Diaspor təşkilatlarının vahid koordinasiya şurası yaradılır
Dünyanın
harasında yaşamasından asılı olmayaraq hər bir azərbaycanlı müstəqil dövlətimizin
qorunmasına və inkişafına xidmət etməlidir.
Bu fikri
Birləşmiş Ukrayna Azərbaycanlıları Konqresinin və Ukrayna Azərbaycanlı Gənclər
Birliyinin Dnepr şəhərində keçirilən forumunda Azərbaycanın Ukraynadakı səfiri
Azər Xudiyev deyib.
Səfir
Ukraynada fəaliyyət göstərən Azərbaycan diaspor təşkilatları arasında vahid
koordinasiya şurasının yaradılmasının vacibliyini vurğulayıb. Bu istiqamətdə
Odessa Azərbaycanlıları Konqresinin hazırladığı yeni inkişaf konsepsiyasının həyata
keçirilməsində səfirliyin hərtərəfli dəstək verməyə hazır olduğunu bildirib.
A.Xudiyev
Azərbaycan diaspor strategiyasına dövlətimiz tərəfindən xüsusi diqqət
ayrıldığını vurğulayaraq Ukraynada fəaliyyət göstərən Azərbaycan diaspor təşkilatlarının
bir araya gələrək tarixi vətənimiz naminə daha səmərəli fəaliyyət göstərmələrinin
zəruriliyini qeyd edib.
Forumda
Birləşmiş Ukrayna Azərbaycanlıları Konqresinin sədri Rövşən Tağıyev, Konqresin
Dnepropetrovsk vilayət təşkilatının sədri Nəcəf Əhmədov, Odessa vilayət təşkilatının
sədr müavini Namiq Talıbov, Ukrayna Azərbaycanlı Gənclər Birliyinin sədr
müavini Aysel Nağıyeva və digər diaspor fəalları çıxış edərək gündəlikdə duran
məsələlər haqqında rəy və təkliflərini bildiriblər. Qeyd olunub ki, bu il aprel
ayının 11-də ölkəmizdə keçiriləcək prezident seçkilərində Ukraynada yaşayan Azərbaycan
vətəndaşlarının iştirakının təmin edilməsi üçün lazım olan şəraitin yaradılması
qarşıda duran ən vacib məsələlərdən biridir.
Səfir Azər
Xudiyev qeyd edib ki, prezident seçkiləri ilə əlaqədar Azərbaycanın Ukraynadakı
səfirliyində seçki məntəqəsi fəaliyyət göstərəcək. Bununla bağlı səfirlikdə
hazırlıq işləri artıq başa çatıb.
Forumda
Poltava vilayətinin deputatı Fəxrəddin Muxtarov, Dnepropetrovsk vilayətinin
deputatı Qoşqar Muxtarov, "Azərbaycan Dəmir Yolları” QSC-nin Ukraynadakı nümayəndəsi
Natiq Nağıyev, Dnepropetrovsk Azərbaycanlıları Konqresinin fəxri sədri Qüdrət
Hacıyev və digər soydaşlarımız çıxış edərək, dünyanın harasında yaşamasından
asılı olmayaraq hər bir azərbaycanlının müstəqil dövlətimizin qorunmasına və
ölkəmizin əldə etdiyi uğurlara öz əməli işləri ilə töhfə vermələrinin
vacibliyini vurğulayıblar. Bu istiqamətdə qarşıdan gələn prezident seçkilərinin
xalqımızın gələcək taleyində müstəsna rol oynayacağı bildirilib.
Forumda Ukrayna Azərbaycanlıları Konqresinin yeni
inkişaf strategiyası və vahid koordinasiya şurasının yaradılması ilə bağlı qərar
qəbul olunub.