Bərabər hüquqlar və bərabər imkanlar
"Azərbaycan əsrlər
boyu dinlər, mədəniyyətlər və sivilizasiyaların bir araya gəldiyi məkan olub.
Biz Şərq ilə Qərb arasında yalnız coğrafi körpü deyil, həm də mədəniyyət körpüsüyük.
Əsrlər boyu müxtəlif dinlərin və mədəniyyətlərin nümayəndələri Azərbaycanda
sülh şəraitində yaşayıblar. Dini dözümlülük və multikulturalizm burada hər
zaman mövcud olub. Multikulturalizm sözü mövcud olmadığı bir zamanda belə, həmin
ideyalar Azərbaycanda daim yaşayıb”.
Bu sözləri Prezident İlham Əliyev Bakıda keçirilən
BMT Sivilizasiyalar Alyansının VII Qlobal Forumun açılış nitqində deyib.
Tarixən Azərbaycanda yaşayan insanlar arasında
milli və ya dini ayrı-seçkilik qoyulmayıb. Tolerantlıq, milli-etnik dözümlülük,
sıx əməkdaşlıq, bərabər imkanlarla iştirak milli mentalitetimizin ayrılmaz cəhətlərindəndir.
Azərbaycan ərazisində məkan salmış bütün millətlərin, dinlərin nümayəndələrinin
sülh, mehribanlıq, qarşılıqlı anlaşma şəraitində yaşadığı Vətəni olub. Bu doğma
mehriban münasibətlər millətlər arasında əlaqələrin daha da inkişaf etdirilməsinə təkan verib.
Multikulturalizmin
Azərbaycan modeli
Bu mövzuda məqalələrlə çıxış edən Ombudsman Elmira
Süleymanova deyir ki, multikulturalizmin hökm sürdüyü ölkədə demokratiya özünün
ən yüksək inkişaf səviyyəsinə çatır: "Yaşadığımız əsr bəşər tarixini milli və
dini ədavətin qızışdığı, milli-dini zəmində qarşıdurmaların müharibə həddinə
çatdığı, etnik təmizləmə ilə müşahidə olunan yüzillik kimi tarixə düşə bilər.
Dünyada bir tərəfdə terror, müharibə, insan hüquqlarının kütləvi şəkildə
pozulması ilə nəticələnən hadisələr, digər tərəfdə isə insan hüquq və
azadlıqlarının təmin olunması, humanist dəyərləri özündə birləşdirən
tolerantlıq, sülh, dözümlülük, multikulturalizm ideyaları özünə yer tutub. Çox
sevindirici haldır ki, son ideyaların gerçəkləşdiyi məkan olan Azərbaycan
dünyaya öz multikulturalizm siyasətini, özünəməxsus modelini nümunə kimi təqdim edir və örnək kimi qəbul
olunur. Yəni, multikulturalizmin hökm sürdüyü ölkədə demokratiya özünün ən yüksək
inkişaf səviyyəsinə çatır. Dünyada multikulturalizmin artıq qəbul olunmuş Azərbaycan
modeli bunun bariz nümunəsidir. Tolerantlıq, sülh, dözümlülük - hər bir ailədə,
icmada, cəmiyyətdə, daha geniş götürdükdə, dövlət daxilində xoş münasibət,
dostluq, qardaşlıq və əməkdaşlıq deməkdir. Azərbaycanda heç bir zaman milli,
dini və irqi zəmində ayrı-seçkilik olmayıb. Əgər biz beynəlxalq sənədlərdə təsbit
olunmuş hüquqların hər birini ayrı-ayrılıqda təhlil etsək, həqiqətən ölkəmizdə
bərabər hüquqların bərabər şəraitdə bərabər imkanlarla təmin olunmasını bir
daha təsdiqləyərik. Milli azlıqların
nümayəndələri hakimiyyətin hər üç qolunda, qanunvericilik, icra və məhkəmə
hakimiyyətlərində yüksək səviyyədə təmsil olunublar. Ölkədə keçirilən seçkilərdə
milli və etnik azlıqlar aktiv və passiv seçki hüquqlarından tam və sərbəst şəkildə
istifadə edirlər. Bu gün Parlamentdə və bələdiyyələrdə milli və dini azlıqların
nümayəndələri də azad, şəffaf və ədalətli seçkilər nəticəsində seçicilərin səsini
qazanaraq, həmin seçkili orqanlarda təmsil olunurlar. Beləliklə, dövlətin
demokratik, idarəetmə sistemində səs verdiyi millət vəkilləri vasitəsilə qərar
qəbul etmək səviyyəsində iştirak edirlər. Etnik, dini və milli azlıqlara mənsub
olan şəxslərin öz mədəniyyətindən istifadə etmək, öz dininə etiqad etmək və
onun ayinlərini icra etmək, habelə doğma dilindən istifadə etmək hüququ vardır.
