Dayanıqlı inkişafla bağlı 17 məqsəd
Prezident İlham Əliyev Azərbaycan Respublikasının Dayanıqlı İnkişaf
üzrəMilli Əlaqələndirmə Şurasının yaradılması haqqında fərman verib. Fərmana
əsasən, ölkəmizdə Dayanıqlı İnkişaf üzrə Milli Əlaqələndirmə Şurası yaradılıb.Şuranın yaradılmasında əsas məqsəd 2030-cu ilədək Azərbaycan üçün
əhəmiyyət kəsb edən, qlobal məqsəd və hədəflərə uyğun milli prioritetləri və
onlara dair göstəriciləri müəyyən etməkdən, ölkədə sosial-iqtisadi sahələri
əhatə edən dövlət proqramlarının və strategiyaların Dayanıqlı İnkişaf
Məqsədləri ilə uzlaşdırılmasını təmin etməkdən, habelə Dayanıqlı İnkişaf
Məqsədlərinə nail olunması ilə əlaqədar illik hesabat hazırlamaqdan ibarətdir.Şura öz fəaliyyətinə yerli və xarici ekspertləri, mütəxəssisləri,
beynəlxalq təşkilatları və elm müəssisələrini cəlb edə, habelə ayrı-ayrı
istiqamətlər üzrə işçi qruplar yarada bilər.
Millət vəkili Tahir
Mirkişili qəzetimizə açıqlamasında bildirdi ki, Azərbaycan BMT üzvü olan
dövlətlərin 2015-ci ilin 25-27 sentyabr tarixlərində keçirilən Dayanıqlı
İnkişaf Sammitində 2016–2030-cu illər üçün təsdiqlənmiş Dayanıqlı İnkişaf
Məqsədlərinə qoşulub. BMT sənədlərinə əsasən Dayanıqlı İnkişaf 17 məqsəddən
ibarətdir. Millət vəkili qeyd etdi ki, bunlar yoxsulluğa, aclığa yox demək,
sağlamlıq, keyfiyyətli təhsil, gender bərabərliyi, yaxşı iş və iqtisadi
inkişaf, sülh və ədalət, hədəflərə çatmaq üçün əməkdaşlıq və s. məsələlərdir:
"Həmin məqsədlər kifayət qədər geniş məsələləri əhatə edir. Bu məqsədlərin
əksəriyyəti Azərbaycanda müxtəlif sənədlərdə əks olunub və onlara çatmaq üçün
davamlı iş aparılır. Ancaq məqsədlər əhatəli olduğundan və görülən işlərdə
davamlılıq tələb olunduğundan bütün bu işlərin əlaqələndirilməsinə bütün
ölkələrdə ehtiyac yaranıb. "Hədəflərə çatmaq üçün əməkdaşlıq” məqsədi də məhz
əməkdaşlığa çağırır”.
İqtisadçı alim Vüqar
Bayramovun sözlərinə görə, BMT dünyada dayanıqlı inkişafın təmin edilməsi ilə
bağlı konkret strategiyasını hazırlayıb və onu bütün dünya ölkələrində reallaşdırmaq
niyyətindədir: "Azərbaycan da BMT-nin proqramlarında fəal iştirak edir, BMT-nin Baş Assambleyasının qəbul etdiyi "Minilliyin Bəyannaməsi”nə qoşulmuş
ölkələrdən biridir. Bu bəyannamə çərçivəsində əsas məqsəd yoxsulluğun aradan
qaldırılması və dayanıqlı inkişafa nail olmaqdır. Bu istiqamətdə Azərbaycanda
bir sıra dövlət proqramları həyata keçirilib. Nəticə etibarilə regionların
inkişafı, regionlarda və ölkə üzə yoxsulluğun aradan qaldırılması, dayanıqlı
inkişafın təmin edilməsi ilə bağlı 2003-2015-ci illərdə real addımlar atılıb”.
