz həyat yoxdur, o
problemlər Misirdə də həmvətənlərimizi izləyir: "Yaranan problemlər bizim
fəaliyyətimizin qarşısını almamalıdır. Təbii ki, biz azərbaycanlı olaraq
Misirdə üzləşdiyimiz problemlərə baş əymirik. Çətinliklərin qarşısında aciz
deyilik. Misir hökumətində xarici vətəndaşlar rəsmi şəkildə diaspor fəaliyyətini
qeydiyyata almırlar. Onlar qeyd edir ki, səfirliyiniz sizi qəbul edirsə, biz də
sizi tanıyırıq. Biz də qanunlara uyğun olaraq yeni addımlar atdıq. Misir
Azərbaycan Dostluq cəmiyyətini qurmaq ərəfəsindəyik. Bu gün diaspor olaraq
Misirin yüksək siyasi dairələrində belə güclü əlaqələr qura bilmişik. Bu il Misir
parlamentdə "Misir-Azərbaycan Dostluq cəmiyyəti” quruldu. Mən də parlamentlərarası dostluq cəmiyyətinin koordinatoru
seçildim. Artıq parlamentlə güclü əlaqələrimiz var. İlk dəfə olaraq Misir parlamentində
Xocalı soyqırımı ilə bağlı bəyanat yayıldı, Azərbaycan xalqına başsağlığı verildi”.
"Hamımız
eyni məqsəd üçün çalışırıq”
Haaqadakı "Ana Vətən”
Niderland Azərbaycanlı Qadınlar Birliyinin sədri Mayisə Ağamirzəyeva Diasporla İş üzrə
Dövlət Komitəsinin yeni sədrinin gördüyü işlər sayəsində yeni hərəkatın
başladığını və Niderlandda bunun açıq-aydın hiss edildiyini bildirdi: "Diasporla
İş üzrə Dövlət Komitəsinin rəhbərliyində dəyişikliklər edildikdən sonra diaspor
fəaliyyəti ilə bağlı bir sıra təqdirəlayiq addımlar atılır. Son bir ildə bu
canlanmanı hiss edə bilirik. Dünyanın müxtəlif ölkələrində yaşayan gənclərimizi
bir araya toplayan layihələr həyata keçirilir və bu da məni çox sevindirir. Gənclərimiz
bu işdə daha çox həvəslidirlər. Azərbaycandan Niderlanda gələn gənclər arasında
diaspor fəaliyyəti daha çox maraq kəsb edir.
Bundan başqa, ötən il Azərbaycan Xalq
Cümhuriyyətinin 100 illiyinə həsr olunan "Cümhuriyyətin 100 illiyi” Diaspor
Gənclərinin I Yay düşərgəsi bizim gənclərimizin bir-birlərini tanımalarına
böyük şərait yaratdı”.
M.Ağamirzəyeva
təşkilatlanma işlərində problemlərin hər zaman olduğunu deyir:
"Ümumiyyətlə hər zaman təşkilatçılıq məsələsində problemlərlə üzləşirsən. Yaşadığın
ölkənin şərtlərilə razılaşmalısan. Müxtəlif xarakterli insanlarla işləyirik,
sosial şəbəkə vasitəsilə toplantılar edir, qərarlar veririk”. M.Ağamirzəyeva lobbiçiliyin
gücləndirilməsi üçün gənc nəslin bu sahədə daha fəal olmasının vacibliyindən
danışdı: "Gənclərimizi tək siyasi partiyalarda deyil, mədəniyyət, elm, sosial
sahələrdə yetişdirməliyik, yaşadıqları xarici ölkələrdə onların hökumətlərinin
tanıdığı səviyyəyə gəlib çatmaları önəmlidir. Lobbiçiliyimizin güclənməsi üçün
daha çox birləşməyə ehtiyacımız var. Doğma torpaqlarımızdan uzaqda hamımız eyni
məqsəd üçün çalışırıq”.
"Diasporumuz
nə qədər bir olarsa, çəkici də bir nöqtəyə vura bilər”
Diaspor Fəaliyyətinə
Jurnalistlərin Dəstəyi İctimai Birliyinin sədri Fuad Hüseynzadə deyir ki, diaspor
quruculuğunda yeni mərhələ, həmrəylik üçün atılan istənilən addım hər
soydaşımız tərəfindən yüksək qiymətləndirilir: "Vətəndən kənarda yaşayan
soydaşlarımıza diqqətin göstərilməsi dövlət üçün hər zaman prioritetdir.
Əlbəttə ki, əsas məqsəd xaricdəki soydaşlarımızın Vətənlə əlaqələrinin daima
qırılmaz tellərlə bağlanmasıdır. Diasporla İş üzrə Dövlət Komitəsinin
rəhbərliyində dəyişikliklər edildikdən sonra diaspor fəaliyyəti ilə bağlı bir
sıra təqdirəlayiq addımlar atılır. Hazırda diaspor sahəsində aparılan
islahatlar və qarşıya qoyulan vəzifələrin icrası üçün atılan addımlar artıq öz
müsbət nəticəsini verir. Ən vacib məqam kimi isə xaricdəki soydaşlarımızın
təşkilatlanması və həmrəyliyinin güclənməsini xüsusi qeyd olunmalıdır. Son
zamanlar Almaniya, Fransa, İsveçrə, İsveç, Hollandiya, ABŞ-da Koordinasiya
Şuralarının yaradılması birlik və həmrəyliyin nümunəsidir. Belə şuralar
perspektiv layihələri həyata keçirərkən xaricdəki soydaşlarımızın fəallıq
nümayiş etdirməsində kömək olacaq. Barışıq, birlik, həmrəylik üçün atılan
istənilən addım hər soydaşımız tərəfindən yüksək qiymətləndirilir və
dəstəklənir. Bu sahədə diasporun çalışmalarını davam etdirməsi vacib amildir.
Bütün hallarda həmrəylik sonda diasporun güc mərkəzinə çevrilməsinə xidmət
edir. Diasporumuz nə qədər bir olarsa, çəkici də bir nöqtəyə vura bilər. Məhz
bu zaman hər hansı işin effektiv nəticəsi olar”.
Dünya azərbaycanlılarının vahid ideya ətrafında birləşməsi ulu öndər
Heydər Əliyev tərəfindən diasporun qarşısında qoyulan əsas vəzifələrdən biri
idi. Ulu öndər hansı ölkəyə gedirdisə, diasporumuzla görüşəndə bu məsələni
soydaşlarımıza xatırlatmağı özünə borc bilirdi. Dünyanın hər yerində
diasporumuzun milli birliyinə böyük ehtiyac var. Bu gün görülən işlər, aparılan
islahatlar sayəsində diaspor sahəsində təşkilatlanma, canlanma hiss olunur.
Amma lobbiçilik fəaliyyətimiz hələ də axsayır. Həmvətənlərimiz isə bu
fəaliyyətin daha da güclənəcəyinə ümidini itirmir.
Xəyalə Rəis
Yazı Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun keçirdiyi müsabiqəyə təqdim edilir.