Dostuq, amma tamaşada dublyor olana qədər
"O aktyor mənimlə düşmən
oldu, salam vermirdi, üzümə baxmırdı”
Teatr aləmində yazılmamış bir
deyim var "Dostuq, qardaşıq, bir tamaşada dublyor olana qədər”. Doğrudan da,
zaman-zaman teatrlarda hazırlanan tamaşalarda dublyorların bir-birlərinə
qısqanclıqla yanaşmasının şahidi oluruq. Aktyorlar arasında "Niyə premyerada o
çıxdı?”, "Onu daha çox alqışladılar”, "Tamaşanın ilkin baxışında mən olmalı
idim” kimi deyişmələr başlayır. Tamaşada dublyorun olması vacib və bir o qədər
də həssas bir məsələdir. Vacibdir ona görə ki, həyatda heç kim heç nədən
sığortalanmayıb, hər an hər hansı aktyor gözlənməyən hadisə ilə üzləşə bilər və
həmin an o aktyoru əvəz edə biləcək birinin olması vacibdir. Digər tərəfdən isə
ən incə və kövrək qəlbə sahib olan aktyorların "Sən məndən daha çox oynadın”
məsələsi ortalığa çıxır. Bu problem əvvəllər də tanınmış sənət adamları ilə
yaşanıb, indi də davam edir. Nəsillər bir birini əvəz edir, ancaq bu dəfə
fərqli formada.
Əməkdar artist, rejissor Nicat
Kazımov deyir ki, imkan olduğu təqdirdə, teatrlarda dublyorların
hazırlanması mütləqdir: "Elə tamaşalar var ki, orada aktyorların dublyorunun olmasının
tərəfdarı deyiləm. O obrazlar dublyorsuz olmalıdır. Rejissor üçün iki heyətlə işləmək
daha böyük zaman tələb edir. Bir çox hallarda teatrlarda dublyorlarla çalışmaq
mütləqdir. O ki, qaldı dublyorların bir-birləri ilə dil tapmamağına, bu insanlıq
məsələsidir. Hər bir insan ayrı-ayrılıqda bir fərddir və cəmiyyətdə öz şəxsiyyətini
nümayiş etdirir. Elə dublyorlar olur ki, bir-birilərinə kömək edir, can deyib can
eşidirlər. Elələri də olur ki, başlarından böyük düşünürlər. Unudurlar ki, tamaşanı
quran rejissordur. "Bu, mənim tapıntım idi”, "Mənim etdiyim yeniliyi o da etdi”
kimi lazımsız fikirlərlə problem yaradırlar. Hansı ki, teatr kollektiv sənətdir
və burda bir nəfərin uğursuzluğu tamaşanın ümumi gedişinə təsir göstərir. Tamaşanın
yaxşı alınması üçün bütün komanda bir amal uğrunda mübarizə aparmalıdır. Burada
"sən, mən” problemi olmamalıdır. Əgər varsa, bu, müştəbehlik əlamətidir. Təbii ki,
zaman-zaman mən də tamaşa hazırlayanda aktyorların dublyor problemi ilə üzləşmişəm.
Ancaq mənim tamaşalarımda aktyor özbaşınalıq edə bilməz. Bacardığım qədər o özbaşınalığın
qarşısını almağa çalışmışam. Özünə arxayın olan aktyor heç vaxt dublyordan qorxmaz
və ona qarşı pis fikirdə olmaz. Mənim özümün də səhnədə dəfələrlə dublyorum olub.
İmkan olan yerdə dublyorun olması yaxşıdır”.
N.Kazımov qeyd etdi ki, aktyorun, dublyorunun məşq prosesində iştirak
etməsi müsbət haldır: "Məşq zamanı zalda oturub tamaşaya baxanda dublyorda hansı
səhvləri görürəmsə, özüm səhnəyə çıxanda o səhvləri düzəltməyə çalışıram. Dublyorunu
tənqid etmək insanın cılızlığından irəli gəlir. Ən son quruluş verdiyim "Tanrıya
14 məktub” tamaşasında mən oğlumla dublyor idim. Bir neçə məşqdən sonra gördüm ki,
o, həmin obraza vizual olaraq məndən daha çox uyğun gəlir. Mən həmin tamaşada səhnəyə
çıxmadım. Gənc yaşlarımda da yaxın dostlarımla dublyor olmuşam. Bir neçə məşqdən
sonra dublyor məşqə gəlməyərək "Bu, Nicatda
daha yaxşı alınır” demişdi”.
Rejissor bildirir ki, dublyor
problemi daha çox baş rolları canlandıran aktyorlar arasında yaşanır: "Digər bir
problem isə tamaşanın primyerasında, ilkin baxışında birinci kimin oynamasındadır.