V.Bayramov deyir ki, ötən il dayanıqlı inkişaf sammitində dayanıqlı
inkişafla bağlı yeni məqsəd və hədəflər müəyyənləşib. Azərbaycan da dayanıqlı
inkişaf üçün öhdəliklərin ölkəmizdə reallaşması ilə bağlı strategiyaya
malikdir: "Dayanıqlı inkişaf üzrə hədəflər çox fərqli sektorları əhatə edir. Bu
hədəflər nəticə etibarilə iqtisadi inkişaf, ekologiya, yoxsulluğun aradan
qaldırılması, gender bərabərliyi, təhsilin, səhiyyə xidmətlərinin keyfiyyətinin
artırılması, təmiz suya çıxış imkanlarının genişləndirilməsi, enerjiyə çıxış
imkanlarının gücləndirilməsi, iqtisadi inkişaf, sənaye, qeyri-bərabərliyin
aradan qaldırılması, dayanıqlı şəhərlər və icmaların formalaşması, eləcə də
istehlak və istehsal üzrə öhdəliyə malik cəmiyyətlərin qurulması, iqlim
dəyişiklikləri və s. istiqamətlər daxil olmaqla 17 məqsədə malikdir. 17
məqsədin də əsas vəzifəsi nəticə etibarilə dünyada, xüsusilə inkişaf etməkdə
olan ölkələrdə yoxsulluğun aradan qaldırılmasına nail olmaqdan ibarətdir”.
İqtisadçı bildirdi ki, dayanıqlı inkişaf üzrə hədəflər və eləcə də
məqsədlər 2016-cı ilin yanvarından qüvvəyə minib və 170-dən artıq ölkədə tətbiq
olunacaq: "Sözügedən bəyannamə növbəti 5 ili əhatə edəcək. Münaqişələrin həll
edilməsi, demokratik idarəetmənin formalaşması, iqlim dəyişiklikləri və çox
fərqli prinsiplər var ki, onların 170 ölkə üzrə tətbiqi nəzərdə tutulub.
Azərbaycanın da Dayanıqlı İnkişaf üzrə Əlaqələndirmə Şurasını formalaşdırması
əslində dayanıqlı inkişafla bağlı hədəflərə çatılması baxımından olduqca vacib
idi. Belə bir şurann formalaşdırılması təbii ki, Azərbaycanın dayanıqlı inkişaf
məqsədlərinə çatmaq ilə bağlı siyasi iradəsini nümayiş etdirir. Nəticə
etibarilə bu, Azərbaycanın "Minilliyin Bəyannaməsi”ndə qeyd olunan hədəflərə
daha qısa zamanda və daha səmərəli şəkildə nail olmasına imkan verir”.
V.Bayramov qeyd etdi ki, şuranın konkret öhdəlikləri olacaq və burada
fərqli dövlət qurumlarının nümayəndələri təmsil olunacaq: "Bütün bunlar
Azərbaycanın növbəti 15 ildə dayanıqlı inkişafa nail olmaqla bağlı konkret
addımlar atmasına şərait yaradacaq. Eləcə də şuranın fəaliyyətinə diqqət
yetirsək, bura qanunvericilik bazasının təkmilləşdirilməsi, eyni zamanda
dayanıqlı inkişaf məqsədinə nail olunması ilə bağlı görülmüş tədbirlərin hesabatlarının
hazırlanması, təqdim olunması, ictimaiyyətin məlumatlandırılması, yerli və
xarici ekspertlər, beynəlxalq təşkilatlarla birgə işçi qruplarının
formalaşdırılması və bu məqsədlərə nail olunması ilə bağlı fəaliyyətin
genişləndirilməsi daxildir. Bu isə birmənalı şəkildə ona gətirib çıxarır ki,
Azərbaycan BMT-nin dayanıqlı inkişafla bağlı məqsədlərinə nail olmağa çalışır.
Və təbii ki, şurasının formalaşması da növbəti 15 ildə sözügedən 17 hədəfə
çatılması ilə bağlı konkret "yol xəritəsi”nin hazırlanmasına imkan verəcək”.
Aygün Asimqızı