Beynəlxalq maliyyə qurumlarından TANAP-a böyük dəstək
Beynəlxalq
maliyyə qurumlarının Azərbaycan təbii qazının Türkiyəyə və bu ölkədən də
Avropaya nəqlini nəzərdə tutan Trans-Anadolu qaz boru kəməri (TANAP) layihəsinə
ümumilikdə 4 milyard dollaradək kredit ayırması gözlənilir. AZƏRTAC-ın
məlumatına görə, Dünya Bankı və Asiya İnfrastruktur İnvestisiya Bankından bu
günlərdə layihəyə ayrılan 1,4 milyard dollarlıq kreditlə yanaşı, Çoxtərəfli
İnvestisiya Təminatı Agentliyi, Avropa İnvestisiya Bankı, Avropa Yenidənqurma
və İnkişaf Bankından da maliyyə vəsaiti cəlb olunacaq.
Dekabrın 21-də Dünya Bankının Direktorlar Şurası
TANAP layihəsinə 800 milyon ABŞ dolları kredit ayrılması ilə əlaqədar qərar
qəbul edib. Belə ki, Dünya Bankı Qrupuna daxil olan Beynəlxalq Yenidənqurma və
İnkişaf Bankı vasitəsilə cəlb olunacaq kreditin 400 milyon dolları Azərbaycanın
zəmanəti ilə "Cənub Qaz Dəhlizi” QSC-yə, qalan hissəsi isə Türkiyənin zəmanəti
ilə "Botaş” şirkətinə veriləcək. Dekabrın 21-də Asiya İnfrastruktur İnvestisiya
Bankının Direktorlar Şurası da TANAP layihəsinə 600 milyon ABŞ dolları kredit
ayrılması ilə bağlı qərar qəbul edib.
Millət vəkili Tahir Mirkişili "Kaspi”yə açıqlamasında bildirdi ki, TANAP layihəsi həm
bizim region, həm Avropa üçün mühüm əhəmiyyətə malikdir: "Bu layihə bütün tərəflər
üçün yeni iqtisadi imkanlar yaradacaq, enerji təhlükəsizliyinin təmin edilməsinə
səbəb olacaq. Layihənin uğurla həyata keçəməsində əsas rol Azərbaycana məxsusdur.
Bu məqsədlə dövlət büdcəsində vəsait də nəzərdə tutulub. Dünya Bankının TANAP
layihəsinə kredit ayırması barədə verdiyi qərar layihənin dərin təhlilindən
sonra baş verib. Bu qərar bir daha Azərbaycanın müəllifi olduğu beynəlxalq
layihələrin perspektivli, gəlirli və etimadyaradıcı olduğunu göstərir”.
Millət vəkili Aydın Hüseynov deyir ki, beynəlxalq maliyyə qurumlarının
TANAP-a kredit ayırması layihənin reallaşması ilə bağlı şübhələri aradan
qaldırır: "Beynəlxalq maliyyə qurumları hansı layihələrə kredit ayırırlarsa, həmin
vəsaitin geri qaytarılacağına tam əmin olduqdan sonra bu addımı atırlar. Xeyli
müddət layihənin mahiyyəti, gələcək perspektivləri ilə bağlı bütün detallar,
geosiyasi proseslər nəzərə alındıqdan sonra o sahənin kreditləşməsi üçün qərar
verilir. Deməli, maliyyə ayırırlarsa, bu, TANAP-ın perspektivinin özünü yüz
faiz doğruldacağından xəbər verir. Azərbaycan tərəfi beynəlxalq qurumların bu dəstəyindən
öncə də layihənin reallaşmasına tam əmin idi. Ölkə başçısının təşəbbüsü, qətiyyəti
sayəsində bu layihə artıq real həllini tapmaq üzrədir. Layihə yaxın gələcəkdə
reallaşdıqda, Avropanın enerji təminatında mühüm rol oynamaqla yanaşı, Azərbaycanın
milli iqtisadiyyatına da öz müsbət nəticələrini verəcək”.