Son qərarı rejissor verir. Bizdən əvvəl də belə problemlər olub. O vaxt daha böyük
mübahisələrə səbəb olurdu. "Mən daha yaxşıyam”, "məni qiymətləndirmirlər, o birisi
məndən zəifdir”, "o nəsə edib ki, onu qabağa çəkib imkan yaradıblar” kimi
fikirlər səsləndirilib”.
Akademik Musiqili Komediya
Teatrının aktyoru Elçin İmanov deyir ki, tamaşada dublyorun olması çox yaxşı
haldır: "İlk dəfə teatra gələndə məni məşhur aktyorların birinin canlandırdığı
obraza dublyor vermişdilər. Sonra o aktyor mənimlə düşmən oldu. Belə ki, mənə salam
vermirdi, üzümə baxmırdı. Birdən-birə onun mənə qarşı xasiyyətinin dəyişməsi mənim
üçün adi hal deyildi. Sonra öyrəndim ki,
məni ona dublyor təyin etdikləri üçün münasibəti dəyişib. İlk dəfə onda başa düşdüm
ki, dublyor olmaq heç də yaxşı bir şey deyilmiş. Həmişə istəmişəm ki, kimsə dublyorum
olsun”.
Aktyor bildirir ki, Akademik Musiqili Teatrda hər bir aktyor istəyir
ki, onun dublyoru olsun: "Bizdə tamaşalar musiqi ilə bağlı olduğu üçün səs
böyük rol oynayır, səs də hər zaman yerində olmur. Ona görə də, aktyorların çoxu
dublyorun olmasını istəyir. Belə bir deyim var – dublyoru ona görə xoşlamır ki,
aktyor özünə güvənmir, yox, qorxur ki, dublyoru onu səhnədə üstələyə bilər.
Əgər üstələsə, bunu tamaşaçı da, çalışdığı kollektiv də görəcək. Aktyorun özünə
güvənməməyi, üzərində işləməməyindən belə bir qısqanclıq yaranır. Bu, birbaşa
aktyorun zəifliyini göstərir. Əgər dublyorun səndən yaxşı oynayırsa, deməli,
sən yaxşı aktyor deyilsən. Dublyor eyni rolu oynayan aktyoru ona görə sevmir
ki, o, bundan yaxşı oynayır. Elə aktyorlar olub ki, ömür boyu istəməyiblər ki,
onun dublyoru olsun. Bu, bütün teatr aləmində var”.
Əməkdar artist Elnur
Kərimov bildirdi ki, dublyor işi aktyor sənətinə kömək olacaq bir sistem olsa da,
təəssüf ki, dar düşüncəli insanlar bunun mahiyyətini tam olaraq başa düşmürlər:
"Dublyor, yaradıcı potensial baxımından
oyun tərzi, aktyorların bir obraza fərqli yanaşması, bir-birləri ilə məsləhəti,
rejissorun yozumu baxımından maraqlı bir prosesdir. Təəssüflər olsun ki,
teatrlarımızda bu məsələyə nəinki yaradıcı bir iş kimi baxılır, əksinə, tərəflərin
qısqanclığına səbəb olur. "O, mənə baxdı”, "o,
bunu məndən oğurladı”, "bu üsulu ondan öncə mən düşünmüşdüm” kimi düşüncəsiz
ifadələrlə qarşı tərəfi ittiham edib, gözdən salmağa çalışır. Yaranan ümumi proses hazırlanan tamaşaya öz təsirini
göstərir. Nədənsə, daha çox baş rolların dublyorları düşmənçilik edirlər. Dərk
etmirlər ki, bu teatrın qanundur və proses belə olmalıdır. Teatr, elə
rejissorun özü də işini bərk tutmaq üçün
dublyordan istifadə edir”.
