Qrup yoldaşı, dost, sevgili və ailə – Ailə » Kaspi.azAzərbaycanda özəl xəbərlər, araşdırmalar, təhlillər və müsahibələrin tək ünvanı

Date: 26 Aprel 2019, 11:00, Oxunma sayı: 1132

Nazim Xəliloğlu: "Səmimi idi, hərəkətləri, jest-mimikaları ilə özünü sevdirməyi bacarırdı”

Yasəmən Quliyeva: "Hara gedirəmsə, deyirəm ki, kaş Nazim yanımda olsun, rahat olum”

Qrup yoldaşı, sonra da dost olublar. Lakin o vaxtlar heç biri sevgili olacaqlarını düşünməyiblər. Zamanla isə isə münasibətlərinin forması dəyişir. Bu gün artıq 5 ildir ki, ailəlidirlər.

Bu dəfə "Ailə” rubrikamızın qonaqları ARB televiziyasının redaktoru Nazim Xəliloğlu və həyat yoldaşı ARB TV "Aranfilm Yaradıcılıq Mərkəzi"ndə ssenari müəllifi kimi çalışan Yasəmən Quliyevadır.

Qrup yoldaşı olublar, bir-birlərini də elə o vaxtdan tanıyırlar. Nazim deyir ki, əvvəllər heç vaxt Yasəmənlə sevgili olacağını düşünməyib: "İkimiz də Mədəniyyət və İncəsənət Universitetinin ssenarist ixtisasında oxuyurduq. İlk vaxtlar heç qrup yoldaşı olaraq da yaxın münasibətimiz olmayıb. Dərsdə ixtisasımıza uyğun olaraq, bizə müxtəlif tapşırıqlar verilirdi, ona uyğun ssenari yazırdıq. Bir dəfə Yasəmən bir yazı yazmışdı, bütün qrupu təəccübləndirmişdi. O vaxt onu bir az kəşf etmiş oldum. Sonra zamanla dostlaşdıq, 2 il dostluq etdikdən sonra da sevgili olduq. Əvvəllər heç sevgili olacağımızı düşünməzdim. Çünki qızlarla görüşə gedəndə geyimimlə bağlı hər şeyin qaydasında olub-olmadığını soruşurdum, o da kömək edirdi. "Saçını belə etsən, daha qəşəng görünərsən” deyirdi. Yəni mənə belə məsləhətlər verən adam idi. Amma dostluğun axırına birinci çıxan da o oldu. Təklifi birinci o vermişdi (Gülür)”.

Yasəmən də bu dostluğun sevgiyə çevriləcəyini fikirləşmirmiş. İlk təklifin ondan gəlməsinin səbəbkarı isə Nazimin davranışları olub: "Bir dəfə də Nazim dərs üçün "Badamgöz” adlı hekayə yazmışdı. O yazı ilə də mən onu daha yaxşı tanıdım. Dostlaşdıq, amma sevgili olacağımızı heç düşünmürdüm. Sonra münasibətimiz elə həddə çatmışdı ki, hara getsəm, maraqlanırdı. O vaxt bir-birimizə "dostik” deyirdik. Mənə deyirdi ki, dostik, bu gün hara gedəcəksən? Deyirdim ki, teatra. Teatra gedəndə onu teatrın qarşısında görürdüm. "Nə var, niyə gəlibsən?” kimi sual beynimdə olurdu. 3 dəfə, 5 dəfə, axırda düşündüm ki, bu, niyə belə edir? Mən də hisslərimi gizlədən deyiləm. Hardasa, 3-cü kursun sonu idi, dedim ki, nə məsələdir, dostsan, bilim dostuq, sevgilimsən, bilim sevgilimsən... O da fikrini dedi (gülür)”.

