Bərabər təhsil imkanı üçün yola çıxan “Təhsil avtobusu” - Örnək
"Hər il səfərdən qayıtdıqdan sonra monitorinq aparırıq. Nəticə necə
oldu? İşimizin faydası nə dərəcədədir? İştirakçıların, valideynlərin reaksiyası
necədir? Bunu öyrənirik. Gördüyümüz qədərilə məmnundurlar. İşimizin faydası
olduğunu gördüyümüz üçün növbəti ildə də davam edirik. Ötən illərin nəticəsi
bizə davam etməyə stimul verir və artıq bu il də işlərə başlamışıq”.
Bu sözləri bizimlə söhbətində "Təhsil
avtobusu” layihəsinin meneceri Ülviyyə Axundova bildirdi. "Örnək”
rubrikasında bu dəfə "Təhsil avtobusu” layihəsi ilə bağlı Ülviyyə ilə söhbətləşdik.
Ü.Axundovanın sözlərinə görə, Təhsil Nazirliyinin layihəsi olan "Təhsil
avtobusu” bu il 4-cü səfərinə yola düşəcək: "Nazirliyin "Azərbaycan üçün öyrət”
proqramı çərçivəsində keçirilən layihə ilk dəfə 2016-cı ildə baş tutmuşdu. Əsas
məqsəd isə hamı üçün bərabər təhsil imkanının yaradılmasıdır. Hər il fərqli
istiqamətdə layihələrlə müxtəlif bölgələrimizə səfər edirik. İndiyə qədər Mingəçevir,
Şəki, Qəbələ, Lənkəran, Quba, Zaqatala, Şəmkir, Masallı, İsmayıllı, Gəncə, Cəlilabad,
Sabirabad və Bakıda olmuşuq. Bu dəfə sərhəd bölgələri plana salınıb. Həmçinin
Cocuq Mərcanlıda da olacağıq. Biz adətən, avtobusumuzun gedə biləcəyi qədər
ucqar yeri müəyyənləşdiririk, həmin yerdə bir məkan təşkil olunur və seçilmiş
şagirdlər, yaxud tələbələr avtobusla həmin əraziyə gətirilir”.
"Tələbənin dərsə marağı
yoxdur, amma...”
Layihə meneceri deyir ki, "Təhsil avtobusu” orta və ali məktəblərdə
orta və zəif nəticə göstərən şagird və tələbələrin dərsə marağının artırılması,
dünyagörüşünün inkişaf etdirilməsi istiqamətində bir proqramla yola çıxır: "Hər
il hədəf auditoriyamız müxtəlif olur deyə, proqramımız da fərqli olur. Birinci
il 5-10-cu siniflərdə zəif və orta nəticə göstərən şagirdləri cəlb etdik.
2017-ci ildə layihəmiz regionlardakı universitet və kolleclərdə 1-2-ci kursda təhsil
alan tələbələrlə bağlı idi. Ötən il 6-9-cu sinif şagirdləri oldu. Bu il də ötənilki
hədəf auditoriyası ilə işləyəcəyik. 10-11-ci siniflərin universitetə
hazırlaşmağa başı qarışır, vaxt cəhətdən problemləri olur. 6-9-cu siniflər elədir
ki, dərsə marağın artırılması, şəxsi inkişaf cəhətdən nələrsə öyrənilməsi üçün
vacib dövrdür. Ona görə biz bu il də bu istiqamətdə davam etmək fikrindəyik.
Biz dərs keçmirik, sadəcə olaraq orta və zəif nəticə göstərən şagird
və tələbələrin dərsə marağını artırmaq üçün çalışırıq. Proqramımız da məhz
insan kapitalını inkişaf etdirmək istiqamətində olur. Əgər layihəyə şagirdləri
cəlb ediriksə, incəsənət, sağlam təhsil, məntiq, motivasiya, intellektual
mövzular, robotlar hazırlamaq və s. kimi mövzular proqrama salınır. Ümumiyyətlə,
intellektual mövzular həmişə olur. 2017-ci ildə tələbələrlə işləyəcəyimiz üçün
karyera və biznes mövzusunda proqram hazırladıq. Tələbələri gələcək iş həyatına
hazırlamağa çalışdıq. Tələbənin dərsə marağı yoxdur, amma o, gələcəkdə bir peşənin
sahibi olmaq, karyera qurmaq istəyə bilər. Biz onlara biznes karyera mövzusunda
maraqlı təlim mövzuları hazırlamağa çalışdıq. Üstəlik, gənclərin bizi
Korporativ Sosial Məsuliyyət çərçivəsində dəstəkləyən şirkətlərdə təcrübə keçmələrinə
şərait yaratdıq”.
