AZƏRBAYCANDA KORONAVIRUSLA BAĞLI XƏBƏRLƏR

Beynəlxalq standartlara uyğun təşkilatçılıq

Beynəlxalq standartlara uyğun təşkilatçılıq

Siyasət
14 Fevral 2020, 17:32 1376
Azərbaycanda parlament seçkisi yüksək rəqabət şəraitində, ədalətli, şəffaf və demokratik şəkildə keçib
 
Fevralın 9-da Milli Məclisə keçirilən növbədənkənar seçkidə rekord sayda - 1314 namizəd iştirak edib. Onlardan 246 nəfəri 19 siyasi partiyanın təmsilçisi olub, 1057 nəfəri fərdi qaydada namizədliyini irəli sürüb. 11 nəfərin namizədliyi isə təşəbbüs qrupu tərəfindən irəli sürülüb. Namizədlərin 21 faizini qadınlar, 79 faizini kişilər təşkil edib. Bundan başqa, növbədənkənar parlament seçkisini 77790 yerli müşahidəçi izləyib ki, onlardan da 35152-si siyasi partiyaların müşahidəçiləri olublar. Eyni zamanda, budəfəki seçki ilə əlaqədar 58 ölkədən və 59 təşkilatdan 883 beynəlxalq müşahidəçi akkreditasiyadan keçib, seçki prosesini yaxından izləyiblər. Həm yerli, həm beynəlxalq müşahidəçilər fevralın 9-da Milli Məclisə keçirilən seçkinin tam demokratik formada baş tutduğunu bəyan ediblər. ATƏT-in Demokratik Təsisatlar və İnsan Haqları Bürosu (DTİHB), ATƏT Parlament Assambleyası və Avropa Şurası Parlament Assambleyasının (AŞPA) nümayəndələrindən ibarət Beynəlxalq Seçki Müşahidə Missiyası (BSMM) da növbədənkənar seçki ilə bağlı fevralın 10-da ilkin qənaətlərini açıqlayıb. Sözügedən hesabatda bir sıra müsbət məqamlar yer alıb.
Seçki başa çatdıqdan bir neçə saat sonra Türkiyə Prezidenti Rəcəb Tayyib Ərdoğan dövlətimizin başçısı İlham Əliyevə telefonla zəng edib. O, Azərbaycanda keçirilən parlament seçkisində Prezident İlham Əliyevin rəhbərlik etdiyi Yeni Azərbaycan Partiyasının qələbə qazanması münasibətilə həmkarını təbrik edib, yeni parlamentə fəaliyyətində uğurlar arzulayıb. MDB İcraiyyə Komitəsi müşahidə missiyasının rəhbəri, Rusiya Federasiyası Dövlət Dumasının MDB məsələləri, Avrasiya inteqrasiyası və həmvətənlərlə iş üzrə komitəsinin sədri Leonid Kalaşnikovun, Türkiyə-Azərbaycan parlamentlərarası dostluq qrupunun rəhbəri Şamil Ayrımın başçılıq etdiyi nümayəndə heyətləri Prezident İlham Əliyevin qəbulunda olarkən ölkəmizdə keçirilən növbədənkənar parlament seçkisində beynəlxalq standartlardan da üstün təşkilatçılıq gördüklərini dilə gətiriblər. Qeyd olunub ki, seçki yüksək rəqabət şəraitində, ədalətli, şəffaf və demokratik şəkildə keçib.
MDB-nin müşahidə missiyasının rəhbəri, MDB İcraiyyə Komitəsi sədrinin birinci müavini Viktor Quminski də Prezident İlham Əliyevin qəbulunda olarkən Azərbaycanda keçirilən parlament seçkisində xeyli sayda müşahidəçinin iştirak etməsinin önəmini vurğulayıb. Qeyd olunub ki, MDB-dən olan müşahidəçilər seçkinin yüksək səviyyədə təşkil olunduğunu dilə gətirir, qanun pozuntusunun qeydə alınmadığını, bütövlükdə seçki prosesinin şəffaf, demokratik və rəqabətlilik prinsipi şəraitində, Azərbaycan qanunvericiliyinə tam uyğun şəkildə keçirildiyini bildiriblər.
Rusiya Prezidenti Vladimir Putin də dövlət başçısı İlham Əliyevə ünvanladığı məktubda Yeni Azərbaycan Partiyasının növbədənkənar parlament seçkisində qələbə qazanması münasibətilə həmkarını təbrik edib. Bildirib ki, xalq səsverməsinin yekunları Prezident İlham Əliyevin başçılıq etdiyi partiyanın Azərbaycan vətəndaşları arasında nüfuzunun yüksək olduğunu əyani təsdiq edir.