E.Kərimov deyir ki, aktyorun obraz üzərində tapdığı truyklar məhz
onun özünə məxsusdur: "Rejissor mənə
tapşırığını verir və mən o tapşırığın üzərində
işləyirəm, növbəti məşqlərdə hazırladığımı göstərirəm. Robot deyiləm ki,
rejissor deyəni olduğu kimi edim. Mən bu anlayışı qəbul etmirəm. Nəyisə edirəmsə və bu rejissor tərəfindən
bəyənilirsə, sonra dublyor onu təkrar
edirsə, o, artıq məni yamsılamaq olur. Onun işi, düşüncəsi mənim düşüncəm kimi
deyil. Mən içini doldururam, dublyor isə
onu quru edir. Təbii ki, dublyor məşq edəndə, o biri dublyor ona baxmalıdır,
çünki məşq prosesində rejissor tapşırıq verir və o tapşırıqları mən də eşidirəmsə,
bu, mənim üçün daha önəmlidir. Dublyor
isə elə düşünür ki, digər aktyor zalda
əyləşibsə, məndən oğurlamaq, tapdığım tryuklara baxmaq üçün oturub. O insanlara
başa salmaq lazımdır ki, sən məşq edərkən
dublyor da orda oturmalıdır ki, rejissor mütəmadi olaraq göstərişlər
versin və aktyor onu götürsün. Dublyor, yaradıcı prosesdə təkan verən işi daha da sürətləndirən sistemdir. Bu qısqanclıq nəyə lazımdır? Təbii ki, həmin
aktyorlara bu mövzu ilə bağlı sual
versəniz, özlərini ağıllı göstərmək üçün böyük danışmağa başlayacaqlar. Amma
işin özünə gələndə çoxu qısqanclıq edir. Bu qısqanclıq da, böyük söz-söhbətlərə
gətirib çıxarır. Bu da sağlam ab-hava, düşüncə deyil, teatrın nüfuzunu geri salan amillərdən
biridir. Hansı ki, buna yol vermək olmaz. İndi dublyor olanlar bir-birinə salam
vermir, sosial şəbəkələrdə qarşılıqlı olaraq söz atışması gedir. Bu da heç
yaxşı hal deyil”.
Aktyor qeyd etdi ki, Azərbaycan teatrlarında dublyor məsələsi böyük
bir sindromdur: "Hamı dublyor istəyir,
ancaq dublyordan qaçır. Dublyorla söz-söhbətlər olur. Təbii ki, bu prosesə
rejissorlar da incə yanaşmalıdırlar. Rejissorlar
da çalışmalıdırlar ki, bu söz-söhbətlərin qarşını alsınlar, böyüməsinə imkan
verməsinlər. Bununla bağlı nə qədər danışsaq, azdır”.
Bakı Bələdiyyə Teatrının
aktrisası Zülfiyyə Qurbanova vurğuladı ki, onun teatrda bu günə qədər 2 və ya 3 dublyoru olub.
Bu isə onun işinə ancaq rahatlıq gətirib: "Mənim dublyorum az olub. O dublyorlarla da heç bir problem
yaşamamışam. Ancaq digər teatrlarda dublyorların bir-birləri ilə yola getmədiklərini
eşitmişəm. Bakı Bələdiyyə Teatrın təməli elə qurulub ki, burda heç bir
intriqaya və söz-söhbətə imkan verilmir. Mərhum sənətkarımız Amaliya Pənahova
əsla icazə verməzdi ki, teatrda kimsə artıq hərəkət etsin və münaqişə yaransın.
Özü aktrisa olduğu üçün bütün bu proseslərə yaxşı bələd idi və teatrda belə
problemlərin yaranmaması üçün hər şeyi nəzərə alırdı. Teatrda canlandırdığım
tamaşaların çoxunu dublyorsuz oynamışam, dublyorum olanda da problem
yaşamamışam”.
Tanınmış aktrisa qeyd etdi ki, teatrlarda dublyor problemi əvvəllər
də yaşanıb, indi də problem olur: "Bu, hər zaman olub və olacaq da. Bunun əsas səbəbi,
çox güman odur ki, aktyorlar ortaq bir rolu bölüşmək istəmirlər. Əslində
dublyorun olması aktyorun rahatlığı
deməkdir. Dublyor aktyorun yaxşı oynamağına təkan verir və şirin bir rəqabət
yaradır. Dublyorun oyununda tapıntıları görürsən və düşünürsən ki, mən ondan
daha yaxşı tapıntılar etməliyəm. Belə olduqda, tamaşanın keyfiyyəti də yüksək
olur. Digər tərəfdən isə aktyor çəkilişdə olanda və yaxud da hər hansı üzrlü
bir işi çıxanda dublyorun onu əvəz etmək imkanı yaranır. Hər an insanın başına hər iş gələ bilər.
Həyatdır, tamaşaya gəldiyi yerdə yıxıla,
özünə zərər verə və ya başına başqa gözlənilməz hadisələr gələ bilər.
Belə olduğu halda onun rolunu dublyor oynayır. Mən dublyorun tərəfdarıyam.
Sığortalanmayan hadisələr üçün də çox yaxşıdır. Hər aktrisanın dublyoru ilə
problemi olmur. Bu, fərd olaraq insanın özündən də asılıdır. Məsələn, mənim nə
vaxtsa dublyorum olanda, buna çox sevinərəm. Növbəli şəkildə tamaşanı
oynayarıq”.
Xəyalə Rəis