Disko rəqqası 70 yaşında
Mithun Çakraborti: İlləri boşuna yaşamamışam, tamaşaçılarım məni
sevir
O, 1982-ci ildə ekranlara çıxan
"Disko rəqqası” filmi ilə məşhurlaşdı. Ümumilikdə isə, bu gün üçün
filmoqrafiyasında 350-dən artıq rol var. 70 yaşını qeyd edən görkəmli hind
aktyoru, "Qızıl lotos” və "Filmfire” mükafatları laureatı Mithun Çakraborti bu
gün də kinosevərlərin pərəstiş etdiyi aktyorlardandır.Əsil adı Qouranqdır. Kəlküttədə, Barisal
şəhərində telefon şirkəti xidmətçisinin ailəsində anadan olub. Gələcək aktyorun uşaqlıq və yeniyetməlik illəri o qədər də uğurlu olmayıb.
Ailələri kasıb idi. Mithun üç bacının bir qardaşı idi. Atası ailənin bütün
yükünü öz çiyinlərinə götürmüşdü, gecə-gündüz çalışırdı.Mithun hələ uşaqlıqdan öz aktyorluq
istedadı ilə hamını heyran etmişdi - heç bir həvəskar teatr tamaşası onsuz
keçmirdi. Öz hobbilərinə baxmayaraq, Çakraborti məktəbi qurtarandan sonra Kəlküttədəki
Şotland kilsə kollecində kimya ixtisası üzrə oxumağa başlayır. Bu kollecdə təhsil alarkən Mithun Çakrabortinin qiyamçı ruhu
onu naksalitlərin ekstremist hərəkatına qoşulmağa sövq edir.Sol radikal kəndli hərəkatı olan naksalitlər
hərəkatı hakim dairələrdə olan korrupsiya və sosial ədalətsizliklərə qarşı
etiraz edirdi. Ancaq naksalitlərin qiyamı hakimiyyət tərəfindən amansızcasına
yatırılır. Mithunun bir çox dostları edam edilir və həbsxanaya göndərilir.
Atası oğlunu məhkəmə təqibindən qurtarmaq üçün Bombeyə, dayısının yanına
göndərir. Canını qurtarıb Bombeyə gələn gənc ətriyyat şirkətində parfüm satışı ilə məşğul olur. İşi asan
deyildi. Bütün şəhər və rayonları gəzib ətriyyat satmağa çalışırdı.
Taleyin hədiyyəsi
Punu şəhərinə
ezamiyyət zamanı parfüm satıcısı yerli kino institutuna qəbul elanı ilə
qarşılaşır və özünü sınamağa qərar verir. Münsiflər heyəti əvvəlcə soy-kökü bəlli olmayan gənci instituta qəbul etməkdən imtina
edir, amma yaraşıqlı xarici görünüşü və istedadı onu xilas edir. Tale xarizmatik gəncin üzünə gülür. Şübhəli
kökəninə baxmayaraq, o, aktyorluq fakültəsinə daxil olur və institutu qızıl
medalla bitirir. "Mən bu təsadüfi həmişə taleyin mənə hədiyyəsi adlandırıram”
deyə aktyor bildirib”. Aktyorluq istedadı ilə yanaşı, gəncin qeyri-adi
bacarığı, səsi və ritmi hiss etmə qabiliyyəti onu yaşıdı olan aktyorlardan
fərqləndirirdi. Hətta bir neçə musiqi alətində mahir ifa edə bilirdi.Mithun 1976-cı ildə
ekranlara çıxan "İki yad adam” və "Kral ovu” filmlərində epizodik rollarda
debüt edir. "Kral ovu” filmi daha yaddaqalan olur. O bu
rolda yaxşı oynamaq üçün həyatı, yerli tayfaların adət-ənənəsini öyrənir, ov
proseslərində iştirak edir. Mithun bu
filmdə sadə bir ovçunun faciəvi həyat dramını oynayır. Ekran əsəri çox təsirli
alınır. Ancaq filmdəki böyük uğuruna baxmayaraq,
rejissorlar onu öz studiyalarına dəvət etməyə tələsmirlər.
70-ci illərin sonlarında aktyor yalnız
orta səviyyəli filmlərdə çəkilirdi.
