Bakı 12°C
Bilik Fondu Almaniyalı alimin mühazirəsini təşkil etdi
Azərbaycan Respublikasının Prezidenti yanında Bilik Fondunun təşkilatçılığı
ilə iyulun 12-də Azərbaycan Respublikasının Prezidenti yanında Vətəndaşlara
Xidmət və Sosial İnnovasiya üzrə Dövlət Agentliyinin 3 saylı Bakı
ASAN Xidmət mərkəzində Almaniya Federativ Respublikasının tanınmış
hüquqşünası, Frankfurt şəhərindəki Kanzlay Haynzen hüquq şirkətinin vəkili Stefan
Heynzelin "Almaniya Federativ Respublikasının ailə hüququnun
özəllikləri” mövzusunda mühazirəsi keçirilib. Fondun "Dünya elmi Azərbaycanda”
layihəsi çərçivəsində keçirilən tədbiri giriş sözü ilə açan Dövlət Agentliyinin
İnsan resursları və təlim şöbəsinin müdir müavini, ASAN Könüllülük məktəbinin rəhbəri Cahangir Hacıyev Agentliyin fəaliyyəti barədə
tədbir iştirakçılarına məlumat verib, bu qəbildən olan silsilə maarifləndirici
tədbirlərin keçirilməsinin məkanı kimi ASAN Xidmətin seçilməsinə görə Bilik
Fondunun rəhbərliyinə təşəkkürünü bildirib.
Fondun aparat rəhbəri, professor İsaxan Vəliyev qonağı iştirakçılara
təqdim edərək, Vətəndaşlara Xidmət və Sosial İnnovasiya üzrə Dövlət Agentliyinin
Azərbaycan Respublikasının Prezidenti cənab İlham Əliyevin birbaşa təşəbbüsü ilə
yaradıldığını, bu qurumun ölkə prezidentinin korrupsiya ilə mübarizə siyasətində
səmərəli bir təsisata çevrildiyini xüsusi vurğulayıb.
Aparat rəhbəri Agentliklə Bilik Fondunun əməkdaşlığını, iki qurum
arasında birgə fəaliyyətlə bağlı imzalanmış memorandumu xatırladıb, Azərbaycan
Respublikası və Almaniya Federativ Respublikasının ailə məcəlləsinin bəzi oxşar
və fərqli xüsusiyyətlərindən danışıb. O, daha sonra Azərbaycan
Respublikasında vəkillik təsisatında baş verən köklü islahatların insan hüquq və
azadlıqların təminatı istiqamətində gözlənilən nəticələri verdiyini konkret
misallarla dinləyicilərin diqqətinə çatdırıb.
Məruzəçi qismində çıxış edən Stefan Heynzel Almaniya Federativ
Respublikasının ailə qanunvericiliyində nigah və boşanma institutlarının mahiyyətini
dinləyicilərə izah edib. Natiq daha sonra boşanma, nigahın etibarsız hesab
edilməsi və vərəsəlik institutlarının Azərbaycan qanunvericiliyi ilə müqayisəli
təhlilini aparıb, tədbir iştirakçılarını maraqlandıran sualları cavablandırıb.
