Üç illik "atəşkəs"i "silah paytaxtı"nda pozan gənc - Portret
Onun Rusiya tatamisində göstərdiyi şücaət dərsliklərə düşəcək səviyyədə idi
Adəti üzrə, böyüklər və
digər yaş qruplarının qitə və dünya çempionatları başa çatdıqdan sonra 23
yaşadək cüdoçular arasında da qitə sınağı baş tutdu. Rusiyanın İjevsk şəhərində
keçirilən Avropa çempionatının yekunlarının millimiz üçün uğurlu olduğunu deyə
bilərik. Sayca 17-ci belə yarışa yalnız oğlanlardan ibarət olmaqla, 9 nəfərlik
heyətlə qatılan yığmamız, bir qızıl, bir gümüş medalla komanda hesabında ilk
"beşliy"i qapadı. Belə ki, ilk gündə mübarizə aparan Nurlan
Osmanov(66 kq) yalnız rusiyalı rəqibinə uduzaraq, fəxri kürsünün ikinci
pilləsinə qalxdısa, növbəti gündə 73 kiloqramda çıxış edən Rəşid Məmmədəliyev
çempionatın əsas favoriti sayılan şimal qonşularımızın təmsilçisini də
üstələyib, üç illik aradan sonra Azərbaycana U-23 Avropa birinciliyinin baş
mükafatını gətirdi. Artıq ölkə cüdosunun ən önəmli simalarından birinə çevrilən
Hidayət Heydərovun 2016-cı ildə İsraildə qazandığı analoji uğuru təkrarlayan
çempionumuzla yaxından tanış olmaq istəyirsinizsə, diqqətiniz bizdə olsun.
Futbol,
basketbol... - nəhayət, cüdo
İjevsk qəhrəmanımız, 21
aprel 2000-ci ildə Bakıda anadan olub. Cüdo ilə 9 yaşından məşğul olan çempion,
onadək qısa fasilələrlə bir müddət idman gimnastikası, futbol, basketbol və
karateyə gedib. Belə ki, Elnur Məmmədlinin Pekin zəfərindən sonra övladlarını
cüdoya yazdırmağa həvəslənən yüzlərlə valideyn kimi, Rəşidin də atası oğlunu
Azərbaycanda çox populyar olan bu döyüş təliminin sıralarına qoşub. Beləcə,
bunadək getdiyi bütün növlərdə heç cür duruş gətirməyən balaca Rəşid, özünü
cüdoda tapır. Yeddi ilə yaxın "Lider" idman klubunun kiçik cüdo
zalında məşq edirsə, 16 yaşından ölkənin ən prestijli cüdo klublarından hesab
olunan, cüdomuza Rüstəm Orucov, Elmar Qasımov, Orxan Səfərov kimi parlaq
simaları qazandırmış "Atilla"ya keçir. Lakin Məmmədəliyevin
yeniyetməlik dövrü nəzərəçarpacaq nailiyyətlərlə yadda qalmayıb. Avropa
çempionumuzun hesabında aşağı yaş kateqoriyası üzrə ölkə birinciliklərinin bircə
medalının olmaması maraqlı faktdır, hər halda.
Silsilə
uğursuzluqlar
"Bu günədək məni ən
çox təəssüfləndirən hal öz səhvim ucbatından yeniyetmələr arasında son Avropa
birinciliyini qaçırmağımdır" deyən Məmmədəliyev, cari ilə təsadüf edən
gənclər arasında ilk qitə çempionatında da uğursuzluqla üzləşib. Finlandiyada
keçirilən sözügedən yarışda o, ilk görüşdəcə ev sahibinə uduzaraq, medal
şansını itirib. Bunadək isə Rəşid 2016-2017-ci illərdə Antalyada təşkil edilən yeniyetmələrin
Avropa kuboku, habelə, cari ilin aprel və iyun aylarında, müvafiq olaraq,
İtaliya və Avstriyada keçirilən gənclərin qitə kubokunda iştirak etsə də, sonda
əliboş qalıb. Maraq üçün qeyd edək ki, o, bu yarışlarda adətən elə ilk
mərhələlərdəcə uduzduğundan, bürünc medal uğrunda mübarizə aparmaq şansı belə,
qazanmayıb. İjevskədək baş verən bütün bu uğursuzluqların arasında üz güldürən bir
məqam var ki, o da elə bu ilin avqustunda keçirilən 23 yaşadək cüdoçular
arasında Azərbaycan çempionatındakı birincilikdir.
