Baloğlan Əşrəfov tamaşaçıları keçmiş illərə qaytarmağa hazırlaşır
Əməkdar artist Baloğlan Əşrəfov sentyabrın 8-də Yaşıl Teatrda konsert
proqramına hazırlaşır. Konsert öncəsi təəssüratlarını "Kaspi”yə bölüşən sevilən
sənətçi, bizimlə söhbətində indiyə qədər nəinki konsertlərində, hətta iştirak
etdiyi toylarda belə, fonoqramla oxumadığını, bundan sonrakı yaradıcılığında da
oxumayacağını qeyd etdi.
- Baloğlan müəllim, isti yay günlərində
harada istirahət edirsiniz?
- Bilirsiniz ki, mən cənub bölgəsindənəm. Masallıda istirahət etməyi
çox sevirəm. Bu cənnət məkan, Azərbaycanda tayı-bərabəri olmayan, gözəl mənzərəsi,
səfalı təbiəti ilə seçilir. Azərbaycanımızın bütün guşələri gözəldir. Boş
vaxtlarımda nəinki cənub bölgəsinə, digər bölgələrə gedib istirahət edirəm,
ancaq doğma məmləkətimdə istirahət
etməkdən zövq alıram. Son zamanlar istirahətdən
çox, yeni mahnılarım üzərində çalışıram. Çünki sentyabrın 8-də Yaşıl Teatrda olacaq
"Mən də varam dünyada” adlı konsertimin məşqlərinə hazırlaşıram.
- Bu konsertdə tamaşaçılar
sizdən nələr gözləsin?
- Tamaşaçılar konsertə asudə zaman keçirmək və zövq almaq üçün
gəlirlər. Bizim də öhdəmizə düşən, tamaşaçılara o zövqü yaşatmaqdır. Ancaq bu o
demək deyil ki, mən ansamblımla səhnəyə
çıxıram və özüm də bir-iki mahnı ifa edib, işimi bitmiş hesab edirəm. Elə
deyil. Konsert vermək məsuliyyətli bir işdir. İstəyirəm elə bir konsert baş
tutsun ki, bizim tamaşaçılar istirahət etməklə bərabər, konsert proqramını uzun
müddət xatirələrindən çıxarmasınlar. Konsertdə
repertuarımda olan mahnılar yer alacaq. Hansı ki, mənim canlı ifamla tamaşaçılar
keçmiş illərə qayıdacaqlar. Köhnə mahnılarımla yanaşı, yeni 10 mahnım var ki, onları
ilk dəfə məhz bu konsertdə səsləndirəcəyəm. Sentyabrın 8-də baş tutacaq konsertimdə tamaşaçıları
sürprizlər də gözləyəcək.
Bu konserti tamaşaçılarla canlı təmasda qurmaq istəyirəm. Hələ qarşıda bir ay var. Hazırlıqlar gedir.
Elə sizin vasitənizlə tamaşaçılara
onları çox gözəl proqram gözlədiyini
bildirmək istəyirəm.
- Konsertin adını nə üçün "Mən
də varam dünyada” qoydunuz. Elə hesab edirsiniz
ki, tamaşaçılar sizi unudub?
- Bu, mənim konsertdə ilk dəfə oxuyacağım mahnının sözləridir. Dünyaya
nə qədər insan gəlir və bu dünyadan doymadan köçüb gedir. Mən də bu konsertimlə
tamaşaçılara bir Baloğlan Əşrəfovun var olduğunu bildirmək istədim.
- Siz cənub
bölgəsindənsiniz, ancaq Lənkəranda çox az konsert veribsiniz. Səbəbi nədir?
- Əvvəllər Lənkəranda çox konsertlərim olub. Dövlət tədbirlərimiz
olduqda təbii ki, sevə-sevə gedib konsert veririk. Bu il öz ansamblımla üç
saatlıq konsert proqramı ilə çıxış etdim. İfam tamaşaçılar tərəfindən çox gözəl
qarşılandı və oradan gözəl təəssüratla ayrıldıq. Bəzən onların çoxu lentə
alınmır. Kommersiya sirri olduğu üçün bunu mətbuatda işıqlandırmırıq.
