DTX-nın “reketlər”ə qarşı əməliyyatı təqdir edilir
Son günlər Dövlət Təhlükəsizlik Xidmətinin əməkdaşlarının "reket”liklə
məşğul olan jurnalistlərə qarşı apardığı əməliyyatlar davam etdirilir. Artıq
"Gündəlik Bakı” qəzetinin baş redaktoru Habil Vəliyev, "Bizim dövr” qəzetinin
baş redaktoru Surxay Əliyev, onun müavini Hikmət Nəcəfli, "Cəmiyyət” qəzetinin
baş redaktoru Asəf Novruzov saxlanılıblar. Bildirilir ki, əməliyyatlar MTN rəhbəri
olmuş Eldar Mahmudovun cinayətkar dəstəsinə daxil olmuş "reket jurnalistlər”ə
qarşı miqyaslı mübarizənin bir hissəsidir. Onlar özlərini jurnalist kimi qələmə
verərək, iş adamlarını, məmurları, müxtəlif dövlət idarələrinin əməkdaşlarını
ifşaedici materialların yayılması ilə şantaj edib, pul tələb ediblər. Mövzu
haqda fikirlərini bölüşən ekspertlər deyirlər ki, artıq bu cür fəaliyyətlə
məşğul olanlara "dayanın” deməyin vaxtı çatmışdı. Çünki onlar özlərini
jurnalist kimi təqdim edib, "reket”liklə məşğul olmaqla, vicdanlı jurnalistləri
də ləkələyirdilər. Millət vəkili Çingiz Qənizadənin fikrincə, hüquq mühafizə
orqanlarının bu istiqamətdə gördüyü işlər təqdir olunmalıdır. Çünki belə
adamlar xərçəng xəstəliyi kimi yayılıblar.
Mətbuat Şurasının sədri, millət vəkiliƏflatun Amaşovda
reketlərə qarşı mübarizəni alqışlayır. Hesab edir ki, həbs edilən baş
redaktorlar və onlarla birgə saxlanılanların əməlləri istintaqla sübut
ediləcəksə, layiq olduqları cəzanı alacaqlar.
"Onlar çirkin məqsədlərlə
mətbuata soxulmuş ünsürlərdir”
Mətbuat Şurası sədrinin müavini, JuHİ sədriMüşfiq
Ələsgərlibildirib ki, uzun illərdir medianın adına ləkə olan belə
şəxslərlə mübarizə aparıblar: "Həbs edilənlərlə bağlı Mətbuat Şurası hələ
2010-cu ildə tədbir görmüş və onları "qara siyahı”ya salmışdı. Lakin bunun da
nəticəsi olmamış və onların əməllərindən əziyyət çəkənlər hüquq mühafizə
orqanlarına müraciət etmişlər. Lakin indi məlum olur ki, vaxtilə keçmiş MTN-də
yuva salan cinayətkar qruplaşma bu dəstəni himayə edirmiş və onların cəzalandırılmasının
qarşısını alırmış. Bu qruplaşmaya dəstək verən müəyyən şəxslər və digər KİV
orqanları da mövcuddur ki, onlar da ifşa edilməlidir. Bəzən bu adamlara qarşı
görülən tədbirləri "jurnalistlərin həbsi” kimi qiymətləndirmək cəhdləri
müşahidə edilir. Lakin bu, tamamilə yanlışdır və o şəxslərin mediaya heç bir
aidiyyatı yoxdur. Onlar çirkin məqsədlərlə mətbuata soxulmuş ünsürlərdir”.
"Özümüzü jurnalist kimi
təqdim etməyə belə utanırdıq”
CASCFEN sədri Azər Həsrət bizimlə
söhbətində dedi ki, xalq arasında "reket jurnalistika” kimi tanınan fəaliyyət
növü Azərbaycan mediasının uzun illərdir gözdən salınmasına səbəb olurdu. Bu
baxımdan, DTX-nın son günlər keçirdiyi əməliyyatlar, bu üz qarası fəaliyyətlə
məşğul olanların aşkara çıxarılması və saxlanılması alqışlanmalıdır: "Düşünürük
ki, dövlətimiz mediada mühitin sağlamlaşdırılması istiqamətində belə addımlar
atmaqla bizim – jurnalistikanı özünə həyat kredosu seçmiş insanların işini
asanlaşdırır. Yoxsa, biz o ünsürlərin əlindən özümüzü jurnalist kimi təqdim
etməyə belə utanırdıq. Çünki cəmiyyətin bəlli bir kəsimi jurnalist deyəndə məhz
o cür adamları tanıyır və düşünür ki, jurnalistlərin hamısı elədir. Şükürlər
olsun ki, problem həllini tapır və mediamızda gerçək jurnalistlərin meydanı
genişlənir.
"Bu məsələ hüquqi çərçivədə
öz həllini tapmalı idi”
Mətbuat Şurasının İdarə Heyətinin üzvüVüqar Rəhimzadə isə "reketlər”in
fəaliyyətiniümumilikdə Azərbaycan jurnalistikasına xələl gətirən hal kimi
qiymətləndirir: "Elə mətbuat orqanları var ki, peşə davranış qaydalarını
mütəmadi olaraq pozur, jurnalistika prinsiplərinə tamamilə zidd hərəkətlər
edirlər. Mətbuat Şurası yarandığı gündən bu hallarla mübarizə aparır, öz
mövqeyini ortaya qoyur. Azərbaycan Mətbuat Şurasının tətbiq etdiyi "qara
siyahı"da 100-ə yaxın bu cür mətbuat orqanının adı var. Dövlət
Təhlükəsizliyi Xidməti əməkdaşlarının keçirdiyi əməliyyat nəticəsində ifşa
olunan şəxslərin rəhbərlik etdiyi həmin qəzetlərin adları da "qara
siyahı"da olub. Mətbuat Şurasının apelyasiya şurasına həmin qəzetlər
müraciət edəndən sonra onların adları bir müddət "qara siyahı"dan
çıxarıldı. Amma Şuranın sonuncu iclasında həmin qəzetlərdən birinin adı yenidən
siyahıya əlavə edildi”.
