Bankla sahibkar arasında etibarlılığı təmin edəcək fond
Prezident
İlham Əliyev "Azərbaycan Respublikasının Kredit
Zəmanət Fondu” Açıq Səhmdar Cəmiyyətinin yaradılması haqqında fərman
imzalayıb. Belə ki, fərmanla "Azərbaycan Respublikasının Kredit Zəmanət
Fondu” Açıq Səhmdar Cəmiyyəti
sahibkarların müvəkkil banklardan manatla aldıqları kreditlərə təminat
verən və Azərbaycan Prezidentinin müəyyən etdiyi hallarda və qaydada həmin
kreditlərə hesablanmış faizlərin bir hissəsinə subsidiya verən hüquqi şəxs
olduğu müəyyən edilib. Bəs görəsən belə bir fondun yaradılmasının daha hansı əhəmiyyətli
rolu olacaq?
İqtisadi İslahatların Təhlili və Kommunikasiya Mərkəzinin (İİTKM)
eksperti Ayaz ÇaparlıTrend-ə açıqlamasında bildirib ki, Azərbaycan
Respublikasının Kredit Zəmanət Fondu” sahibkarların kommersiya banklarından
milli valyuta ilə aldıqları kreditlərə təminat verən və həmin kreditlərə
hesablanmış faizlərin bir hissəsini subsidiyalaşdıran hüquqi şəxs kimi çıxış edəcək:
"Bu tədbir "Kiçik və orta sahibkarlıq səviyyəsində istehlak mallarının
istehsalına dair Strateji Yol Xəritəsi”ndə öz əksini tapmış islahatlardan
biridir. Hesab edirəm ki, Kredit Zəmanət Fondunun yaradılması real
sektorla maliyyə sektoru arasındakı iqtisadi tarazlığın bərpa olunması, maliyyə
risklərinin bölünməsi, bankların dayanıqlığının və real sektora maliyyə
axınının gücləndirilməsi və əks-dollarlaşmanın stimullaşdırılmasına nail olmaq
üçün mühüm bir addımdır. Fond maliyyə inklüzivliyinin artırılması, maliyyə xidmətlərinin
çatdırılması kanallarının diversifikasiyası, habelə sahibkarların maliyyə mənbələrinə
çıxış imkanlarının genişləndirilməsi və maliyyə xidmətlərindən istifadənin
yaxşılaşdırılmasını təmin edəcək. Ölkədə maliyyə inklüzivliyinin artımına nail
olunması iqtisadi fəaliyyətin dəstəklənməsinə, sahibkarlığın inkişafına, məşğulluğun
artırılmasına, ev təsərrüfatlarının istehlak imkanlarının genişlənməsinə və gəlir
bərabərsizliyinin aradan qaldırılmasına əlavə dəstək verə bilər”.
Milli Məclisin İqtisadi Siyasət, Sənaye və Sahibkarlıq komitəsinin
üzvü, millət vəkili Vahid Əhmədovbildirdi ki, belə bir fondun yaradılması
çox vacib idi: : "Prezident 2016-cı ildə "Strateji Yol Xəritəsi”ni imzalayanda
11 sahə üzrə prioritetləri müəyyən etdi. Bank sistemində olan mövcud vəziyyət nəzərə
alınaraq, belə bir fondun
yaradılması qərara alındı. Bu gün Azərbaycanda
kredit məsələləri ilə bağlı çoxlu problemlər var. Vaxtı keçmiş kreditlərin məbləği
artıq 1,8 milyard manata çatıb. Bu işlə məşğul olan bank təşkilatları kreditləri
azaltmaq əvəzinə, daha da artırırlar. Sahibkarlar isə kredit almaq üçün çox
böyük əziyyətlər çəkirlər. Bütün bunları nəzərə alaraq, belə bir fond
yaradıldı. Sözügedən fondun yaradılmasında məqsəd ilk növbədə sahibkarlara kömək
etmək və kreditlərin əlçatanlığını təmin etməkdir. Digər tərəfdən, iri təsərrüfat yaradan
sahibkarlara subsidiyaların verilməsi təmin edilir. Hətta ola bilsin ki, faizlər dövlət hesabına
silinsin. Yəni burada sahibkarla çoxlu
güzəştlər edilir. Düzdür, indi nizamnamə təsdiq olunmayıb. Ona görə də
bu haqda tam detallı danışmaq üçün tezdir. Ümumilikdə götürdükdə isə bankla
sahibkar arasında kredit məsələsini həll etmək,
etibarlılığı təmin etmək və eləcə də bankların vəziyyətini
yaxşılaşdırmaq üçün belə bir fondun yaradılması çox vacib idi. Fondun kiçik və
orta sahibkarlığın inkişafında ciddi rol oynayacağını düşünürəm”.