Özü
də inanmırmış...
Açıq danışsaq,
Məmmədəliyevin AÇ-də "qızıl" medal qazanacağını heç kim
proqnozlaşdırmırdı. Hər halda, reytinqdə ilk "200-lük"də də qərarlaşmayan
bir cüdoçunun qələbəsi istənilən yarışın əsas sensasiyası kimi qəbul edilməlidir.
Yeri gəlmişkən, bu, onun özü üçün də sürpriz olub: "Davamlı uğursuzluqlar
özümə qarşı inamsızlıq hissi formalaşdırmışdı. Yarışa yola düşənədək ümidsiz
əhval-ruhiyyədə idim. Açığı, heç məşqlərdə də özümü normal göstərə bilmirdim.
Amma çempionatın ab-havası mənə yaxşı təsir elədi. Qarşıma məqsəd qoydum ki,
nəhayət, özümü göstərəcəyəm. Görüşdən görüşə gücümə inamım artırdı. Hər
qələbədən sonra özümə "bu rəqibi məğlub etdimsə, niyə də onu
keçməyim" sualını verirdim.
Çempionluq
üçün 33 dəqiqə 23 saniyə!
19 yaşlı Məmmədəliyevin
Rusiyanın "silah paytaxtı"nda göstərdiyi şücaət dərsliklərə düşəcək
səviyyədə idi. Keçirdiyi beş görüşün üçünü "ippon"la başa vuran
Rəşid, qələbələrindən dördünü yorucu "qızıl xal"da qazandı.
Yarımfinalda moldovalı rəqibinin müqavimətini 10 dəqiqənin tamamında qırdısa,
rusiyalı Ayub Xajaliyevi 6 dəqiqə 48 saniyə davam edən mübarizənin yekununda
"gümüş"lə barışmağa vadar etdi. Ümumilikdə, beş görüşə 33 dəqiqə 23
saniyə sərf edərək, qalibiyyət sevinci yaşamaq dünya cüdosunda nadir haldır.
Görünür, Məmmədəliyev bu yarışa özünü psixoloji cəhətdən yetərincə güclü, uzun
illərin təcrübəsini daşıyan idmançılara xas ustalıqla hazırlayıbmış.
Kifayət
, Hidayət və Rəşid
Yuxarıda vurğuladığımız
kimi, İjevskdə keçirilən AÇ sayca 17-ci idi. İlk dəfə 2003-cü ildə Ermənistanda
təşkil olunan bu yarışda iştirak etməmişdiksə, növbəti il Sloveniyada ilk
"qızıl"a sevinmişdik. Azərbaycan qadın cüdosunun gəlmiş-keçmiş ən
uğurlu nümayəndəsi Kifayət Qasımova 57 kiloqram çəkidə medal hesabımızı
açmışdı. Lakin sonrakı 12 il ərzində bir neçə dəfə əsas hədəfə yaxınlaşsaq da,
yekun nəticədə digər əyyarlı mükafatlarla kifayətlənmişdik. Beləliklə, Hidayət Heydərovdan
üç il sonra analoji uğuru təkrarlayan Rəşid Məmmədəliyev, 23 yaşadək cüdoçular
arasında tarixdə sayca üçüncü Avropa çempionumuzdur.
"Çempionluğumu
o seçimlərə borcluyam"
Rəşidi, hələ bir il də
gənclər arasında yarışlarda izləyə bilərik. İjevskdəki zəfər sayəsində
özünəinamını əhəmiyyətli dərəcədə bərpa edən cüdoçumuz, növbəti ildə, sadəcə
gənclərin deyil, böyüklərin mübarizəsində də adından söz etdirmək gücündədir.
