Dərman
Fəxrəddin Salim
Sıxıntılar,
üzüntülər, ağrılar, acılar... Böyük ariflər deyərdi ki, bunlar bir Tanrı
hədiyyəsidir. Təkyə qapısından içəri girə bilmək üçün ən qısa yol məhz
bunlardan keçir. Heç bir elm, ədəb, təcrübə və sədaqət insanı əzab qədər, dərd
qədər Tanrıya yaxınlaşdıra bilməz. Bu dünyada acı qədər, müsibət qədər sürətli
heç nə yoxdur. Əgər bir vücud həqiqətin işığına talibdirsə, dərddən, bəladan
küsməməli, onlardan qaçmamalıdır. Dərd gələndə onu əziz qonaq kimi qarşılamalı,
üzünə gülməli, əzizləməlidir. Çünki o, qonaqdır. Yəni gəldiyi kimi də gedər.
Getdikdən sonra isə həmin o eşq sultanına səndən şikayət etməz. Əksinə, getdim,
üzümə xoş baxdı, məni qovmadı deyər. Bu sözlər isə, ariflər arifi uca Mövlana
Rumiyə məxsusdur.
Əsrlərdir ki, deyirlər: "Dərdim mənə dərman imiş". Niyə? Necə? Nə var
dərd çəkməkdə bu qədər cazib olan? Dərd insanın mərifəti, yoxsa Allahın
istəyidir? Dərdi insanmı qazanır, Allahmı verir?
Suallar çox, cavab isə birdir: Dünyada baş verənlər fanidir, uzun sürən kabus
və röya kimidir. Heç fərqi yoxdur, bu dünyada əyri, düz, çirkin, gözəl, nə baş
verirsə, versin, əvvəldən sona bir aldanış, bir sərabdır. Fəqət, elə bu
faniliyin içindəcə bir əbədiyyət gizlənmişdir. Bu dünya bir qabığa bənzər ki,
həmin nüvəni, həmin mayanı qoruyur. Dünya olmasa, həqiqət çılpaq qalar, hər
kəsə yem olar. Məhz dünya adlı aldanış və görüntüdür ki, layiq olmayana eşqin
həqiqətini göstərmir. Yalnız bu qabığı sındıra bilənlərdir çılpaq həqiqə
sarılanlar. Dünyanı sındırmaq isə ona görə çətindir ki, bunu istəyən yoxdur.
Bəlkə də insan oğlu nəfsinə deyil, eşqə talib olsaydı, o zaman dünyadan imtina
edərdi. Ancaq hardadır, kimdir dünyanı buraxan? Adına həyat, sevgi, təbiət,
yaşamaq uğrunda mübarizə deyib, hər kəs beş əlli sarıldı bu vəfasız, bu
etibarsız faniyə. Hər kəs qabıqla əlləşir, hər kəs dünyanın gizlətdiyinə deyil,
dünyanın özünə meyl edir. Həqiqət uğrunda deyil, yalan uğrunda mübarizə gedir.
Dünya qabığı insanın köks qəfəsinə bənzəyir. Bu qəfəsin altında toxunulmaz
qalan ürək öz həqiqətini hər zaman gizli saxlayır. Bu, yaradılışın gərəyi,
xilqətin şəklidir. Ancaq ziddiyyət və tərs mütanasibliyin ölçü vahidi olan
yaradılış anı əvvəldən sona qədər ziddiyyət və tərslik diktə edir. Belə
olmasaydı, hər yaranan şey bizə uyar, mücadilə və ixtiyar adında heç nə
olmazdı.
Allahın, yəni eşqin və həqiqətin məzhəri olan ürək köks qəfəsinin altında necə
gizlənibsə, dünyada görünməyən və batini olan şey də dünyanın içində elə
gizlənmişdir. Hər iki qabığı sındırmaq məhz dərdlə, fəlakətlə, ağrı-acıyla
mümkün olur. Çəkilən çilələr, qılınan ibadətlər, edilən dualar, davam edən
zikrlər də öz həqiqiliyini dərdlə, əzabla təzələyir. Zöhdü riyadan qoparan
yeganə şey acılı ürək, bəlalı başdır. Ustadım Cavid Mürtəzaoğlu demişkən; "Hər bağrı bütöv burda nigəhban ola
bilməz". Düzdür, doğrudur, o da insan qəlbini gizlədən köks qəfəsindən
bəhs edir. Həmin qəfəs ki, bütöv olduğu zaman, sınmadığı zaman öz sahibini
Allahdan məhrum qoyur.