Bu hüquqlar da ölkəmizdə tam şəkildə təmin olunur. Milli azlıqlar öz dillərində
sərbəst şəkildə danışır, azad şəkildə öz dinlərinə etiqad edirlər, milli adət-ənənələrini,
mədəniyyətlərini, mərasimlərini yaşadırlar. Məlum olduğu kimi, 2000-ci ildə ölkəmiz
Avropa Şurasının "Milli azlıqların müdafiəsi haqqında Çərçivə Konvensiyası”na
da qoşulub. Bu Konvensiyaya əsasənmilli azlıqların və bu azlıqlara
mənsub şəxslərin hüquq və azadlıqlarının müdafiəsi insan hüquqlarının
beynəlxalq müdafiəsinin ayrılmaz tərkib hissəsidir və buna görə də,
beynəlxalq əməkdaşlığın bir sahəsi hesab olunur”.
"Gələcəyə
nikbin baxış”
Azərbaycan mədəniyyətinin inkişafında, ölkədə və
xaricdə daha geniş təbliğ olunmasında, Azərbaycan həqiqətlərinin dünyaya
çatdırılmasında çoxsaylı və geniş səpkili
fəaliyyəti ilə seçilən Heydər Əliyev Fondunun Prezidenti,UNESCO-nun və İSESCO-nun
xoşməramlı səfiri, Milli Məclisin deputatı Mehriban xanım Əliyeva 7-ci Qlobal
Forumun "Sosial inteqrasiya sahəsində qabaqcıl metodlar” mövzusunda ikinci
plenar iclasın açılışındakı yaddaqalan çıxışında bildirib: "Azərbaycanda müxtəlif
dini icmalar tolerant şəkildə yaşayırlar. Ən mühüm nailiyyətlərdən biri Azərbaycan
cəmiyyətində yüksək sosial tolerantlığın olmasıdır. Uğurlarımıza və nailiyyətlərimizə
baxdıqda, gələcəyimizə çox nikbinliklə yanaşırıq. Tanınmış alim Albert Şteyn
deyib ki, hər hansı fərdin həyatı o zaman məna daşıyır ki, başqa bir canlının həyatını
mənalı etsin”.
