Dəyişən imtahan qaydaları əvvəlki ilin məzunlarına necə şamil olunacaq?
Dövlət İmtahan Mərkəzində Direktorlar Şurasının
sədri Məleykə Abbaszadə, DİM-in digər məsul işçiləri ilə təhsil nazirinin müavini
Ceyhun Bayramovun başçılıq etdiyi nümayəndə heyəti arasında görüş keçirilib. Görüşdə
2019-cu ildə tətbiqi nəzərdə tutulan tam (11 illik) orta təhsil səviyyəsi üzrə
buraxılış imtahanlarının, ali və orta ixtisas təhsili müəssisələrinə
qəbul imtahanlarının yeni modelinin yekun müzakirəsi keçirilibvə ümumi
razılıq əldə edilib.
Hər iki qurumun iştirakı ilə tərtib
olunmuş yeni modelin hazırlanma zərurəti barədə aparılan müzakirələr zamanı
qeyd olunub ki, 2009-cu ildən başlayaraq respublikanın ümumtəhsil
müəssisələrində yeni təhsil proqramları (kurikulum) tətbiq olunur və
yeni məzmun standartlarına uyğun hazırlanmış dərsliklərdən istifadə
edilir, tədris prosesində yeni qiymətləndirmə vasitələri tətbiq olunur. Bunları
nəzərə alaraq, 2017-ci ildə ümumi (9 illik) orta təhsil səviyyəsi üzrə təhsil
alanların biliyinin yekun qiymətləndirilməsi imtahanı da yeni qaydalar əsasında
keçirilib. 2019-cu ildən isə tam (11 illik) orta təhsil səviyyəsi üzrə
buraxılış imtahanlarında, eləcə də ali və orta ixtisas təhsili müəssisələrinə
qəbul imtahanlarında yeni təhsil standartları əsasında tərtib olunmuş
qiymətləndirmə vasitələrindən istifadə olunacaq.
Yeni modelə əsasən, tam (11 illik) orta
təhsil səviyyəsi üzrə buraxılış imtahanları indiyədək olduğu kimi – 3 fənn üzrə
keçiriləcək, ali təhsil müəssisələrinin ixtisas qrupları üzrə qəbul
imtahanlarında imtahan fənlərinin sayı 5-dən 3-ə endiriləcək və buraxılış
imtahanlarının nəticələri ali təhsil müəssisələrinə qəbul zamanı nəzərə
alınacaq.
Yəni abituriyentlər buraxılış və qəbul
imtahanlarının birgə nəticəsinə əsasən ali təhsil müəssisələrinin müsabiqəsində
iştirak edəcəklər. Yeni qəbul modelində hazırda olduğu kimi, ali təhsil
müəssisələrinin qabiliyyət tələb edən ixtisaslarına və orta ixtisas təhsili
müəssisələrinə müsabiqə buraxılış imtahanlarının nəticələrinə əsasən
aparılacaq.
Qısa müddət ərzindəTəhsil
Nazirliyivə Dövlət İmtahan Mərkəzi tərəfindən yeni modelə dair ətraflı
şəkildə birgə açıqlama verilməsi planlaşdırılır.
Təhsil sistemində edilən bu dəyişikliklər bəzi
cavabsız suallar doğurur. Suallardan biri əvvəlki ilin məzunlarının buraxılış imtahanı ilə bağlıdır. Belə ki, vaxtilə 8 fəndən buraxılış imtahanı
verən biri kimi bu xəbəri eşidən zaman çox sevindim. Təhsilə olan marağım daha
artdı. Yenidən təhsil almaq, tələbə olmaq istədim. Amma bir məqam mənim üçün
qaranlıq qaldı. Bəs mənim buraxılış imtahan nəticələrim necə müəyyən ediləcək?
Ümumiyyətlə
bir neçə il əvvəl orta məktəbi bitirmiş şəxslərin imtahan nəticələri necə müəyyən
ediləcək, bu mexanizm necə tətbiq olunacaq? Bu kimi suallara cavab tapmaq üçün
aidiyyəti qurumlar olan Təhsil
Nazirliyinə və Dövlət İmtahan Mərkəzinə, həmçinin təhsil üzrə ekspertə müraciət
etdik.
Hər iki qurumdan - həm Təhsil Nazirliyindən, həm də Dövlət
İmtahan Mərkəzindən verilən məlumata görə, hələ ki, bəzi məsələlərlə bağlı
konkret bir açıqlama vermək mümkün deyil: "Yeni sistemlə bağlı müzakirələr davam edir. Bəzi məsələlərlə bağlı konkret
açıqlamalar bu yaxınlarda olacaq.
Ya hər iki qurumun iştirakı ilə mətbuat
konfransı keçiriləcək, ya da yazılı məlumat veriləcək. Amma hələ ki, dəqiq bir
şey deyə bilmərik”.
Təhsil üzrə ekspert
Kamran Əsədov deyir ki,
əvvəlki illərin məzunları və ya buraxılış imtahanı verməyənlər yenidən imtahanda
iştirak edəcəklər: "Bu günə qədər buraxılış imtahanın nəticələri yalnız ixtisas
seçimi zamanı qəbulda eyni bal toplayan abituriyentlər arasında seçim etmək
üçün nəzərə alınırdı. Amma 2019-cu ildən
etibarən təhsil sistemində edilən ən ciddi dəyişiklik ondan ibarətdir ki, ali
məktəblərə qəbul zamanı buraxılış imtahanın nəticələri qəbul imtahanın
nəticələri ilə toplanacaq. Təbii ki, siz də çox düzgün vurğuladınız ki, elə
insan var buraxılış imtahanı verdiyi ildən uzun müddət keçib, eləsi də var ki,
heç buraxılış imtahanı verməyib. Həmin şəxslər də eyni qaydada yenidən
buraxılış imtahanı verəcəklər. Bir misal
deyim, artıq bir neçə ildir ki, orta ixtisas təhsili müəssisələrinə qəbul
buraxılış imtahanının nəticələri ilə həyata keçirilir. Yəni əgər kimsə buraxılış
imtahanı verməyibsə və ya uzun müddətdir ki, buraxılış imtahanı verib, onlar da
imtahana girəcək, eyni model testlərlə imtahan verəcəklər”.
Günel Azadə