Diaspor təşkilatlarının işi ölkə üçün hər zaman zəruri olacaq - Fotolar
Azərbaycan Texniki Universitetində
(AzTU) Diaspor Jurnalistləri Birliyinin (DJB) könüllü olaraq icra etdiyi "Ali məktəblərdə diaspor dərsləri” layihəsi
çərçivəsində tədbir keçirilib.
AzTU-nun prorektoru İsa Xəlilov qonaqları salamlayıb
və onları tələbələrə təqdim edib. Prorektor
çıxışında müxtəlif ölkələrdə fəaliyyət göstərən diaspor təşkilatlarının
işindən danışaraq Azərbaycanı dünyaya tanıdan bu təşkilatlarda görülən işlərin əhəmiyyətini vurğulayıb. 90-cı illərin əvvəllərində
ölkəmizin məqsədli şəkildə informasiya blokadasına salınmasını və bu blokadanın
yarılmasında diasporların fəaliyyətlərini yadda salan İsa Xəlilov qeyd edib ki,
diaspor təşkilatlarının işi ölkə üçün hər zaman zəruri olacaq.
DJB-nin sədri Fuad Hüseynzadə layihənin məqsədindən
danışaraq əsas hədəflərin tələbə-gənclərin Azərbaycan diasporu haqqında düşüncəsini
inkişaf etdirmək, gənclərin informasiya müharibəsinin aparılmasında rolunu gücləndirmək
olduğunu qeyd edib.
Daha sonra "Hollandiya Azərbaycan Evi”nin sədri
Elxan Mirhəşimli, Dünya Azərbaycanlıları Konqresinin Qadınlar Şurasının sədri
Dünya Əliyeva, Türkiyə Azərbaycan evinin icraçı direktoru, diaspor məsələləri
üzrə ekspert Toğrul Allahverdili, Ukraynada fəaliyyət göstərən Yeni Dünya Beynəlxalq
İctimai Birliyinin baş katibi Xəzri Elxanoğlu, Prezident yanında Dövlət İdarəçilik
Akademiyasının müəllimi və Rusiya Azərbaycanlıları Gənclər Təşkilatının keçmiş
üzvü Zaur Məmmədov, Qırğızıstan Xarici İşlər Nazirliyinin Diplomatik
Akademiyasının magistri olmuş gənc politoloq Elvin Babayevin çıxışları maraqla
dinlənilib. Çıxış edənlər məlumat və maarifləndirmə xarakterli "Diaspor dərsi”ndə
ulu öndər Heydər Əliyevin azərbaycançılıq ideologiyasının xaricdəki azərbaycanlıların
vahid ideya ətrafında birləşməsində rolu, Azərbaycan dövlətinin diasporun
inkişafı istiqamətində gördüyü işlər, xaricdəki tələbə-gənclərimizin diaspor fəaliyyətinin
perspektivləri, gənclərimizin informasiya müharibəsinin aparılmasında rolu
mövzularında çıxışlar ediblər.
Azərbaycan Texniki Universitetinin məzunu və
hazırda Almaniyanın Rostok Universitetinin Texniki termodinamika kafedrasının
daimi elmi işçisi Cavid Səfərov isə "Skype” vasitəsilə "Diaspor dərsi”nə
qoşulub və öz fikirlərini tələbələrlə bölüşüb.
Sonda qonaqlar tələbələri maraqlandıran bütün
sualları cavablandırıblar.