Baş nazir Moldovada qayda-qanun yaratmağa söz verdi
Moldovanın baş naziri Mayya Sandu Moldovada, o cümlədən Kişinyovun nəzarəti altında olmayan separatçı
Dnestryanı bölgədə də qayda-qanun yaratmağa qərar verib. Baş nazir bildirib ki,
bu məqsədlə bütün vasitələri işə salacaq. Tanınmamış qurumda isə baş nazirin
fikirlərini bölüşmürlər. Orda, sadəcə, Kişinyovun onlar üzərində rəhbərlik
etmələrini istəmirlər. Separatçıların lideri Vadim Krasnoselski bildirib ki,
Moldova ilə siyasi dialoqa əsas görmür. Ardınca da bəyan edib ki, Moskva da bu
mövqeyi bölüşmür. Bütün bu iradları Sandu, Moskvaya səfəri zamanı Rusiya
tərəfinə çatdırmağı düşünür. Bu səfər isə sentyabr ayına planlaşdırılır. Baş nazir
bildirib ki, səfər zamanı Rusiyaya meyvə və tərəvəz ixracı, eləcə də qazın
qiyməti məsələsini müzakirə edəcək. Maraqlıdır ki, onun səfərindən bir qədər
əvvəl, daha dəqiq desək, bu ayın ortalarında prezident İqor Dodon Moskvaya
səfər edəcək.
Öz növbəsində,moldovalı politoloq Anatol Çaranu hesab edir ki, Dnestryanı
münaqişənin həlli istiqamətində real olaraq Sandu deyil, səlahiyyətləri
genişlənən prezident İqor Dodon məşğul olacaq. Bəlli olduğu kimi, rusiyapərəst
qüvvələrdən ibarət Sosialistlər Partiyası hakim koalisiyada təmsil olunur.
Koalisiyada qərbyönümlü sağların partiyası ACUM da var. Hər iki partiyanın
Dnestryanı münaqişənin həllinə münasibəti fərqlidir. "Politicon” strateji tədqiqatlar
və siyasi konsaltinq mərkəzinin rəhbəri Anatol Çaranu hesab edir ki, məhz bu
səbəbdən də koalisiya çat verə bilər: "Düzdür, hakim koalisiyaya daxil olan
qüvvələr bu birliyin qorunub saxlanılması üçün razılığa gəlməyə çalışırlar.
Uğur əldə ediləcəyi təqdirdə, ölkə qazanacaq - sabit işləyən hökumət və
sabitlik əldə edəcək”. Moldovalı ekspertin qənaətincə, bu, çətin ki, baş
versin. Səbəb də odur ki, koalisiya bir-biri ilə ziddiyyətdə olan partiyalardan
ibarətdir: "Oktyabrda keçiriləcək seçkilərə qədər bu alyans qalacaq, lakin
sonra onu qarşısıalınmaz ayrılıq gözləyir”. Sosioloji sorğuların nəticələrinə
görə, sosialistlərin reytinqi artır. Əgər seçkilər bu gün keçirilsə, onda onlar
48 deputat yeri əldə edərdilər. Hazırda isə onlar 101 yerlik parlamentdə 35
yerə malikdirlər. Sosialistlərin səslərinin yanına proporsional seçki sistemi
üzrə mümkün nəticələri də daxil etmək gərəkdir. Son seçkilər qarışıq sistem
üzrə keçirilmişdi. Bu da parlamentə o qədər də populyar olmayan Demokrat
Partiyasının keçməsinə səbəb olmuşdu. Bir vaxtlar hakim partiya olan bu qurumu
qanundan kənar elan etməyə hazırlaşırlar. Onun lideri Vladimir Plaxotnyuk
hökuməti, prokurorluq və məhkəmələri nəzarət altına almışdı. Bir növ,
Moldovanın "ağası” statusunda idi. Yeni koalisiya qurulan kimi, onun
partiyasını və sədrini hakimiyyətdən uzaqlaşdırdılar, partiyanı təmsil edən
nazirləri işdən qovdular. Artıq partiya funksionerlərinə qarşı qalmaqallı
cinayət işləri başlanılıb. Rusiyapərəst prezident İqor Dodon rəsmən bəyan edib
ki, korrupsiyalaşmış demokratlar hər ay 40 mln. dollar rüşvət toplayırmışlar.
