Bağışlanmaz səhv
Rusiyanın bəzi rəsmi şəxsləri tərəfindən Azərbaycana
qarşı bu günlərdə atılan addım ölkəmizdə böyük narazılıq doğurmaqdadır. Söhbət
Moskva milyonçularının sevimli məkanlarından biri olan "Safis” restoranında
Rusiya Erməniləri İttifaqının prezidentiAra Abramyanın 60 illiyinin qeyd
olunmasından, tədbirin qonaqları arasında Rusiyanın xarici işlər naziri Sergey
Lavrovun, prezident Vladimir Putinin mətbuat katibi Dmitri Peskovun və Liberal
Demokrat Partiyasının lideri Vladimir Jirinovskinin də olmasından gedir.
Prezident Vladimir Putinin özü də yubilyara təbrik məktubu göndərib. Burada
diqqət çəkən məqam ondan ibarətdir ki, yubiley tədbirində Qarabağ
separatçılarının lideri Bako Saakyan da iştirak edib. ATƏT-in Minsk qrupunun həmsədr
dövlətinin rəsmi şəxslərinin heç bir dünya dövlətinin, beynəlxalq təşkilatın
tanımadığı separatçı qurumun "rəhbəri” ilə məsafə saxlamaması, onunla bir arada
olması, hətta deyilən sağlıqlara birgə badə qaldırması Ermənistan-Azərbaycan,
Dağlıq Qarabağ münaqişəsinin dinc yolla həllində Rusiyanın tərəfsizliyini şübhə
altına salır. Elə təəssürat yaranır ki, rəsmi Moskva Dağlıq Qarabağ probleminin
həllində birmənalı olaraq işğalçı Ermənistanın mövqeyini dəstəkləmək xətti
tutub.
Mövzu ilə bağlı fikirlərini "Kaspi”yə açıqlayan millət vəkili, politoloq Aydın Mirzəzadə ehtimal
edib ki, Sergey Lavrov həmin tədbirə Ermənistan prezidenti Serj Sarkisyanın dəvəti
ilə gəlib. Millət vəkili deyib ki, Rusiyanın xarici işlər naziri ilə Dağlıq
Qarabağdakı qondarma rejimin rəhbərinin eyni tədbirdə iştirak etməsi
bağışlanmaz səhvdir: "Lavrov bilməli idi ki, həmin tədbirə tanınmamış separatçı
rejimin rəhbəri Bako Saakyan da gələcək. Yaxud, bilməsə belə, Lavrov həmin tədbirə
gələrkən Saakyanı görən kimi, dərhal tədbirin təşkilatçılarından onlarla eyni
yerdə otuzdurulmamasını xahiş edə bilərdi. Lakin buna barmaqarası baxılmasını əlbəttə
ki, Rusiya diplomatiyasının uğursuzluğu kimi qiymətləndirmək olar. Rusiya
ATƏT-in Minsk qrupunun həmsədrlərindən biridir. Rusiya prezidenti Vladimir
Putin, həmçinin də Ermənistan tərəfindən işğal olunmuş ərazilərimizdə yaradılan
qondarma rejimin rəhbəri ilə eyni masa arxasında oturan Sergey Lavrov hər zaman
Azərbaycanın ərazi bütövlüyünü dəstəklədiklərini bəyan ediblər. Ancaq son baş
verənlərdən sonra bu bəyanatlar qeyri-səmimi təsir bağışlayır. Yəqin ki, Azərbaycan
tərəfi rəsmi Moskva ilə diplomatik kanallar vasitəsilə bununla bağlı araşdırma
aparacaq, məsələni aydınlaşdırmağa çalışacaq. İstənilən halda, Rusiya, bu dövlətin
rəsmi şəxsləri belə addım atmamalı idilər. Rusiyanın xarici işlər naziri ilə
Dağlıq Qarabağdakı qondarma rejimin rəhbərinin eyni tədbirdə iştirak etməsi
bağışlanmaz səhvdir”.
Politoloq
Mübariz Əhmədoğlubildirib ki, A.Abramyan kimi bir adamın təşkil etdiyi tədbirdə iştirak etmək
Rusiya elitası üçün müsbət hadisə deyil. Onun sözlərinə görə, Peskov, Lavrov və
digər rəsmilərin belə davranışı Rusiyaya başucalıq gətirmir: "Ara Abramyan 40
ildir Rusiyada yaşayır, oğurluq yolu ilə var-dövlət toplayır və müsbət imici
olan şəxs kimi tanınmır. Lavrov, Peskov, Jirinovski və başqaları da "Safis”
restoranında oğrunun yığdığı pulun başına toplaşıblar. Üstəlik, separatçı rejimin
başçısı Bako Saakyanla onların eyni məclisdə olması da Rusiya elitası üçün
yaxşı hal deyil. Çox güman ki, məhz bu tədbirdən sonra Sarkisyan, Saakyan və
digər ermənilər Lavrovun, yaxud da Peskovun adından müxtəlif yalanları ictimailəşdirməyə
başlayacaqlar. Biz bu məsələdə ayıq olmalı, rəsmi şəxslər səviyyəsində müəyyən
tədbirlər görməliyik. Vaxtilə Kazimirov da Dağlıq Qarabağ separatçısı Arkadi
Qukasyanla Moskvada restoranların birində görüşmüşdü. Ümummilli lider Heydər
Əliyev Kazimirovun başına olmazın oyun açdı. O, Bakıya səfərə gələndə şəkilləri
qarşısına qoyub fakt qarşısında çıxılmaz vəziyyətə saldı. Düşünürəm ki, gələcəkdə
Peskov, Lavrov və digərləri ilə də bu tonda danışmaq lazımdır”.
Politoloq
Fikrət Sadıxovda bizimlə söhbətində bildirib ki, Rusiyanın xarici işlər naziri, hökumət üzvü
S.Lavrovun Dağlıq Qarabağ separatçılarının rəhbəri ilə eyni tədbirdə olması müəyyən
suallar doğurur. Onun sözlərinə görə, Rusiyadakı erməni diasporu Lavrovun erməni
kökənli olmasından məharətlə istifadə edir. Politoloq deyib ki, Dağlıq Qarabağ
probleminin həllinə məsul olan ATƏT-in Minsk qrupunun həmsədr dövlətinin rəsmi
nümayəndəsi bitərəfliyini bütün hallarda qoruyub saxlamağı bacarmalıdır: "Biz
arzulamırıq ki, Lavrov və ya qeyrisi bizi tərifləsin, yaxud ancaq bizim
maraqlarımızın müdafiəçisi olsun. Biz istəyirik ki, onlar bitərəf olsunlar,
münaqişənin həllinə bu yolla dəstək olsunlar, ərazi bütövlüyü prinsipinə hörmətlə
yanaşsınlar. Əks halda, belə arzuolunmaz addımlar Rusiya-Azərbaycan münasibətlərinə
kölgə sala bilər”.
Rufik
İSMAYILOV