Danışıqların məqsədi işğal edilmiş torpaqların azad olunmasıdır - Fotolar
Prezident İlham Əliyevin
rəhbərliyi ilə həyata keçirilən xarici siyasət kursunda Dağlıq Qarabağ
münaqişəsinin həlli hər zaman bir nömrəli problem - əsas vəzifə kimi qarşıya
qoyulur. Dövlət başçısı İlham Əliyev xarici ölkələrə rəsmi səfərlərində,
beynəlxalq əhəmiyyətli tədbirlərdə ən yüksək tribunadan Dağlıq Qarabağ problemi
barədə həqiqətləri dünya ictimaiyyətinə çatdırır. Bununla bərabər, o, ATƏT-in
Minsk Qrupunun həmsədrləri və işğalçı Ermənistanın siyasi rəhbərliyi ilə
müxtəlif vaxtlarda görüşlər keçirir, münaqişənin dinc yolla, xüsusən də
Azərbaycanın ərazi bütövlüyü çərçivəsində həll olunması üçün danışıqlar aparır.
Cari il martın 19-da Avstriyanın paytaxtı Vyana şəhərində Azərbaycan Prezidenti
və Ermənistan baş naziri arasında keçirilən daha bir görüş də bu qəbildəndir.
İlk növbədə qeyd edək ki, bu görüşü Azərbaycanın növbəti diplomatik uğuru kimi
dəyərləndirmək olar. Çünki, Ermənistanda inqilab yolu ilə siyasi rəhbərlik
dəyişdikdən sonra işğalçı dövlətin rəsmiləri müxtəlif bəyanatlar səsləndirir,
danışıqlar prosesində separatçıların da iştirak etməsinə cəhdlər göstərirdilər.
Yəni, Ermənistan tərəfi danışıqların formatının dəyişdirilməsi ilə bağlı absurd
iddialar irəli sürürdü. Lakin 9 mart tarixində ATƏT-in Minsk Qrupu həmsədrləri
bəyanatla çıxış edərək formatın dəyişdirilməsinin qəbuledilməzliyini
bildirdilər. Azərbaycan tərəfi də öz növbəsində dəfələrlə formatın
dəyişilməzliyini vurğuladı.
Danışıqların
formatı dəyişməz qalır
Beləliklə də düşmən ölkənin
bu kimi bütün niyyətinin qarşısı alındı, işğalçı ölkənin lideri danışıqlar
masasına otuzduruldu. Xeyli müddət keçdikdən sonra Azərbaycan Prezidenti və
Ermənistanın baş naziri arasında ATƏT-in Minsk Qrupu həmsədrlərinin vasitəsi
ilə ilk dəfə, özü də 2 saatdan artıq təkbətək görüş keçirildi. Daha sonra
görüşə həmsədrlər və 2 ölkənin xarici işlər nazirləri də qatıldı, toplam 3 saatdan
artıq müddətdə danışıqlar aparıldı. Sözügedən görüşün keçirilməsi bir daha
təsdiq etdi ki, danışıqlar yalnız Azərbaycan və Ermənistan arasında aparılır və
format dəyişməz qalır.
Danışıqlar prosesinin mahiyyətinə gəlincə, Azərbaycanın
mövqeyi bəllidir və birmənalı xarakter daşıyır. Mövqeyimizi əsasən Helsinki
yekunu haqqında BMT Təhlükəsizlik Şurasının müvafiq qətnamələri təşkil edir.
BMT Təhlükəsizlik Şurasının qətnamələrinin tələblərinə uyğun olaraq, Ermənistan
qoşunları Azərbaycanın işğal olunmuş ərazilərindən çıxarılmalı və ölkəmizin
ərazi bütövlüyü, suverenliyi təmin olunmalıdır.
"Bu,
müstəqil Azərbaycanın suveren hüququdur”
Azərbaycan bu mövqeyindən
heç vaxt geri çəkilməyib, rəsmi səviyyədə aparılan danışıqlarda heç bir zaman
ölkəmizin ərazi bütövlüyü müzakirə mövzusu olmayıb. Həmsədrlərin təşkilatçılığı
ilə keçirilən son Vyana görüşündən sonra Prezident İlham Əliyevin Müdafiə
Nazirliyinin Xüsusi Təyinatlı Qüvvələrinin "N” saylı hərbi hissəsində olması,
hərbçilər qarşısında çıxış edərək həm ölkə ictimaiyyətinə, həm də beynəlxalq
aləmə verdiyi mühüm mesajlar bir daha onu deməyə əsas verir ki, Azərbaycan bir
qarış torpağını da işğalçı Ermənistana güzəştə getməyəcək, tarixi
ərazilərimizdə ikinci erməni dövlətinin yaradılmasına imkan verilməyəcək.
Azərbaycan
xalqının güclü iradəsinə, dəstəyinə və Silahlı Qüvvələrimizin peşəkarlığına,
qüdrətinə arxalanan Prezident İlham Əliyev danışıqlar yolu ilə Dağlıq Qarabağ
münaqişəsinin yalnız Azərbaycanın ərazi bütövlüyü çərçivəsində həllinin
mümkünlüyünü bir daha bəyan edib. Əks təqdirdə, Azərbaycan hərbi yolla işğal
altındakı torpaqlarını azad edəcək, ərazi bütövlüyünü təmin edəcək. Bu,
müstəqil Azərbaycanın suveren hüququdur.
