Bilməyə-bilməyə, bilirmiş kimi görünməyin aqibəti
Adam o vaxt gülünc, rəzil duruma düşür ki, bilmədiyi məsələ barədə
danışır. Özü də "mütəxəssis” kimi danışır. Və bu məsəldən az-çox xəbərdar
olanlar, nəyin necə olduğunu bilənlər şaqqanaq çəkib gülürlər.Əli Kərimli adlı "siyasətçi” də bu günlərdə bilmədiyi məsələ haqqında
danışıb. Amma özünü elə göstərib ki, guya bilir. Bu məsələni bilənlər də Əli
Kərimlinin "biliyinə” heyran olub uğunurlar gülməkdən. Əli Kərimli deyib ki,
"Arsenal” və "Çelsi” UEFA-nın onlara ayırdığı biletlərin yarısını sata
bilməyərək geri qaytarıblar. Əli Kərimli bunu Bakıda hotellərin qiymətinin baha
olması, viza almağın çətinliyi ilə əlaqələndirib.
Bilənlər bilir, biz bilməyə-bilməyə bildiyini güman edən Əli Kərimli
üçün bəzi məqamlara aydınlıq gətirək. Aydınlıq gətirək ki, bəlkə bundan sonra
bildi.Əvvəlcə viza məsələsi barədə. Martın 11-də Azərbaycan Respublikasının
Prezidenti İlham Əliyev UEFA Avropa Liqasının Bakıda keçiriləcək final oyununun
təşkili və keçirilməsi ilə bağlı ölkəmizə gələcək əcnəbilər və vətəndaşlığı
olmayan şəxslər üçün viza prosedurlarının sadələşdirilməsi barədə sərəncam
imzalayıb.Sərəncama əsasən, UEFA Avropa Liqasının 2019-cu ildə Bakıda
keçiriləcək final oyunu ilə əlaqədar Azərbaycan Respublikasına gələn və
Azərbaycan Futbol Federasiyaları Assosiasiyasından (AFFA) rəsmi dəvət məktubunu
və ya UEFA-nın müvafiq qaydalarına uyğun olaraq akkreditasiyadan keçməni təsdiq
edən sənədi, yaxud final matçına bilet və ya biletin əldə olunmasını
təsdiqləyən sənədi təqdim edən əcnəbilər və vətəndaşlığı olmayan şəxslər mayın
15-dən iyunun 1-dək Azərbaycan Respublikasının beynəlxalq hava limanlarında
viza ala bilərlər. Sənədə
əsasən, Xarici İşlər Nazirliyinə final oyunu ilə əlaqədar Azərbaycana gələn
şəxslər üçün viza prosedurlarının sadələşdirilməsi, habelə Azərbaycan
Respublikası Prezidentinin 2016-cı il 1 iyun tarixli fərmanının 4.2-ci bəndinə
əsasən təsdiq edilmiş ölkələrin siyahısına uyğun olaraq, əcnəbilərin və
vətəndaşlığı olmayan şəxslərin "ASAN Viza” sistemi vasitəsilə elektron viza
almaq imkanı barədə UEFA-ya və xarici ölkələrin müvafiq orqanlarına məlumat
vermək tapşırılıb. Bunu bildinizmi, Əli Kərimli? Və bilməyə-bilməyə, bildiyinizi
güman etdiyinizi də bildinizmi?
UEFA hər bir kluba 6 min bilet ayırmışdı. Ancaq bu o demək deyildi
ki, Azərbaycan paytaxtına cəmisi 12 min ingilis azarkeşi gələcək.Yox, Əli Kərimli, bu biletlər komandalara şəxsən verilir ki,
fan-klublarının üzvlərinə satsın. Və bu biletlərin heç də həmişə hamısı
satılmır. Finalın Bakıda, Kiyevdə, Parisdə və ya Madriddə keçirilməsindən asılı
olmayaraq. Həmişə fan-klublar üçün ayrılmış biletlərin müəyyən qismi geri
qaytarılır.Ancaq bu o demək deyil ki, o biletlər satılmır. Yox, satılır.
