Danimarka “Şimal axını”nı bloklayacaqmı?

Danimarka “Şimal axını”nı bloklayacaqmı?

İqtisadiyyat
02 Noyabr 2019, 16:30 1367
AFR-in Baltik dənizi sahillərində yerləşən Lubmin adlı kommunasında "Şimal axını” qaz kəmərinin ikinci növbəsinin kəsişmə zonası yerləşib. Qaz kəməri Avropanın qaz nəqliyyat sisteminə məhz burada qoşulmalıdır.
AZƏRTAC xəbər verir ki, boruların artıq 87 faizi Baltik dənizinin dibi ilə çəkilib və magistralın bu ilin sonuna qədər işə salınması nəzərdə tutulub. Konsorsium nümayəndələri bu yaxınlarda bildiriblər ki, onlar qalan işləri vaxtında başa çatdırmağa ümid bəsləyirlər.
Lakin bu günlərdə boru kəmərini çəkənlər üçün xoşagəlməz hadisə baş verib: rəsmi Kopenhagen Danimarkanın ərazi sularında boru kəmərinin çəkilməsinə icazə verməyib. Odur ki, Rusiyadan Almaniyaya qaz kəmərinin vaxtında istifadəyə verilməsi hələlik sual altındadır. Konsorsium apelyasiya şikayəti verib və indi məsələ baxılması üçün Danimarka hökumətinə qaytarıla bilər.
Yeri gəlmişkən, qaz kəmərinin Almaniya hissəsinin dəniz və yerüstü sahələrində işlər başa çatmaq üzrədir və Almaniya Rusiyadan qaz qəbul etməyə hazırdır.
İndi iş Danimarkaya qalıb. Lakin bu ölkə cavab verməyə hələlik tələsmir. Kopenhagenin cavabı nə qədər uzadacağı isə hələlik məlum deyil.