Sənədlər
10 dekabr 1948-ci ildə BMT-nin Ümumdünya İnsan
Hüquqları Bəyannaməsi hər bir kəsin hüquq bərabərliyi və heç kəsə qarşı
ayrı-seçkiliyə yol verilməməsi prinsipi üzərində qurulmuş ən mühüm sənəddir. Bəyannamə qəbul edildikdən sonra daha geniş və
daha yüksək səviyyədə tanınmağa, yayılmağa başladı. Bu tarixdən etibarən demək
olar ki, insan hüquq və azadlıqları sahəsində artıq yeni bir mərhələyə qədəm
qoyuldu və BMT tərəfindən insan hüquqları sahəsində bir sıra sənədlər qəbul
edildi. Bu sənədlər arasında 16 dekabr 1966-cı il tarixli Mülki və Siyasi
Hüquqlar haqqında və İqtisadi, Sosial və Mədəni Hüquqlar haqqında Beynəlxalq
Paktların bu il bütün dünya tərəfindən 50 illiyi qeyd olunur. Bu Paktlarda bir
daha insanların fundamental hüquqları aydın şəkildə öz əksini tapmış, dünyanın
bir çox ölkələri tərəfindən tanınmış və əsas müddəaları milli qanunvericilik
aktlarında təsbit olunmuşdur. Hüquq ədəbiyyatında Bill kimi tanınmış Bəyannamədə
və Paktlarda xüsusilə qeyd edilir ki, hər kəs heç bir fərq qoyulmadan, o cümlədən
irqindən, dərisinin rəngindən, cinsindən, dilindən, dinindən, siyasi və digər əqidəsindən,
milli yaxud sosial mənşəyindən, əmlak və ya digər vəziyyətindən asılı olmayaraq,
bu sənədlərdə təsbit edilmiş bütün hüquq və azadlıqlara malikdir. Deməli, bu
hüquqlardan hamı bərabər şəkildə və bərabər imkanlarla istifadə edə bilər və
heç kəs ayrı-seçkiliyə məruz qala bilməz. Odur ki, BMT tərəfindən bunlardan
sonra qəbul edilmiş demək olar ki, hər
bir sənəd ayrı-seçkiliyin yolverilməz olduğunu xüsusilə vurğulayır. Azərbaycan
Respublikasının Konstitusiyasında da hamının qanun və məhkəmə qarşısında bərabərliyinin,
insan və vətəndaş hüquqları və azadlıqlarının irqi, milli, dini, dil, cinsi, mənşəyi,
əqidə, siyasi və sosial mənsubiyyətə görə məhdudlaşdırılmasının qadağan
edildiyi təsbit olunur.
"Genetik koda
möhürlənmiş insanlıq”
Bakı Beynəlxalq
Multikulturalizm Mərkəzi Məşvərət Şurasının üzvü, araşdırmaçı-jurnalist Niyaz
Niftiyev qəzetimizə
açıqlamasında bildirdi ki, tarixən, Azərbaycanda insanlar arasında milli, dini
və irqi ayrı-seçkiliyə yol verilməyib, tolerantlıq milli mentalitetimizə xas
olub. Onun sözlərinə görə, Azərbaycan modeli dünya tarixinə yazılan tarixi
nümunədir: "Azərbaycan müxtəlif etnik və dini qrupların ənənəvi dözümlülük və
ahəngdar birgəyaşayışı üzərində qurulmuş və həyata keçirilən milli siyasətin
aparıldığı çoxmillətli və çoxdinli ölkədir. Yüzilliklər boyunca Azərbaycanda məskunlaşan
və müxtəlif dinlərə etiqad edən xalqlar aralarında heç bir ayrı-seçkilik
olmadan sülh və əmin-amanlıq şəraitində dinc - yanaşı yaşayıblar. Bu, dünya
tarixinə yazılan tarixi nümunədir. Bu, adına "tolerantlıq” deyilən, gerçəkdə
isə xalqımızın genetik koduna möhürlənmiş insanlıq, humanizm və bəşərilikdir.
Bu, həqiqətdir, ən yüksək kürsülərdə səslənən səmimi etirafdır. Prezident İlham Əliyevin dediyi kimi, ölkədə milli və
dini dözümlülüyün, tolerantlığın yüksək səviyyədə olması faktdır və bu, Azərbaycan
xalqının güc mənbəyidir, hər bir cəmiyyətin gücü onun dini və milli müxtəlifliyindədir”.
