BMT-nin Azərbaycandakı rezident əlaqələndiricisi ADU-da olub
Azərbaycan Dillər Universitetində (ADU) universitetin Tələbə Gənclər Təşkilatının
(TGT) nəzdində fəaliyyət göstərən Tələbə Diplomatlar Klubunun (TDK) "Səfirdən gələcək
səfirə” layihəsi çərçivəsində növbəti qonağı Birləşmiş Millətlər Təşkilatının
(BMT) Azərbaycandakı rezident əlaqələndiricisi və BMT
İnkişaf Proqramının (BMTİP) rezident nümayəndəsi Qulam İsakzai olub.
Tədbirdən
öncə qonaqla görüşən ADU-nun Beynəlxalq əlaqələr üzrə prorektoru, dosent Jalə Qəribova
onu universitetdə görməkdən məmnunluğunu bildirib. O, universitetin tarixi,
beynəlxalq əlaqələri, tədris prosesi haqqında danışaraq burada müxtəlif dillərin
tədris olunduğunu qeyd edib. Prorektor J.Qəribova ADU-nun dünyanın bir çox
nüfuzlu ali təhsil müəssisələri ilə əməkdaşlıq etdiyini və universitetlərarası
müəllim-tələbə mübadiləsinin aparıldığını vurğulayıb.
Səmimi
qəbula görə təşəkkür edən Q.İsakzai ADU-da olmaqdan məmnun olduğunu deyib. O, tələbələrlə
görüşərək diplomatik sahədə təcrübələrini onlarla bölüşəcəyini qeyd edib.
Daha
sonra Q.İsakzainin tələbələrlə görüşü baş tutub. O, tələbələri salamlayaraq universitet rəhbərliyinə
təşəkkür edib. "Çoxsahəli diplomatiyada BMT-nin töhfələri” mövzusunda mühazirə
oxuyan Q.İsakzai öncə özü haqqında tələbələrə ətraflı məlumat verib. Təhsili,
diplomatik fəaliyyəti haqqında danışan Q.İsakzai BMT-nin gördüyü işlər barəsində
də danışıb. O, BMT-nin beynəlxalq sülhün və təhlükəsizliyin qorunub
saxlanılması, millətlər arasında dostluq əlaqələrinin inkişafı və sosial tərəqqiyə
yardım, insan həyatının və hüquqlarının müdafiəsi səviyyəsinin
yüksəldilməsi məqsədi ilə yaradıldığını bildirib. BMT-nin dövlətlərarası təşkilat
olduğunu deyən Q.İsakzai təşkilatın məqsədləri, prinsipləri haqqında da söz
açıb.
Bundan
başqa uğurlu diplomat olmağın yolları haqqında danışan Q.İsakzai münasibətlərin
düzgün qurulmasının vacibliyini vurğulayıb.
Sonra
çıxış edən dosent J.Qəribova qonağa dəvəti qəbul edib gəldiyi üçün universitet
rəhbərliyi adından təşəkkür edib. O, bu görüşdən tələbələrin faydalı məlumatlar
əldə etdiyinə əminliyini ifadə edib.
Tədbir
tələbələri maraqlandıran sualların cavablandırılması ilə başa çatıb.