- Sizcə, konsertlər
müğənninin özünün özünə hesabatıdırmı?
- Konsert verməyi özümə hesabat kimi görmürəm. Məni sevənlər üçün öz
mahnılarımı oxuyuram. Onların ruhunu, zövqünü oxşamağa çalışıram. Mən nə
hesabatı verəcəyəm ki? Mahnılar mənim ürəyimdən qopan nəğmələrimdir,
tamaşaçılar onu dinləyir və mənəvi zövq alırlar.
- Bir zamanlar Baloğlan Əşrəfov
bütün toyların bəzəyi idi və həmin dönəmlər toylarda canlı ifaya daha böyük ehtiyac
var idi. İndi isə fonoqramlar toylarımızın bəzəyi olub. Belə durumda yenə də toylara
mütəmadi dəvət alırsınızmı?
- Allahımdan razıyam. Bu gün də, musiqiyə dəyər verən insanlar, məni
öz övladlarının toyunda görmək istəyənlər bizə müraciət edirlər. İndiki gəncləri də qınamaq olmur. Onlar da dövrün
tələbatına uyğun olaraq istəyirlər ki, toylarında dinamika olsun, əylənsinlər. Ancaq
onlar da yaşlanacaqlar. O gənclərin də həyatlarında elə bir dönəm olacaq ki, canlı
və qulağa zövq verən mahnılara ehtiyac duyacaqlar. Arzum odur ki, həmin gənclər
bir neçə ildən sonra öz toy disklərinə baxanda, xəcalət çəkməsinlər, utanmasınlar.
Bu gün toylarda səviyyəli, rahat musiqilərə üstünlük verənlər də çoxdur. Biz də
onların xidmətində dayanmışıq. Azərbaycanlılara xas olan formada toylarını keçirənlər
də var. Allah hər kəsə can sağlığı versin. Azərbaycansayağı toylar azlıq təşkil
edir. Bu gün diskoteka gəncləri daha çox əyləndirir.
- Bir zamanlar sizin kasetləriniz,
daha sonra diskləriniz evlərin bəzəyi idi. Ancaq son bir neçə ildə albom çıxardığınızı
xatırlamıram. Artıq o həvəsiniz qalmayıb?
- Artıq dövr dəyişib. İndi kaset dövrü deyil. Heç son dövrlər bilmirəm
ki, hansı studiya kaset, albom istehsal edir. İndi gedib hər hansı studiyada mahnı
yazdırırıq, onu bir dəfə efirdə oxuyan kimi, səhəri işbazlar internetə qoyurlar
və mahnı beləcə, yayılmağa başlayır. Yaşımın bu vaxtı mənə yaraşmaz ki, belə şeylərə
görə kimisə məhkəməyə verim. Artıq hər şey dəyişib. İndi stolun üstə nəyisə dınqıldada-dınqıldada
mahnı oxuyurlar və bütün Azərbaycana yayılır.
- Sosial şəbəkələrin bu qədər
aktiv olduğu bir dövrdə sizin "Facebook” və "İnstaqram” səhifəniz varmı?
- Mən o dediklərinizdən istifadə etmirəm. İnternetdən ancaq saytlardan
xəbər oxumaq üçün istifadə edirəm. Azərbaycanda və dünyada baş verən hadisələri
izləməyə çalışıram. "İnstaqram”ın nə olduğunu bilmirəm. Nəyə xidmət etdiyini bilmək
istəmirəm. Kimlərsə özünü onun vasitəsi ilə reklam edir və tamaşaçı kütləsi toplamağa
çalışır. İnternetdə baxıram ki, mənim mahnılarımdan da istifadə edirlər. Mahnılarımın,
tanımadığım ifaçılar tərəfindən belə oxunduğunun şahidi oluram.
