Diferensial tarif yanaşması sosial ədalət prinsipinə söykənir
Beynəlxalq aləmdə baş verən proseslər, o cümlədən kəskin
qütbləşmə və siyasi maraqlar nəticəsində ötən ilin ortalarından başlayaraq
dünya bazarında neftin qiyməti bir neçə dəfə ucuzlaşdı. Təbii ki, bu vəziyyət
neft ölkələrində, xüsusən də iqtisadiyyatının, büdcə gəlirlərinin əsasını neft
ixracı, bundan əldə edilən gəlirlər təşkil edən dövlətlərdə daha çətin vəziyyət
yaratdı. Azərbaycan da neft ölkəsi olduğundan dünyada baş verən bu kimi proseslər
bizdən də yan keçmədi. Büdcə gəlirlərində nisbətən azalmalar müşahidə edildi,
milli valyuta olan manat iki dəfə devalvasiyaya uğradı, idxaldan asılı olan bəzi
sahələrdə bahalaşma müşahidə olundu. Lakin Azərbaycan Prezidenti İlham Əliyevin
yeni iqtisadi prioritetlər elan etməsi, zamanın tələbinə uyğun olaraq çevik
iqtisadi siyasət yürütməsi, bir sıra zəruri islahatlar həyata keçirməsi vəziyyətin
gərginləşməsinin qarşısını aldı. Dünya bazarında neftin qiymətinin kəskin şəkildə
ucuzlaşmasına qədər olan dövrlərdə Azərbaycanın neft ixracından əldə etdiyi gəlirləri
düzgün xərcləməsi, qeyri-neft sektoruna sərmayələrin yatırılması, obrazlı şəkildə
desək, "qara qızıl”ın insan kapitalına vaxtında çevrilməsi də ölkəmizin bu böhrandan
daha az itkilərlə çıxmasına səbəb oldu. Hazırda da iqtisadiyyatın şaxələndirilməsi,
qeyri-neft sektorunun, o cümlədən sənayenin, kənd təsərrüfatı və sair sahələrin
davamlı inkişafı Azərbaycanda nəinki iqtisadi böhran yaşanmasının qarşısını
alır, üstəlik ölkəmizi inkişaf səviyyəsinə görə Cənubi Qafqazın lider dövlətinə
çevirir.
Xüsusilə bir məqamı da vurğulamaq yerinə düşər ki,
indiyə qədər ötən vaxt ərzində Azərbaycanda sosial xidmətlərə görə tariflərdə
radikal artıma yol verilməyib, bu sahədə həyata keçirilən siyasət maksimal şəkildə
vətəndaşların sosial durumu ilə uzlaşdırılıb. Hətta devalvasiyanın yaşandığı,
neftin qiymətinin kəskin aşağı düşdüyü günlərdə belə, kommunal xidmətlərin qiyməti
artırılmayıb. Azərbaycan hökumətinin sosial xidmətlərə görə tarif siyasəti əhalinin
potensial imkanlarını nəzərə alınmaqla, vətəndaşların və dövlətin maraqlarının
müdafiəsi prinsipi üzərində qurulub. Noyabrın 28-də Tarif Şurasının elektrik
enerjisi və təbii qazla bağlı yeni tarif tənzimlənməsi barədə qərarında da ölkədə
aparılan sosialyönümlü siyasət nəzərə alınıb, əhalinin aztəminatlı təbəqəsinin
sosial müdafiəsi məqsədilə bir çox ölkələrin təcrübəsində mövcud olan diferensial
tarif yanaşması və optimal qiymətlərin tətbiqi məqsədəuyğun hesab olunub. Qeyd
edək ki, differensiallaşdırma və optimallaşdrıma müxtəlif ölkələrdə fərqli
prinsiplər əsasında tətbiq olunur. Misal üçün, bəzi ölkələrdə qiymətlər həftənin
gününə görə, yaxud günün ayrı-ayrı saatlarına görə, bölgələr üzrə və ya istifadə
həcminə görə müəyyənləşdirilir. Azərbaycanda tariflərin
diffirensiallaşdırılması elektrik enerjisi və təbii qazın istifadə həcmi əsasında
həyata keçiriləcək ki, bu da sosial ədalət prinsipinin təmin edilməsi deməkdir.