Əsgər
və zabitlərimizlə fəxr edirik
Ali Baş Komandan İlham
Əliyev hərbçilər qarşısında çıxış edərkən diqqəti bir daha bu məsələyə yönəldib
və bildirib ki, bu gün Azərbaycan Ordusu uğurla inkişaf edir, ordu quruculuğu
prosesi sürətlə gedir, hərbi hissələr yenidən qurulur, yenidən tikilir, ordumuz
ən müasir texnika ilə təchiz edilir. O, bunu təbii hadisə kimi qiymətləndirib.
Deyib ki, Azərbaycan müharibə şəraitində yaşayır və müharibə hələ bitməyib,
yalnız onun birinci mərhələsi başa çatıb. Dövlətimizin başçısı bu gün
Azərbaycan Ordusunun dünya miqyasında güclü ordular sırasında öz potensialına
görə 52-ci yerdə olduğunu vurğulayıb.
2016-cı ilin uğurlu Aprel döyüşlərinə,
2018-ci ilin Günnüt, Qızılqaya əməliyyatlarına, mühüm strateji yüksəkliklərin ələ
keçirilməsinə diqqət çəkən Prezident İlham Əliyev həmin hadisələr zamanı həm
Azərbaycan hərbçilərinin, həm də mülki vətəndaşların böyük fədakarlıqlar,
qəhrəmanlıqlar göstərdiyini dilə gətirib. Qeyd olunub ki, bu gün hər bir
Azərbaycan vətəndaşı haqlı olaraq Azərbaycan Ordusu, o cümlədən peşəkar əsgər
və zabitlərimizlə fəxr edə bilər. Prezident deyib ki, Azərbaycan Ordusu
dövlətimizin ərazi bütövlüyünün qorunması işində rol oynayan əsas amildir. Bununla
o, Azərbaycanda xalq-iqtidar, xalq-ordu birliyinin olmasına, işğal altındakı
ərazilərimizin hər qarışının azad olunması ilə nəticələnən istənilən döyüşün
cəmiyyət tərəfindən dəstəkləndiyini bəyan edib. Bununla da rəsmi Yerevana və
havadarlarına mesaj göndərib ki, Ermənistan qeyri-konstruktivlikdən, işğalçılıq
siyasətindən geri çəkilməzsə, Azərbaycan xalqının və ordusunun gücü ilə
üzləşəcək.
"Böyük
qayıdış”ın başlanğıcı
Aprel döyüşləri nəticəsində
Cocuq Mərcanlı kəndinə yeni həyat verilməsinə, bu yaşayış məntəqəsinin qısa
müddət ərzində yenidən qurulmasına, 150 fərdi ev, məktəb, uşaq bağçası, tibb
məntəqəsi, Şuşa məscidinin bənzəri olan məscidin tikilməsinə, yeni iş
yerlərinin yaradılmasına toxunan Prezident İlham Əliyev Azərbaycan xalqının
işğal faktı ilə heç vaxt barışmayacağını bəyan edib. Bildirib ki, hər bir
Azərbaycan vətəndaşı işğal altındakı torpaqlarımızın tezliklə azad olunması və
ərazi bütövlüyümüzün bərpa edilməsi arzusu ilə yaşayır. O, bununla "Böyük
qayıdış”ın elə də uzaqda olmadığını, Cocuq Mərcanlıya yeni həyat verilməsinin
bu istiqamətdə atılan ilk addım olduğunu nümayiş etdirib.
Ölkə başçısı bütün
dünya ictimaiyyətinin Dağlıq Qarabağı Azərbaycanın ayrılmaz hissəsi kimi
tanımasına da toxunub. Bildirib ki, bütün mötəbər beynəlxalq təşkilatlar
bununla bağlı müvafiq qərar və qətnamələr qəbul ediblər, indiyə qədər heç bir
ölkə qondarma "Dağlıq Qarabağ Respublikası”nı tanımayıb və bundan sonra da tanımayacaqdır.
Tarixi və hüquqi əsasın, haqq-ədalətin Azərbaycanın tərəfində olduğunu
xatırladan dövlət başçısı bildirib ki, danışıqların davam etdirilməsinin yeganə
məqsədi işğal edilmiş torpaqların azad olunmasıdır.
Hərbi
əməliyyatlar daha geniş miqyas alacaq
Sonda bir daha vurğulamaq
yerinə düşər ki, Prezident İlham Əliyevin Ermənistan-Azərbaycan, Dağlıq Qarabağ
münaqişəsinin sülh yolu ilə tənzimlənməsi üçün keçirilən son Vyana görüşündən
dərhal sonra Müdafiə Nazirliyinin Xüsusi Təyinatlı Qüvvələrinin "N” saylı hərbi
hissəsində olması, hərbçilər qarşısında çıxış etməsi Ali Baş Komandanın yalnız
öz xalqına və ordusuna arxalandığını, Azərbaycanın işğalçı Ermənistana bundan
sonra da heç bir güzəştə getməyəcəyini bir daha nümayiş etdirib.
Hərbçilər
qarşısında çıxış edərkən səsləndirdiyi fikirlərlə dövlət başçısı gec-tez, nə
yolla olursa-olsun Azərbaycanın öz suverenliyini, ərazi bütövlüyünü bərpa
edəcəyini bəyan edib. Bu o deməkdir ki, sülh danışıqları heç bir nəticə
verməyəcəyi halda uğurlu Aprel döyüşləri, Günnüt əməliyyatı daha geniş miqyasda
baş verəcək, Azərbaycan hərbi yolla işğal altındakı Dağlıq Qarabağı və ətraf
rayonları azad edəcək.
Rufik
İSMAYILOV