AzTU-nun əlaçı tələbələrinə Fəxri Fərman təqdim edilib
Azərbaycan Texniki Universitetində (AzTU) Qış semestrində
əlaçı olan və eyni zamanda öz fakültəsi və kursu üzrə ən yüksək ortalama bal
yığan tələbələrlə rektor əvəzi, professor Xalıq Yahudovun görüşü keçirilib.
Görüşdə rektor əvəzi Azərbaycanda təhsilə göstərilən dövlət qayğısına
diqqət çəkərək bildirib ki, AzTU-da yüksək səviyyəli mütəxəssis kimi yetişmək
üçün hər cür şərait yaradılıb. Bunun əyani sübutu olaraq Qış semestrini ən yüksək
ortalama balla başa vuran tələbələri göstərən Xalıq Yahudov deyib ki, əlaçıların
təbliği universitetdə bir ənənə olaraq davam etdiriləcək. Rektor əvəzi qeyd
edib ki, hər fakültə və həmin fakültənin hər kursu üzrə ən yüksək ortalama bal
yığan tələbələr 1 ay boyunca ictimai müzakirələrə də təqdim olunublar. Belə ki,
tələbələrin bal göstəricisi və foto şəkilləri universitetin 21 minlik feysbuk səhifəsində
(https://www.facebook.com/AzTUFAN/) yayımlanaraq ictimai müzakirəyə buraxılıblar.
Xalıq Yahudov vurğulayıb ki, AzTU-da, ümumiyyətlə Azərbaycan ali təhsil
müəssisələrində ilk dəfə olaraq keçirilən bu bilik yarışmasının qalibləri gələcəkdə
Fəxri Fərmanla yanaşı pul mükafatı ilə də mükafatlandırılacaqlar.
Görüşdə çıxış edən fakültə dekanları 9 min tələbənin arasından hər
fakültə üzrə 4 tələbənin seçilərək ictimaiyyətə təqdim olunmasını və bu yolla
sağlam rəqabətin formalaşdırılmasını, eləcə də bilikli, savadlı gənclərin dövlət
siyasətinə uyğun şəkildə irəli çəkilməsini çox müsbət hal kimi qiymətləndiriblər.
Qeyd olunub ki, imtahan nəticələri yüksək olanların təbliği digər tələbələri də
təhsilə sövq edəcək.
Tədbirdə tələbələrə Fəxri Fərmanlar təqdim edildikdən sonra
universitetin həyətində xatirə fotosu çəkilib.