Birpərdəli pyeslərə qayıdış zərurəti
Mədəniyyət
Nazirliyi tərəfindən 2018-ci il sentyabrın 11-də elan olunan "Birpərdəli pyeslər”
müsabiqəsi başa çatıb və qaliblər mükafatlandırılıb. Müsabiqəyə təqdim olunan əsərlər
tanınmış mədəniyyət xadimlərindən ibarət komissiya tərəfindən qiymətləndirilib.
Xatırladaq ki, müsabiqənin təşkilində məqsəd, xalq teatrlarının repertuarlarını
kiçik həcmli tamaşalarla zənginləşdirmək, ədəbi-bədii və mövzu baxımından yüksək
dəyərə malik dram əsərlərinin yazılmasına stimul vermək, yeni nəsil
dramaturqların yaradıcılığını dəstəkləmək, tamaşaçıların mənəvi-estetik
zövqünün formalaşması üçün birpərdəli pyeslər əsasında müasir tamaşaların
hazırlanmasını təmin etmək idi. Müsabiqəyə təqdim edilən pyeslərin mövzusu vətənpərvərlik,
2016-cı ilin Aprel döyüşləri, multikulturalizm, mənəvi dəyərlər, dövrümüzün
sosial-əxlaqi problemləri, sosial şəbəkələrin cəmiyyətə təsiri, dini
radikalizmin fəsadları və digər aktual məsələləri əhatə edib.
"Müzakirə”mizdə çağdaş ədəbiyyatda birpərdəli pyeslərin nə qədər populyar olmasını, teatrların bu əsərlərə müraciət edib-etməməsini aydınlaşdırmağa çalışdıq.
Teatrlar maraqlı olacaqlar
Dövrün tələbatı yarandıqca
"Müzakirə”mizdə çağdaş ədəbiyyatda birpərdəli pyeslərin nə qədər populyar olmasını, teatrların bu əsərlərə müraciət edib-etməməsini aydınlaşdırmağa çalışdıq.
Teatrlar maraqlı olacaqlar
"Birpərdəli pyeslərin müasir dövrdə çox yazıldığını
deyə bilmərik”- deyən "Ölümə gedən” pyesinə görə müsabiqədə II yerə layiq görülən
yazar Cavid Zeynallının sözlərinə görə, Mədəniyyət
Nazirliyinin elan etdiyi müsabiqəyə cəmi 29 pyes göndərilib: "Mükafatlandırma tədbirində
münsiflərdən eşitdim ki, həmin pyeslərin arasında bədii səviyyəsi çox aşağı
olanları da az olmayıb. Ümumiyyətlə, dramaturgiya uzun illər aktual olmayıb.
Pyes oxumaq üçün yox, səhnə üçün yazılır. Teatrlar gənclərin əsərlərində müraciət
etmədikdə, müəlliflər düşünür ki, havayı əziyyət çəkirəm. Müraciət etməməyin də
müxtəlif səbəbləri olub. Məsələn, əsərlərin aşağı keyfiyyətli olması və s. Səbəb
hər nə olur-olsun, bu sahədə stimul demək olar, olmayıb. Mən ədəbiyyat və teatr
mühitini yaxşı tanıyıram. Kimlərin pyes yazdığını da adbaad bilirəm. Onların
sayı artmaqdadır. Məhz buna görə də Teatr Xadimləri İttifaqı yaradıcılıq
laboratoriyalarının içində xüsusi olaraq dramaturgiya laboratoriyası da təşkil
edib. Çox vacib, çox dəyərli addımdır. Həmin laboratoriyaya mən də yazılmışdım,
amma təəssüf ki, iş qrafikim iştirak etməyə imkan vermədi. Mənim orda
master-klass keçən dostlarım var. Çox razılıq edirlər. Deməli, pyes yazanların
sayı gələcəkdə daha da artacaq və püxtələşəcəklər”. Azərbaycan teatrlarının
hazırda yeni mərhələyə qədəm qoyduqlarını deyən yazar, dövlətin teatra böyük
diqqət və qayğısının olduğunu deyir: "Bütün bunlar əlaqəli şəkildə gənclərə də
müsbət təsir edir. Müsabiqənin mükafatlandırma mərasimində mənə də çıxış üçün
söz verdilər. Dedim, arzu edirəm ki, gələcək aylarda böyük pyeslərin də müsabiqəsi
keçirilsin. Nazirliyin müsabiqələrində cəmiyyətə təqdim olunan imzalar, Azərbaycan
teatrının sabah üçün həqiqi simaları ola bilərlər. İnanıram ki, belə də olacaq.