"Uşağım orda nə öyrənəcək?”
Layihə meneceri bildirdi ki, valideynlər ilk olaraq uşaqlarını yay məktəbinə
gətirməkdən çəkinirlər: "Çünki yeni bir şeydir, elə bilirlər ki, uşaqları zəif
olduğu üçün yenidən dərs keçiriləcək. Amma biz məlumat veririk. Hər hansı
valideyn narahat olursa, özü də gəlib uşağı ilə bir yerdə layihəyə qatıla bilər.
Layihə getdiyi müddətdə sosial şəbəkədə canlı yayımlarımız olur. Bizi bir həftə
hamı izləyə bilir. Uşaqların neylədiyini görürlər, bu zaman valideynlər də
rahat olur. Valideynlərin əsas sualı "uşağım orda nə öyrənəcək” olur. Biz də bu
sualın cavabını onlara veririk”.
"Təlimin hər bir anında
uşaqlar fəal olurlar”
"Təhsil avtobusu” bir həftə ərzində bir neçə rayona səfər edir, hər
bölgədə seçilmiş şagirdlərlə, yaxud tələbələrlə bir gün keçirir. Bir günə bir nəfərin
dünyagörüşündə, təfəkküründə nəyi dəyişmək mümkündür? Ülviyyə bu suala elə həmin
günün sonunda cavab tapdıqlarını bildirdi: "Layihəyə gələndə hər birinin
baxışları sualla dolu olur. Bu, onlara maraqlı gəlmir, elə bilirlər ki, zəif
olduqları üçün onlara dərs keçəcəyik və s. İlk olaraq biz onlara layihə çərçivəsində
apardığımız hədiyyələri təqdim edirik, yay məktəbinin köynəklərini geyinirlər,
onlara verilən çantalar, əşyalar, kitabları ilə tanış olurlar və artıq auraları
dəyişir. Birinci təlim başlayır, bir az keçəndən sonra görürük ki, gülümsəyirlər,
yavaş-yavaş fəal olurlar. Günün sonunda təlim yekunlaşanda isə pis olurlar,
deyirlər ki, yenə iştirak etmək istəyirik, tez bitdi”.
Yay məktəbinin müddətinin uzadılmasına gəlincə, Ülviyyə bildirdi ki,
bu zaman heç də bütün şagirdlər qatıla bilməyəcək: "Biz proqramı elə qurmuşuq
ki, bir həftə ərzində keçiriləcək mövzuları bir gün içərisində çox düzgün
vaxtlarda onlara veririk. Təkcə təlim olmur. Yarış, xüsusi intellektual
oyunlar, yemək və çay fasiləsi olur. Bizimlə bir günün necə keçdiyini bilmirlər.
Yəni, hər şey o qədər maraqlı təşkil edilir. Günün sonunda görürük ki, nəsə öyrəniblər
və onların gələcəklə bağlı daha əmin hədəfləri var. "Təlimçi gəldi, danışdı,
getdi” kimi olmur. Uşaqlar daim interaktiv şəkildə işləyirlər, öyrənirlər. Təlimin
hər bir anında uşaqlar fəal olurlar”.
