Bakı sivilizasiyaların harmoniyası olacaq
Prezident İlham Əliyevin 2011-ci il 27 may tarixində imzaladığı fərmanla
Ümumdünya Mədəniyyətlərarası Dialoq Forumu hər iki ildə bir dəfə keçirilir. Bu
fərmandan irəli gələrək, 7-9 aprel 2011-ci ildə Bakıda I, 29 may - 1 iyun
2013-cü ildə II, 18-19 may 2015-ci ildə III Ümumdünya Mədəniyyətlərarası Dialoq
Forumu keçirilib. Azərbaycan Prezidentinin himayəsi ilə keçirilən bu Forum
YUNESKO, BMT-nin Sivilizasiyalar Alyansı, BMT-nin Dünya Turizm Təşkilatı,
Avropa Şurası, İSESKO-nun birgə tərəfdaşlığı ilə təşkil edilən yeganə
platformadır. 4-6 may 2017-ci il tarixlərində isə ölkəmizdə IV dəfə Ümumdünya
Mədəniyyətlərarası Dialoq Forumu təşkil ediləcək. Daha əvvəl keçirilən
forumların uğurlu nəticəsi və hər il genişlənən mütərəqqi təcrübəyə əsaslanan
IV Bakı Forumu öz növbəsində mədəniyyətlər və sivilizasiyalar arası
gərginliklərin aradan qaldırılması, davamlı inkişaf və inklüziv cəmiyyət məsələlərinin
müsbət dinamika üzrə inkişafını təmin etmək və başqa bu kimi ali məqsədlərin
həll olunması üçün səy göstərəcək, beynəlxalq aləmdə sülh və əmin-amanlığın
möhkəmlənməsinə, istər etnik-mədəni, istərsə də dini-siyasi sferada konstruktiv
ideyaların reallaşması və yayılması prosesinə öz töhfəsini verəcək.
Mövzu ilə bağlı "Kaspi” qzəetinə açıqlamasında millət vəkili Aydın Mizəzadə bildirib ki, Azərbaycan artıq
beynəlxalq tədbirlərin keçirildiyi bir ölkə kimi tanınır: "Bu, həm
təşkilatçılıq baxımından, həm də Azərbaycanın özünün keçirtdiyi hər hansı
tədbirlə əlaqədar təqdim edəcəyi müsbət təcrübə ilə bağlıdır. Bu gün
mədəniyyətlərarası dialoq və sivilizasiyaların harmoniyası ən aktual
məsələlərdən biridir. Dünyada bir çox ölkələr bu məsələlərin böhranını yaşayır.
Azərbaycan isə əksinə, bu sahədə çox böyük uğurlar əldə edib. Bir çox ölkələr
və beynəlxalq təşkilatlar bu məsələ ilə bağlı Azərbaycanın təcrübəsini
öyrənməkdə maraqlıdırlar. Hesab edirəm ki, Azərbaycan artıq özünün inkişaf
etmiş dövlət quruculuğu təcrübəsi ilə digərlərinə nümunə ola biləcək bir ölkə
imici yaradıb. Həmçinin, Azərbaycan sözün əsl mənasında artıq mədəniyyətlərin
qovuşduğu ölkədir. Müasir dünyanın problemləri də məhz sivilizasiyaların
bir-biri ilə harmoniya şəklində yaşaması ilə mümkündür. Bir çox dövlət
başçılarının, vaxtı ilə mühüm siyasi vəzifə tutmuş insanların, ziyalıların,
tanınmış şəxslərin tədbirə gəlişi isə Azərbaycanın artan nüfuzunun növbəti
göstəricisi olur”.
A.Mirzəzadə qeyd edib ki, IV Bakı Forumu vasitəsilə Azərbaycanın dünyaya
mesajı sülhün, təhlükəsizliyin qorunması, insan faktoruna diqqətin artırılması,
beynəlxalq hüququn ciddi şəkildə qorunmasına riayət edilməsi kimi məsələlər
olacaqdır: "Dünyanın xilası harmoniyada, hüququn aliliyində və mədəniyyətlərə
hörmətlə yanaşılmasındadır”.
Milli Məclisin deputatı
Rasim Musabəyov bildirib ki, Ümumdünya Mədəniyyətlərarası Dialoq
Forumu Azərbaycanda keçirilən ənənəvi tədbirdir və ölkəmiz bu toplantıya aktiv
şəkildə ev sahibliyi edir: "Bu tədbirə nüfuzlu siyasətçilər, tədqiqatçılar,
ziyalılar toplaşır və dünya üçün çox aktual olan problemlər müzakirə edilir.
Nəzərə almaq lazımdır ki, dünyada təlatümlü dövrdür, sivilizasiyalar arasında
gərginlik artır, çarpışmalar baş verir. Azərbaycan da dünya sivilizasiyalarının
kəsişməsində yerləşir. Ölkəmizin şimalında xristian dövləti, cənubunda isə
müsəlman dövləti yerləşir. Mədəniyyətlərarası gərginlik artarsa, bu, bizim üçün
də təhlükələr vəd edər. Azərbaycan belə dialoqun keçirilməsində və problemin
dinc yolla həllində maraqlıdır. Yəni, ölkəmiz həm daxili sabitliyi saxlamaq,
həm də ətrafımızda əlverişli mühit yaratmaq üçün bu tədbirə ev sahibliyi
etməkdə maraqlıdır”.
Demokratik İslahatlar
Partiyasının sədri, millət vəkili Asim Mollazadə bildirib ki,
Mədəniyyətlərarası Dialoq Forumunun Bakıda keçirilməsi artıq ənənəvi hal alıb:
"Çox gözəl bir imkandır ki, Azərbaycan öz təcrübəsini, tarixi ənənəsini dünya
ilə bölüşsün. Çünki Azərbaycanda artıq uzun iləərdir ki, fərqli dinlərin, etnik
qrupların birgə qarşılıqlı hörmət və əməkdaşlıq sistemi formalaşıb. Bizim
fikrimizcə, bu, çox böyük dəyərdir ölkəmiz üçün çox əhəmiyyətlidir. Dünyanın
bir sıra bölgələrində islamafobiya, antisemitizm artmağa doğru gedir. Düşünürəm
ki, məhz Azərbaycan təcrübəsi bu istiqamətdə çox gözəl bir nümunə ola bilərdi”.
A.Mollazadə əlavə edib ki, budəfəki Bakı Forumunda dinlərin qarşılıqlı
hörmət ənənəsi, millətlərin mədəni münasibətləri, mübadiləsi müzakirə mövzusu olacaq:
"Bir neçə dəfə bu istiqamətdə Forum baş tutub. Sadəcə olaraq, indi əhatə
dairəsi genişlənib, yeni üzvlər foruma qatılır. Bu mənada Forumun çox önəmli
olduğunu qeyd edir və onu mühüm hadisə kimi qiymətləndirirəm”.
Millət vəkilinin sözlərinə görə, Bakı Forumu vasitəsilə dünyaya
veriləcək mesaj ondan ibarət olacaq ki, tolerantlıq sahəsində mühüm irəliləyişlər
sivilizasiyaları xilas edə bilər: "Bilirik ki, Avropada tolerantlıq anlayışı
nifrətin dözümlülüklə əvəz olunması kimi başa düşülür. Lakin Azərbaycanda bu
anlayış qarşılıqlı hörmət və əməkdaşlıq təcrübəsidir. Bizim nümunəyə
əsaslansaq, bu, sivilizasiyaların, o cümlədən dünyanın xilası ola bilər”.
Bəxtiyar MƏMMƏDLİ