AzTU-da imtahanların gedişini izləmək üçün açıq qapı təşkil olunub
Azərbaycan Texniki Universitetində (AzTU) "Açıq Hökumətin təşviqinə dair 2016-2018-ci
illər üçün Milli Fəaliyyət Planı”nın təsdiq edilməsi haqqında Azərbaycan
Respublikası Prezidentinin 27 aprel 2016-cı il 1993 nömrəli Sərəncamının
icrasını təmin etmək məqsədi ilə qış imtahan sessiyasının gedişini izləmək üçün
universitet İctimai Şurasının üzvləri, KİV nümayəndələri, təhsil ekspertləri və
valideynlərin iştirakı ilə açıq qapı günü təşkil olunub.
Qanaqlar auditoriyalarda imtahanların gedişini izləyib, qış imtahan
sessiyasının mövcud qaydalara uyğun təşkilini, tələbələrin biliyinin qiymətləndirilməsində
şəffaflığın, obyektivliyin təmin edilməsini müşahidə ediblər.
AzTU-nun rektor əvəzi Xalıq Yahudov bildirib ki, bu il qış imtahan
sessiyasında təxminən doqquz minə yaxın tələbə iştirak edir. Bütün I , II kurs
və Xüsusi texnika və texnologiya fakültəsinin, SABAH qruplarının tələbələri, eləcə
də magistrantlar yazılı, bakalavriat səviyyəsinin III və IV kurslarında təhsil
alan tələbələr isə test üsulu ilə imtahan verirlər.
Rektor əvəzi qeyd edib ki, imtahan sessiyasına hazırlıq ərəfəsində
müvafiq fənlər üzrə yoxlama imtahanları-kollokviumlar keçirilib. Həmçinin,
imtahanların gedişinə nəzarət etmək məqsədilə universitetdə qərargah və
Apelyasiya Komissiyası yaradılıb. Bildirilib ki, qiymətləndirmədən narazı qalan
tələbələrin Apelyasiya Komissiyasına ərizə ilə müraciət etmələri üçün lazımı şərait
yaradılıb. Burada mübahisə doğuran məsələlər komissiya tərəfindən tələbələrin
iştirakı ilə araşdırılır, qiymətləndirmədə şəffaflıq və operativlik təmin
edilir.
Xalıq Yahudov məlumat verib ki, universitetdə tədris prosesi və
imtahanların təşkili üzrə bütün məsələlər bu ali məktəbdə yaradılmış elektron
universitet portalı vasitəsilə nəzarətə götürülür. Tələbə test imtahanlarının nəticələrini
cavabları təsdiq etdikdən sonra dərhal kompyuterin ekranında görür. Yazılı
imtahanlar da test imtahanları kimi ciddi nəzarətə götürülüb. Yazılar şifrələnir,
sonra yoxlanılır. Həmin gün yaxud da 1 gün sonra qiymətlər tələbələrə elan
edilir və eyni zamanda itm.aztu.az
saytına yerləşdirilir.
Sonda təhsil ekspertləri, media nümayəndələri imtahan prosesinin
gedişi ilə bağlı fikirlərini bölüşüblər. Müşahidəçilər universitetdə
imtahanların yüksək səviyyədə təşkil olunduğunu, lazımi şəraitin yaradıldığını
bildiriblər.