Büdcə layihəsində neftin qiyməti necə olacaq?
Maliyyə Nazirliyi 2017-ci il və sonrakı iki
ilin dövlət və icmal büdcələrinin layihəsini hazırlayıb. Sənədlər Nazirlər
Kabinetinə və Hesablama Palatasına göndərilib. KİV-də yayılan məlumatda qeyd
olunur ki, dövlət büdcəsinin parametrləri açıqlanmasa da, burada 2017 -ci ilin prioritetlərindən
bəhs edilir. Belə ki, orada sosial siyasətin
davam etdirilməsi, əhalinin yaşayış səviyyəsinin, qaçqın və məcburi köçkünlərin
sosial rifahının yaxşılaşdırılması qarşıya məqsəd qoyulur. Bundan başqa, ölkənin
müdafiə qabiliyyətinin gücləndirilməsi və təhlükəsizliyinin təmin edilməsi də əsas
prioritetlərdən sayılır. Habelə ölkə daxilində, xaricdə icrasına başlanılmış və
prioritet hesab edilən investisiya layihələri diqqətdə saxlanılır. Bəs görəsən 2017-ci ilin büdcə layihəsi hazırlanarkən
neftin qiyməti necə hesablanacaq? Cari
il ərzində nəzərdə tutulan qiymətlər
özünü doğrulda bildimi? Ümumiyyətlə,
büdcə layihəsi hazırlanarkən risklər necə hesablanır?
Neft Araşdırmaları Mərkəzinin rəhbəri İlham Şaban qeyd etdi
ki, növbəti ilin büdcəsini İqtisadiyyat və Maliyyə nazirlikləri
sentyabr ayında hökumətə təqdim edirlər. Sentyabrın sonunda isə hökumət bu
layihəni təsdiqləyir: "Azərbaycanda büdcəni ilk olaraq Maliyyə Nazirliyi
açıqlayır. Lakin hələlik adıçəkilən
nazirlik bu barədə heç bir
açıqlama verməyib. Ona görə də 2017-ci ilin büdcəsi hazırlanarkən neftin hansı qiymətdən hesablanacağı barədə proqnoz vermək çətindir. Lakin çox
güman ki, qiymətlər 30 dollar civarına yaxın bir rəqəmlə təyin olunacaq”.
İ.Şabanın sözlərinə görə, büdcə layihəsi
hazırlanarkən qiymətlər bir qədər aşağı həddə nəzərdə tutulur: "Adətən risklər hesablanarkən beynəlxalq enerji
agentliklərinin, OPEC və bu kimi başqa qurumların növbəti il üçün proqnozları nəzərə alınır. Adətən
Azərbaycanda proqnozlarda müəyyən edilən qiymətlərdən aşağı qiymət götürülür
ki, bu, baş verə biləcək hər hansı risk
dərəcəsini azaltsın. Lakin bu, dünya təcrübəsində bir qədər fərqlidir. Məsələn,
Rusiya və Qazaxıstan kimi ölkələrdə büdcə bir neçə ssenari əsasında hazırlanır.
Büdcə neftin optimist, normal və neqativ qiymətlərinə uyğun hazırlanan ssenari əsasında təyin olunur. Bizdə isə belə bir təcrübə
tətbiq olunmayıb”. İ.Şabanın sözlərinə görə, ilin son rübü üçün neftin qiymətlərinin
artacağı proqnozlaşdırılsa da, qiymətlər
təxminən 50-55 dollar arasında dəyişə bilər.
İqtisadçı-ekspert Rəşad Həsənovisə bildirdi ki, 2017-ci ilin büdcəsi hazırlanarkən neftin qiyməti 25 dollardan
hesablanacaq: "Bu günlərdə mətbuatda Rusiyanın
dövlət büdcəsi layihəsində neftin qiymətinin 45 dollardan
hesablanacağına dair yazılar getdi. Azərbaycana gəldikdə isə 2017-ci ilin büdcə
layihəsi haqqında deyə bilərəm ki, böyük ehtimalla neftin qiyməti
artırılmayacaq. Yəni neftin qiyməti 2016-cı ildə nəzərdə tutulduğu kimi 25 dollar həcmində
olacaq. Bu isə fiskal ehtiyatın təmin edilməsi, yəni baş verə biləcək proseslərə
hazır olmaq üçündür. 2017-ci ildə neftin qiymətinin 2016-cı illə müqayisədə
nisbətən yüksək səviyyədə olacağının
söylənməsinə baxmayaraq, ehtimal olunur ki, neftin qiyməti dövlət
büdcəsində 25 dollardan hesablansın. Əgər qiymətlərdə hər hansı ciddi bir dəyişiklik
müşahidə olunarsa, sonrakı mərhələdə neftin qiymətinin büdcədə yenidən dəyişdirilməsi
və büdcəyə dəyikişliklər edilməsi yolu ilə qiymətin artırılması nəzərdə tutula
bilər”.