Nazim deyir ki, Yasəmən tələbə vaxtı ona dadlı kekslər bişirib gətirirmiş, amma evlənəndən sonra onu görməyib: "Deməli, dost olduğumuz vaxtlarda tez-tez yumru kekslər bişirib gətirirdi, "özüm bişirmişəm, evdə yeyərsən” deyirdi. Çox dadlı olurdu, xoşuma gəlirdi. Yasəmənə qarşı fikrimin dəyişməsində o kekslər də rol oynamışdı, amma evlənəndən sonra o keksləri görmürəm. Oğlanlara məsləhət görürəm ki, belə şeylərə aldanmasınlar (gülür).

"Qazandığım pullar xonçalara gedirdi”

Universiteti bitirəndən sonra Nazim hərbi xidmətə gedir, qayıtdıqdan sonra nişanlanırlar. 3 il nişanlı qalırlar. Azərbaycanda ailələr uzun müddət nişanlı qalmağı məsləhət görmürlər. Bu mövzuda Nazimin də ürəyi dolu idi: "Dalaşa-dalaşa keçirdik (gülür). Maksimum dərəcədə az nişanlı qalmaq lazımdır. Qazandığım pullar xonçalara gedirdi. Çox bərbad adətdir. Heç Yasəmənin valideynləri xonça aparmağımızı istəmirdilər, amma böyüklərimiz deyirdilər ki, yaxşı deyil, aparmalıyıq”.

Yasəmən isə sevgililik müddətinin çox olmasının tərəfdarıdır: "Nişanlılıq müddəti odur ki, cütlüklər bir-birini daha yaxşı tanısın. Amma bizdə nişan qaytarılırsa, bu, faciə kimi qəbul edilir. Ona görə, tez nişanlanmaqdansa, sevgili müddətini çox saxlamaq yaxşıdır”.

"Yeməyimi yedimsə, divanda uzanmalıyam”

Evləndikdən sonra Yasəməni Nazimlə bağlı təəccübləndirən məqamlar olub: "Düzdür, çox şey təsəvvürümdə olduğu kimi qaldı, amma bəzi xüsusiyyətləri məni qıcıqlandırırdı. Məsələn, işdən ondan bir saat gec gəlirdimsə, otağa girəndə görürdüm ki, stolun üstündə 6-7 fincan var. Birinci dəfə elə bildim ki, qonaq gəlib. Sonra məlum oldu ki, hər dəfə çay içəndə başqa fincan götürür. "Birinci içdiyin fincanı yaxala, sonra yenə onda iç” deyirdim. Deyirdi ki, belə öyrəşmişəm. Corabın bir tayı bir otaqda olurdu, o biri tayı başqa otaqda. İndi bir az düzəlib”.

Nazim deyir ki, ana rahatlığına öyrəşən adam olduğu üçün o, belə şeyləri qəbul edə bilmirmiş: "Axı analar oğlanlarına baxdığı kimi, həyat yoldaşları onlara baxmır (gülür). Yemək yeyəndən sonra boşqabı aparıb mətbəxə qoymaq nədir? Yeməyimi yedimsə, divanda uzanmalıyam. Mamam yığışdırırdı. Sonra artıq gördüm ki, iki nəfərlik həyat başqadır, müəyyən qədər o komfortdan əl çəkməlisən”.

Evləndikdən sonra isə Nazim həyat yoldaşının necə qayğıkeş olduğunu görüb: "Bir müəllimimiz var idi, həmişə deyirdi ki, eyni yaşda olan qızla oğlan arasında 10 yaş fərq olur. Bizim də bir yaş fərqimiz var. Evləndikdən sonra gördüm ki, o, məndən bir neçə yaş böyükdür. Bəzən mübahisəli məqam olurdu, inciyirdi, amma mən "haqlıyam” deyib dirəşirdim. Müəyyən zaman keçdikdən sonra haqsız olduğumu başa düşürdüm. Ailənin nə demək olduğunu dərk etmək üçün mənə bir müddət vaxt lazım oldu, ancaq o, artıq dərk etmişdi”.