"Layihədə iştirak edənlərin
ortalama nəticələri dəyişib”
Layihə meneceri əlavə etdi ki, layihə bitəndən sonra valideynlərin
fikirlərini öyrənirlər, yay məktəbinin nə dərəcədə faydalı olmasını müəyyənləşdirmək
üçün monitorinq aparırlar: "Məqsədimiz layihəyə cəlb etdiyimiz şəxslərin
dünyagörüşünün inkişafı, dərsə maraqlarının artırılması və gələcək həyatlarındakı
fəaliyyətlərinə müsbət təsir etməkdir. Və biz gördüyümüz işin bu cəhətdən nə dərəcədə
rol oynadığını öyrənməkdə maraqlıyıq. İyul ayında layihə baş tutur. Biz orda
bütün şagirdlərin əlaqə nömrəsini, e-mail ünvanlarını, sosial şəbəkə
hesablarını götürürük. Avqust ayında bizim heyətimiz xüsusi anket formaları
hazırlayır. Birbaşa təhsil idarələri, məktəblər, yaxud şagirdlərin özü ilə əlaqə
saxlayıb layihədə iştirak edənlərin dərsləri ilə bağlı maraqlanırıq. Çünki əsas
məqsədimiz bərabər təhsil imkanı yaradılması və iştirakçılarımızın da bundan
faydalanmasıdır. Bizim gördüyümüz qədərilə layihədə iştirak edənlərin ortalama
nəticələri dəyişib. Çünki biz onlara dərsin daha maraqlı gəlməsinə şərait
yaradırıq. Digər məsələ odur ki, onlar yenidən bu layihəyə qoşulmaq istədiklərini
bildirirlər”.
"Təhsil avtobusu”nda kimlərin olmasına gəlincə, Ülviyyə 20-25 nəfərlik
bir heyətlə yola düşdüklərini bildirdi: "BİR” Tələbə-könüllü proqramının üzvləri,
təlimçi-ekspert heyəti, layihənin idarə heyəti və Təhsil Nazirliyinin media
komandasından iştirak edənlər olur. Bir də Korporativ Sosial Məsuliyyət çərçivəsində
bizim tərəfdaşlarımız olur ki, onların nümayəndələri də bəzən bizimlə gəlirlər,
dəstək olduqları layihəyə regionlarda reaksiyanın necə olduğunu görmək istəyirlər.
Ekspert heyətinin getməsində biz də maraqlıyıq”.
"Nəsimi ili”nə töhfə
Ülviyyə deyir ki, şirkətlərimiz layihəyə dəstək olmaqda
maraqlıdırlar: "Layihənin ilkin elanı adətən aprel ayında gedir. Elanı yerləşdirdiyimiz
ilk gün 10-dan çox müəssisə zəng vurub bu layihəyə dəstək olmaq istədiyini
bildirir. Layihənin 20-dən çox dəstəkçisi var. "ENGİN”, "Kapital Bank”,
"Bakcell”, "Paşa Sığorta”, "Microsoft Azerbaijan”, "Golden Pay” və s. müəssisələr
hər il bu layihəni dəstəkləyirlər. Hər il layihəni başlayanda onlarla əlaqə
saxlayırıq, görüşlər keçiririk və yenə dəstək olmaq istədikləri halda bizə
qoşulurlar. Çünki "Təhsil avtobusu” Azərbaycanda ucqar kəndləri gəzən, ordakı
şagird və gənclərlə maraqlanan unikal bir layihədir. Bu il də tərəfdaşlarımızın
sayı çox olacaq. Layihəni dəstəkləyən çox olduğu halda, biz rayonların, şagirdlərin
sayını artırmağa çalışacağıq. İldən-ilə artım olur. Layihədə iştirakçı sayı
ümumilikdə 550 nəfəri keçib”.
Ülviyyə sonda əlavə etdi ki, builki layihə Prezidentimizin sərəncamı ilə elan olunan "Nəsimi ili”nə həsr olunub: "Təhsil Avtobusu – Nəsimi” Yay məktəbinin bu ilki məqsədi də sərhəd bölgələrinin şagirdlərini əsas götürərək onların şəxsi və fərdi inkişafına təkan vermək, dünyagörüşünü genişləndirmək, "Nəsimi ili”nə töhfə vermək və İmaməddin Nəsiminin yaradıcılıq irsini davam etdirməkdir. Ümid edirik və inanırıq ki, bu il də layihə uğurla həyata keçiriləcək və marağa səbəb olacaq”.
Aygün Asimqızı