V.Rəhimzadənin fikrincə, davamlı olaraq bu cür şantaj xarakterli
əməllərlə məşğul olanlar qanun qarşısında cavab verməli, məsuliyyətə cəlb
edilməlidir: "Reket”lik edən bu cür insanlar jurnalistika adından istifadə
edərək, insanları təhdid edirlər. Bu, həm Azərbaycan cəmiyyətinə, həm də
Azərbaycan jurnalistikasına qarşı təhqirdir. Onlar insanları təhqir etməklə
yanaşı, adamların şəxsi həyatına, ailə həyatına qərəzli mövqedən yanaşır, öz
məqsədlərinə çatmaq üçün müəyyən şantaj xarakterli əməllərə əl atırdılar. Bu
şəxslər çirkin əməllərini mütəmadi edirdilər, ayrı-ayrı insanları şantaj
etməklə məşğul idilər. Hamı onların fəaliyyətini görürdü, hansı əməllərə əl
atdıqlarını bilirdilər. Buna görə də bu məsələ hüquqi çərçivədə öz həllini
tapmalı idi. Dövlət Təhlükəsizliyi Xidməti əməkdaşlarının keçirdiyi bu cür
əməliyyat Azərbaycanda jurnalistikanın sağlamlaşmasına, cəmiyyətə qarşı
yönəlmiş mənəvi terrorun qarşısını almaq üçün atılan addımlardandır”.
"Bu tədbirlər Azərbaycan
mətbuatının sağlamlaşmasına xidmət edəcək”
Mətbuatdan sui-istifadə halları, "reket jurnalistlər”in fəaliyyəti haqda
Trend-ə açıqlamasında "Səs" qəzetinin baş redaktoru Bəhruz Quliyevdeyib ki, bu cür hallar 90-cı illərin əvvəlindən başlayıb: "Həmin vaxt
hələ internet resurslarından istifadə məhdud idi. O vaxtlar Azərbaycanda
"reket ordusu" formalaşdı. Ölkədə xaos, anarxiyanın tüğyan etdiyi bir
dövrdə Azərbaycan mətbuatında da belə bir problem ortaya çıxdı və "reket
jurnalistlər” cəmiyyətdə özünə yer elədi. Sonrakı dövrlərdə bunun acı
nəticəsini çəkməyə başladıq. Bu gün də ənənəvi jurnalistika "reket jurnalistika”ya
görə əziyyət çəkir. Bu gün əsl jurnalistika ilə "reket jurnalistika” cəmiyyətdə
fərqləndirilmir, insanlar ayırd edə bilmirlər. Amma müsbət haldır ki, bu gün
ənənəvi mətbuat öz işi ilə məşğuldur, peşə fəaliyyətini diqqətlə yerinə
yetirir, Azərbaycan qanunvericiliyinə uyğun fəaliyyət göstərir. Reket şəbəkə
isə bunun tam əksinə hərəkət edir, yaranmış vəziyyətdən sui-istifadə edir, Azərbaycanda
azad söz, azad fikir, azad mətbuatdan öz mənafeləri üçün yararlanmağa çalışır".
B.Quliyev DTX-nın reketləri ifşa etməsini yüksək qiymətləndirdiyini
də vurğulayıb: "Belə əməliyyatlara hətta ənənəvi mətbuatın özü də
qoşulmalı, reket jurnalistlərin ifşası üçün hüquq-mühafizə orqanlarına yardımçı
olmalıdır. Bu mübarizə bizim cəmiyyətin sağlamlaşmasına xidmət edən
addımlardandır. Vətəndaş cəmiyyətinin formalaşmasında mətbuatın da böyük rolu
var. Əgər cəmiyyətdə qeyri-sağlam ünsürlər olarsa, cəmiyyət başqa istiqamətə
yönələr. Ona görə də DTX-nin gördüyü tədbirlər çox uğurludur və əminəm ki, bu
tədbirlər Azərbaycan mətbuatının sağlamlaşmasına xidmət edəcək. Amma biz də bu
mübarizəyə qoşulmalıyıq və bu çirkabdan qurtulmalıyıq. Bu cür tədbirləri
Azərbaycan mətbuatına qarşı əməliyyat adlandırmaq olmaz. Ümumiyyətlə, bu
şəxsləri Azərbaycanın mətbuat nümayəndəsi adlandırmaq düz deyil. Onların
mətbuat nümayəndəsi adlandırılması bizim beynəlxalq imicimizi aşağılayar. Həmin
şəxsləri jurnalist adlandırmaq məsələyə qeyri-peşəkar yanaşmadır. Dövlət
mətbuatın inkişafında maraqlıdır. 2013-cü ildə Prezident İlham Əliyev
"Jurnalistlərin dostu" elan edildi. Bu o deməkdir ki, dövlət
rəhbərliyi mətbuatın sağlamlaşmasında, demokratik fəaliyyətində və inkişafında
maraqlıdır. Bu da birbaşa cəmiyyətin, hüquqi dövlətin inkişafına xidmət edən
amildir".
H.Əsgər