Bu məkana oğlanlar yalnız xanımlarla gedə bilərlər - Reportaj
Hansısa
bəy bu məkanın qapısını döyüb içəri daxil olmaq istəyirsə, "biz xanımlara xidmət
göstəririk” cümləsini eşidir, ya da, "həftənin 3-4-cü günləri xanımlarla gələ
bilərsiniz” cavabını alır. Məkan xanımlar üçündür və burda hər bir şey onların
maraq və zövqlərinə uyğun hazırlanıb. Söhbət "Ooh la la” antikafesindən gedir.
Adı,
antikafe söhbətindən tutmuş, məkanla bağlı mənə maraqlı gələn məqamlar çox idi,
ona görə baş çəkib suallarıma cavab tapmaq istədim. İlkin təəssürata əsasən,
buranın xanımların içəri daxil olanda "Ooh la la” deyə biləcəyi bir yer
olduğunu deyə bilərik.
Bizi məkanın
yaradıcılarından olan Taleh Şirinov qarşıladı, elə ayaqüstü söhbət zamanı məlum
oldu ki, iki oğlan dost birləşib xanımlar üçün belə bir məkan yaradıblar.
Sosial şəbəkə səhifələrində "Bu, gender ayrı-seçkiliyidir” tipli suallarla
qarşılaşmışdım. Elə bu sualın cavabı da maraqlı idi. Xanımlar üçün ayrıca belə
bir məkanın olmasına nə ehtiyac var idi? T.Şirinov deyir ki, bunu nə xanımlar,
nə də bəylər ayrı-seçkilik kimi qəbul etməsinlər: "Bizim məkanın mahiyyəti
yalnız kafe, yeyib-içməkdən ibarət deyil. Biz buranı qadın klubu üslubunda təşkil
etmişik. Heç bir kişi demir ki, qadın klubu niyə var? Buranı restoran, kafe
kimi deyil, qadınlar üçün bir məkan adlandıra bilərik. Əgər ayrı-seçkilikdirsə,
onda gərək qadın klubları olmasın”.
"Sırf kişilərin gedə biləcəyi məkanlar çoxdur”
2 otaq
kafe, 2 otaq atelye, 1 otaqlı mətbəxdən ibarət olan, nostalji abı-hava yaradan
məkanın dizaynı fransız üslubunda hazırlansa da, ümumilikdə bütün nüanslar Azərbaycana
bağlıdır. Bəs niyə fransız üslubu? Taleh bildirdi ki, götürdükləri məkanın
dizaynı belə bir qərar vermələrində rol oynayıb: "Bundan əvvəl Əli adlı
dostumla balaca SMM agentliyimiz var idi. Ofisimiz Fəvvarələr Meydanı tərəfdə
yerləşirdi. Alt mərtəbədə kafe fəaliyyət göstərirdi. Bir gün məkanı kirayə verən
şəxs zəng vurdu ki, sizin ofisi qonşunuz kafeyə veririk, yaxşı pul təklif edirlər.
Həmin vaxt müştərilərimiz də azalmışdı. Həmin yeri antikafeyə çevirmək qərarı
aldıq. Bu zaman da fikirləşdik ki, yer balaca olduğu üçün xanımlar gəlməyəcək,
kişilər daha çox olacaq. Və dedik ki, onda elə biz də sırf xanımlar üçün yer edək.
Çünki onsuz da bizdə sırf kişilərin gedə biləcəyi məkanlar çoxdur, amma yalnız
xanımların gedə biləcəyi kafe, antikafe yoxdur. Məkan yenə də balaca gəlirdi,
amma ağlıma xanımlar üçün belə bir yer açmaq ideyası qoymuşdum, ona görə
dostumla daha böyük bir yer axtardıq və buranı bəyəndik. Bu binanın dizaynı Avropasayağı
idi, ona görə qərara aldıq ki, retro tərzdə, fransız üslubunda bir yer olsun”.
Antikafenin
nə olmasına gəlincə, Taleh bu haqda da danışdı: "Antikafe kafe qaydalarının əskinə
olan yer deməkdir. Burda ofisiant olmur, hər kəs evindəki kimi özünə qulluq
edir. Əslində, bizdə antikafe olsa da, ofisiantımız da var. Kim istəsə özünə
xidmət edir, kim istəsə biz qulluq edirik”.
Biz də
antikafe xidmətindən istifadə edib, özümüzə qulluq etmək istədik, amma "bu dəfə
biz sizə qulluq edək, gələn dəfə özünüzə xidmət göstərərsiz” cavabı aldıq.