O qəfəslə bağlı digər bir məsələ İlahi nurun, İlahi rəhmətin daxil olmaq
istədiyi qəlbin qapılarının bağlı olmasıdır. Gerçəkdən də dünyəvi olan xoş
gündə, dünyəvi məmnuniyyətin hökm sürdüyü anlarda Allah insana yaxın gəlmir.
Nəinki yaxın gəlmir, hətta qaçır. Bunun öz məntiqi vardır. Belə ki, Allah özünü
dünyanın batinində gizlətdi. Dünyanın zahiri ona pərdə oldu. İnsanın cismi də
vücudu da belədir. Bədəni ilə əlləşən, yalnızca onu görən, onu hiss edən insan
qəlbindən, yəni elə hər mənada özündən bixəbər qalır. Dünyanın da cismin də
pərdələdiyi nəsnənin adı Allahdır. Elə buna görə deyirlər ki, özünü tanıyan
Allahı tanıyar. Özündən qafil olan Allahdan qafil olar. Çünki Allahı göylər,
qanunlar, müəmmalar deyil, sən gizlətmisən, ey insan oğlu! Sən də onu kəşf
edəcəksən. Ən dərin qaranlıq, ən keçilməz qanun, ən çözülməz müəmma məhz insan
özüdür. İnsan özünü aydınlatmadıqca, özünü sındırıb dağıtmadıqca, özünü
çözmədikcə həqiqət heç bir zaman ortaya çıxmayacaq, insan bu dünyaya niyə
gəldi, bilməyəcək və bu fani, zahiri, mənasız və keçici ömrü boşu-boşuna
yaşayıb bitirəcək. Əslində fani olan elə dünya deyil, insanın özüdür. Dəni olanda
dünyəvi olan da insan özüdür. İnsan batinini görsə, dünyanın bətni açığa çıxar.
Ümumiyyətlə, dünya dünya olmaqdan çıxar, əbədiyyət yurduna dönər. Heç kim
deməsin ki, bu münkün deyil, çünki Allah bunu istəmir. Xeyr, Allah istəyir, biz
istəmirik. Bir də ki, insandan kənarda Allah olsaydı, o zaman O, insanı xəlq
etməz, kənarda, yalnız başına Allahlığını sürdürərdi. İnsandan sonra Allahın
mahiyyəti dəyişdi. Məhz insanı yaratdıqdan sonra özünə "əhsən" dedi
Allah. Zahirdə insanı öz xəlifəsi olaraq yaratdı. Batində isə insanı Allah
olaraq yaratdı. Allah öz yazdığı əsərin oyunçusuna çevrildi. Özü özünə qədər
yazdı, qeybi özündən belə gizlətdi. Şah Xətai boşuna demir ki;
Girdim
Adəm cisminə, bir kimsə bilməz sirrimi,
Mən şu Beytullah içində ta əzəldən var idim.
Bu sözlər, bu misralar elə-belə nəzm üçün
yazılan şeir olsaydı, şəxsən mən illər boyu yazıb anlatdıqlarımı dilimə
gətirməz, kimsəylə paylaşmazdım. Bu bir Fəzl qiyamıdır! Yəqin ki, mən də məğlub
olacağam. Ancaq bu məğlubiyyət qaçılmazdır, çünki zahiridir. Deməli qələbə
batinidir. Buradan başqa bir nəticə də hasil olur ki, zahiri qələbələrin hamısı
batini məğlubiyyət deməkdir. Ölkələrin fəthi, qazanılan sərvətlər, şöhrətlər,
başqalarını rəqib bilib, düşmən bilib əzmək, üstün olmaq,.. bunların hamısı
əslində qazanmaq deyil, itirməkdir. Batini olanlar dünyaya məğlub olur, zahiri
olanlar həqiqətə məğlub olur. Allahın, yoxsa dünyanın yanında olmaq seçimi
insanın özünə qalıb.
İnsan həm yalanın, həm həqiqətin daşıyıcısıdır.