- Nəinki "Youtube”da, el şənliklərində
də ifaçılar sizin mahnılarınızdan çox istifadə
edirlər. Onlara hər hansı etirazınızı bildirirsinizmi?
- Əlbəttə ki, mənim onların hamısından xəbərim var. Bilirəm ki, Azərbaycan
müğənnilərinin 80 faizi mənim mahnılarımı oxuyurlar. Hətta bəziləri mənə zəng edib
xeyir-dua alırlar. Mən də onlara öz xeyir-duamı verirəm. Ancaq şərtimi də bildirirəm.
Qeyd edirəm ki, elə oxuyun ki, mənim mahnım sizin ifanızda gözəl səslənsin və mən
də fəxr edim.
- Sizcə, sizin mahnınızı sizdən
gözəl oxuya bilərlərmi?
- Həyatda hər cür insanlar var. İstəyərdim ki, doğrudan da elə müğənnilər
olsun ki, məndən yaxşı oxusun və mən o mahnımla fəxr edim. Əgər o mahnının bəstəkarı
mənəmsə, təbii ki, əsərimin kimlərsə tərəfindən gözəl səsləndirilməsi məni sevindirər.
O, mənə xeyir gətirər ki, ziyan gətirməz. Mahnını oxuyanda deyəcəklər ki, bu mahnı
Baloğlan Əşrəfovundur. Ancaq elə müğənnilər də var ki, mahnılarımı çox pis
oxuyurlar, onda xəcalətimdən səsim də çıxarda
bilmirəm.
- Xaricdə yaşayan azərbaycanlılar
öz toylarına müğənnilərimizi dəvət etməkdə maraqlıdırlar. Bəs sizi necə, həmin toylara dəvət edirlərmi?
- Xaricdə yaşayan azərbaycanlılarımızın toylarında oluruq. Allah onlara
can sağlığı versin. Ancaq bəzi müğənnilərdən fərqli olaraq, mənim xaricdə toyda
iştirak etməyim onlara bir az baha başa gəlir. Çünki mən təkbaşına çantamı qoltuğuma
vurub, toya getmirəm. Ölkə xaricindəki toylara da öz ansamblımla gedirəm. Bir var
tək gedəsən, bir də var 10 nəfərlə. Ancaq yenə də məni sevənlər dəvət edirlər.
- İndiyə qədər heç fonoqram
oxumayıbsınız?
- Əgər mən fonoqram oxusam, özümlə 10 nəfəri niyə xaricə toylara aparım
ki? Əslində, bu mövzu ilə bağlı çox danışmaq istəmirəm. Müğənnilər var ki, dünyanın
o başına gedirlər və fonoqram oxuyurlar. Mən haram pul qazana bilmirəm. Nə qədər
nəfəsim var, canlı oxuyacağam. Fonoqram oxusam utanaram, xəcalət çəkərəm. Yaşımın
bu vaxtında məni təhqir etsələr, gərək gedib özümü asım.
- Ancaq bu gün toylarda fonoqramla
oxuyanların qiyməti sizin getdiyiniz toylardan daha bahadır.
- Bu, toy sahibinin özündən asılıdır. Toy sahibi istəyir ki, onun
övladının toyunda fonoqramla oxusunlar. Bəziləri öz toylarında müğənniləri
xaricdən dəvət edirlər. O, müğənnilər gəlib bizimkilərin pullarını alıb
ciblərinə qoyurlar, bir-iki fonoqram oxuyub gedirlər. Əslində bu, mənə çox
ləzzət edir. Deyirəm ki, elə musiqidən anlayışı olmayanların pulunu xaricilər
aparsalar yaxşıdır. Mən Allahımdan qorxuram. Nə vaxtsa canlı oxuya bilməsəm
belə, fonoqramdan istifadə etmərəm.
Xəyalə Rəis