Olsun, bizə belə də xoşdur.
"Bizdə təkcə antikafe deyil, həm də...”
"Ooh la
la”nın mənasına gəlincə isə, öyrəndik ki, fransız sözüdür, hiss bildirən ifadədir.
İnsanın müsbət bir şeyə təəccüblənərkən verdiyi reaksiyadır.
Məkanın
təsisçisi burda xanımlara təqdim olunan xidmətlər haqqında da məlumat verdi:
"Bizdə təkcə antikafe deyil, həm də atelye var. Xanımlar geyim məsələsində həssasdırlar
və bunu da nəzərə almışıq. Kitab rəfimiz var, kitab oxumaq üçün gözəl şərait
yaradırıq. Bizim mərkəzdən kovörkinq kimi də istifadə edə bilərlər. Kino
axşamlarımız olur, qız-qıza film izləmək istəyənlər gələ bilər. Mafiya gecələri
təşkil edirik. Antikafenin xüsusiyyətlərindən biri də stolüstü oyunların
olmasıdır, Bizdə bu da var. Xanımlar üçün müxtəlif mövzularda təlim və
seminarlarımız da olur. Eyni zamanda ad günləri, xına mərasimləri, toyların
ildönümləri və s. tədbirləri də təşkil edirik. Xidmətlərin sayını getdikcə daha
da artırırıq. Burda sakitlik, hüzur var. Qonaqlarımız dincələ bilirlər”.
Həftənin 3-4-cü günləri bəylər də gedə bilər,
amma...
"Həftənin
3-4-cü günləri antikafemizə yarınızla təşrif buyura bilərsiniz” deyə
paylaşımları var. Resepşn Səma Məstəliyeva deyir ki, bunu xanımların istəklərinə
əsasən ediblər: "Bizdə ilk olaraq ancaq xanımlarla bağlı idi. Elə xanımlar var
ki, "belə daha rahatdır, oğlanlar olmasın” deyirlər. Ancaq ailəli, nişanlı,
sevgilisi olan bəzi xanımlar dedilər ki, gözəl yerdir, biz öz yarımızı da bura
gətirmək, belə yerdə birgə vaxt keçirmək istəyirik. Onları nəzərə alıb bəylərin
xanımlarla birlikdə gələcəyi günlər təyin etdik. Həmin günlər sevgilisi,
nişanlısı, həyat yoldaşı, dostu fərqi yoxdur, yanında xanım varsa, oğlanlar bura
gələ bilər. Əgər qrupla xanım və bəylər gəlirsə, ya əlli-əlliyə olmalıdır, ya
da çox hissəni xanımlar təşkil etməlidir”.
Xanımların
karpizinə dözməklə bağlı danışanda Səma artıq buna alışdığını bildirdi. Taleh
isə "bu məkanı açmışıqsa, xanımların kaprizinə dözməliyik” dedi: "Əlli faiz
xanımların elə çox kaprizi olmur, onlar bizi başa düşür, biz də onları. 50 faiz
isə çox kaprizlidir. Ancaq biz bu məkanı
açanda, xanımlarla işləyəcəyimizi bilirdik və o nazı da sevə-sevə çəkirik”.
Bir neçə
saat məkanda olduq, bu müddətdə ancaq nostaljiyə kökləyən musiqilər eşitdik.
Bildirdilər ki, müştəriləri nostalji abı-havanı çox bəyənirlər: "Bu günün
musiqilərini onsuz hər yerdə dinləyə bilərsiniz. Bizdə monitorlarda retro
stilində filmlər və moda nümayişlərindən kadrlar göstərilir. Musiqilərimiz də
retrodur. Biz bu günün mahnılarını dinlətmirik. Canlı musiqi olanda, müştəri
sifariş verərsə, qarışmırıq”.
Ayaqqabı, dodaq, dırnaq boyası, eynək...
Bura
xanımların bolluca şəkil çəkdirə biləcəyi yer də demək olar. Məkanın əməkdaşları
söhbət zamanı bildirdilər ki, xanımlar bu imkandan o ki var, yararlanırlar. Hətta
deyirlər ki, bura gələn xanımların vaxtının çoxu şəkil çəkdirməyə gedir: "Məqsədimiz
bu deyildi, amma belə alınır. Çünki burda fərqli dekorasiyalar var, xanımlar da
hər birində şəkil çəkdirməyə çalışırlar”.