"Mənə indiyə kimi "bunu geyinmə” deməyib”

"Ailədə biri od olanda biri su olmalıdır” deyirlər. Yasəmən bildirdi ki, əvvəllər ikisi də od olublar, indi ikisi də sudur: "İkimiz də od idik, sonra gördük ki, iki odla heç nə etmək olmur və ikimiz də su olduq. Artıq hadisələrə yanaşmamız dəyişib. Əvvəllər problem etdiyimiz nüanslara indi başqa cür baxırıq. Hətta küsəndə bəzən Nazimin səhvi olsa belə, barışmaq üçün mən addım atmışam, o isə hərəkətindən utanıb”.

Bir-birini bəyənməklərinə səbəb olan xüsusiyyətlərə gəlincə, Nazim, xanımının səmimiliyini daha çox sevib: "Səmimi idi, hərəkətləri, jest-mimikaları ilə özünü sevdirməyi bacarırdı. Kişilər elə şeylərə bir az uyumlu olur. Çəkiciliyi var. Sonra artıq digər xüsusiyyətlərini kəşf etməyə başladım. Çox vaxt "sevmək, sevmək” deyirlər, amma mənə elə gəlir ki, biz Yasəmənlə bir-birimizi sevməmişik. Sevmək ailə qurmaq üçün kifayət deyil. Ailə üçün daha köklü xüsusiyyətlər lazımdır. Ömrünün sonuna qədər bir adamla yola çıxmaq asan deyil. Mən Yasəməndə o yolu davam etdirmək üçün lazım olan xüsusiyyətləri gördüm, bəyəndim”.

Yasəmən isə Nazimin yanında rahat olduğunu dedi və bu, seçimində böyük rol oynayıb: "Nazimin yanında rahat oluram. Universitet vaxtı hara getsəm, yanımda olmasını istəyirdim. Bu gün də belədir. Bəzən kimsə deyir ki, kaş, həyat yoldaşım toya getməsin, rahat olum. Amma mən hara gedirəmsə, deyirəm ki, kaş Nazim yanıma olsun, rahat olum. İnsan var "onu eləmə”, "bunu eləmə”, "onu geyinmə”, "bunu geyinmə”, kimi o qədər "olmaz”ları olur ki. Nazimdə bu, yoxdur. Deyir ki, sən özün hər şeyin sərhədini bilirsən. Mənə indiyə kimi "bunu geyinmə” deməyib. Yaraşmadığı halda deyib, amma qadağa kimi yox”.

Nazim deyir ki, rahatlığın qarşılığını xanımından görür: "Bəzən oğlanlar evlənəndə dostları "səni də itirdik” deyirlər. Çünki ailə qurandan sonra qayğılar artır, saatlarla dost məclisində vaxt keçirmək heç də alınmır. Məndə bu cəhətdən çox rahatdır. Dostlarım deyirlər ki, subay vaxtınla indi fərqlənmir. Yasəməndə "niyə?” sualları yoxdur. Mən yazıram ki, bu gün dostlarla görüşəcəyəm, evə gec gələcəyəm, "oldu” yazır. Arada lazım olanda təbii ki yığır, amma dalbadal zəng vurub "hardasan?” sualını vermir”.

"Ağır yeməkləri bizim üçün anam bişirib göndərir”

Ailənin mətbəxindən söhbət edək. Yasəmən yemək bişirməyi sevməsə də, Nazim bu cəhətdən çox həvəslidir. Bəyin əlinin duzu da var, amma di gəl ki, xanım onun mətbəxə keçməsinin ona baha başa gəldiyini deyir: "Duz qabından duz götürüb qazana tökübsə, iki qabın arasındakı məsafə ancaq duz olur. Sarıkök götürdüyü qaşığı çay dəsmalının üstünə qoyur. Belə misallar çoxdur. Yemək əla olur, amma yeməkdən sonra 3 saat mətbəxi yığışdırıram. Ağır yeməkləri bizim üçün anam bişirib göndərir. Qalan vaxtlar Nazimlə ikimiz idarə edirik”.

