AzTU-Berkli timsalında Amerika-Azərbaycan elmi əlaqələri

Azərbaycan Texniki Universiteti (AzTU) ilə Amerika Birləşmiş Ştatlarının (ABŞ) Kaliforniya Ştatında yerləşən Berkli Universiteti arasında əməkdaşlıq memorandumu imzalanıb.

Berkli Universitetinin kansleri Nicolas Dick və AzTU-nun rektor əvəzi Xalıq Yahudov tərəfindən imzalanan memorandum iki ali təhsil müəssisəsi arasında geniş əməkdaşlıq perspektivi yaradıb. 2017-2022-ci illəri əhatə edən memorandum çərçivəsində AzTU-nun professor-müəllim heyəti və tələbələri Berkli Universitetində elmi-tədqiqat işləri aparmaq və təhsil almaq şansını qazanıblar.

Bundan əlavə memorandumda universitetlər arasında mədəni və elmi tədbirlərdə, konfranslarda qarşılıqlı iştirak, geniş təcrübə mübadiləsi kimi məsələlər də nəzərdə tutulub.

Memorandumun koordinatoru, AzTU-nun dosenti Şahnaz Şahbazova bildirib ki, AzTU Berkli Universiteti ilə əməkdaşlıq memorandumu imzalamış ilk Azərbaycan universitetidir.

Hərtərəfli inkişaf etmiş, yüksək idarəetmə mexanizminə malik, nüfuzlu elm və təhsil müəssisəsi olan Berkli Universiteti ilə qurulacaq əlaqələr Azərbaycanda ixtisaslı mühəndis kadrların hazırlanması işində mühüm addım hesab edilir.

Qeyd edək ki, Berkli Universiteti məşhur həmyerlimiz, böyük elm adamı Lütvü Zadənin çalışdığı Universitetdir.