Cimi...
Mithun Çakraborti 1982-ci
ildə küçə müğənnisi Anil obrazında "Disko rəqqası” musiqili melodramında
ekranlara çıxandan sonra ulduzu kinematoqrafiya səmasında parladı. "Disko
rəqqası”nın uğuru qeyri-adi idi. Mithun o
zamanın gənclərinin əsl məhəbbət kumirinə çevrilir. Onun yaratdığı "Cimi”
obrazı hədsiz sevilir.Təkcə Sovet
İttifaqında filmi ekran qarşısında 60,9 milyon tamaşaçı izləyir. Bütün ittifaqı dolaşan film sovet məkanındakı şöhrətinə görə Moskva
kinofestivalının proqramına minnətdar idi. Sonra film prokat tərəfindən alınır.
Hər yerdə insanlar aktyoru personajının adı ilə - "Cimi” çağırırdılar. Film ən yaxşı kassa filminə çevrilərək kino şirkətinə 100 milyon
dollar qazandırır. Həmin il Çakraborti Hindistan kinosunun
beş aparıcı aktyoru sırasına düşür və Bollivudun ən çox qazanan aktyorlarından
birinə çevrilir. Bu filmin ardıyca yeni
ulduzun karyerasında "Qədim məbədin incisi”, "Boksçu”, "Üç muşketyor kimi”,
"Oyna, oyna” və s. obrazlar ekrana çıxır. "Hind
kinosunda ulduz olmaq yalnız uğurların kölgəsində dincəlmək və qazandığın
pulları saymaq deyil. Çətin işdir, əzablıdır. Çox rol, çox film - bir o qədər
də əmək deməkdir. Ulduz daha çox qazanmaq üçün o qədər də işləməlidir”.
Çakraborti hind kinosu ilə yanaşı, 80-ci illərin
ortalarında doğma benqal dilində də rollara çəkilir. 1986-cı ildə aktyorun adı
daha çox çəkildiyi "İki məhəbbət anı” filmindəki tərəf-müqabili Jaya Prado ilə
yaşadığı məhəbbət macərasında hallanır.O, 2000-ci ildə Qərbi Banqladeş
kinematoqrafiyasının ən məşhur aktyorlarından birinə çevrilir. "Qəhrəmanlar”,
"Əbədi məhəbbət”, "Şən fırıldaqçılar”, "Varislər” və s. uğurlu ekran
əsərlərində rol alır.Çakraborti
karyerası boyunca təkcə romantik ampluada deyil, həmçinin amansız kriminal
avtoritet rollarında da çəkilib. Xüsusən 90-cı illərdə çəkildiyi filmlər bu janrda
olub. "Cəllad” filmindəki roluna görə nüfuzlu "Filmfare” jurnalının "Ən yaxşı
mənfi rol” nominasiyasına layiq görülür. 2005-ci
ilin yanvarında "Elan” filmi ekranlara çıxanda, beynəlxalq terrorçu Baba
Sikander rolunu oynayan Mithun, mətbuat konfransında tamaşaçılardan üzr
istəyərək hələ də mənfi rollarda çəkildiyini etiraf edib. Bəzi kinoşünaslar
aktyorun bu həvəsini gənclik illərindəki qiyamçı ruhu ilə əlaqələndirirlər.
Ginnesin Rekordlar kitabında
Aktyorluq fəaliyyətindən savayı,
Çakraborti bizneslə məşğul olur. 90-cı illərin sonunda "Monarx” otellər
şəbəkəsini qurub, həmçinin kriket oynayan futbol klubu və komandasının sahibidir.
2014-cü ildə aktyorun Hindistan parlamentinə namizədliyi irəli sürülür. Çakraborti
bu təklifi qəbul etsə də, səhhəti ilə əlaqədar iclaslarda iştirak edə bilmədiyi
üçün məktub yazaraq üzrxahlıq edir və deputatlığının geri alınması xahişini
edir.Bizneslə
məşğulluğuna baxmayaraq, Çakraborti kinoda fəal çəkilməkdə davam edir. O hətta fəallığına
və rollarının sayına görə Ginnesin Rekordlar kitabına düşüb. 1999-cu ildə
artist çəkildiyi baş rolların sayına görə rekord vurub. O zaman aktyor 249
filmdə oynamışdı.Hazırda da aktyor,
əvvəlki kimi ekran əsərlərində çəkilir və Bollivudun ən varlı və uğurlu
ulduzlarından biri sayılır.
