Biznes qurmaq üçün dövlət işindən çıxanda, hamı ona gülürmüş - Biznes
Səidə Quluzadə: "Azərbaycanda atasız, yoldaşsız,
qardaşsız, əmisiz, dayısız olan bir xanım uğur qazana bilər”
Uşaqlıqdan
rəssamlığa marağı olub, ancaq bu gün biznes sferasındadır. Onlayn biznes,
baxça, ketrinq və s. sahələrdə öz işini qurub, marketoloq kimi fəaliyyət göstərir.
Bizneslə bağlı aktiv fəaliyyətdə olsa da, müəyyən yaşdan sonra özünü ancaq rəssam
kimi görür. Müsahibimiz gənc xanım Səidə Quluzadədir.
- Uşaqlıqdan rəssamlıqla məşğul olubsunuz, bu gün
isə biznes sferasındasınız. Bu keçid necə oldu?
- Rəssamlıqla 4 yaşımdan məşğulam. Daim ən ali xəyalım rəssamlıqla
bağlı olsa da, bu sahə hazırda o qədər də gəlirli sektor deyil. Ancaq mən
birbaşa rəssamlıqdan biznesə də keçid etməmişəm. Belə ki, ilk olaraq maliyyə
üzrə oxudum. Sonra hüquqşünaslıqla bağlı bakalavr və magistr təhsili aldım. Bir
müddət Vergilər Nazirliyində, notariusda işlədim. Ancaq bir gün qərar verdim
ki, öz işimi qurmalıyam və bu məqsədlə də notariusdakı işimdən uzaqlaşdım.
Biznes qurmaq üçün dövlət işindən çıxanda, hamı mənə gülürdü. Amma qərarımı
vermişdim.
- Çox adam biznes qurmaq istəyir, amma qəti qərarı
hər kəs verə bilmir.
- Mənim
tərəddüd etmək kimi şansım olmadı. Pul lazım idi və onu qazanmaq üçün nə isə
etməli idim.
- Amma incəsənətə meyilli adamlar biznes qurmağa
çox da meyil etmirlər…
- İncəsənət
çox qısqancdır. O, səni bütünlüklə ələ almaq istəyir. Amma biznes adamı bir dəqiqə
də olsun telefonu söndürə bilmir. Rəssam isə bir gün telefonu söndürüb özünü rəsmə
həsr edə bilər. Bir-biri ilə üst-üstə düşmür. Bu ikisini bir arada aparmaq çox
çətindir. Hər gün səhər 5-də oyanmağımın səbəbi də budur.
- Hazırda bir neçə biznesiniz var. Bəs ilk addımı
necə atdınız?
- İlk
olaraq sosial şəbəkədə səhifə açıb onlayn bizneslə məşğul oldum. Kosmetika və
parfümeriya satışı aparırdıq. Aparırdıq deyəndə ki, hər işi özüm görürdüm.
Sonra işçilər cəlb etdik. Əvvəllər səhifənin adı başqa idi, sonradan "Neko”
adlandırdıq. Neko yapon dilində pişik deməkdir.
-O dönəmi
necə xatırlayırsınız?
-
(Gülür) Bunu başıma gələn bir hadisə ilə ifadə etmək istərdim. Deməli, onlayn
biznes işinə yeni başlamışdım. Təbii ki, hər işi özüm görürdüm. Bir oğlan zəng
vurub bir neçə parfüm sifariş etdi. Çatdırılma günü görüş təyin etdiyimiz yeri
tapa bilmirdim, o da tələsirdi və telefonda mənimlə hədsiz dərəcədə sərt
danışırdı. Deyirdi ki, mən başa düşə bilmirəm ki, siz necə kuryersiniz,
vaxtında niyə gətirib çatdırmırsınız və s. Dedi ki, mağazaya zəng vurub sizdən
şikayət edəcəyəm, məhsulunuzu almayacağam. Dedim ki, çox xahiş edirəm, alın,
yoxsa mənim maaşımdan kəsərlər və s. Nə
isə, çox sağa-sola dönəndən sonra gedib tapdım. Həmin gün də ad günü var idi, bəzənib
düzənib getmişdim ki, ordan da ad gününə gedəcəyəm. Oğlan məni görəndə donub
qaldı ki, siz kuryersiniz? Dedim ki, hə. O insan yəqin ki, sonradan mənim
müsahibələrimi gördü, bildi ki, mağazanın sahibi elə özüməm. Sonradan bizdən
çox sifariş etdi. Kuryer kimi sifarişi yerinə yetirəndə hamı soruşurdu ki, həqiqətən
siz kuryersiniz? O işi görmək mənim üçün heç də asan deyildi. Bəzən çatdırmalı
olduğum bağlamalar çox ağır olurdu, nəqliyyat vasitələrində düşürüb qaldırmaq
belə çətin olurdu. Bir müddətdən sonra kuryer xidməti ilə işləməyə başladıq.
İndi artıq hər bir işi ayrıca bir şəxs görür.
- İlk biznesiniz uğurlu alındı? Bəs digər bizneslərə
başlamağınız necə oldu?
