Bakıda film çək, Hindistandan turist gəlsin
Hazırda turizm dünyada ən
dinamik inkişaf edən və ən gəlirli sahələrdən biridir desək, yanılmarıq. Son
dövrlər Azərbaycanda da bu sahədə görülən işlər, atılan addımlar turizmin
inkişafına təsirsiz ötüşmür. Müxtəlif metod və üsullarla ölkəyə turist axınının
təmin olunmasına şərait yaradılır. Belə ki, Azərbaycan Turizm Assosiasiyası
(AzTA) ölkəyə Hindistandan turistlərin cəlb olunması üzərində işləyir.
Bunu
Trend-ə Assosiasiyanın sədri Nahid Bağırov deyib. Onun sözlərinə görə, AzTA
hazırda müxtəlif Hindistan şirkətləri ilə danışıqlar aparır: "Assosiasiya
Bakıda Hindistan filminin bəzi səhnələrinin çəkilməsi təşəbbüsü ilə çıxış edib.
Bu filmin çəkilişləri bir müddət əvvəl başa çatıb. Film ekranlara çıxanda bu,
Azərbaycan üçün böyük reklam olacaq. Bu cür filmlər həmçinin Hindistandan
turist axınının artmasına təsir göstərəcək". 2019-cu il üçün prioritetlərindən
danışan N.Bağırov qeyd edib ki, bu, Hindistan bazarında fəal iştirak, eləcə də
ərəb bazarının qorunub saxlanılması üçündür: "Ərəb turisti digər ölkələrdə
da populyardır. Demək olar ki, bütün ölkələr ərəb turistlərini cəlb etməyə
çalışır". Azərbaycanın turistlər arasında ən populyar regionuna gəldikdə
isə assosiasiya rəhbəri bildirib ki, əsas turist axını Qəbələdə müşahidə
olunur. Ekspertlərlə həmsöhbət olub bu addımın turizm sahəsinin inkişafına necə
təsir edəcəyini, hindistanlı turistləri cəlb etmək üçün başqa hansı addımların
atıla biləcəyini öyrənməyə çalışdıq.
"SKAL
İnternational Baku” klubunun (Səyahət və Turizm Peşəkarları Beynəlxalq
Assosiasiyası)sədri
Ceyhun Aşurov bildirdi ki, bu ideya ölkəmiz üçün çox perspektivli addımdır:
"Bu praktika artıq uzun müddətdir ki, Gürcüstanda istifadə edilir. Belə ki, orada
bir sıra Ukrayna filmlərinin və bəzi serialların çəkilişi həyata keçirirlər.
Hindistanın məşhur aktyorları Avropanın bəzi şəhərlərində çəkilişlər edirlər.
Hətta, ölkələr və turizm şirkətləri özləri onlara sponsorluq edir ki, gəlib
film çəksinlər. Məsələn, elə dövlət olur ki, həmin çəkilişlərə görə filmin
ümumi büdcəsinin 20 faizini ödəyir. Bunun qarşılığında isə filmin əsas kadrları
o ölkənin konkret olaraq tanıdılması nəzərdə tutulan məkanlarında çəkilir, kinonun
qəhrəmanları məhz o yerlərdə görüşür. Bu metod turistlər üçün çox güclü təsirə
malikdir. Xüsusilə də Hindistan auditoriyası üçün bunlar daha effektli olur.
Onlar tanımadıqları, fiziki olaraq getmədikləri yerləri kinodan görürlər. Bunu
da nəzərə almaq lazımdır ki, Hindistan filmləri tərcümə olunaraq bütün MDB
məkanında və digər ölkələrdə təqdim edilir. Təbii ki, filmdə çəkilən
aktyorların tanınma səviyyəsi də burada böyük rol oynayır. Bu, ölkəmiz üçün çox
perspektivli bir addımdır. Məkanların seçilməsi isə kinonun motivlərindən
asılıdır. Yəni filmi çəkən tərəf ilə filmin çəkildiyi ölkə arasında kinonun
hekayəsinə uyğun razılaşma əldə edilir. Düşünürəm ki, Bakı çəkiliş üçün
əlverişli olan şəhərlərdəndir. Çünki burada müasirlik ilə qədimlik bir aradadır”.
C. Aşurov Bakıda yerləşən
Atəşgah məbədinin də hindistanlı turistlərin marağını cəlb etdiyini deyir: "Əvvəlki
illərdə də Hindistandan olan zəvvarların
Atəşgah məbədinə, Yanardağa böyük marağı olub. Onlar həmin yerləri müqəddəs
sayırlar. Ona görə, bu yerlərin lazımı infrastrukturu daha da inkişaf
etdirilməlidir. Sırf turistlər üçün xüsusi şərait yaradılmalıdır. Burada hədəf
auditoriyası təkcə hindlilər yox, hind filmlərini sevərək izləyən kütlə
olmalıdır. Film vasitəsi ilə ölkəyə turist cəlb etmək dünyada geniş istifadə
olunan və sınanmış təcrübədir. Bundan başqa, lap film çəkilməsə belə, hansısa
bir tanınmış şəxsin ölkəyə səyahət edərək fikir bildirməsi, həmçinin sosial
media hesabında şəkil və ya sözlü paylaşım etməsi də həmin ölkə üçün
əhəmiyyətlidir”.
"New ERA Travel”
turizm agentliyinin rəhbəriElçin Rüstəmov deyir ki, müxtəlif ölkələrdə çəkilən
filmlər istənilən halda, onların reklamına səbəb olur: "Bu, həm Hindistan
filmlərinə, həm də digər ölkələrin istehsalı olan filmlərə aiddir. Bu,
istənilən halda ölkənin populyarlaşmasına şərait yaradacaq. Bu, bir növ
şüuraltı təsir kimidir. İstənilən halda, hər hansı Hindistan filmində
ölkəmizdən kadrların olması, adının hallanması belə, reklama səbəb olar. Film
çəkənlər bacardıqları qədər onu daha az büdcə ilə başa gətirməyə çalışırlar.
Ona görə, ola bilsin ki, ölkəmizdə edilən çəkilişlərin müqabilində, həmin
aktyorların bura gətirilməsini, onların oteldə yerləşdirilməsini və digər
xidmətləri ölkəmizin qarşılamasını istəsinlər”.
Günel Azadə