Əsas
bioloji yaşdır
Mithunun hələ gənclik illərində
rastlaşdığı Helena Lyuk adlı fotomodellə yaşadığı sevgi macərası onun ilk
məhəbbəti kimi qələmə verilir. Bu mövzuya gələndə, aktyor dərinə getməyi
xoşlamır. Bunu şəxsi həyatı sayır. Mətbuat isə yazır ki, aktyor Helena ilə rəqs
meydanında tanış olub. Uzun müddət qızla görüşsə də, imkansızlıqdan evlənə bilməyib.
Toydan sonra isə ər-arvad səhv etdiklərini başa düşüb. Birlikdə yaşaya bilməyəcəklərini
anladıqları üçün nikahları qısa çəkib, onlar ayrılıblar.Yoqito Bali ilə olan ikinci nikahı isə
aktyora əsil xoşbəxtlik gətirir. Həyat yoldaşı ailəsi naminə karyerasından
imtina edir. Çütlüyün dörd övladı – üç oğlu və bir qızı var. Qızı doğma övladı
deyil, aktyor onu zibil konteynerindən tapıb. Yol gedərkən uşaq çığırtısını
eşidən aktyor geri qayıdıb və zibillikdən ağlayan körpəni götürərək birbaşa xəstəxanaya
yollanıb. Uşağın müalicəsindən sonra ailə qızı övladlığa götürür. Mithun
filmlərdəki sevgi qəhrəmanları obrazında olduğu kimi, nümunəvi ailə başçısı olur. Düzdür, bir dəfə nikahları az qala çat verir. Buna səbəb
ulduzun aktrisa Şridevi ilə isti münasibəti olur. Ancaq cütlük ailəni xilas edə
və bu qalmaqallı hekayəni unutdura bilir.
Aktyor uzun müddət kinematoqrafçıların
həmkarlar ittifaqına rəhbərlik edib. Bu postda olarkən o keçmiş kinoulduzlara
kömək etməyə çalışıb və aktiv xeyriyyəçiliklə məşğul olub. Bundan əlavə, Çakraborti
mütəmadi olaraq "Oyna Hindistan, oyna” şousu
ilə tamaşaçıların qarşısına çıxıb və rəqs nömrələri ilə onları valeh edib.Çakrabortinin böyük oğlu Mamoh da
Bollivud aktyorudur. Ortancıl oğlu Rimoh "Kəbə piri” filmində Mithunun obrazını
canlandırıb. O da atasının yolu ilə gedərək aktyor olub. Tamaşaçılar onun
kinoda uğur qazanacağını deyirlər.Aktyor həmişə ailədə bir-birlərini
başa düşdüklərinə görə Tanrısına minnətdarlıq edib. Ailəsinin möhkəmliyini öz
uğurunun sirlərindən biri sayıb. "Həyat yoldaşımın müdrikliyi mənə həmişə kömək
olub. Yaşıma baxmayaraq, bu məni həmişə cavan və enerjili saxlayıb. Yeni
yaradıcılıq planlarına həvəsləndirib. Övladlarımın uğuru da ailəm üçün
qürurdur”.
Ulduz aktyorun sosial şəbəkələrdə
hesabı yoxdur. Bununla belə, pərəstişkarları öz kumirləri haqqında daim yeni
xəbərlər əldə edirlər. Düzdür, hərdən aktyorun ölümü haqqında doğru olmayan
xəbərlər də yayılır.Aktyor 70 illik yubileyini sevinclə
qarşıladığını deyir: "İlləri boşuna yaşamamışam. Filmoqrafiyamda yüzlərlə rol
yer alıb. Tamaşaçılarım məni sevir. Hind kinosunun inkişafı üçün çox iş
görmüşəm. İndi dincəlməyə daha çox haqqım var. Amma mən daim işləyirəm. Əsas
insanın bioloji yaşıdır...”
Rusiya mətbuatından tərcümə etdi
Təranə Məhərrəmova