V.Putinlə yanaşı, Serbiya Prezidenti Aleksandr Vuçiç, Özbəkistan Prezidenti Şavkat Mirziyoyev, Moldova Parlamentinin Sədri Zinaida Qreçanı, Rusiya Federasiyası Federal Məclisinin Federasiya Şurası sədrinin müavini İlyas Umaxanov, Gürcüstanın Baş Naziri Giorgi Qaxaria da Prezident İlham Əliyevi təbrik ediblər. Avropa İttifaqının (Aİ) Xarici Fəaliyyət Xidmətinin sözçüsü də Azərbaycanda keçirilmiş növbədənkənar parlament seçkisi ilə bağlı bəyanat yayıb. ATƏT/DTİHB Seçki Müşahidəsi Missiyasının qeydlərinə istinad edilən bəyanatda bildirilib ki, Mərkəzi Seçki Komissiyası şəffaf fəaliyyət göstərmək üçün səylərini əsirgəməyib və beynəlxalq müşahidəçiləri qarşılayıb. Bəyanatda qeyd olunub ki, Avropa İttifaqı bütün vətəndaşların mənafeyi naminə dialoqun davam etdirilməsini və Azərbaycan təsisatları ilə, o cümlədən yeni seçilmiş parlamentlə sıx işləməyi səbirsizliklə gözləyir. Azərbaycan Xarici İşlər Nazirliyinin Bəyanatında isə qeyd olunub ki, Milli Məclisə keçirilmiş seçki ölkə Konstitusiyası, Seçki Məcəlləsi və Azərbaycanın beynəlxalq öhdəliklərinə tam uyğun olaraq baş tutub.
Bütün bunlar bir daha onu deməyə əsas verir ki, ölkəmizdə keçirilən parlament seçkisi Azərbaycanda bütün sahələri əhatə edən genişmiqyaslı islahatların tərkib hissəsi olmaqla, ədalətli və demokratik şəraitdə keçib. Azərbaycan dövləti seçkinin beynəlxalq standartlar səviyyəsində baş tutması üçün hər cür şərait yaradıb. "Dağlıq Qarabağın Azərbaycanlı İcması” İctimai birliyinin İdarə Heyətinin üzvü Elman Məmmədov da bildirib ki, Azərbaycanda keçirilmiş 9 fevral növbədənkənar parlament seçkisi tam demokratik, şəffaf, ədaləti, seçki qanunvericiliyə uyğun şəkildə baş tutub. Onun sözlərinə görə, seçki prosesində hər hansı ciddi qanun pozuntusu, saxtakarlıq qeydə alınmayıb. E.Məmmədov Azərbaycanda seçkiləri izləyən beynəlxalq müşahidəçilərin də belə qənaətdə olduğunu dilə gətirib. Bildirib ki, müşahidəçilərin hamısı seçkinin qanunauyğun keçirildiyini diqqətə çatdırıblar: "Seçkini xaricdən gələn müşahidəçilər keçirmir, onlar yalnız müşahidə etməklə məşğuldurlar. Hansı qurumu təmsil etməsindən asılı olmayaraq bu, belədir. Seçkini keçirən Azərbaycan xalqıdır və bu seçkinin keçirilməsinə, idarə olunmasına rəhbərlik edən Mərkəzi Seçki Komissiyasıdır. Azərbaycan xalqı da öz sözünü dedi, məntəqələrə gəlindi, səs verildi və seçki keçirildi. Cənab Prezidentimizin Kürdəmirdə "ASAN xidmət” mərkəzinin açılış mərasimində söylədiyi kimi, elə bir dövlət olmaz ki, orada seçki tam ideal formada olsun. Təbii ki, müəyyən qədər prosedur qaydalarında, seçkinin gedişatında xırda narazılıqlar olur. Ölkə başçısı bir daha bəyan etdi ki, əgər elə məsələlər varsa, onlar MSK və yaxud başqa qurumlar tərəfindən çox ciddi şəkildə araşdırılacaq. Hamısına ciddi, düzgün və hüquqi qiymət veriləcək. Əgər ciddi pozuntulara yol verənlər olubsa, təbii ki, onlar da müvafiq qaydada cəzalandırılacaqlar. Amma ümumən götürəndə Azərbaycanda 9 fevralda keçirilmiş növbədənkənar parlament seçkisi demokratik, şəffaf və açıq formada keçirildi. Azərbaycan xalqı, seçicisi iradəsini ortaya qoydu və istədiyi namizədə də səs verdi”.
 
Ərturan İSMAYIL