Çünki Mədəniyyət Nazirliyinin birpərdəli pyeslər müsabiqəsi çox böyük və müsbət
fikir yaratdı. Bu, həqiqətdir və bunu demək lazımdır”. Birpərdəli pyeslərin səhnələşdirilməsinə
gəlincə, yazar hesab edir ki, 12-15 iştirakçısı olan pyesi səhnələşdirməkdənsə,
iki-üç nəfərlik əsərə quruluş vermək bütün mənalarda rahatdır: "Yaxşı əsərlər
yazılarsa, teatrlar niyə də səhnələşdirməsinlər? Əksinə, teatrlar bunda maraqlı
olacaqlar”.
Əgər yaxşıdırsa...
Xalq artisti Ağakişi Kazımovun sözlərinə görə, birpərdəli pyeslər
indiyədək dövlət teatrlarında səhnələşdirilməyib: «İndiyədək dövlət
teatrlarının səhnəsində birpərdəli əsərlərə rast gəlməmişəm. Bu cür əsərlər
xalq teatrlarının səhnəsində, həvəskar teatrlarda, ali məktəblərin tələbə
teatrlarında səhnələşdirilib. Əvvəllər xalq yaradıcılıq evləri var idi. Onlar
birpərdəli pyesləri alırdılar. İndi isə bu cür yaradıcılıq evləri olmadığından,
həmin əsərləri də almırlar. Ona görə, o əsərlərin səhnə həllinə rast gəlinmir».
Rejissor bu cür əsərlərin dövlət teatrlarında səhnələşdirilməsinə müsbət
yanaşır: «Əgər yaxşı əsərdirsə, niyə səhnələşdirilməsin? Rejissor üçün birpərdəli
pyesi hazırlamaq daha asandır. Onun ideyasını da tez başa düşürsən. Aktyora da
tez izah edə bilirsən». A.Kazımov rejissor kimi ali məktəblərin tələbə
teatrlarında bir neçə birpərdəli pyesə quruluş verdiyini deyir: «Xarici Dillər
Universitetində fransız dilində, o cümlədən Azərbaycan Pedaqoji Universitetində
birpərdəli əsərlər səhnələşdirmişəm. Amma dövlət teatrlarında birpərdəli pyesə
müraciət etməmişəm”.
Ən yaxşı yenilik
Xalq artisti Mərahim Fərzəlibəyovun sözlərinə görə, birpərdəli pyeslər
formadır, janr deyil. Belə ki, bu formalar sovet dövründə SSRİ məkanında
populyar olub: «Təxminən 30-cu illərdən
sonra özlərini yalnız birpərdəli pyeslərə həsr edən dramaturqlar var idi. Bu əsərləri
də o zaman çox populyar olan xalq teatrları, kiçik dərnəklər üçün yazırdılar.
Ona görə, bütün nazirliklərdə belə bir şöbə açılırdı və xalq teatrlarına nəzarət
edən müfəttişlər fəaliyyət göstərirdi. O zaman Azərbaycanda Səttar Axundov adlı
yazıçı xalq teatrları üçün birpərdəli pyeslər yazırdı. Birpərdəli pyeslər üzrə
ümumittifaq festivallar keçirilirdi. Dramaturqlar şifrə ilə öz əsərlərini həmin
festivala göndərirdilər. Rejissorlar dövlət teatrlarının səhnəsi üçün iki birpərdəli
pyesi səhnələşdirirdilər. Mən Moskva, Sankt-Peterburq kimi böyük şəhərlərinin
dövlət teatrlarının səhnəsində birpərdəli pyeslərin səhnələşdirilməsinə rast gəlməmişəm.
Ola bilsin ki, əyalət teatrlarının rejissorları belə bir formaya müraciət ediblər».
