“Bu gün Cocuq Mərcanlıya, sabah Şuşaya”
Prezident İlham Əliyevin işğaldan azad edilmiş Cəbrayıl rayonunun
Cocuq Mərcanlı kəndinin bərpası ilə bağlı tədbirlər haqqında sərəncam
imzalamasından sonra erməni cəmiyyətində ruh düşkünlüyü müşahidə edilir. Erməni
istifadəçilər bu haqda fikirlərini sosial şəbəkələrdə açıq şəkildə bölüşməkdən
çəkinmir və prezidentləri Serj Sarkisyana konkret suallar ünvanlayırlar.
"Azərbaycan” qəzetinin yazdığına görə, Karen Mkrtçyan adlı "Facebook”
istifadəçisi "Nə vaxta qədər belə davam edəcək? Bu gün Cocuq Mərcanlıya, sabah
isə Şuşaya” başlıqlı status paylaşıb. Arut Xaçatryan adlı bir nəfər "Twitter”də
belə bir paylaşım edib: "Biz hələ də anlaya bilmirik ki, İlham Əliyevin
fəaliyyətindən niyə Serj Sarkisyan nəticələr çıxara bilmir? Azərbaycan
torpaqları geri qaytarır, bizdə isə geri dönən yalnız əsgərlərimizin
cənazəsidir. S.Sarkisyan Ermənistanı məhvə aparır”.
Henrix Aşotyan adlı biri isə "Facebook”da Prezident İlham Əliyevin imzaladığı
sərəncamla bağlı paylaşılan statusa belə bir şərh yazıb: "Açıq reallıq budur.
Aprel döyüşlərində İlham Əliyev Serj Sarkisyana yüksək peşəkarlığın necə
olduğunu göstərdi. Bizim prezident bəs nə etdi? Seyrçi mövqeyində qaldı.
Azərbaycan Prezidenti bu gün Cocuq Mərcanlı kəndinin bərpası ilə bağlı sərəncam
imzalayır. Belə davam etsə, Stepanakert (Xankəndi - red.), Şuşa, Kəlbəcər üçün
də belə sərəncamlar gözləniləndir”.
Robert Şaqinyan adlı biri isə "Twitter”də yazıb: "Ötən il
azərbaycanlıların aprel hücumundan sonra qorxu hələ də canımızdadır. İlham
Əliyev Azərbaycan üçün lazımi addımlar atır, ərazilərin qaytarılması ilə bağlı
işlər görür. Cocuq Mərcanlı kəndi buna nümunədir. Bəs Serj nə edir?”
Karine Baqratyan adlı biri isə "VKontakte” sosial şəbəkəsində erməni iqtidarına
qarşı etirazını bildirib: "İlham Əliyevin Azərbaycan üçün nələr etdiyi göz
qabağındadır. Ermənistan rəhbərliyi isə yalnız öz maraqlarını güdür, onlar üçün
dövlətin və xalqın mənafeləri yoxdur. Aprel məğlubiyyətindən sonra Sarkisyan
hansı üzlə xalqın qarşısına çıxır? Hələ İlham Əliyevin imzaladığı məlum
sərəncamı demirəm. Bəs sabah Azərbaycan əsgəri İrəvana girsə, nə edəcəyik?”
Ovik Karapetyan adlı birinin "Twitter”dəki paylaşımı isə daha çox bəyənmə
toplayıb: "Azərbaycan Prezidenti Cocuq Mərcanlını geri qaytarıb, sabah Şuşanı
da götürəcək. Biz müharibədən sonra təlaş içərisində yaşayırıq. Sarkisyan
iqtidarından təngə gəlmişik”.
Edvard Şahnazaryan "Facebook”da paylaşdığı statusda bildirib ki,
xalqın hakimiyyətə inamı artıq tamam tükənib və atdığı bütün addımlar
vətəndaşlar tərəfindən birmənalı şəkildə rədd edilir: "İlham Əliyev bir kəndin
bərpası üçün xüsusi sərəncam imzalayır, cəbhə bölgəsinə səfərlər edərək Ali Baş
Komandan olduğunu nümayiş etdirir. Serj Sarkiysan, Ermənistan üçün nə etmisən?