Mayya Sandu vəd edib ki, ölkədən qaçan Plaxotnyuk Moldova həbsxanasında cəza
çəkəcək. Hazırda o, Birləşmiş Ştatlardadır. Əgər Plaxotnyuk və onun ətrafı
barəsində sosialistlər və ACUM bloku bir mövqedən çıxış edirsə, Dnestryanı
bölgə barəsində fikirlər haçalanır. Bu günlərdə reinteqrasiya üzrə nazir Vasili
Şova (sosialistlərin nümayəndəsi) bildirib ki, Dnestryanı bölgə sakinlərinin
hüquqlarının genişlənməsi istiqamətində qanun layihəsi hazırlayırlar. Baş nazir
Mayya Sandu da mövqeyini ortaya oyub. Onun sözlərinə görə, ilk növbədə bölgədə
qayda-qanun yaratmaq gərəkdir. Bunun üçün qaçaqmalçılığın qarşısı alınmalı, qaz,
elektrik enerjisi ödəmələrinin bərpasına nail olunmalıdır: "İqtisadi stimulları
dəyişmək gərəkdir. Yeni iş yerləri yaradılmalıdır, insanların həyat şəraiti
yaxşılaşdırılmalıdır, sxemlər yox. O zaman Dnestrin hər iki sahili arasında
qarşılıqlı etimad yaranacaq, münaqişənin nizamlanması istiqamətində danışıqlar
başqa cür aparılacaq. Dnestryanı bölgə üçün bütün ticarət rejimləri açılıb.
Moldova da orada iştirak edir. Dnestryanı bölgə Avropa İttifaqı ilə azad
ticarət zonasında aktiv iştirak edir və bu da regionun iqtisadiyyatı üçün çox
vacibdir. Bu proses Moldovanı sağ
sahilindən daha əlverişli şərtlərlə həyata keçirilir.”
Yeri gəlmişkən, Moldovanın Avropa İttifaqı ilə vizasız gediş-gəliş
barədə razılaşmasının olmasına baxmayaraq, ölkə vətəndaşlarının çoxu hələ də
Rusiyaya işləməyə gedirlər. Baxmayaraq ki, Avropa İttifaqı ölkələrində qazanmaq
şansı daha genişdir. Sadəcə Qərbin əmək bazarında əcnəbi dili bilmək zəruri
olduğundan, moldovanlar Rusiyanı seçirlər. Moldova Mərkəzi Bankının yaydığı
məlumata görə, bu ilin ikinci rübündə Rusiya Avropa İttifaqının 20 ölkəsi
arasında ölkəyə pul göndərilməsində birinci yerdə qərarlaşıb. Onun ardınca
İsrail və İtaliya gəlir. Bankın məlumatına görə, ilin ikinci rübündə Rusiya
Federasiyasından daxil olan vəsait 70 mln. dollar təşkil edib. "Noi.md” xəbər
verir ki, bu vəsaitin 98 faizi pul köçürmələri ilə, yerdə qalan 2 faiz isə
müxtəlif ödəmə sistemləri - SWIFT və s. vasitəsilə həyata keçirilib. İkinci və
üçüncü yerdə qeyd edildiyi kimi, İsrail və İtaliya, sonrakı yerləri isə ABŞ (25
mln dollar), Almaniya (24), Böyük Britaniya (22), Fransa (16), İrlandiya (5),
İspaniya (4), Çexiya (4), Rumıniya (3), Türkiyə (2), Birləşmiş Ərəb Əmirlikləri
(1,75), Ukrayna (1,39) və Qazaxıstan (0,49) gəlir. Bu statistikanın
coğrafiyasına nəzər salanda görünür ki, moldovanlar bütün dünyaya səpələniblər.
Təqribən 200 min moldovalı Avropa İttifaqı ölkələrində, 500 min isə (Moldova
hakimiyyət orqanlarının son statistik rəqəmlərinə görə) Rusiyada çalışıb
işləyirlər. Onların bir çoxu artıq Rusiya pasportu alıblar. Belə ki, Moldovada
ikili vətəndaşlığa icazə verilir. Maraqlı olan detal odur ki, əvvəllər
moldovanlar Rusiyada pul qazanıb evlərinə dönmək barədə düşünürdülərsə, bu gün
artıq onların çoxu bu ölkədə qalıb həyatlarını qurmağa çalışırlar.
Azər NURİYEV