O həm fanidir, həm baqi. Həm bəşərdir, həm Tanrı. Nəsimi də boş yerə deməyib:
Vəhdətin
şəhrində seyran eylərəm,
Mən səni cismimdə heyran eylərəm,
Sirrimi Adəmdə pünhan eylərəm,
Adəmi həm Həq, həm insan eylərəm.
Həqqin cəmalı görünmürsə, deməli o yoxdur.
Onun bir məkanı yoxdursa, deməli o mövcud deyil. İnsan Haqqın görünən cəmalı,
onun məkan qurduğu məzhəridir. Bu məntiqdən çıxış etsək, belə ərz edə bilərik
ki, insana qədər Tanrı yox idi. Aləmdə ən quru şey addır, Onun quruca bir adı
belə yox idi. İnsana qədər yaranan nə vardısa, səssiz-səmirsiz, öz axarında
fırlanırdı. Bu səssizlikdən Tanrı da yoruldu. Özünü görmək istədi və öz ziddini
yaratdı. Yəni insanı... Əvvəlcə ona nəfs verdi. Bunun üçün dörd ünsürü xəlq etdi.
Nəfsi ona görə insandan əvvəl yaratdı ki, nəfs özü həyat deməkdir. Həyat isə
Allaha ziddir. Çünki Allah yaşamır. Yaşayan bir gün ölür. Allah isə baqidir.
İnsanı yaratmaqla, həm də öz ziddini yaratdı Allah. Onu üzə çıxaran da öz ziddi
oldu. Şeytanı bəhanə edib, insan sifətində dünyaya gəldi. O gündən bu günə
insan hər özünü kəşf etdiyində "Ənəlhəq" deyir. Hər
"Ənəlhəq" dediyində dərisi soyulur. Niyə? Çünki qabıqdan çıxır.
Mənsuru, Fəzli, Nəsimini edam edənlər onların dünya adlı qabığını əbədiyyən
sındırdılar. Bəlkə də onlar özləri də "həqiqəti görmək" istəyirdilər.
Lakin bilmədilər ki, hər kəsin həqiqəti öz içində gizlidir. Bir həqiqəti görmək
başqa bir gözə nəsib olmaz! Allahı zahirdə fəhm edənlər Onu insanlara anlatmağa
çalışdılar. Dinlər, məzhəblər, şəriətlər yaratdılar. "Bizim Allahımıza
inanın" dedilər. Allahı batində görənlər isə, insanlara heç nə
anlatmadılar. Heç bir din, məzhəb, şəriət yaratmadılar. "Bizim
anladığımızı siz də anlayın" demədilər. Sadəcə bir söz dedilər: "Hər
kəs özünü tanısın. O zaman Allahın kim, harada və necə olduğunu anlayar insan.
Çünki, Allah insanı məhz bunun üçün yaratmışdır".
Zahiri gözlə zahiri, batini gözlə batini görmək
olar. Baş üzərindəki bir cüt göz kimi, tək bir ürək gözü də var. Ürəyin qulağı
da var. Hətta əlləri, ayaqları da var. Yəni, qısa desək, insanın içində bir
insan var. Bax, Allah odur. İnsan özü özünə qabıqdır. İnsanın zahirinə baxanlar
yanılırlar. Dədə Yunus da elə bunu deyir:
Məni
məndə sorma, məndə deyiləm,
Bir mən vardır məndə məndən içəri.
Görün bir insanlar nələr yaşayıblar, nələr
görüblər, nələri dərk ediblər! Əslində isə, heyrətə düşüləcək şey insanın o
halı yox, bugünkü halıdır. Həm də bu olaylar tarixi deyil. Ümumiyyətlə, eşqin
və irfanın tarixlə bir əlaqəsi yoxdur. Hər zaman zahir zahirdir, batin batin.
Hər zaman haq haqdır, batil də batil. Deməli, övliyalıq, pirlik, müridlik
məqamları hər zaman diridir. Mürşud qapısı, Cəm dərgahı hər yerdə və hər
dövrdə var və hər kəsin üzünə açıqdır.
Ancaq bu yazının əvvəlində başqa bir şeydən bəhs edirdik. Dedik ki, insanı
Haqqa, Tanrıya yetişdirən ən sürətli vasitə dərddir, bəladır.