Ehtiyatlı, bir az da təvazökar açıqlamaları ilə diqqət çəksə də, 23 yaşlılar
arasında Avropa çempionluğu kifayət qədər ciddi nailiyyətdir. Ardını gətirmək,
tezliklə uğurları sıralamaq üçün yetərincə potensialı var. Onu da nəzərə alaq
ki, Məmmədəliyevin çıxış etdiyi və yaxın gələcəkdə dəyişmək niyyətində olmadığı
73 kiloqram Azərbaycan cüdosunda ən uğurlu çəki dərəcəsidir. İki olimpiada, üç
DÇ finalı, bir o qədər də qitə çempionluğu. Bu da 19 yaşlı Rəşid üçün bir
stimuldur. Əlbəttə, hazırda Rüstəm Orucov, Hidayət Heydərov, Telman Vəliyev
kimi cüdoçuları bir araya gətirən, üstəlik, tez-tez yeni istedadların üzə
çıxmasına adət etdiyimiz 73 kiloqramda "1 nömrə" olmaq üçün hələ çox
tər tökmək lazımdır. "Həmişə özümdən xeyli güclülərlə sınaqçı-rəqib olmağa
can atıram" deyən Rəşid, görünür, indidən özünü böyük rəqabətlərə hazırlayır:
"Məşqlərdə özümü çox yükləyirdim. Adətən özümdən güclü, qat-qat təcrübəli
cüdoçularla sınaqçı-rəqib olurdum. Aramızdakı fərqi nə qədər başa düşsəm də,
istər-istəməz pessimizmə qapılırdım. Lakin indi istəyimə çatmışamsa, bunu o
seçimlərə borcluyam. Çəkidəki böyük rəqabət məni qorxutmur, əksinə, güc verir.
Bu gün başabaş güləşdiyim bəzi yerli uşaqlar var ki, vaxtilə düşünürdüm,
görəsən, onlara az da olsa müqavimət göstərə bilərəmmi?!"
Orucov
və Ononu kumir seçən gənc
Rusiya tatamisində 33
dəqiqə duruş gətirməsi, fiziki hazırlığının nə qədər yaxşı olduğuna dəlalət
edir. Texniki bacarıqlarına görə də fərqləndirilən Məmmədəliyev, adətən
yaxa-qol və iki qol tutuşunda güləşməyə üstünlük verir. Cüdoda ən baxımlılardan
sayılan "ippon seoi-nage" (yaxa-qol tutuşundan çiyin üzərinə
gətirilən rəqibin yüksək amplituda ilə tatamiyə vurulması) və
"karyaqa" isə "kral" fəndləridir.
Əfsanəvi rusiyalı güləşçi,
üçqat olimpiya çempionu Buvaysar Saytiyev uşaqlıq, müasir Azərbaycan cüdosunun
ən parlaq siması Rüstəm Orucov və onun əzəli rəqibi, dünya cüdosunun
olmazsa-olmazlarından sayılan Şohey Ono isə bugünkü kumirləridir. Hər iki
cüdoçunun onun potensial rəqibi olduğunu və qarşıdakı bir neçə ildə çəkisini
dəyişmək niyyətində olmadığını nəzərə alsaq, yaxın gələcəkdə Rəşidi onlarla
üz-üzə görə bilərik.
Portret
"Tokio 2020" onun
üçün sadəcə, əlçatmazdır. Rüstəm Orucov və Hidayət Heydərovun
"ölüm-dirim" savaşına girdiyi olimpiya lisenziyasından nəinki
Məmmədəliyev, digər - daha təcrübəli cüdoçular da çoxdan əlini üzüb. Hədəf,
amal Paris olimpiadasıdır. Yeri gəlmişkən, Rəşidi, xarakter baxımından elə
Rüstəm Orucova bənzədirlər. Eynilə onun kimi davamiyyətli, ambisiyalı olduğu
vurğulanır. Odur ki, "yeni ulduzumuz yetişir" deməkdə çox tərəddüd
etməyək.
Sahib