Xalqın yoxsullaşmasında və gənclərin cəbhədə səbəbsiz ölümündə birbaşa
təqsirkarsan. Buradan əsgər valideynlərindən xahiş edirəm. Hakimiyyətin
yeritdiyi yarıtmaz siyasətə qarşı çıxın, övladlarınızın boş yerə, Serj
Sarkisyan rejiminin maraqları naminə qurban getməsinə mane olun, etiraz edin”.
Paylaşılan fikirlərdən bir daha görünür ki, erməni cəmiyyətində
narahatlıq, ruh düşkünlüyü getdikcə dərinləşir və artıq onların olmayan torpaqlar
uğrunda savaşmaq istəmirlər. İtkilərə görə isə birbaşa ölkə rəhbərliyinin
məsuliyyət daşıdığını dərk edirlər.
Mövzu ilə bağlı fikirlərini "Kaspi” ilə bölüşən politoloq Mübariz Əhmədoğlu bildirdi ki, azərbaycanlıların Cocuq
Mərcanlıya qayıdışı fonunda müşahidə olunan erməni pessimizmi getdikcə artacaq:
"Ermənilər nəhayət ayılmalı, baş verənləri dərk etməlidirlər. Başa
düşməlidirlər ki, səhv yoldadırlar. Ümumiyyətlə, bu dövlətin yanaşması səhv
yanaşmadır, xəstə təfəkkürə əsaslanır. Biz gec-tez öz torpaqlarımıza
qayıdacağıq. Torpaqlarımızın hamısını işğaldan azad edəcəyik. Bu proses
getdikcə, onlar daha da pis duruma düşəcəklər. Hələ ki, Cocuq Mərcanlıya
qayıtmağımıza görə belə ruh düşkünlüyünə qapılıblar. Prezident İlham Əliyevin
işğalda olan torpaqlarımızın geri qaytarılması üçün atdığı addımları ermənilər
özləri üçün bir sağlam yol kimi qəbul etsinlər. Nə qədər tez sağalsalar,
xəstəlikdən qurtulsalar, bu, onların özünə xeyirdir. Ermənilər 1988-ci ildən bu
yana, azərbaycanlılara problem yaratmağa başladıqları müddətdə böyük dövlət
qurmaq iddiasında idilər. Hazırda Ermənistanın heç düz-əməlli büdcəsi yoxdur,
özlərini dolandıra bilmirlər. Ermənistandakı əhali fürsət düşdükcə oranı tərk
edir. Çox böyük məbləğdə xarici borcları var. Təəssüf ki, Dağlıq Qarabağı işğal
etdilər. Azərbaycanın da Ermənistanı blokadada saxlaması onları belə bir çətin
vəziyyətə salıb. Bu durumdan çıxmaq istəyirlərsə, reallığı dərk edib
ayılsınlar. Bu, onlar üçün xeyirdir. Mən onlara məsləhət görürəm ki, öz
prezidentlərindən çox İlham Əliyevə inansınlar. Sosial şəbəkələrdə də bu yöndə
fikirlər paylaşırlar. Bu, həm də onların Sarkisyana olan münasibətini göstərir”.
QHT rəhbəri, hüquqşünas Sahib
Məmmədov dedi ki, aprel döyüşlərindən sonra işğalda yaşayan əhalidə əvvəldən erməni
təbliğatı nəticəsində yaranmış arxayınçılıq aradan qalxdı. Çünki rəsmi erməni
təbliğatı insanların beyninə yeritmişdi ki, Azərbaycan ordusu bu ərazilərin bir
qarışını da ala bilməyəcək: "Aprel döyüşləri bu mifi dağıtdı və ermənilər hələ
də tərk etdikləri kəndlərə qayıda bilməyiblər. Cocuq Mərcanlı kəndinin bərpası
və əhalinin ora qayıdışı ermənilər üçün növbəti həyəcan siqnalıdır. Ona görə də
əhali narahatlığını gizlətmir. Onlar bir icmanın qayıdışını böyük qayıdışın
başlanğıcı hesab edirlər. Əslində, prezidentin qərarının da əsas məqsədi budur.