Dünyanın təxminən 100 ölkəsindən "Çelsi” və Arsenal” azarkeşləri Bakıdakı final
oyununa bilet əldə ediblər. Yəni hər şey Əli Kərimlinin "bildiyi” kimi deyil,
Bakıya 25-30 min arası azarkeşin gəlməsi gözlənilir. UEFA-nın klublara ayırdığı
biletdən 2 dəfə, klubların fan-klub üzvlərinə satdıqları biletlərdən 4 dəfə çox
azarkeş. Onlar kimlərdir, Əli Kərimli?Üstəlik, "Arsenal” və "Çelsi” azarkeşləri Bakıdakı otellərin
qiymətindən yox, biletlərin qiymətindən narazılıq ediblər. Burda isə Azərbaycan
hakimiyyətinin heç bir günahı yoxdur. Vallah, billah, biletin qiymətini UEFA
müəyyənləşdirir.
Yeri gəlmişkən, bir məsələni də deyək, Əli Kərimli bilsin, çünki bir
ildən sonra bilməyə-bilməyə bu barədə də yazacaq.2020-ci ildə baş tutacaq Avropa çempionatının oyunları üçün ən ucuz
bilet Bakıda keçiriləcək qarşılaşmalar üçündür. Ən baha bilet isə Londonda
keçiriləcək oyun üçün. İngilislər qiymətlərin baha olmasına görə indidən
narazılıq edirlər. Amma buna görə Azərbaycan hakimiyyətini, heç İngiltərənin
kraliçasını və ya baş nazirini də ittiham etmirlər. UEFA-nı günahlandırırlar.
Çünki ingilislər Əli Kərimli deyillər, bilirlər ki, biletin qiymətini kraliça
və ya Tereza Mey yox, UEFA müəyyənləşdirir. Əli Kərimli, bil ha, Avropa
çempionatı FİFA yox, UEFA- nın bayrağı altında keçirilir. Bir ildən sonra bu
məsələdə də səhvə yol verəcəyinə əmin olduğumuz üçün xatırlatdım ey.
İndi də gələk otellərin qiymətinin baha olması məsələsinə. Bazar
qanunlarından xəbərsiz olan Kərimli bunun da günahını Azərbaycan hakimiyyətində
görür. "Madriddə 100 funt-sterlinqə olan otellər indi 2700 funt-sterlinqə
yüksəlib. Bu, ağlasığmazdır. Azarkeşlər üçün çox təəssüflənirəm”.Əli Kərimli, Yurgen Kloppu tanıyırsan? Yox, "Barselona”nın baş
məşqçisi deyil. Çempionlar Liqasının yarımfinalında "Barselona”ya qalib gələrək
finala adlayan "Liverpul”un baş
məşqçisidir. Madriddə qiymətin fantastik həddə yüksəldiyini deyib, azarkeşlərə
görə təəssüflənən də odur. Bakıdakı finaldan 2 gün sonra Madriddə Çempionlar
Liqasının son qarşılaşmasında "Liverpul” "Tottenhem”lə üz-üzə gələcək.
Oxuyun və bilin ki, artıq Madriddə otellərin, icarəyə verilən şəxsi
mənzillərin qiymətləri fantastik həddə yüksəlib. Bunu bazar qanunları
formalaşdırır ey, Əli Kərimli. Bunu bilmək üçün iqtisadçı, mühasib, nə bilim,
bazarkom, kolxoz sədri olmağa ehtiyac yoxdur axı. Bunu bilmək bilik deyil. Bu,
adi məntiqdir.
İndi sizin deməyinizdən belə çıxır ki, İspaniyada otellər
hakimiyyətin monopoliyasında olduğu üçün qiymətlər qalxıb? Bəlkə, otellər İspaniya
hakimiyyətinin yox, kralının monopoliyasındadır? Bunu bir dəqiqləşdirin. Bəlkə,
dəqiqləşdirərkən məlum olacaq ki, Madriddə otellərin qiymətinin qalxmasının da
baiskarı Azərbaycan hakimiyyətidir?
Əli Kərimli, axı, məcbur deyildi ki, futbol haqqında yazasınız. Axı,
insanın bilmədiyi məsələ haqqında bilirmiş kimi danışması onu ağıllı yox, axmaq
obrazında göstərir cəmiyyətə. Yəni bunu da bilmirsiniz? Yoxsa, bilməyə-bilməyə
elə bilirsiniz ki, bilirsiniz?
F.ABASOĞLU