AzTU-da 3 gün davam edəcək elmi-texniki konfrans keçirilir - Fotolar
Bu gün Azərbaycan Texniki
Universitetində «Maşınqayırmada intellektual texnologiyalar» mövzusunda
beynəlxalq elmi-texniki konfrans öz işinə başlayıb. Konfransın keçirilməsində
əsas məqsəd maşınqayırmada intellektual texnologiyalar sahəsində müasir
elmi-texniki istiqamətlər üzrə mütəxəssislərin apardıqları tədqiqatların və
alınmış nəticələrin müzakirəsidir.
Konfrans vasitəsi ilə texnoloji inkişaf
etmiş ölkələrin təcrübələri, MDB və digər xarici dövlətlərin alimləri ilə elmi əlaqələrin
və əməkdaşlığın genişləndirilməsi də mümkün olub. 3 gün davam edəcək konfransda çox sayda
tanınmış alimlərin və nüfuzlu qonaqların iştirakı alimlərin təcrübə və bilik
mübadiləsi aparması üçün geniş imkan yaradıb.
Qonaqlar arasında Türkiyə, Rusiya, Almaniya və Ukraynadan
olan elm adamları çoxluq təşkil edir. Həmçinin böyük zavod və müəssisə rəhbərləri,
maşınqayırma sahəsi ilə maraqlanan iş adamları da konfransa qatılıb.
Maşınqayırma sahəsinə aid son dərəcə
kritik məsələlərin müzakirə olunacağı Beynəlxalq Konfransın işi 8 bölmə üzrə təşkil olunub. Maşınqayırma sahəsinin
prioritet məsələlərini əhatə edən bölmələrə "İntellektual idarəetmə sistemləri”,
"Avtomatlaşdırılmış layihələndirmə və ekspert sistemləri”, "Maşınların layihələndirilməsində
innovativ metodlar”, "Maşınqayırmada keyfiyyət: problemlər və perspektivlər”, "Yeni
kompozisiya materiallarının materialşünaslığı və metallurgiyası”, "Bərk cisim,
maye və qaz mexanikasının problemləri”, "Logistik sistemlər”, "Təhsildə
intellektual texnologiyalar və resurslar” daxildir. Həmin bölmələr üzrə
sentyabrın 30-a kimi onlarla məruzənin dinlənilməsi planlaşdırılır. 240 elmi məqalənin
təqdim olunduğu konfransda məruzələr əsasən müvafiq bölmələr üzrə intellektual
idarəetmə sahəsində əldə olunmuş nailiyyətlərin, avtomatlaşdırılmış layihələndirmə
və ekspert sistemləri, yeni kompozisiya materiallarının materialşünaslığı və
metallurgiyası, logistik sistemlər, intellektual texnologiyaların inkişaf ənənələri,
təhsildə və istehsalatda istifadə olunan innovativ metodlar haqqında müzakirələr
olunacaq.
Qeyd edək ki, texniki elmlər
sahəsində Azərbaycanda flaqman hesab olunan AzTU-da bu ilin noyabr ayında daha
bir beynəlxalq konfrans təşkil olunacaq. 23-25 noyabr tarixlərində keçirilməsi
planlaşdırılan Beynəlxalq Elmi-Texniki Konfransın məqsədi müasir informasiya və
kommunikasiya texnologiyalarının inkişaf ənənələri və perspektivləri sahəsində
alimlərin, mütəxəssislərin elmi nailiyyətləri barədə müzakirələrin
aparılmasıdır. Telekommunikasiya sahəsində peşəkar kadrların yetişdirilməsində
aparıcı rol oynayan Universitet bu sahə üzrə yeni dünya trendlərinə cavab verən
innovativ texnologiyaların öyrənilməsi və ölkədə telekommunikasiyanın
inkişafına yeni nəfəs vermək niyyətindədir.