Proses başlayıb. Ermənistan rejimi bilməlidir ki, Azərbaycan dövləti və xalqı
heç bir güzəştə getməyəcək. Yeganə güzəşt Azərbaycanın yurisdiksiyasını qəbul
edən erməni əhalinin buradakı dinc yaşayışına təminatdır. Bu təminat da ən
yüksək səviyyədə verilib”.
Qhtxəbər.az saytının baş
redaktoru Sənan Nəcəfov nəzərə çatdırdı ki, Cəbrayılın Cocuq Mərcanlı
kəndi ulu öndər Heydər Əliyevin birbaşa rəhbərliyi ilə Azərbaycan ordusunun
Birinci Qarabağ müharibəsində keçirdiyi ən uğurlu döyüş əməliyyatlarından biri
olan Horadiz əməliyyatı nəticəsində Ermənistanın işğalçı ordusundan geri
alınıb: "Lakin strateji yüksəkliklərin düşmən nəzarətində olmasına görə kənddə
tam məskunlaşma qeyri-mümkün idi. Ötən ilin aprel ayında son illərin ən uğurlu
hərbi əməliyyat-manevrlərindən sonra ordumuz strateji əhəmiyyətli Lələtəpə
yüksəkliyini azad etdi və Cocuq Mərcanlıya gediş-gəliş, orada yaşamaq üçün
unikal şərait yarandı. Niyə unikal? Əvvəla, kənar güclərin, mərkəzlərin,
dövlətlərin ciddi səyi və dəstəyi ilə Qarabağ cəbhəsində qorunub saxlanılan 24
illik status-kvo məhz aprel hərbi əməliyyatları ilə dəyişdi, bu möhtəşəm tarixi
hadisə ilə danışıqlar prosesində Azərbaycanın mövqeyi gücləndi. İlham Əliyevin
dəfərlərlə səsləndirdiyi "Azərbaycan Ordusu Qarabağı işğaldan azad etməyə
qadirdir və buna heç bir qüvvə mane ola bilməz” bəyanatlarının istənilən an
hərbi əmrə çevriləcəyi tərəflərə izah edildi. İkincisi, "İşğaldan azad edilmiş
Cəbrayıl rayonunun Cocuq Mərcanlı kəndinin bərpası ilə bağlı tədbirlər
haqqında” prezidentin sərəncamı tək bir kəndin bərpası, yenidən qurulması deyil,
mənəvi-psixoloji baxımdan, Azərbaycan tərəfinin üstünlük simvoludur. "İşğal
olunmuş torpaqlarımıza qayıdacağıq və Azərbaycanın bir qarış torpağı belə işğal
altında qalmayacaq” - Ali Baş Komandan İlham Əliyev dediyi sözün sahibidir. Bu,
Böyük Qayıdışın startıdır”.