Rejissorun fikrincə, birpərdəli pyes yaradıcılığı hazırda bizdə sovet dövründəki
kimi inkişaf etməyib: «Mədəniyyət Nazirliyi tərəfindən birpərdəli pyeslər
yazılması üzrə müsabiqənin keçirilməsi təqdirəlayiq haldır. Birpərdəli pyes
geniş həcmli pyes yazmaqdan çətindir. Fikirləşdiyin süjet, ideyalar, dinamika
elə güclü olmalıdır ki, tamaşaçı onları bir pərdənin içərisində böyük emosional
hisslə qəbul etsin. Məsələn, Çexovun yazdığı qısa hekayələri bu gün dünyada demək
olar ki, çox nadir müəlliflər yazır. Hər şeyin konkretliyi çox çətindir. Hesab
edirəm ki, bu formaya dramaturqlarımız müraciət etsələr, onların
yaradıcılıqlarına müsbət təsir edər, həmçinin formanın ölkə ədəbiyyatında
inkişafına səbəb olar». Rejissorun fikrincə, bugünkü prizmadan yanaşılsa, məsələn,
bir saatlıq, 55 dəqiqəlik pyeslər tamaşaçıların da marağına səbəb olar: "Mənə
elə gəlir ki, çoxpərdəli pyeslər bir qədər öz formasını dəyişməlidir. Ən yaxşı
yenilik dönüb arxaya baxmaqdır. Yəni birpərdəli pyeslərə qayıdış bəlkə də zəruri
olmalıdır. Belə ki, konkret, saatı az olan tamaşalara tamaşaçı çox meyillidir.
Dövlət teatrları bu cür əsərlərdən bəhrələnər. Fikrimcə, bu formaya qayıdış
müsabiqələrlə meydana çıxa bilər».
Dövrün tələbatı yarandıqca
Yazıçı İlqar Fəhmi hesab edir ki, hansı işin texniki baxımdan reallaşması
asandırsa, onun yaradıcılıq tərəfdən həlli çətin olur: "Yəni birpərdəli pyesin
reallaşması asandır, həmçinin az dekor tələb edir. Qastrola gedəndə də onu
nümayiş etdirmək asandır. Ancaq bu prosesin sonradan asan olması başlanğıcdakı
işi çətinləşdirir. Sən gərək bütün fikrini, düşüncəni kiçik bir çərçivəyə
sığışdırasan. Bu baxımdan texniki həlldən çox, yaradıcılığın üzərinə böyük iş
düşür. Bəzən əksinə olur, yaradıcılığı asan olan bir şey reallaşma vaxtı
müşkülləşir, böyük xərc tələb olunur. Ona görə, gərək qabaqcadan beyin enerjisi
sərf edib işi elə qurasan ki, sonradan bu tamaşanın qastrol həyatı, müxtəlif səhnələrdə
göstərilməsi asan olsun. Yəni kompakt, yığcam, minimalist üslubda bir süjet
qurasan». Yazıçının sözlərinə görə, birpərdəli pyeslərin ənənəsi bizdə çox
inkişaf etməyib: «Dramaturgiyamıza nəzər salsaq, əsasən böyük həcmli pyeslər
daha çox yazılıb. Ancaq indi dövr tələb edir ki, istər birpərdəli, istər mono,
istər duet pyeslər yazılsın. İndi dünya səhnələrinə nəzər salsaq, görərik ki, məhz
bu cür kompakt pyeslər teatra daha çox xidmət edir. Bu gün biz istehlak dövründə
yaşayırıq. Hər şey gərək öz xərcini ödəsin. Böyük tamaşalar, iri layihələr
getdikcə azalmaq üzrədir. Hesab edirəm ki, kiçik həcmli əsərlərin tədricən Azərbaycanda
da ənənəsi yaranacaq”.
İ.Fəhminin
fikrincə, ümumiyyətlə, pyes yazmaq çətindir: "Çünki düşüncəni, fantaziyanı, təxəyyülü
məhdud bir çərçivəyə sığışdırmaq asan deyil. Ancaq dövr tələb edir ki, bunu öyrənək.
Nəsrdən çıxan yazıçı üçün bu forma çox çətindir. Çünki nəsrdə sən sərbəstsən, həcm
problemin yoxdur, təxəyyülünü necə var inkişaf etdirirsən. Adətən nasirlərin bu
cür pyeslər yazmağı çətin olur. Xarici ölkələrdə bunun da öz məqsədləri var. Əminəm
ki, bizdə də dövrün tələbatı yarandıqca, birpərdəli pyeslər müəyyən formada
yetişəcək».
Təranə