Nazim deyir ki, televiziyada işləməsəydi, aşpaz olardı: "Yemək bişirməyi sevirəm. Ona görə, imkan olan kimi mətbəxə keçirəm. Amma Yasəmənin də bacarığı yaxşıdır”.

"Vətəndaş nikahı ilə yaşamaq daha yaxşıdır”

5 ildir evlidirlər. Hər ikisi yaradıcı adamdır. Nazim deyir ki, məişət qayğıları incəsənət adamlarını yaradıcılıqdan uzaqlaşdıra bilir: "Biz hansısa Avropa ölkəsində yaşasaydıq, nişanlanmaq, evlənmək kimi məcburiyyətimiz olmasaydı, bir yerdə yaşayardıq, uşaq məsələsini bir az daha yuxarı yaşlara keçirərdik, yaradıcılığımızla məşğul olardıq. Ailə quranda artıq üzərinə böyük yük götürmüş olursan. Bu, xanımın mənə, ya mənim ona yük olmağım anlamına gəlmir. Amma Azərbaycanda ailə qurmaq üçün pul yığmalı, 300-400 nəfərlik toy etməli, sonra sən toyuna gələnlərin toyuna getməlisən, sonra uşaq olur, filankəs uşağına ad günü edib çağırır, sən də bunu etməlisən və s. Bu kimi şeylər adamı yaradıcılıqdan uzaqlaşdırır. Uşaq müəyyən bir müddətdən sonra olsa, daha yaxşı olar. Bu bazar günü ancaq evdə oturduq, yemək bişirdik, evi yığışdırdıq, uşaqla oyandıq. Biz yazı yaza, hansısa kitab oxuya, hansısa filmə baxa bilərdik, amma qayğılar bunlara vaxt ayırmağa imkan vermir. Mən, müəyyən qədər bu kimi şeylərə vaxt ayıra bilirəmsə, Yasəməndə heç alınmır. Çünki o, uşaqla daha çox vaxt keçirir”.

Yasəmən də yaradıcı adamların gec evlənməyinin tərəfdarıdır: "Rejimim elədir ki, səhər işə gedirəm, qayıdandan sonra ancaq ev işləri görürəm, uşaqla məşğul oluram. O yatandan sonra Nazim bir-iki saat kitab oxuya bilirsə də, mən o qədər yorğun oluram ki, onu da edə bilmirəm. Yaradıcı insanlar yaxşı olar ki, bizdəki kimi, o ailədən qurmasınlar. Əvvələ qayıtsaq, yenə Nazimlə evlənərdim. Ondan yaxşısını düşünmürəm, amma həddindən artıq məişətləşirəm. Bu proses bir neçə il gec olsa, məncə, yenə də heç nə itirməzdik. Qızıma görə 3 il analıq məzuniyyətində oldum, Nazim deyirdi ki, çox geri düşürsən”.

Nazim deyir ki, həyat yoldaşı 3 il çalışmadığı müddətdə onların söhbət mövzusu da dəyişib: "3 il müddətində söhbətimiz ancaq uşağın qarnının ağrımağından, yeməyindən və s. olurdu. Mən onun işinə qayıtmağını istəyirdim. İndi gələndə, gördüyü işlərdən, ünsiyyətdə olduğu adamlardan, çəkdikləri filmdəki hansısa detallardan danışır. Bu, yaxşı bir şeydir. Mən Qərb insanlarını başa düşürəm, 40 yaşdan sonra ata-ana olurlar. Məncə, yaradıcılığa vaxt sərf etmək üçün bu, normaldır. O baxımdan, vətəndaş nikahı ilə yaşamaq daha yaxşıdır”.

"Uşaqdır” deyib qeyri-ciddi yanaşmırıq”

Amma həm də yaradıcılıqlarının ən böyük zirvəsi 4 yaşlı qızları Nilufəri hesab edirlər. O, dünyaya gələndən sonra həyatlarının başqa yöndə dəyişdiyini dilə gətirdilər. Nazim deyir ki, özü üçün ideallaşdırılmış bir qız böyütmək istəyir: "Çalışıram ki düz olsun, var-dövlətin, vəzifənin qarşılığında ədaləti tapdalamasın. Sərbəst təxəyyüldə biri olmasını, mənimlə dost olmasını istəyirəm. Böyüdüyündə, sevgilisinin olduğunu gəlib mənə rahatlıqla desin.

