Corc Sorosa Avstriya qadağası
Sebastian
Kurz dünyanın və Avstriyanın ən gənc siyasi lideri sayılır. Bir zamanlar media
onun haqqında "Avstriyanın dahi cocuğu" deyə, yazırdı. 27 yaşında
ölkəsinin xarici işlər naziri olan bu şəxsin hazırda 31 yaşı var. Seçkilərdə
qalib gəlmiş Avstriyanın Xalq Partiyasının gənc lideri S.Kurz bu günlərdə sensasiya
sayıla biləcək addım atıb. Gənc və qalib lider milyarder iş adamı Corc Sorosa Açıq
Cəmiyyət Fondunun fəaliyyətini Avstriya ərazisində 28 gün ərzində dayandırmaq
barədə ultimatum verib. Əks təqdirdə hüquqi yola əl atacağına dair xəbərdarlıq
edib. Yournewsire.com saytı yazır ki, S.Kurz fondun Avstriyadakı fəaliyyətini
dayandırmadığı təqdirdə "Millətin demokratiyasına hücum" maddəsi ilə
hüquqi işlər başladacağını qeyd edib (http://yournewswire.com/youngest-leader-george-soros/amp/).Gənc
lider Corc Sorosun 24 milyardlıq sərvətinin 18 milyardını fonda bağışladıqdan
sonra dərhal fəaliyyətə keçməyin vacib olduğunu bildirib. S.Kurz "Vəziyyət
kritikləşib. Soros qlobal idaerəetməni əldə saxlamaq üçün bütün fürsətləri
ortaya qoyur. Yanlış məlumat və medianın manipulyasiyası bir gecədə daha da
artdı. Biz narahatıq",- deyə vurğulayıb. "Açıq Cəmiyyət
İnstitutu"nu nə üçün qadağan etmək istəyirsiz?" sualına Kurz belə
cavab verib:"Çünki 2017-ci ildir". "Soros əlindəki pulu
siyasətçiləri, jurnalistləri, ictimai sektoru ələ almaq və dünyada özünə imic
yaratmaq üçün istifadə edir", deyə Kurz əlavə edib.
Xatırladaq ki, Soros
Fondu biznesdən tutmuş missionerliyə qədər müxtəlif
sahələri əhatə edir. Fondun başında maliyyə möhtəkiri, xaosun
memarı kimi ad çıxaran, dünyaca məşhur fırıldaqçı Corc Soros dayanır. Milyardlarla
dollar sərvətə sahib olan və dünyanın ən varlıları sırasında yer alan C.Sorosun "xeyriyyəçilik” missiyası 1979-cu ildə təsis edilmiş Açıq
Cəmiyyət İnstitutu ilə başlayıb. Hazırda bu qurum dünyanın 30-dan çox ölkəsində
fəaliyyət göstərir. 2009-cu ildə Açıq Cəmiyyət İnstitutunun Yardım Fondu dünya
üzrə bütün proqramlara 683 milyon dollar (OSİ Report 2009) xərcləyib. C.Sorosun
yaratdığı bu qurumlar "demokratiya və insan haqları”nı əldə bayraq tutan
onlarla təşkilatı maliyyələşdirir. Xüsusən Varşava Müqaviləsi Paktı dağıldıqdan
sonra bütün inqilab və çevrilişlərdə Sorosun adı hallanır. "Gül inqilabları”nda
Soros əsas aktorlardan biridir. ABŞ-ın hökumət olaraq nüfuzunun zəif olduğu
əksər regionlarda, o cümlədən İslam, post-sovet, sosialist, Cənub-Şərqi Asiya
ölkələrində bu fond ən aktiv rol oynayır.
Sorosun maliyyə möhtəkirliyi bütün dünyaya
məlumdur. 1997-ci ildə o, birja spekulyantları vasitəsi ilə başda Malayziya və
Sinqapur olmaqla, bəzi Asiya-Sakit okean bölgəsinə aid olan ölkələrin
valyutalarının dəyərini da aşağı salıb. Bundan sonra onun növbəti hədəfi Çin
olub. Lakin Pekində onun cəhdlərinin qarşısı alınıb. ABŞ-da da Sorosun maliyyə imperiyası daim tənqid hədəfindədir. Belə ki,
bu məşhur "xeyriyyəçi” ölkədə varlılar üçün daha ağır vergi yükü və
fəaliyyətlərinə ciddi nəzarət mexanizmi tələb etdiyi halda, özü daim nəzarətdən
yayınmağa çalışıb. Onun əsas qazancını təşkil edən şirkətlər ofşorlardır.
C.Soros maliyyə əməliyyatlarını 1969-cu ildə yaratdığı "Quantum Fund NV”
vasitəsilə həyata keçirir. Rəsmi olaraq bu şirkət Holland Antil adalarında
qeydiyyatdadır və C.Soros idarə heyətində təmsil olunmur, yalnız investisiya məsləhətçisidir.
Bu tip fondlarda səhmdarlar açıqlanmır. "Quantum Fund”un adı dünyanın bütün
yerlərində qaranlıq maliyyə əməliyyatlarında hallanır. Qeyd edilən faktlardan
da göründüyü kimi, ABŞ-da varlılar üçün daha ağır şərtlər tələb edən birisi
müxtəlif yollarla vergidən yayınır və hətta ölkədə vergi qeydiyyatında deyil.
Ümumiyyətlə, Sorosun maliyyə imperiyası fəaliyyətinə nəzarət güclü olmayan
investisiya bankları, ofşor investisiya fondları, hedge fondlar və bu kimi
qurumlar üzərində qurulub.
Məhz bu kimi amillər nəzərə alınaraq, dünyanın
bir sıra ölkələrində Soros fondlarının fəaliyyəti dayandırılıb və ya
məhkəməyə verilib. 2002-ci ildə Paris məhkəməsi C.Sorosu "Societe
Generale” bankı haqqında məxfi məlumatları bilməsindən sui-istifadə edərək onun
səhmlərinin alqı-satqısından böyük qazanc götürdüyü üçün 2,2 mln. avro
məbləğində cərimələyib. 2009-cu ildə Macarıstanın ən böyük bankı "OTP Bank
Nyrt”-ın səhmlərinin məqsədli şəkildə dəyərdən düşməsi haqqında spekulyasiya
yaradaraq bundan faydalandığı üçün "Soros Fund Management” 2,2 mln. dollar
cərimələnib. Rusiyada da birjada Sorosun möhtəkirliyi ilə bağlı bir neçə il
bundan öncə məsələ qalxıb. Rus kəşfiyyatı müəyyən edib ki, Soros İsveç və
Danimarka derivativləri vasitəsilə Rusiya Fond bazarına hücum etmək niyyətindədir.
Məhz bundan sonra Rusiyada qeyri hökumət təşkilatlarının xaricdən
maliyyələşdirməsinin qadağan edilməsi ilə bağlı qərar qəbul olunub və Açıq
Cəmiyyət İnstitutunun fəaliyyəti məhdudlaşdırılıb. Sözügedən səbəbdən,
Belarusda, Özbəkistanda, Türkmənistanda da Açıq Cəmiyyət İnstitutunun
fəaliyyəti qadağan olunub.
Rufik İSMAYILOV