Ya Rəb, bəlayi-eşq ilə qıl aşina məni,
Bir dəm bəlayi-eşqdən etmə cüda məni.
Az eyləmə inayətini əhli-dərddən,
Yəni ki, çox bəlalərə qıl mübtəla məni.
Olduqca mən, götürmə bəladən iradətim,
Mən istərəm bəlanı, çün istər bəla məni.
Böyük Füzuli məhz elə həmin bəladan,
yəni eşqə götürən bəladan bəhs edir. Ona görə, bu bəlanın adına
"bəlayi-eşq" deyir.
Pir qapısında, mürşid ətəyində bulunmaq elə bir səadətdir ki, o şərabı dadan
aşiq dünyanın bütün şərbətlərini zəhər bilər. Lakin həmin dərgaha boş əllə
gedilməz. Yoxsa qapını açmazlar. O dərgaha qucaq dolusu dərdlə, günahla
getməkdir əsil mərifət. "Dərd" və "günah" ifadələrini
boşuna işlətmədik. Elə günah da böyük bir dərddir. Elə dərdlər də vardır ki,
özü bir günahdır. Qərəz ki, Pir Sultan Abdal demişkən;
Boş gəlir dərgahə, könlü doludu,
Açılın qapılar Şah himmətinə.
Təsadüfi deyil ki, mövləvi dərvişlər bir-birinin əlini öpərkən, biri digərinin
qulağına pıçıldayır: "Allah dərdini
artırsın".
Dərd olayı, sıxıntı vaqiəsi, üzüntü səbəbi kamilliyə can verən həyat nəfəsidir.
Dərvişin ruhu və eşqi öldükcə, dərd onu dirildir. Dərdlərdən şikayət etmək
aşiqin nöqsanıdır. Füzuli baba deyirdi:
Ey Füzuli, ahu nalən incidibdir aləmi,
Gər bəlayi-eşq ilə xoşnud isən, qovğa nədir?
Bəli, dərvişin dünyadan imtinası nədir, dünya üçün etdiyi qovğa nədir? Bu elə
həmin ikilikdir, həmin ziddiyyətdir ki, xilqətin gərəyi belə yaranmışdır. Elə
mücadilə də mübarizə də bunun başındadır. Bu dünyada heç zaman qəflətə düşməyən
yeganə şey qəflətin özüdür. Hər kəs hər an qafil ola bilir.
Bəli, dərddir, bəladır insanı qəflət yuxusundan oyadan. Bu mənada bütün
dərdlərin ən gözəl və sürətli dərmanı dərd özüdür. Necə ki, Xətai deyir: "Bir dərdim var, min dərmanə
dəyişməm".
Fani dünyanın özü kimi dərdləri də fanidir və gülüncdür. Bu dərdlərin
yeganə mahiyyəti qısa müddətə də olsa, insanı öz nəfsindən ayırıb, Allaha
yaxınlaşdırmaqdır. Lakin, insan bunun fərqində olsa, nə gözəl olardı! Heyf ki,
çoxluq, bəzən isə tam əksəriyyət dərdə, müsibətə düçar olduğunda bunu vasitə,
fürsət, hədiyyə olaraq görmək əvəzinə daha da batır, bir günahdan başqa bir
günah çıxarır. Halbuki, yol və ərkan eşqə, gözəlliyə, vəhdətə və həqiqi həzzə
götürür.
Dünya gerçəkdən də fanidir, ölümlüdür, çünki gəlimli, gedimlidir. Ulu Dədə
Qorquddan mərhum Aşıq Veysələ cəmi bircə addım yoldur. Çünki məna və eşq üçün
zaman məcburiyyəti və məkan məhdudiyyəti yoxdur.
Anlatmam dərdimi dərdsiz insana,
Dərd çəkməyən dərd qiymətin biləməz,
Dərdim mənə dərman imiş, bilmədim,
Heç bir zaman gül tikansız olamaz.
Gülü yetişdirir tikanlı çalı,
Arı hər çiçəkdən yetirir balı,
İnsan səbr ilə bulur kamalı,
Səbr etməyən məqsudunu bulamaz,
Veysəl, günlər keçdi, yaş altmış
oldu,
Töküldü yarpağım, güllərim soldu.
Gəmi yükün aldı, qəm ilə doldu,
Hərəkətə kimsə mane olamaz,