Cəmiyyətimizdə kişilərin qadınlara yanaşması məni çox da qane etmir. Ona görə, özüm üçün ideallaşdırılmış bir qız böyütmək istəyirəm. Travma alan, kişiləri pisləyən qadınlardan olmasın, əksinə, elələri ilə qarşılaşanda atasını misal çəkib, daha yaxşı bir örnək kimi danışsın. Bizdə qadını namus-qeyrət meyarı ilə ölçürlər, amma mən onun vətənə faydalı fərd olmasını istəyirəm. Qadının bacarığına baxmaq lazımdır, şəxsi həyatı, onunla bağlı fikir demək üçün meyar olmamalıdır. Məsələn, onun 5 dəfə də sevgilisi olsa, mən ona heç vaxt qarışmaram. Şəxsiyyətin meyarı cinsi həyatla ölçülməməlidir. Çalışdığımız qədər, cəmiyyətə faydalı övlad böyütmək istəyirik”.

Yasəmən isə bildirdi ki, qızlarının seçiminə hər zaman önəm verirlər: "Biz şəxsiyyət böyütmək istəyirik. "Uşaqdır” deyib qeyri-ciddi yanaşmırıq. Ona fərd kimi yanaşırıq. Hansı paltarı geyinmək istədiyini, hansı restorana getmək istədiyini ondan soruşuruq. Restoranda yemək seçimi edəndə belə, onun istəyini nəzərə alırıq”.

"Dediyim dedikdir” deməklə ailə olmur”

Sonda ailəni möhkəm edən səbəblərdən danışdılar. Yasəmən, güzəştə getməyin çox vacib amil olduğunu vurğuladı: "Dediyim dedikdir” deməklə ailə olmur. Bəzən ailələr niyə dağılır? Oturub problemi müzakirə edə bilmirlər. Səhv olub, hər iki tərəf oturub danışanda sonra görürsən ki, heç elə də böyük problem deyil. Maraq dairəsinin eyni olması da önəmlidir. Fikirlər üst-üstə düşməlidir. Bir də kişi "qadındır, evdə otursun” deməməlidir. Kişi qarşısındakına qadın yox, şəxsiyyət kimi baxmalıdır”.

Nazim isə qarşındakını səhvləri ilə qəbul etməyin önəmli olduğunu qeyd etdi: "Qarşındakı insanı səhvləri ilə qəbul etməlisən. Bu zaman daha rahat olar. Cütlüklər maksimum dərəcədə güzəştə getməli, qarşı tərəfin daha yüksəkdə olduğunu düşünməlidirlər. Qalan problemlər o yüksəkliyə gəlib çatmamalıdır. Bizim aramızda elə problemlər olub ki, çox cütlüklər həmin vaxt yollarını ayırardılar, amma biz bunu etməmişik. Bir-birimizi çox istəmək bizi bir yerdə saxlayıb”.

Aygün Asimqızı

Tipi	Ədə.	Adı	AZN
USD	1	1 ABŞ dolları	1.7
EUR	1	1 Avro	1.8816
GEL	1	1 Gürcüstan larisi	0.5812
GBP	1	1 İngiltərə funt sterlinqi	2.0788
IRR	100	100 İran rialı	0.004
SEK	1	1 İsveç kronu	0.1756
CHF	1	1 İsveçrə frankı	1.7256
KWD	1	1 Küveyt dinarı	5.5885
TRY	1	1 Türkiyə lirəsi	0.2946

Bu sayımız

"Ədəbiyyat" əlavəsi

"Teatr" əlavəsi

Bir məktəbin tarixi

Reklam

"Kaspi"nin nəşrləri