Dağların qoynunda əsrarəngiz kompleks - FOTOSESSİYA
Mayın
22-də Mədəniyyət və Turizm Nazirliyinin dəstəyi, Azərbaycan Sağlamlıq və Termal
Turizmə Dəstək Assosiasiyası, "Synergy Hospitality” və "AtaTravel"-in
birgə təşkilatçılığı ilə "Qalaaltı Hotel & SPA” müasir müalicə-istirahət
kompleksinə info-tur təşkil olundu. İnfo-turda ölkəmizdə fəaliyyət göstərən
100-ə yaxın yerli turizm şirkəti və media nümayəndələri iştirak edirdi. İnfo-turun
keçirilməsində əsas məqsəd "Qalaaltı Hotel & SPA” sağlamlıq və istirahət mərkəzinin
turizm potensialının tanıdılması və ölkəmizin sağlamlıq turizminin daha geniş təbliğ
olunması idi. İştirakçılar əvvəlcə yüksək dağlıq ərazidə, tarixi bir yerdə və əsrarəngiz
təbiət qoynunda yerləşən "Qalaaltı Hotel & SPA” müasir müalicə-istirahət
kompleksi və onun təqdim etdiyi çeşidli, unikal xidmətlərlə ətraflı tanış
oldular. Kompleks Azərbaycanın qədim tarixi-mədəniyyət abidələrindən olan Çıraqqalanın
yaxınlığında, sıldırım qayanın altında yerləşir. Dəniz səviyyəsindən 700 metr
yüksəklikdə yerləşən yeni kompleks məşhur "Qalaaltı” kurortunun bazasında inşa
edilib. Təxminən 7,1 hektar sahəsi olan kompleksdə eyni zamanda 354 nəfəri qəbul
edə biləcək hotel, villa və kotteclər var.
Məkanla
tanışlıqdan sonra "Qalaaltı Hotel & SPA” sağlamlıq və istirahət mərkəzinin
turizm imkanları və ölkəmizin sağlamlıq turizminə həsr olunmuş dəyirmi masa
keçirildi. Konfransı giriş sözü ilə açan Azərbaycan Sağlamlıq və Termal Turizmə
Dəstək Assosiasiyasının prezidenti Ruslan Quliyev bildirdi ki, son illər ərzində
turizm təşkilatları və media qurumları arasında yaranan peşəkar əlaqələr Azərbaycan
turizminin təbliğ olunmasına, ölkəmizdə turizmin inkişafına öz töhfəsini verir:
"Azərbaycanın sağlamlıq turizmi ilə bağlı ənənələri mövcuddur. Bu ənənələri bərpa
edərək və yeni innovativ sistemləri təqdim etməklə daha geniş coğrafiyada tanınmaq
mümkündür. Başlıca məqsədimiz ölkəmizin bu sahədə potensialını geniş şəkildə təbliğ
etməkdir. Azərbaycanın sağlamlıq turizminin mirvarisi sayılan "Qalaaltı Hotel
& SPA” sağlamlıq və istirahət mərkəzi
Avropa Termal Tarixi Şəhərlər Assosiasiyasının üzvü seçilib. Ölkədə fəaliyyət
göstərən sağlamlıq və istirahət mərkəzlərindən məhz "Qalaaltı”nın Avropanın
termal şəhərlər xəritəsinə düşməsi onun imkanlarına və turizm axınına müsbət təsir
göstərəcək. Sağlamlıq turizmini digər turizm növlərindən fərqləndirən əsas cəhət
buranın 365 gün fəaliyyət göstərə bilməsidir. Burada gecələmə müddəti 7-21
gündür. Bu da sağlamlıq turizmindən gələn gəlirlərin daimi və yüksək olmasını təmin
edir”.
Daha
sonra çıxış edən "Qalaaltı Hotel & SPA”
sağlamlıq və istirahət mərkəzinin direktoru Turqay Arı bildirdi ki,
Naftalan və Qalaaltı dünyada çox unikal
turizm imkanlarına malikdir və bu baxımdan yalnız Truskavetslə müqayisə oluna
bilər: "İstər Qalaaltıda, istərsə də Naftalanda son texnologiyalara dayanan
unikal turizm mərkəzlərimiz var – "Qalaaltı Hotel & SPA” və "Naftalan-Çinar”. Bu mərkəzlərdə yüksək səviyyəli
istirahətdən əlavə, çox effektli müalicəni təmin edən gözəl şərait və çox peşəkar
həkimlər var. "Qalaaltı Hotel & SPA”
sağlamlıq və istirahət mərkəzində hazırkı dövr üçün çox münasib qiymətə
- iki nəfər üçün 130 manata bir günlük yüksək səviyyəli istirahət mümkündür. Bu
qiymətə iki nəfər üçün 3 dəfə yemək, istirahət və əyləncə daxildir. Müalicə
daxil olmaqla qiymətlər isə belədir: "Superior” otaqlarda 7 günlük "single” (tək)
üçün 614, "double” (iki nəfər) üçün 939, 14 günlük "single” üçün 1100, "double” üçün 1669, 21
günlük "single” üçün 1562, "double” üçün 2360, "suit” otaqlarda isə müvafiq
olaraq 926, 1370, 1727, 2532, 2498 və 3653 manat. Buradakı əyləncə mərkəzi çox
genişdir və 5400 kvadratmetr ərazini əhatə edir”.
