Daha yüksək səviyyəli xidmət üçün innovativ inkişaf əsas şərtdir
İqtisadi İslahatların Təhlili və
Kommunikasiya Mərkəzində (İİTKM) "Qlobal innovasiya indeksi 2019”da
Azərbaycanın mövqeyi ilə bağlı müzakirələr aparılıb. Mərkəzdən bildirilib ki,
müzakirələrdə Biznes Mühiti və Beynəlxalq Reytinqlər üzrə Komissiyanın
aidiyyəti işçi qruplarının rəhbərləri və nümayəndələri iştirak edib. Qeyd
olunan reytinqdə Azərbaycanın mövqeyinin yaxşılaşdırılması üçün görülən işlər
barədə dolğun məlumatların toplanılması, innovasiyanın inkişafı prosesində
iştirak edən qurumların lazımi səviyyədə əlaqələndirilməsi və gələcək islahat
tədbirləri haqqında müzakirələr olub.
İİTKM-in icraçı direktoru Vüsal
Qasımlı bildirib ki, Prezident İlham Əliyevin rəhbərliyi ilə yeni iqtisadi
modelə keçid əsasında aparılan iqtisadi islahatlarda qlobal innovasiyalar
trendinə uyğunlaşma prioritet təşkil edir. O, Strateji Yol xəritələrində də
innovasiyayönümlü inkişafa xüsusi yer verildiyini, elektron hökumət və elektron
məhkəmə, habelə təhsil və elm sahəsində görülən işlərdən danışıb: "Ölkə
başçısının tapşırığına uyğun olaraq nüfuzlu beynəlxalq məsləhətçi şirkətlər
cəlb edilməklə innovasiya strategiyası hazırlanır, innovativ inkişaf sahəsində
koordinasiya gücləndirilir, Dünya İqtisadi Formunun 4-cü Sənaye İnqilabı
Mərkəzi ilə əməkdaşlıq qurulub, İnnovasiyalar Agentliyi fəaliyyətə başlayıb,
"EnterpriseAzerbaijan.com” portalı və digər inkubasiya və akselerasiya
mərkəzləri innovativ startapları dəstəkləyir. Bütövlükdə innovasiya
ekosisteminin inkişaf etdirilməsi "Qlobal İnnovasiyalar Hesabatı”nda
Azərbaycanın mövqelərinin güclənməsinə zəmin yaradacaq. Bunun üçün Biznes
Mühiti və Beynəlxalq Reytinqlər üzrə Komissiya çərçivəsində də müvafiq
tədbirlərin həyata keçirilməsi planlaşdırılır”.
Maraqlıdır, innovasiyayönümlü
iqtisadi inkişaf nədir və ölkəmizin müvafiq potensialı varmı?
İqtisadçı Ramin Rəhimov bildirir
ki, qlobal innovasiyayönümlü iqtisadi islahatlar müasir iqtisadiyyata keçid
deməkdir: "Burada rəqəmsal iqtisadiyyatdan, beynəlxalq rəqəmsal ticarət
əməliyyatlarından, nağdsız hesablaşmalardan söhbət gedir. Həmçinin
vətəndaşların vaxt itkisi olmadan qurumlara müraciəti, yəni məsafədən idarə
olunma vasitəsi ilə bu kimi məsələlərin həll olunması, eyni zamanda müasir, son
dərəcə inkişaf etmiş texnologiyalarla iqtisadi inkişafa nail olunma nəzərdə
tutulur. İnnovativ trend - dünyada beynəlxalq qlobal iqtisadiyyatda hansı
iqtisadi modellər tətbiq edilirsə, onların Azərbaycan iqtisadiyyatına
inteqrasiya olunması deməkdir. Yəni Azərbaycanın da həmin modellərdən istifadə
etməsi mümkündür.
İqtisadçı ölkəmizin bu potensiala
malik olduğunu qeyd edir: "Əslində, Azərbaycan bu modelləri tətbiq etmək
potensialına malikdir. Bu potensialın arxasında lazımı rəqəmsal texnologiyanın
olması vacibdir. Hamımıza bəllidir ki, ölkəmizdə rəqəmsal texnologiya sahəsi
yüksək səviyyədə inkişaf edib. Yəni ölkəmizdə qlobal innovativ iqtisadi
islahatların aparılması üçün hər cür şərait var. Sadəcə, bunlar mərhələli
şəkildə həyata keçirilməlidir. İlk olaraq dövlətin strateji əhəmiyyətli
strukturlarından başlanmalı və özəl sektora qədər davam etdirilməlidir.
Prezidentin tapşırığı ilə rəqəmsal iqtisadiyyat, bankçılıq və marketinq - bu 3
strategiya əsas götürülüb. Ölkəmizdə texnoloji baxımdan baza var, sadəcə
bunların tətbiqi üçün hüquqi bazanın formalaşdırılması da əsasdır. Hüquqi
bazanın tətbiqi isə vaxt tələb edən işdir. Bu işdə qabaqcıl ölkələrin
təcrübələrindən istifadə etməliyik”.
İqtisadçı Pərviz Heydərov deyir
ki, innovativ inkişafın əsas məqsədi
daha yüksək xidmətin təqdimindən ibarətdir: "Hazırda bütün dünyada 4-cü sənaye
inqilabı yaşanır. Təbii ki, Azərbaycan da bu dünyanın bir parçası olaraq sənaye
inqilabında iştirak edir. Əgər biz müvafiq iqtisadi inkişafdan, tərəqqidən
danışırıqsa, bunu innovasiyalarsız təsəvvür etmək mümkün deyil. Təsadüfi deyil
ki, dövlətimiz son dövrlər bu sahəyə xüsusi diqqət yetirir və lazımı addımlar
atır, iqtisadiyyatın innovasiyayönümlü inkişafının təmin olunması üçün hər cür
dəstəyi göstərir. İnnovasiyayönümlü inkişaf müasir informasiya
texnologiyalarının daha əyani şəkildə istifadə edilməsini nəzərdə tutur. Sosial-iqtisadi
sahələrdə elektronlaşmanın olması əhalinin vaxt itkisinin qarşısını alır. İnnovativ
inkişafın əsas məqsədi daha yüksək xidmətin təqdimindən ibarətdir. Günümüzdə
bir çox ölkələrdə bu üsuldan istifadə edir. Azərbaycan da dünyanın bir parçası
olduğu üçün bu inkişafa qoşulub və zəruri addımlar atır”.
Günel
Azadə