Bakı 24°C
Bakı Beynəlxalq Avtovağzalı Ramazan bayramı ilə əlaqədar iş qrafikində dəyişiklik edib
Bakı Beynəlxalq Avtovağzalı (BBA) qarşıdan gələn Ramazan bayramı ilə əlaqədar iş qrafikində dəyişiklik edib. BBA mətbuat xidmətindən "Kaspi"yə bu barədə verilən məlumata görə,iyunun 23-dən 28-dək avtovağzal gücləndirilmiş iş rejimində fəaliyyət göstərəcək. Bayram ərəfəsində yarana biləcək sərnişin axınının qarşısını almaq və kompleksin ahəngdar işləməsini təmin etmək məqsədi ilə həmin günlərdə 200 ehtiyat avtobusun ayrılması nəzərdə tutulub. Qeyd edək ki, adi günlərdə 300-330 reyslə 7,5-8 min sərnişin daşınması həyata keçirildiyi halda bayram günlərində təxminən 500-dən yuxarı reyslə 16 mindən çox sərnişin daşınması gözlənilir.
BBA rəhbərliyi müqəddəs Ramazan bayramı münasibətilə bütün həmvətənlərimizi təbrik edir və bayram günlərində müşahidə olunacaq sıxlığı nəzərə alaraq, həmin tarixlərdə regionlara səfər edəcək sərnişinlərə biletləri bir neçə gün əvvəl almağı tövsiyə edir. Belə ki, il boyu olduğu kimi bayram ərəfəsində də 10 gün əvvəldən təyin olunmuş bütün qrafik üzrə bilet satışı həyata keçirilir.
Əlavə sual və təkliflər üçün BBA-nın (012-499-70-38, 012-499-70-39) nömrələrinə zəng edə bilərsiniz.
