Bəzən həyat mənbəyi olmayan sular...
Su həyatdır. Hər nə qədər şablon səslənsə də,
doğrudan da su insan həyatında mühüm rol oynayır. Qızmar yay günlərində isə suya
olan tələbat daha da artır. Təəssüflər olsun ki, bu gün satışda olan suların
heç də hamısı "həyat” deyil. Hətta satışda olan bəzi su butulkalarının üstündə bir
il yararlılıq müddəti olduğu qeyd olunub. Belə olan təqdirdə, istər-istəməz
fikirləşirsən ki, bir il qalan suyun insana hansı faydası ola bilər? Axı, adicə,
ev şəraitində bir neçə gündən artıq qalan suyun tərkibi dəyişir, yararsız hala
düşür. Bəs görəsən suyun bir il yararlı olması üçün onun tərkibinə hansı
maddələr vurulur? Bu maddələrin orqanizmimizə hansı zərərli təsirləri ola
bilər?
Tibb üzrə ekspert,
professor Adil Qeybulladeyir ki, uzun müddət qalması üçün şirkətlər suyu müxtəlif üsullarla sterilizə
edirlər: "Suyun mineral tərkibində normal miqdarda bakteriyalar var. İçməli
suyun kriteriyaları bir kub metr suyun
tərkibində olan bağırsaq çöpü bakteriyalarının həcmi ilə ölçülür. Yəni bəlli
sanitar normalar var. Su hövzələrində adətən, normalar yoxlanıldıqdan sonra
suyun içməli olub-olmadığı müəyyən edilir və istifadəyə buraxılır. Suyun tərkibində
bakteriyalar olduğu üçün uzun müddət bir yerdə qaldıqda tərkibindəki
bakteriyalar çoxalır və su içməyə yaramır. Ona görə də, suyu uzun müddət
saxlamaq olmaz. Suyun uzun müddət yararlı qalması üçün şirkətlər onu müəyyən
üsullarla sterilizə edirlər. Amma əsl içməli su uzun müddət qala bilməz. Çünki
uzun müddət qalan suyun tərkibində toksinlər artır. Bunu adi ev şəraitində də
sınaqdan keçirmək mümkündür. Əgər siz uzun müddət bir qabda içməli suyu
saxlasanız, görəcəksiniz ki, xarab olub”.
Həkim bildirdi ki, suyun konservasiyası üçün
istifadə olunan bütün maddələr insan orqanizminə ziyanlı təsir göstərir: "Plastik
qablarda suyun saxlanılması bu gün dünyanın əsas problemlərindən biri hesab
olunur. Belə qablarda günəş şüasının suya təsir etmə qabiliyyəti artır və
toksiki effekt verir. Nəticədə belə su, orqanizmdə zəhərlənməyə gətirib
çıxarır. Hazırda polietilen tərkibli örtük materiallarının hamısının
dəyişdirilməsi və əvəzlənməsi məsələsi dünyanın gündəmindədir. Ümumiyyətlə,
içməli suyun və qida maddələrinin bu cür qablarda saxlanılması və
qablaşdırılması Ümumdünya Səhiyyə Təşkilatı tərəfindən qadağan edilib. Satışda
olan sularla evimizə gələn suyun tərkibində fərqlər var. Yaxşı olardı ki, su ev
şəraitində sterilizə edilsin. Bunun üçün müxtəlif daşlar və qurğular var. Ölkədə
əsas şirin su hövzələrindən biri Kür çayıdır. Amma düşünürəm ki, Kür çayının
suyu içməli su kriteriyasından xeyli uzaqdır. Bu suyun bioloji göstəriciləri və
təmizlənməsi bəlli deyil. Bildiyim qədər, həmin su xlorlaşdırılaraq şəbəkəyə
buraxılır. Bu mənada deyə bilərəm ki, problem çox ciddidir. Su, ərzaq, dərman
təhlükəsizliyi konsepsiyası dünyanın əksər ölkələrində milli təhlükəsizlik
konsepsiyasının tərkib hissəsidir. Bu, çox mühüm məsələdir. Bir neçə il öncə aparılan tədqiqatlara görə,
Araz və Kür çayının tərkibində xeyli zərərli maddələrin olduğu aşkar edilmişdi.
Bildiyiniz kimi, Araz çayı Ermənistan ərazisindən də keçir. Orada kimyəvi
zavodların tullantıları çaya axıdılır. Bu tullantıların tərkibində ağır metal
duzları, ammonyak kimi zərərli maddələrin miqdarı həddən artıqdır. Ona görə də,
ehtiyatı əldən vermək lazım deyil. Hesab edirəm ki, marketlərdə satılan sulara
aldanmaq olmaz. Çalışmaq lazımdır ki, ev şəraitində gündəlik təmizlənmiş sudan
istifadə edilsin”.
"Azad İstehlakçılar”
Birliyin sədri Eyyub Hüseynovbizimlə söhbətində su ilə bağlı tez-tez şikayətlərin olduğunu söylədi: "Şüşə
qablarda olan sular üçün bir illik yararlılıq müddəti qoymaq olar. Amma plastik
qablardakı sular tez bir zamanda istifadəyə yararsız olur. Belə suları bir il
saxlamaq olmaz. Bu sulardan istifadə etmək çox təhlükəlidir. Buna aid çoxlu
nümunələr göstərmək olar. Hətta ən məşhur brendlərin satdığı suların da saxlanma
şəraiti pis olduğundan, yararlılıq müddəti ərzində tərkibində göbələklər əmələ
gəlir. İstehlakçılar açıq havada satılan , saxlanma şəraiti normal olmayan və uzun
müddət yararlılıq müddəti olan suları almaqdan imtina etməlidir. Belə suların
insan orqanizminə heç bir faydası yoxdur. Çünki bu sular adətən, çirklənmiş su
hesab edilir. Qeyd edim ki, bu məsələ ilə bağlı bizə tez-tez bizə şikayətlər
olur. İstehlakçılar suların qablaşdırılmasından narazılıq edirlər”.
Şəbnəm
Mehdizadə