İqtisadçı-ekspert Rəşad Həsənov deyir
ki, bu haqda uzun müddət idi ki, müzakirələr
gedirdi: "Hələ bir neçə il bundan öncə bu təkliflər hökumətə təqdim edilmişdi.
Fondun yaradılmasında əsas məqsəd maliyyə
əlçatanlılığını artırmaqdır. Bildiyiniz
kimi, Azərbaycanda kiçik və orta
sahibkarların bir sıra hallarda kredit əlçatanlılığı xeyli aşağıdır. Çünki bəzi
hallarda kreditlərin verilməsində girov, yaxud böyük biznes dövriyyələri tələb
olunur. Əsasən regionlarda sahibkarların təqdim etdiyi girov - daşınmaz əmlak banklar tərəfindən qiymətləndirilmir.
Çünki sonrakı dövrlərdə kreditin ödənişi ilə bağlı problem yarandıqda, banklar bu əmlakın bazarda satışını təmin edə bilmirdi. Regionlarda daşınmaz əmlak
bazarında durğunluq bu sahədə ciddi problemlər yaradırdı. Zəmanət fondunun
yaradılması məhz bu kimi hallarda sahibkarlara zəmanətlərin verilməsi yolu ilə
onların banklardan kredit götürmək imkanlarını genişləndirir. Belə bir məqamda kommersiya banklarının real sektora
qoyuluşlarının həcmi də arta bilər. Eyni
zamanda, bu proses sahibkarlıq subyektlərinin fəaliyyətini təşviq etməklə,
kiçik və orta sahibkarlığın inkişafını da şərtləndirə bilər. Burada əsas məqamlardan
biri məhz budur. İkinci bir məqam isə
faizlərin subsidiyalaşdırılması məsələsidir. Bildiyiniz kimi, uzun müddətdir
ki, Azərbaycanda bank kredit faizlərinin yüksək olması biznesin inkişafında əsas əngəllərdən biri
hesab olunur. Düzdür, bu problemin
aradan qaldırılması üçün müxtəlif mexanizmlər var. Məsələn, Sahibkarlığa Kömək Milli Fondunun xətti
ilə sahibkarlara daha aşağı faizli kreditlər təklif olunur. Amma dövriyyənin
kiçik olması və digər məqamlar bazarda tələbi ödəmir. Sahibkarlığa Kömək Milli
Fondu il ərzində 100-150 milyon kredit
təklif edə bilir ki, bu da bazarın tələbini ödəmir. Belə bir şəraitdə
daha az vəsaitlə bu prosesi inkişaf etdirmək
və yaranmış problemi aradan qaldırmağın yollarından biri də faizlərin
subsidiyalaşdırılmasıdır. Bu o deməkdir ki, sahibkar Kredit Zəmanət Fondunun zəmanəti
əsasında bankdan kredit alırsa, bu
kreditlərin faizlərinin müəyyən hissəsi
qədər kompensasiya olunur, yəni dövlət tərəfindən ödənir. Bu isə sahibkarlıq xərclərinin
azalması ilə yanaşı, mənfəət normasının
yüksəldilməsinə və iqtisadi aktivliyin artmasına gətirib çıxara bilər. Bütövlükdə götürdükdə, belə bir fondun
yaradılması və onun təklif etdiyi xidmətlərin son nəticədə Azərbaycanda kredit əlçatanlılığının
artırılması istiqamətində müsbət dəyişikliklərə səbəb olacağını düşünürəm. Həmçinin
fond, kiçik və orta sahibkarların üzləşdiyi müəyyən problemlərin aradan
qaldırılmasını və maliyyə axınının sürətlənməsini təmin edə bilər”.
Şəbnəm MEHDİZADƏ