Baş nazir Serj Sarkisyan üçün başağrısına çevrilir
Serj Sarkisyanın hökumət başçısı vəzifəsinə təyin etdiyi Karen
Karapetyan getdikcə onun özü üçün ciddi problemlər yaradır. Belə ki, baş nazir
qalmaqallı açıqlamaları ilə diqqət cəlb etməyə başlayıb. Ölkənin düşdüyü ağır
iqtisadi və siyasi vəziyyətdən çıxmaq üçün təkliflərlə çıxış edən baş nazirə
qarşı hakim partiya və rəhbərlikdə narazılıqlar artır. Hətta belə bir söhbət də
gəzir ki, S.Sarkisyan yeni baş nazirin qərarlarına təsir gücünə malik deyil və
ölkədə hakimiyyət büsbütün Karapetyana verilib.
Bu dəfə rəhbərlik etdiyi yeni hökumətin fəaliyyət planını təqdim edən
Karen Karapetyan korrupsiyanı ən başlıca problem adlandırmaqla gündəmə gəlib.
Bu isə birbaşa Serj Sarkisyana qarşı çıxmaq deməkdir. Ölkədə hamı gözəl bilir
ki, baş korrupsioner elə prezidentin özüdür. Parlamentdə çıxışında baş nazir
korrupsiya ilə yanaşı, kölgə iqtisadiyyatına qarşı qətiyyətlə mübarizə
aparacaqlarına, vergi və gömrük xidmətlərinin imiclərini kökündən
dəyişəcəklərinə söz verib. O, hüquq-mühafizə orqanı əməkdaşlarının vəzifə
səlahiyyətlərini aşması ilə bağlı heç bir faktın cəzasız qalmayacağını
bildirib.
Ölkədə toplanan vergilər korrupsiyaya qurşanmış rəsmilər və məmurlar
tərəfindən mənimsənilir və bununla bağlı çoxsaylı fakt var. Məsələn,
prezidentin qardaşı Aleksandr Sarkisyanın iş adamlarından gəlirlərin yarısını
aldığı vurğulanır. Qeyd olunur ki, büdcənin 30 faizi dövlət satınalmalarına,
yəni ayrı-ayrı dövlət strukturlarının öz ehtiyacları üçün sifariş verdiyi mal
və xidmətlərə xərclənir. Ancaq araşdırmalar göstərir ki, bu sifarişlər, bir
qayda olaraq, heç bir tender keçirilmədən eyni şirkətlərə verilir."Çiçəklənən
Ermənistan” fraksiyasının rəhbəri Naira Zohrabyanın "Biz elə hey korrupsiya,
kölgə iqtisadiyyatı, inhisarçılıq deyirik. Sanki bunlar qarşısı alınması müşkül
bir kabusdur. İnhisarçıların bir neçəsi elə bu parlamentdə əyləşib. Hamımızın
yaxşı tanıdığımız həmin inhisarçılarla necə mübarizə aparacaqsınız” sualına baş
nazir lakonik cavab verib: "Necə mübarizə aparacağımızı görəcəksiniz”. Baş
nazirin təqdim etdiyi 33 səhifəlik proqramda dövlət rəsmilərinin "qanunsuz
varlanmasının”kriminallaşdırılması da nəzərdə tutulub.
Baş nazirin ən gülməli qərarlarından biri isə dövlət idarələrinin
bütün əməkdaşlarına, tutduqları vəzifədən asılı olmayaraq, sosial şəbəkələrdən
istifadəni qəti şəkildə qadağan etməsi olub. "İş vaxtı sosial şəbəkələrdən
istifadə etmək üçün yalnız mətbuat xidmətlərinə icazə verilir ki, bu da onların
peşə funksiyalarının bir hissəsidir. Yeri gəlmişkən, dövlət sistemində
əməkdaşların kompüter biliklərinin də yoxlanılmasına başlanıb, burada söhbət
əsasən yığım surətindən gedir”, - Ermənistan mətbuatı yazır.