- Onlayn
biznesə başlayandan bir müddət sonra "Neko” adlı uşaq kursu da açdıq. Əlimdə müəyyən
qədər gəlir olduqdan sonra isə "Nənəmin evi” adlı baxça yaratdıq. Onun adını
ona görə elə qoydum ki, mənə görə uşaq 24 saat rahat şəkildə ancaq nənəsinin
evində qala bilər (gülür). Çünki bizim baxça həftənin 7 günü 24 saat fəaliyyət
göstərir. Bu, xüsusilə işgüzar xanımlar üçün sərfəlidir. Onlar rahatlıqla işlərini
görürlər, onlayn şəkildə də uşaqlarının baxçada nə etdiyini izləyə bilirlər.
Əslində, baxça işi bizdə nəsilbənəsil ötürülən işdir. Çünki nənəm, anam baxça
müdiri olub. Daha sonra isə təkərlər üzərində bir mağaza yaratdıq. Onu da
"Neko” adlandırdıq. Məsələn, bir xanım işdədir və gərgin bir rejimi var. Amma
axşam hansısa tədbirdə, ad günündə və s. iştirak etməlidir. Onun evə gedib
hazırlaşıb qayıtması uzun çəkir. Bizim təkərlər üzərində olan o mağazanı
çağırır. Maşında gedəcəyi ünvana çatana qədər yolda hazırlaşır. Maşında fərqli
geyimlər, ayaqqabılar, kosmetik məhsullar - xanım üçün lazım olacaq hər şey var. Üstəlik,
hədiyyəni də maşından ala bilər. Bizim orda müxtəlif hədiyyə seçimlərimiz təqdim
olunur. "Neko” adlı suşi çatdırma şirkətimiz var idi. Bu ildən rebrendinq edib
onu ketrinq şirkəti etdik.
- Nənəniz və ananız baxça müdiri olublar. Baxça
işinə başlayanda, onların sizə maddi dəstəyi oldumu?
- Yox,
olmadı. Atasız ailədə böyümüşəm, məni anam tərbiyə edib. O ərəfədə ailə
problemlərimiz var idi, ona görə, anam mənə maliyyə cəhətdən yardım edə
bilmirdi. Onlayn biznesdən qazandığım pulları bu işə investisiya etdim. Baxça
qurmaq çətin olmadı, çünki uşaqlıqdan bu işin içində idim, məlumatım var idi.
Qida sektoru isə mənə yad idi. Ətrafımda bu sektorda çalışanlar olmayıb.
- İşləri qurarkən ətrafınızda sizə kömək edənlər
olmadı?
- Adətən,
yeni başladıqda ətrafındakı insanlar səndə perspektiv görmədikləri üçün görəcəyin
işə dırnaqarası baxırlar. Sənin işin uğur qazananda yanında olmağa, səndən iş
qurmaqla bağlı fikir almağa çalışırlar. Sənə kömək etməyən insanlar səndən
fikir alırlar. Buna nail olmaq isə mənə görə, ən böyük qazancdır.
- Ətrafdakı insanların inanmamağı halları çox olur.
Bəs siz biznesinizin uğurlu alınacağına əmin idiniz?
- Düzü,
o haqda düşünmürdüm. Düzdür, marketoloqam, Azərbaycanda hazırda fəaliyyətdə
olan bir çox bizneslərin planlarını yazmışam. Amma öz işimi quranda heç bir
plan yazmadım. Hansısa işə başlamaqdan da qorxmurdum. Çünki onsuz da ətrafdakı
insanlar mənə inanmırdılar. Biri var ki, insanlar sənə inansınlar və onların bu
inamını itirməmək üçün "alınmasa, neyləyərəm” deyə düşünürsən. Amma mənə inanan yox idi (gülür).
- Niyə
inanmırdılar sizə?
- Şıltaq
və incəsənətə meyilli qız olmuşam. Yəqin fikirləşiblər ki, burda da şıltaqlıq
göstərərəm, yarımçıq qoyaram və s. Ancaq söhbət işə gələndə, mən tamam başqa
insan oluram. İş işdir, onu ən yaxşı formada etmək lazımdır.
Azərbaycanda
atasız, yoldaşsız, qardaşsız, əmisiz, dayısız olan bir xanım uğur qazana bilər.
Kimsə, kiməsə inanmaya bilər, amma bu, mümkündür. Sadəcə olaraq, kimin nə qədər
yaxşı yaşamaq istəyinə bağlıdır. Hamı yaxşı yaşamaq istəyir, ancaq bu istək hər
kəsdə fərqlidir. Elə adamlar var ki, bu istəklə yaşayırlar, elələri də var
deyir ki, əlimdə olan bəsimdir.
- İstəyiniz bu işləri qurmaq idi?
- Əslində,
mənim istədiyim rəssamlıqdır. İstəyim həmişə az olub. Müəyyən yaşdan sonra
özümü gözəl mənzərəli evdə rəsm çəkən kimi görürəm. Ailəmlə, uşaqlarımla bir
yerdə. Hələ ki ailəli deyiləm, amma belə bir şey təsəvvür edirəm. Bir də
uşaqlara dərs keçmək mənə böyük zövq verir. Sadəcə olaraq, bu gün üçün bizneslərimlə
məşğulam. Eyni zamanda marketoloq kimi fəaliyyət göstərirəm. Biznesmenlərə
biznesin idarə olunması, marketinqlə bağlı məsləhətlər verirəm. Bir çox bizneslərin
qurulmasında iştirak etmişəm və edirəm. Amma dediyim kimi, müəyyən yaşdan
sonrakı hədəfim uşaqlıqdan marağım olan rəssamlıqdır.
Aygün Asimqızı