“Biz sadəcə, beynəlxalq hüquq normalarının yerinə yetirilməsini istəyirik”
Prezidentin
ictimai-siyasi məsələlər üzrə köməkçisi Əli Həsənov "Xəzər Xəbər”ə
açıqlamasında ABŞ-ın dövlət katibi Con Kerrininbu günlərdə Dağlıq Qarabağ
münaqişəsi haqda səsləndirdiyi fikirlərə münasibət bildirib. O, qeyd edib ki,
dövlət katibinin "liderlər buna hazır deyillər” açıqlaması təəssüf hissi
doğurur və məyusedicidir.Ə.Həsənov əlavə edib ki, bu açıqlamaABŞ-ın münaqişənin həllində üzərinə
götürdüyü missiyaya uyğun deyil.Çünki Dağlıq Qarabağ münaqişəsinin həlli
prosesindəABŞüzərinə müəyyən öhdəliklər götürüb.
Mövzunu
politoloqlarla müzakirə etdik. Onlar da düşünürlər ki, ABŞ dövlət katibi bu cür
bəyanat verməməli idi. Çünki bu fakt həmsədrlik öhdəlikləri ilə ziddiyyət təşkil
edir. Politoloq Mübariz Əhmədoğlu "Kaspi”yə
açıqlamasında dedi ki, artıq 20 ildən çox vaxt keçib. Bu qədər müddətdən sonra
həmsədr ölkənin belə bir münasibət sərgiləməsi qəbul olunan məsələ deyil: "Münaqişənin
həlli üçün şərait yarada bilmirsinizsə, bunun təqsiri kimdədir? 22 ildən çox
vaxt keçib, bu qədər vaxtda nə işlə məşğul olmusunuz? Neçə illərdən sonra durub
belə bir bəyanat vermək nə dərəcədə doğrudur və ya ədalətlidir? 22 ildir ATƏT-in
Minsk qrupu münaqişəni tənzimləməklə məşğuldur. Hələ də nəticə yoxdur. Bu azmış
kimi, məsuliyyəti də üzərlərindən atırlar. "Şərait yetişməyib” və s. bu kimi
fikirlərlə məsuliyyəti başqalarının üzərinə qoymaq olmaz. Əgər vəziyyət yaxşı
deyilsə, deməli, bu şəraiti siz yaratmamısınız. Kimi aldadırlar?”
M.Əhmədoğlunun
fikrincə, prosesi onlar aparırlarsa, məsuliyyət də daşımalıdırlar: "Vəziyyəti
düzəldə bilmirdinsə, niyə indiyə qədər bu işlə məşğul olurdun? Üstəgəl,
diplomatlara və s. məsələlərə bu qədər pul xərclənib. Əli Həsənov dövlət rəsmisidir.
Ona görə bir qədər yumşaq danışıb. Fikirlərini diplomatik ifadələrlə çatdırıb.
Amma mən açıq danışıram. Kerri o sözlərlə həm tənzimləmə prosesinə xəyanət
etdi, həm də açıq-aşkar ermənipərəst mövqe nümayiş etdirdi. Dediklərini məsuliyyətdən
qaçma kimi qiymətləndiririk. Hətta buna yalançılıq da demək olar. Onlar kimi
aldadır? 22 ildir deyirlər ki, biz bu məsələni tənzimləyəcəyik. Bu qədər
vaxtdan sonra isə dur de ki, şərait yetişməyib. Ona görə də bu, konkret şəkildə
adamları aldatmaqdır. Təəssüf ki, məsuliyyətdən qaçırlar”.
Politoloq Fikrət Sadıqov da Kerrinin dediklərinə haqq qazandırmır. Hesab
edir ki, belə bir nəhəng ölkənin dövlət katibi bu cür bəyanatlar səsləndirməməlidir:
"Necə yəni ölkə başçıları buna hazır deyillər, şərait yaranmayıb? 20 ildən
artıqdır ki, danışıqlar gedir. Hansı şərait yaranmalı idi? Məgər biz hansısa
güzəştlərə getməliyik? Mənə çox maraqlıdır, o, bu cür fikirləri səsləndirməklə
nəyi nəzərdə tutur? Nə demək istəyirlər? Ermənistana təzyiq göstərməkdənsə, bəzən
ölkəmiz haqda uyğun gəlməyən fikirlər səsləndirirlər. BMT-nin qətnamələrini
yerinə yetirməkdən, Ermənistana qarşı müəyyən tələblər irəli sürməkdənsə, neçə
illərdən sonra bu cür danışırlar. Qətnamələr neçə ildir niyə yerinə yetirilmir?
Ona görə də belə bir bəyanat vermək heç də məntiqə uyğun deyil. Heç yaranmış şəraitə
də uyğun gəlmir. Biz tərəfdən heç bir şərait yaranmayacaq. Azərbaycan sadəcə
olaraq, beynəlxalq hüquq normalarının yerinə yetirilməsini istəyir”.
F.Sadıqov nəzərə
çatdırdı ki, burada heç bir şəraitdən söhbət gedə bilməz. Çünki Azərbaycan
haqqını tələb edir: "Bir sıra problemlərin olmasına baxmayaraq, Azərbaycan
danışıqları davam etdirir. Bunlar isə şərait yaranacağından danışırlar. Bax, bu
cür gözləmə mövqeyi, ikili standartlar Ermənistanın xeyrinədir, vaxtın uzanması
onlara sərf edir. Üstəgəl, onların bu cür davranmalarına, beynəlxalq hüquq
normaları ilə hesablaşmamalarına gətirib çıxarır. Ona görə də Əli Həsənovun
fikirlərini dəstəkləyirəm və onunla həmfikir olduğumu bildirirəm”.
Şəfa Tapdıq