R.Həsənov bildirdi ki, neftin qiymətinin proqnozlaşdırılması kimi
risklərin nəzərə alınması da çətindir: "2015-ci ilin dövlət büdcəsi təsdiqlənərkən
neftin qiyməti 90 dollardan hesablanmışdı. Həmin dövrdə isə neft 55-56 dollara
satılırdı. Sonrakı dövrlərdə bu özünü doğrultmadığı üçün 2016-cı ilin dövlət
büdcəsi layihəsində neftin qiyməti 50 dollara qədər azaldıldı. Bundan sonra isə
qiymətlərin bir az da enəcəyi ehtimalları artdığına görə yanvar ayında ölkə rəhbərliyinin
təşəbbüsü ilə dövlət büdcəsində neftin qiymətinin 25 dollara endirilməsi məsələsi
gündəmə gəldi və dövlət büdcəsi və Neft Fondunun gəlirləri 25 dollara uyğunlaşdırıldı. Sonrakı
dövrlərdə neftin qiymətinin artmasına baxmayaraq, bazarda risklər hələ də
qalmaqdadır. Çünki neftin qiyməti ən
müxtəlif-həm siyasi, həm də iqtisadi səbəblərdən
dəyişə bilir. Qeyd edim ki, yaxın gələcək üçün bir çox maliyyə institutları
neftin qiymətinin artacağını proqnozlaşdırsa da, digərləri əksinə olaraq,
ucuzlaşmanın ola biləcəyini ehtimal edir”.
İqtisadçı 2016-cı ildə dövlət büdcəsində nəzərdə tutulan neftin qiymətinin
özünü doğrultması məsələsində bir qədər təzadlar oduğunu da bildirdi: "Neft
Fondunun büdcəyə transfertlərinə diqqət etsək, görərik ki, 2016-cı ildə 3,6
milyard dolların büdcəyə transferti nəzərdə tutulub və hazırda təxminən 2 milyarda
yaxın transfert həyata keçirilib. Lakin
növbəti 4 ay ərzində Neft Fondunun ciddi şəkildə transfertlər həyata keçirilməklə
yaranmış fərqi kompensasiya edəcəyini düşünmürəm. Neft Fondunun 2016-cı il büdcəsi
10,6 milyard manat həcmindədir. Neft Fondunun gəlirləri isə 25 dollarla
götürüldüyünə görə hazırda fondun beş milyard dollara yaxın kəsiri var. Belə
bir şəraitdə isə fond öz öhdəliyini yerinə yetirə bilməyəcək. Eyni zamanda,
neft sektorunda büdcə gəlirlərinin həcmində də azalma müşahidə olunur. Neftin
qiymətinin özünü doğrultması haqqında
birmənalı fikri o vaxt demək olar ki, dövlət büdcəsi nəzərdə tutulan kəsirdən
artıq olmayan kəsir səviyyəsi ilə tam icra olunsun”.
Sonda R.Həsənov cari ilin son rübünə dair neftin qiymətlərinə
dair proqnozlardan da söz açdı: "Neft
istehsal edən OPEC ölkələri, o cümlədən Rusiya, İran, Səudiyyə Ərəbistanı
arasında müxtəlif fikir ayrılıqları
mövcuddur. Amerika şist neftinin dünya bazarlarına sürətlə satışını təmin etməyə
cəhd göstərir. Belə bir şəraitdə gələn il qiymətlərin müxtəlif dövrlərdə hansı səviyyədə qərarlaşacağını
konkret olaraq demək mümkün deyil. Beynəlxalq Enerji Agentliyi 2017-ci ildə
neft tələbatının gündəlik 400 min barel
olaraq artacağını ortaya qoydu ki,
bu da qiymətlərdə müəyyən qədər bahalaşmaya səbəb
oldu. Hazırda isə əksinə, qiymətlərdə yenidən ucuzlaşma müşahidə olunur. Bu
günlərdə İran neft hasilatının həcmini artırma mövqeyini dəyişmədiyini
açıqladı. Təbii ki, bu amil özü də dünya
bazarına müəyyən mənada təsir göstərəcək. Ona görə də qiymətlərdə ciddi
bahalaşma olacağını gözləmək düzgün olmazdı. Qiymətlərin 2016-cı il səviyyəsində
ola bilmə ehtimalı daha yüksəkdir. Əgər
kəskin ucuzlaşma dövrü olarsa belə, bu,
qısamüddətli dövrü əhatə edəcək. Məsələn, cari ilin yanvar ayında qiymətlər
25-26 dollaradək ucuzlaşsa da, qısa müddət sonra itkilər bərpa olundu. Hesab
etmirəm ki, uzun müddət ərzində dünya ölkələrində neftin qiyməti 25-30
dollardan ucuz olsun. Çünki faktiki olaraq neftin psixoloji hədd olan 40
dollardan aşağı satılması Amerikada neft quyularının və neft ehtiyatlarının həcminin
azaldılmasına və neft sahəsində fəaliyyət göstərən bir çox şirkətlərin iflas
olmasına gətirib çıxara bilər. Cari ildə məhz bu səbəbdən 256 neft şirkəti
iflasa uğrayıb. Gələcək dövrlərdə neftin qiymətinin müəyyənləşməsində əsas səbəblərdən
biri neft sektoruna investisiya məsələsi olacaq. Hazırda investisiyaların həcmində
kəskin azalmalar var”.
İqtisadçının sözlərinə görə, bir qədər zaman lazımdır ki, dünya
bazarına təklif olunan neftin həcmində
azalma müşahidə olunsun: "Azalma baş verərsə, qiymətlərin artacağı istisna
edilmir”.
Şəbnəm Mehdizadə