"Qalaaltı
Hotel & SPA” sağlamlıq və istirahət mərkəzinin baş həkimi Vahid Vəliyev isə
bildirdi ki, hələ sovetlər dönəmində bu yerlərə ittifaqın hər yerindən müalicə
və istirahət üçün gəlirdilər: "Hələ o vaxtlar buradakı sanatoriya göstərdiyi
xidmətlərə görə çox yüksək səviyyəli diplomlar almışdı, dəfələrlə ikinci yeri
tutmuşdu. Qalaaltı suyu çox müalicəvidir və neft tərkiblidir. Burada iki cür
bulaq-maye mənbəyi var – bir-biri ilə yanaşı olan neft və su bulaqları. Bu su
müalicə üçün, əsasən də uroloji xəstəliklər üçün olduqca faydalıdır.
Sidikqovucu, böyrək daşlarının
çıxarılması, həzm və ifrazat sistemlərinin müalicəsində əvəzsizdir. Həmçinin mərkəzin
quru iqlimli yüksəklikdə olması ürək, oynaq xəstəlikləri və digər xəstəliklərin
müalicəsinə də çox ciddi imkanlar yaradır. Bundan başqa, burada yaxın
zamanlarda raxit və digər xəstəliklərlə bağlı uşaqların müalicəsi üçün olduqca
yüksək şərait yaradılacaq və belə xəstəlikləri olan uşaqların müalicəsini həyata
keçirəcəyik”.
Həkim
bildirdi ki, müalicə seksiyasına qəbul olunanlar öncə ən müasir üsullarla hərtərəfli
müayinə olunurlar, nəticədə üzə çıxan xəstəliklərə əsasən müalicəyə götürülürlər.
Burada böyrək daşları cərrahi əməliyyatsız düşürülür. Müalicə ilə yanaşı, xəstələrin
gəzintisi və idmanı təşkil olunur. Böyrək xəstəliklərinin ölkəmizdə və dünyada
çox geniş yayılmış və ağır xəstəliklərdən olduğunu nəzərə alsaq, bu mərkəzdə müalicə
yolu ilə, heç bir əməliyyat keçirmədən xəstəliklərdən qurtulmaq mühüm göstəricidir:
"Onu da deyək ki, "Qalaaltı” kompleksində tibbi mərkəz müasir avadanlıqlarla təchiz
edilib. Laboratoriya, rentgen və ultrasəs müayinələri üçün lazımi şərait
yaradılan mərkəzdə fizioterapiya, elektroterapiya, maqnitoterapiya, hidroterapiya,
hidrokolonterapiya otaqları var. Burada müalicə alanlar masaj və palçıq
applikasiya otaqlarından istifadə edə bilərlər. Tibbi mərkəzdə uroloji xidmətlər
də göstərilir. Kosmetoloji bölmədə prosedur otağı, krioterapiya, solyarium,
ozon kapsula və haloterapiya-duz otaqları var”.
Mədəniyyət
və Turizm Nazirliyinin nümayəndəsi Sərxan Rəsulov bildirdi ki, son illərdə
nazirlik bölgələrə ardıcıl info-turlar həyata keçirir. Məqsəd Azərbaycan
turizminin böyük imkanlarını təqdim etməkdir.
"AtaHolding” Şirkətlər Qrupunun Korporativ kommunikasiyalar
şöbəsinin rəisi Dilarə Zamanova isə həyata
keçirilən info-turların böyük önəmindən danışdı: "Bu cür info-turlar sayəsində
turistlər ölkəmizdə müalicəvi və termal turizmlə bağlı ən yaxşı şərait və yüksək
xidmətlər, çox münasib qiymətlər təklif edən mərkəzləri yaxından tanımış
olacaqlar”.
Şəfa
Tapdıq