"Dünyada mütərəqqi
model”
Milli Məclisin Mədəniyyət komitəsinin üzvü, millət vəkili Ülviyyə Həmzəyeva da
hesab edir ki, bu gün Azərbaycan multikulturalizmi dünyada mütərəqqi model kimi
qəbul olunur. Onun fikrincə, Azərbaycan sülh, tolerantlıq, birgəyaşayışın
ideal modelinə, nümunəsinə sahib olan bir dövlət olaraq, bütün
dünyada tanınır: "Əsrlərdir xalqımız tolerantlıq, dözümlülük, başqa dinlərə
və mədəniyyətlərə hörmət prinsiplərini həyat tərzinə çevirərək,
multikulturalizm ənənələrinin formalaşmasına mühüm töhfələr verib. Tarixi keçmişə
malik olan Azərbaycan insanları, adət-ənənələriilə hələ qədim zamanlardan
başqa dövlətlərin, xalqların marağını cəlb edib. İpək Yolunun üstündə
yerləşən diyarımıza sənətkarlar, səyyahlar, elm adamları həmişə maraq
göstərib, öz ölkələrinə qayıtdıqdan sonra ölkəmizi, xalqımızı, qonaqpərvərliyimizi,
hörmət-izzətimizi qələmə alıb, Azərbaycana və xalqına bir çox əsərlər həsr
ediblər. Çoxmillətli Azərbaycan tarixinin bir mərhələsi ümummilli lider Heydər
Əliyevin adı ilə bağlıdır. Ulu öndər ictimai-siyasi həyatın bütün sahələrində,
o cümlədən dini etiqad azadlığının təminatında, dini-mənəvi dəyərlərin qorunmasında,
tolerantlılığın inkişafında müstəsna xidmətlər göstərib. Bu gün ümummilli
liderin siyasi xətti ölkə Prezidenti İlham Əliyev tərəfindən uğurla davam
etdirilir”.
"Qırmızı qəsəbə”
nümunəsi
Bakı Beynəlxalq
Multikulturalizm Mərkəzinin (BBMM) əməkdaşı Tofiq Abbasov qəzetimizə açıqlamasında bildirdi ki, Azərbaycanda
milli-dini tolerantlığın təməli əsrlər öncə qoyulub: "Milli-dini
tolerantlıq tarixi şəkildə formalaşmış bir cərəyandır. Bunun təməli demək olar
ki, əsrlər boyu qoyulub. İndi də öz gücünü, qüdrətini risklərə, təhdidlərə göstərə
bilir. Azərbaycanda yerli əhalinin VI-VII əsrdən bəri islama yaxınlaşması digər
təriqətlərin buradan sıxışdırılıb çıxarılmasına imkan yaratmayıb. Şimalda - "Qırmızı
qəsəbə” deyilən yerdə yəhudilər artıq bir neçə əsrdir ki, yaşayırlar. Məhsəti
türklərinə qarşı 80-ci illərin axırında Özbəkistanda amansız bir kampaniya
başlandı. Onların bir qismi Azərbaycanda özünə sığınacaq tapdı, xalqımız onları
qəbul etdi, dəstək oldu. İndi də onlar özlərini Azərbaycan vətəndaşı kimi hiss
edirlər. Biz görürük ki, dini zəmində də, milli zəmində də ölkələrin daxilində,
sərhədləri boyunca toqquşmalar baş verir, münaqişələr yaranır. Azərbaycanda belə
bir mühit yoxdur. Bu da ondan irəli gəlir ki, Azərbaycan reallığında müxtəlifliyin
vəhdəti artıq bərqərar olub. Bu da bizim xalqımızı, dövlətimizin ən böyük
varlığı, sərvətidir”.
Azərbaycan çoxmillətli, çoxkonfessiyalı ölkədir.
Bu, bizim sərvətimizdir. Biz bunu qorumalıyıq, qoruyacağıq.
Aygün ƏZİZ
Yazı
Ombudsmanın 10 dekabr - Beynəlxalq İnsan Hüquqları Günü münasibətilə "Hüquqlar -
hamı üçün!” mövzusunda keçirdiyi jurnalist yazılarının ənənəvi müsabiqəsinə təqdim
olunur.