Getdiyin
yerdə hansısa əşyanı unutmaq normal haldır, amma maraqlısı odur ki, burda əşyalarını
unudan xanımlar sonra heç onların arxasınca gəlmirlər də: "Ayaqqabı, dodaq,
dırnaq boyası, eynək, içində pul olan pulqabı və s. qalıb, amma arxasınca gələn
yoxdur. Bununla bağlı sosial şəbəkədə paylaşım edəcəyik, xanımlar əşyalarını gəlib
götürsünlər”.
"Təklif və ideya” kitabı
Divarda
maraqlı dizaynda asılan "Təklif və ideya” kitabını vərəqlədik. Təklif və ideya kitabı olsa da,
iradlar da var idi.
Ülviyyə:
"Məkan və ünvanı çox gözəldir. Şəkil çəkdirmək üçün idealdır. Hətta rəfiqəmlə
aşırı dərəcədə çox şəkil çəkdirdik. Ancaq çox oturduğumuz üçün acdıq. Yeməklər
də olsa, daha yaxşı və ideal olar. Yenə gələcəyik”.
Qumru Cəbrayılova:
"Çox bəyəndim, buranın gözəlliyi həmişə belə qalsın. İdeyam odur ki, mətbəxinizdə
şokoladlı şirniyyatlar çox olsun. Mətbəxiniz çox gözəldir”.
Taleh
deyir ki, bu fikirlər onların işini təkmilləşdirmək cəhətdən önəmlidir. Mətbəx
məsələsi ilə bağlı müştərilərin fikirlərini nəzərə alırlar və davamlı olaraq
menyuya əlavələr edilir.
Otaqda
bir qutu qoyulub, yanında isə belə bir sual yazılıb: "Nə sizin əhval-ruhiyyənizi
hər zaman daha yaxşı edir?” Bu suala cavabını və əlaqə nömrəni yazıb qutuya
atırsan, bir müddət sonra kafe rəhbərliyi qutunu açır, içərisindəki ən maraqlı
cavabın sahibi ilə əlaqə saxlayıb ona hədiyyə verirlər. Bildirdilər ki, bu sual
tez-tez dəyişir.
"Xanımların məkanında bəylər gözlədə bilər”
Biz
xanımların məkanına 3-cü gün getmişdik, yəni xanımların yanında oğlanlara da
giriş üçün icazə olan gün idi. Lakin hələ ki ancaq xanımları görürdük. Tək əyləşən
Almaz Bunyatovaya yaxınlaşıb söhbətləşdik. Almaz dedi ki, sevgilisini gözləyir:
"Birinci dəfədir bura gəlirəm. İnstaqramda səhifələrini izləyirdim, sırf
xanımların və bir də oğlanların yalnız xanımlarla gələ biləcəyi bir yer kimi
diqqətimi çəkdi. Özüm dizayn üzrə təhsil alıram, buranın dizaynı da mənə
maraqlı gəldi. Tək deyiləm, sevgilim də gəlir, sadəcə bir az gecikir”.
"Sevgiliniz
sizi niyə gözlədir?” sualımıza isə Almaz belə cavab verdi: "Xanımların məkanında bəylər gözlədə bilər.
Burda o imkanı onlara vermək olar (Gülür)”.
Münasib qiymətlər
"Ooh la
la” səhər saat 10-dan axşam 10-a qədər işləyir. Deyirlər ki, səhər yeməyi üçün
öncədən yazılan olanda iş 9-da başlayır, gecə müştəri olanda isə ən son müştəriyə
qədər açıq olur. Qiymətlərə gəlincə, bir nəfərin bir saatlıq məkanda qalması,
çay, kofe, şirniyyatlardan istifadəsi 4 manat dəyərindədir. Eyni zamanda qiymət
daxilində karaokedən istifadə edə, oyunlar oynaya, kitab oxuya bilərlər. Menyudan
əlavə sifarişlər olursa, artıq bu, ödənişə əlavə edilir.
Və
xanımların məkanında bir neçə saat oldum, şirniyyatla çaylarından içdim. Ordan
ayrılanda isə "biz sizə bir suşi qonaqlığı söz veririk” dedilər. Bu zaman
bildim ki, menyuda xanımların sevdiyi yemək olan suşi də var. Özü də dadına zəmanət
verdiklərini deyirlər.
Məkandan
ayrılanda əlimi qapının dəstəyinə atırdım ki, əməkdaşlar gülərək əlavə etdilər:
"Birinci xanımsınız ki, burdan çıxanda qapını rahatlıqla tapdınız (Gülürlər).
Çünki qapı elə dizayn olunub ki, divardan fərqlənmir”.
Aygün
Asimqızı