Müxalifət lideri Levon Ter-Petrosyan isə bəyan edir ki, görülən
tədbirlərə baxmayaraq, Ermənistanı tezliklə real iqtisadi fəlakət gözləyir: "Özü
də bu dəfə gözəl defolt adı altında”. O, yazılı açıqlamasında bildirib ki,
Karapetyanın səmimiliyinə inanır: "Ancaq onun vədlərinə əməl edə bilməsindən
ötrü hökumət korrupsiyasına qarşı iki konkret addım atılmalıdır. Bunlardan biri
bütün nazirliklərin və digər dövlət qurumlarının büdcədənkənar fondlarının
ləğvi, digəri isə BMT-nin Korrupsiya və vəzifəli şəxslərin qanunsuz
varlanmasına qarşı mübarizə haqqında Konvensiyasının ratifikasiyasıdır. Əgər bu
iki məsələ hökumətin fəaliyyət proqramına daxil edilməsə, onda Ermənistanda
iqtisadi vəziyyətin yaxşılaşacağına ümid etməyə dəyməz. Belə olan halda, baş
nazir nə qədər qabiliyyətli olsa da, hökumət qurbanlıq qoyuna çevrilərək,
əvvəlki iki hökumətin acı taleyini yaşayacaq. Çünki Ermənistanın bütün
bəlalarının kökündə məhz korrupsiya durur”.
Bundan bir qədər əvvəl müxalifət lideri demişdi ki, ölkənin iqtisadi
fəlakətin astanasında olduğu bir vaxtda prezident Sarkisyan hakimiyyətini necə
əbədiləşdirməyin yollarını axtarır. O, hakimiyyətin
səylərini"islahatların imitasiyası”adlandırmışdı.
Gəlinən qənaət budur ki, Ermənistanda hökumət üzvlərinin böyük
əksəriyyətinin yeni şəxslərlə əvəz edilməsindən sonra belə, bu ölkədə
sosial-iqtisadi vəziyyətin yaxşılaşacağına yenə də heç bir ümid yoxdur. Əksinə,
dövlət idarəçiliyində naşı olan bu şəxslərin vəziyyəti daha da pisləşdirəcəyi,
ölkəni iqtisadi xaosa sürükləyəcəyi qaçılmaz sayılır. Məsələnin bu tərəfinə
diqqət çəkən deputat Zaruhi Postancyan bildirir ki, Ermənistan hakimiyyətinin
yeni nazirləri küçədən gəlib və onların heç birinin dövlət idarəçiliyi və
siyasi təcrübəsi yoxdur. Deputatın fikrincə, yeni nazirlərin onlara tapşırılan
sahələrdən xəbəri yoxdur: "Deyirlər, onlar menecerdirlər və biznesdən gəliblər.
Lakin hökuməti idarə etmək menecmentlik deyil, bu, siyasətdir. İqtisadiyyat
Nazirliyinin adını dəyişib İnvestisiyalar Nazirliyi qoyub və ölkəyə
sərmayələrin axacağını gözləmək lazım deyil. Düzgün rəqabət şəraiti lazımdır.
Yalnız onda 10 milyonluq erməni diasporu sərmayəni Gürcüstana deyil,
Ermənistana yatıracaq”.
Yeri gəlmişkən qeyd edək ki, Ermənistanın ümumi dövlət borcu ilin əvvəlindən
5,3 faiz və yaxud 267,5 milyon dollar artaraq ilk yarımillikdə 5 milyard 345,2
milyon dollar təşkil edib. Ekspertlərin proqnozlarına görə, 2016-cı ilin
yekunlarına əsasən dövlət borcunun həcmi 5,569 milyard dollar təşkil edəcək. Bu
həcmdə borcu isə Ermənistan sadəcə ödəmək iqtidarında deyil, çünki ölkədə
iqtisadi inkişaf üzrə heç bir ciddi proqram həyata keçirilmir. Borcun artıq
ümumi daxili məhsulun yarısına çatması isə Ermənistanda defoltu qaçılmaz
edir.
Yeni Ermənistan Partiyasının lideri Andrias Qukasyan da bildirir ki, misli
görünməmiş böhranda olan erməni cinayətkar oliqarxiyası oğurladığı əmlakın
xilası yollarını axtarır: "Xalq buna imkan verməməlidir. Ermənistanda
konstitusiya qayda-qanununun bərqərar olunmasına çalışan və xalqın iradəsini
əks etdirən xadimlər artıq bu gün birləşməlidirlər ki, növbədənkənar prezident
seçkiləri təyin ediləcəyi təqdirdə, ölkəmizi məhvə aparan qüvvələrin
toparlanmasına qarşı dura bilsinlər”.
Azər