AzTU və Bilik Fondu arasında əməkdaşlıq müqaviləsi imzalanıb
Azərbaycan Respublikasının
Prezidenti yanında Bilik Fondunun icraçı direktoru Oktay Səmədov Azərbaycan
Texniki Universitetində professor-müəllim heyəti və təhsildə fərqlənən tələbələrlə
görüşüb.
Görüşdə iştirak edən AzTU-nun rektor əvəzi,
professor Xalıq Yahudov Bilik Fondunun ölkədə aparılan sosial-iqtisadi və
elmi-texniki quruculuq proseslərinin mahiyyətinin ictimaiyyətə çatdırılmasını təmin
edən xüsusi məqsədli bir qurum olduğunu vurğulayıb və universitetin bu təşkilatla
əməkdaşlığından məmnunluğunu bildirib.
Sonra Bilik
Fondunun icraçı direktoru Oktay Səmədov
rəhbərlik etdiyi təşkilatın missiyasından, bu günə kimi görülən işlərdən,
həyata keçirilən layihələrdən danışıb. O.Səmədov bildirib ki, bu təşkilat Azərbaycan
dövlətinin daxili və xarici siyasətini, təhsil müəssisələrinin fəaliyyətinin təkmilləşdirilməsini
dəstəkləyən tədbirlər, mühüm sosial problemlərin həllində elm və texnikanın
rolunun yüksəldilməsi istiqamətində bir çox layihələr həyata keçirir.
AzTU-nun Heydər Əliyev Mərkəzində keçirilən görüşdə
Azərbaycan Respublikasının Prezidenti yanında Bilik Fondu və Azərbaycan Texniki
Universiteti arasında əməkdaşlıq sazişi
imzalanıb.
Müqavilədə birgə konfransların, simpoziumların,
elmi-texniki layihələrin həyata keçirilməsi, elmi-tədqiqat işlərinin,
kitabların nəşri, yaradıcı gənclər arasında müsabiqələrin və AzTU-nun
professor-müəllim heyətinin ölkənin müxtəlif regionlarında mühazirələrinin təşkil
edilməsi nəzərdə tutulub.