İqtisadçı alim Vüqar Bayramov hesab edir ki, son vaxtlar TANAP-ın maliyyələşdirilməsinə
beynəlxalq maliyyə qurumlarının maraq göstərməsi və eyni zamanda kreditləşmədə
iştirak etməsi bir neçə aspektdən müsbət hal kimi qiymətləndirilməlidir: "Birinci
tərəfi ondan ibarətdir ki, TANAP-ın inşası üçün maliyyə vəsaitlərinə ehtiyac
var. Buna görə inşaatda fasilənin yaranmaması üçün maliyyə təminatının gücləndirilməsi
və kreditlərin cəlb edilməsi vacib idi. Nəzərə alaq ki, TANAP və TAP Cənub Qaz Dəhlizinə
daxil olan iki böyük kəmərdir. TANAP vasitəsilə Azərbaycan il ərzində təxminən
7 milyard kub metrə yaxın mavi qazı Türkiyə bazarına çıxaracaq. Eyni zamanda,
TAP layihəsi vasitəsilə Azərbaycan birinci mərhələdə Avropa bazarına 10
milyard, sonrakı mərhələlərdə isə illik 15-20 milyard kubmetr arası mavi qazı nəql
edəcək. O baxımdan söhbət kifayət qədər böyük layihənin maliyyələşdirilməsindən
gedir”.
V.Bayramov deyir ki, vəsaitin
cəlb edilməsinin digər önəmli tərəfi TANAP-a inamın və xüsusilə beynəlxalq dəstəyin
artırılmasıdır: "TANAP-ın reallaşması, inşasının aparılması ilə bağlı müxtəlif
fikirlər var idi. Hətta beynəlxalq cəmiyyətdə bəzi hallarda TANAP-ın gələcəyinə
bir inamsızlıq da nümayiş etdirilirdi. Amma beynəlxalq maliyyə qurumları, Dünya
Bankı və Avropa Bankının maliyyələşdirmədə iştirak etməsi ondan xəbər verir ki,
onlar TANAP-ın reallaşmasında maraqlıdırlar. Təbii ki, TANAP-ın reallaşması ölkəmizə
beynəlxalq inamın artmasına gətirib çıxarır. TANAP-la bağlı şübhələrin aradan
qaldırılması və onun inşası üçün beynəlxalq dəstəyin gücləndirilməsi baxımından
məsələnin siyasi tərəfi də var. Eləcə də bu maliyyələşdirmə kəmərin strateji əhəmiyyət
daşıdığını nümayiş etdirir. Beynəlxalq maliyyə qurumlarının belə qərarları qəbul
etməsində inkişaf etmiş ölkələrin təsir imkanları böyükdür. Təbii ki, onlar
porosesə təsir göstərirlər. Öncə Asiya İnkişaf Bankı, sonra Dünya Bankı, eyni
zamanda Beynəlxalq Yenidənqurma və İnkişaf Bankı sözügedən kəmərlərin maliyyələşməsində
iştirakla bağlı qərar qəbul etdilər. Bu ondan xəbər verir ki, inkişaf etmiş ölkələr
və ya böyük güclər TANAP-ın reallaşmasına dəstək verirlər. Bu, iqtisadi və
siyasi xeyirlə yanaşı, strateji bir əhəmiyyətin də olduğunu göstərir”.
İqtisadçı onu da bildirdi
ki, Azərbaycan Cənub Qaz Dəhlizinin reallaşmasından təxminən
100 milyard dollara yaxın gəlir əldə edəcək. Burada söhbət həm də Azərbaycan
dövlət gəlirlərinin formalaşması baxımından kifayət qədər əhəmiyyəti olan bir təşəbbüsün
dəstəklənməsindən gedir. Qazanan tərəf region, regionun təhlükəsizliyində
marağı olan dövlətlər və ideyanın müəllifi Azərbaycandır.
Aygün