Tarif Şurasının sözügedən qərarına görə, təbii
qazın pərakəndə satış tarifi əhali üzrə illik istehlak həcmi 1500 kubmetrədək
olan istehlakçılar üçün dəyişdirilməyərək bir kubmetr üçün mövcud 10 qəpik səviyyəsində
saxlanılıb, illik istehlak həcminin 1500 kubmetrdən çox olan hissəsi üçün isə
20 qəpik müəyyənləşdirilib. Hesablamalara əsasən, əhali abonentlərinin 62
faizinin illik istehlak həcmi 1500 kubmetrdən aşağıdır. Diferensial tariflərin
tətbiqi nəticəsində həmin abonentlərin, o cümlədən bu kateqoriyaya aid olan aztəminatlı
ailələrin təbii qaz üzrə ödənişlərində artım olmayacaq. Sadə dildə desək, əhali üzrə hər bir abonent üçün illik 1500 kubmetr sərfiyyat
müəyyənləşdirilib. Əgər abonent 1 il ərzində 1500 kubmetr qaz istehlak edəcəksə,
o bu halda qazın hər kubmetrini əvvəlki qaydada 10 qəpiklə ödəyəcək. Başqa sözlə,
il ərzində 1500 kubmetr qaz istehlakına görə abonent 150 manat ödəniş edəcək.
Amma illik qaz sərfiyatı 1500 kubmetrdən çox olan abonent bu göstəricidən artıq
istehlak etdiyi hər kubmetr qaza görə 20 qəpik ödəməli olacaq. Məsələn, illik
qaz istehlakı 2000 kubmetr olan abonent 1500 kubmetri 10 qəpiklə ödəyəcək. Yerdə
qalan 500 kubmetrə görə ödəniş hər kubmetrə görə 20 qəpikdən hesablanacaq. Yəni,
ümumilikdə, limitdən əlavə istifadə olunmuş 500 kubmetr qaz üçün 100 manat ödəməli
olacaq. Beləliklə, il ərzində 2000 kubmetr qaz istehlak edən abonent 250
manatından keçməli olacaq.
Təbii qaz tariflərinin dəyişdirilməsi elektrik
enerjisi üzrə tariflərə də yenidən baxılmasını zəruri edib. Elektrik
enerjisinin pərakəndə satış tarifi sosial siyasətə uyğun olaraq, əhali üzrə
aylıq elektrik enerjisi istehlakı 250 kilovat-saatadək olan istehlakçılar üçün
dəyişdirilməyərək mövcud 7 qəpik səviyyəsində saxlanılıb. Aylıq istehlak həcminin
250 kilovat-saatdan çox olan hissəsi üçün isə 11 qəpik müəyyənləşdirilib. Əhali
abonentlərinin 72 faizinin aylıq istehlak həcmi 250 kilovat-saatdan az olduğu
üçün, bu sahədə də diferensial tariflərin tətbiqi həmin abonentlərə, o cümlədən
bu kateqoriyaya aid olan aztəminatlı ailələrə təsir göstərməyəcək. Yəni, bu qərarla
da əhali üzrə aylıq elektrik enerjisi istehlakı 250 kilovat-saatadək olan
istehlakçılar üçün heç nə dəyişməyib. Amma aylıq enerji istehlak 250
kilovat-saatdan çox olan abonentlərin xərcləri artıb. Məsələn, ayda 400
kilovat-saat enerji istehlak edən abonent buna görə 34 manat ödəniş etməli
olacaq. Halbuki əvvəl o, bu göstəriciyə görə əvvəl indikindən 6 manat az, yəni
28 manat ödəyirdi. Ayda 1000 kilovat-saat enerji istehlak edən abonent buna görə
100 manat ödəniş etməli olacaq.
Beləliklə, differensiallaşma elektrik enerjisi və
qazdan adi qaydada istifadə edən sadə vətəndaşlara təsir göstərməyəcək.
Differensiallaşdırmada hər bir vətəndaşın və ailənin elektrik enerjisindən və təbii
qazdan istifadə həcminin mövcud tariflərlə istehlak limiti nəzərə alınıb.
Mövcud təcrübənin tətbiqi daha çox böyük evləri, obyektləri və sair olan
imkanlı təbəqəyə qismən təsir göstərəcək. Ən önəmlisi isə differensiallaşdırma
elektrik enerjisi və təbii qazın sərfiyatına daha qənaətlə yanaşmanı və izafi
istehlakın qarşısının alınmasını stimullaşdıracaq, bu prosesi
optimallaşdıracaq.
Fuad Qəhrəmanlı