S.Nəcəfov qeyd etdi ki, erməni mətbuatı və adi vətəndaşların sosial
şəbəkələrdə yazdıqlarından belə anlaşılır ki, onlar artıq vəziyyəti aydın dərk
edirlər. Bilirlər ki, Azərbaycan gec-tez torpaqlarını azad edəcək, qaçqın və
məcburi köçkünlər yenidən öz yurdlarınaqayıdacaqlar: "Geri sayım
başlayıb. Prezident İlham Əliyevin Cocuq Mərcanlı kəndinin bərpası ilə bağlı
tarixi əhəmiyyətə malik sərəncamı həm də Ermənistana növbəti xəbərdarlıqdır. Ermənilər
işğaldan azad olunan bir strateji yüksəkliyə görə belə sürətli məskunlaşmanı,
təsərrüfat qurulmasını gözləmirdilər. Bu, ən qatı erməni millətçisinə, müharibə
partiyasının üzvlərinə də sarsıdıcı zərbə idi. Prezident İlham Əliyev yanvarın
30-da "Azərbaycan Respublikası regionlarının 2014-2018-ci illərdə
sosial-iqtisadi inkişafı Dövlət Proqramı”nın icrasının üçüncü ilinin
yekunlarına həsr olunan konfransda Cocuq Mərcanlı ilə bağlı layihənin icra
edilməsinin çox böyük rəmzi məna daşıdığını bildirdi. Qeyd etdi ki, bu, tarixi
hadisədir. Biz işğaldan azad edilmiş kəndə sakinləri qaytarırıq. Mən çox şadam
ki, Cocuq Mərcanlı kəndinin sakinləri buna çox böyük həvəslə, böyük maraqla
yanaşırlar, o günü səbirsizliklə gözləyirlər. Əminəm ki, biz Cocuq Mərcanlı
kəndini qısa müddət ərzində yenidən quracağıq. Prezident, həmçinin vurğuladı
ki, indi işğal edilmiş digər torpaqlara erməni işğalçıları beynəlxalq
müşahidəçiləri buraxmırlar. Buna görə də Ağdamın, Füzulinin, digər
şəhərlərimizin dağıntıları beynəlxalq mətbuatda az-az görünür - "Cocuq Mərcanlı
erməni vəhşiliyinin, vandalizminin əyani sübutudur. Gəlsinlər, görsünlər ki,
özlərini mədəni xalq kimi təqdim etməyə çalışanlar hansı vəhşiliklər
törədiblər. Ona görə orada bu işlər görülməlidir, bütün sənədləşmə,
pasportlaşdırma, erməni vəhşiliklərinin sənədləşdirilməsi işləri, video, foto-çəkilişlər
aparılmalıdır, dağılmış bütün binaların ölçüləri, dəymiş ziyan hesablanmalıdır.
Bu çıxışları diqqətlə izləyən erməni tərəfi də görür ki, Azərbaycan öz
ərazilərini işğaldan azad edib, onları bərpa etməklə yanaşı, gələcəkdə yüz
milyard dollarlıq təzminat tələbi də var. Bu, yaddan çıxmayıb. Ermənistan
məğlub olma aktını imzaladıqdan sonra dağıtdıqları Azərbaycan ərazilərini
özləri bərpa etmək məcburiyyətində olacaq. Belə bir iddia təmin olunarsa, ən
sadəsi, Avropa Məhkəməsi məcburi köçkün ailələrinin şikayətlərini təmin edərsə,
Ermənistan belə iqtisadi potensialla bu təzminatları yüz illər bundan sonra da
ödəyib qurtara bilməz. Cənab Prezidentin çıxışında beynəlxalq təşkilatlara
dağıntıları öz gözləri ilə görmək çağırışının arxasında həm də bu mesaj var idi”.
Həmsöhbətimiz onu da dedi ki, deyilənlər "Qarabağ Azərbaycanın daxili
işi deyil” mesajına tutarlı cavab idi: "Cənab Prezident göstərdi ki, Qarabağ
elə Azərbaycanın daxili işidir. Bu, hələ startdır. Davamında Azərbaycanın digər
işğal olunmuş rayonlarının əvvəl hərbi, sonra iqtisadi yolla bərpası gəlir.
Neçə-neçə belə kəndlərimiz qaytarılacaq, neçə-neçə insanların öz torpaqlarına
qayıtması üçün sərəncamlar imzalanacaq. Bu sərəncamla sübut olundu ki,
qətiyyət, prinsipiallıq necə olur! Bu sərəncamla sübut olundu ki, ölkənin
iqtisadi qüdrətini yüksəltməsi, beynəlxalq nüfuzunu artırması və güclü modern
ordu qurmaq necə olur! Bir də o sübut olundu ki, Böyük qələbə heç də görünməyən
dağların arxasında deyil, çox yaxındadır. Erməni mətbuatını izləyənlər bunu da
təsdiqləyərlər ki, erməni əhalisində bu qədər ruh düşkünlüyü heç vaxt olmayıb”.
Şəfa Tapdıq